1-2. (a) Mukonda dyahi twa bhingile kukingila kwila Jezú u tu londekesa o ukexilu wa tokala phala kubhanga a o Fesa ya Lembalasa ya kufwa kwê? (b) Idifwa yebhi ya Jezú i twa-nda dilonga?

U TENA kujimbulula yene mu bhita mu Fesa ya Lembalasa ya kufwa kwa Kidistu mu mivu yoso? Mu kidi avulu mudyetu twejiya yoso yene mu bhita mu Kizuwa kya Fesa ya Lembalasa. Mukonda dyahi? Mukonda yene ki ya bhonzo kana, yala ni kilombolwelu kya dikota. Maji tu tena kudibhwidisa: ‘Mukonda dyahi o Lembalasa ki ya bhonzo’?

² Mu ukunji wê mu ixi, Jezú wexile ni kifwa kya kulonga o kidi, mu ukexilu wa bhebhuluka ki kwa bhonzele kutendela o milongi yê. (Mat. 7:28, 29) Kyene we kimoxi, mwene wa tu xila ukexilu wa bhebhuluka, maji wala ni valolo ya dikota wa kubhanga o lembalasa * ya kufwa kwê. Twa-nda dilonga kyambote o Lembalasa yiyi, o ima ya bhange ni ya zwela Jezú. Twa-nda tendela dingi kyambote kyebhi Jezú kya londekesa o kulenduka, kuswina ni henda ya kidi. Twa-nda dilonga we kyebhi ki tu tena ku mu kayela.

3. Kala ki londekesa o divulu dya Matesu 26:26-28, kyebhi Jezú kya bhangele o Fesa ya Lembalasa ni mukonda dyahi mwene wa i bhangele ngó ni ima iyadi?

³ Jezú wa kexile ni 11 dya jipoxolo jê ja fiyele kyoso kya bhange o Lembalasa ya dyanga. Mwene wa bhange o Fesa yiyi sé  ima yavulu. (Tanga Matesu 26:26-28.) Mwene wa kwatele ngó o mbolo ya kambele o felemendu ni vinyu ya subhukile mu fesa ya Phasu. Jezú wa tangela jipoxolo jê kwila, o twima tu iyadi tutu, twa kexile kizuzumbya kya mukutu ni manyinga eji bhana kala sata, mu kithangana ni mbandu, phala o mbote yâ. O Jipoxolo ka diwana mu ku mona kwila, o fesa yiyi yonene, ya ubhe, Jezú wa i bhange mu ukexilu wa bhebhuluka, sé ima yavulu. Mukonda dyahi?

4. Kyebhi o kitendelesu kya bhana Jezú kwa Malata ki tu kwatekesa kutendela se mukonda dyahi wa bhange o Fesa ya Lembalasa ni ima yofele?

⁴ Tala ngó kya bhiti ku dimatekenu dya ukunji wa Jezú wa mivu itatu, kyoso kyayi mu kunda o makamba mê—Lazalu, Malata ni Madiya. Sumbala wexile mu kithangana kya kutonoka ni makamba, maji Jezú wa a longo kima. Malata bhene bhwa kexile, maji mwene wa thandanganyele mu kulamba kudya kwavulu phala o mujitu, Jezú. Kyoso kya ki mono, Jezú ni kilendu kyoso, wa bazela Malata, wa mu kwatekesa kumona kwila, ki kwa bhingile kulamba kudya kwavulu mu kithangana kyenyókyo. (Luka 10:40-42) Kupholo dya kwenda, sumbala kwa kambele ngó tu ola phala kubhana o sata ya kukula, Jezú wa kayela o kitendelesu kya bhanene kwa Malata. Mwene wa bhange yoso phala kubhanga o fesa ya Lembalasa mu ukexilu wa bhebhuluka, sé ima yavulu. O ima yiyi i tu longa ihi ya lungu ni Jezú?

5. O ukexilu wa lenduka wa Jezú u londekesa ihi ni kyebhi o maka yá a lungu divulu dya Filipe 2:5-8?

⁵ Jezú wa londekesa kulenduka, mu ima yoso ya zwela ni ya bhange. Mu kiki, ki kima kya ku diwana, kyoso mwene kya londekesa o kulenduka kuku kwa dikota mu usuku wê wa sukina mu ngôngo. (Mat. 11:29) Mwene wejidile kwila, kwa kambele ngó weji bhana o sata ya beta kota mu ixi, wejidile we kwila eji mu fukununa phala kutambula kididi kya fuma, kya ujitu wonene ku dyulu. Né kiki, mwene ka soto ku di fumanesa, mu kubhanga fesa ya ungúngu phala kulembalala o kufwa kwê. Mu veji dya kiki, mwene wa tangela o maxibulu mê kwila, a tokalele ku mu lembalala bhu kaxi ka fesa yiyi, ya bhebhuluka, lumoxi ku muvu. (Nzwá 13:15; 1 Kol. 11:23-25) O fesa yiyi ya bhebhuluka maji yala ni valolo ya dikota, ya londekesa kwila, Jezú kexile mukwa ukumbu. Ki tu sangulukisa kyavulu kwijiya kwila, o Sobha yetu ya dyulu, muthu wa lenduka.—Tanga Filipe 2:5-8.

6. Kyebhi ki tu tena kukayela o kulenduka kwa Jezú kyoso ki tu dibhana ni ibhidi?

 ⁶ Kyebhi ki tu tena kukayela o kulenduka kwa Jezú? Mu ku ta kupholo o mbote ya akwetu. (Fil. 2:3, 4) Tu xinganeke dingi mu usuku wa sukina wa Jezú, mu ixi. Jezú wejidile kwila, weji bhita mu hadi ande dya kufwa. Né kiki, mwene wa thandanganyele ni ufiyele wa jipoxolo jê, eji luwala mukonda dya ufwilu wê. Kyenyiki, mu usuku wa sukina wa mwenyu wê, mwene wa a bhana milongi, wa a swinisa ni ku a tululukisa. (Nzwá 14:25-31) Jezú ni kulenduka kwoso, wa londekesa kwila, wa mesenene kyavulu o mbote ya akwâ, o yê mwene ndenge. Yiyi phangu ya katunda ya tu xila!

7. Kyebhi Jezú kya londekesa o kuswina ande dya kubhanga o Fesa ya Lembalasa?

⁷ Kyoso kya zubha kubhanga o Lembalasa, Jezú wa londekesa kuswina kwonene. Kyebhi kyene? Jezu wa xikina o vondadi ya Tat’ê sumbala wejidile kwila o ukexilu wa ku mu jibha ki wa mu tokalele maji mwene wa xikina phala kubhana kijingu kwa Jihova. (Mat. 26:65, 66; Luka 22:41, 42) Jezú wa kolokota mu ufiyele phala kuximana o dijina dya Jihova, kuzokela o utuminu wa Nzambi ni kujikula o njila phala o athu a dyela o ituxi a tene kukala ni mwenyu wa kalelaku. Mu kithangana kimoxi kyenyiki wa pelepalala akayedi’ê phala o ima yeji bhita kupholo.

8. (a) Ihi ya zwela Jezú ku jipoxolo jê ja fiyele? (b) Kyoso Jezú kyafu, kyebhi o maxibulu mê kya kayela o phangu yê ya kuswina?

⁸ Jezú wa londekesa o kuswina mukonda mwene kya lungu o muxima mu ima ya mesenene kana, maji wa te kupholo o ibhindamu ya jipoxolo jê ja fiyele. O fesa ya bhange mwene kyoso kya kaye Juda, yeji lembalesa ku maxibulu a undu o valolo ya manyinga a bhubhu Jezú ni mbote ya kubhanga mbandu ku kikutu  kyobhe. (1 Kol. 10:16, 17) Phala ku a kwatekesa kusuluka mu ufiyele n’a tumina ni Jezú ku dyulu, mwene wa a tangela se ihi ya kexile kwa bhinga Tat’ê ni mwene. (Nzwá 15:12-15) Jezú wa zwela ku jipoxolo o ibhidi yeji dibhana na-wu kupholo. Mu kusuluka, wa a swinisa kukayela o phangu yê bhu kaxi ka izwelu: “kwatenu-phe mwanu!” (Nzwá 16:1-4a, 33) Mu kubhita mivu yavulu, o maxibulu a Jezú exile mu kayela hanji o phangu yê ya kuta o vondadi ya akwa kupholo ya vondadi yê ni kulondekesa o kuswina. Sumbala ene a bhingile kutala hadi, a di kwatekesa mu dya mu ibhidi yoso.—Jihe. 10:33, 34.

9. Kyebhi ki tu tena kukayela o phangu ya Jezú kya kulondekesa o kuswina?

⁹ Kyene kimoxi lelu, twa mu kayela o phangu ya Jezú ya kulondekesa o kuswina. Mu kifika, kubhinga o kuswina phala ku kwatekesa o jiphange jetu a mu a zukutisa mukonda dya kixikanu kyâ. Sayi bhabha, o jiphange jetu a ta mu kaleya sé kikuma. Kyoso o ima yiyi i bhita twa bhingi kubhanga yoso, katé mwene kwa zokela mu kididi kyâ. (Fil. 1:14; Jihe. 13:19) O ukexilu wengi wa kulondekesa o kuswina, o kusuluka ni kuboka sé “wôma.” (Ika. 14:3) Kala Jezú, twala polondo phala kuboka o njimbu ya mbote ya Utuminu, sumbala o athu a tene ku tu zukutisa. Sayi kithangana, tu tena kudivwa kwila kwa tu kambe kuswina. Ihi i tu tena kubhanga?

10. O jisemana ande dya Lembalasa, ihi i twa tokala kubhanga, ni mukonda dyahi?

¹⁰ Tu tena kubandekesa o kuswina kwetu mu kuxinganeka mu kidyelelu ki tu bhana o sata ya kukula ya Kidistu. (Nzwá 3:16; Efe. 1:7) Mu ji semana ande dya Lembalasa twala ni ujitu wa kulondekesa o kisakidilu kyetu kwa sata ya ku kula. Mu thembu yiyi, bhanga o kitangelu kya Bibidya kya Lembalasa, samba ni  kuxinganeka mu izulukutu ya bhite ni Jezú ande dya kufwa. Mu kithangana kya ku dyongeka phala o Fesa ya Lembalasa, twa-nda tendela dingi kyambote o kilombolwelu kya vinyu ni valolo ya sata. Kyoso ki tu tendela kya bhange Jihova ni Jezú phala o mbote yetu ni jindandu jetu, o kidyelelu kyetu ki kola dingi, twa-nda kolokota ni kuswina kwoso kate kudisukilu.—Jihe. 12:3.

11-12. Ihi i twa dilongo katé kindala kiki?

¹¹ Katé kindala twa dilongo kwila, o Fesa ya Lembalasa ki i tu lembalesa ngó maka alungu ni sata ya ku kula ya Jezú, maji o kulenduka ni kuswina. Kisangusangu kya dikota ki tu kala na-kyu ku muxima mu kwijiya Jezú wa-nda suluka mu kulondekesa o idifwa yiyi ku dyulu kala Mukunji wa Dikota mu ku tu bhingila! (Jihe. 7:24, 25) Phala kulondekesa o kisakidilu kyetu ni muxima woso twa tokala kubhanga o Lembalasa kala kya tu londekesa mwene (Luka 22:19, 20) Tu bhanga kiki mu kizuwa 14 kya Nizá o kizuwa kya beta-o-kota ku muvu.

¹² Tu tena kumona bhu kaxi ka Lembalasa kidifwa kya mukwa kya bhangesa Jezú kufwa mukonda dyetu. Kya kexile mu ixi, mwene a mwijidile bhu kaxi ka idifwa yiyi. Kidifwa kyebhi?

13. Kyebhi o madivulu a Nzwá 10:16 ni 1 Nzwá 4:8-10, a jimbulula o henda ya londekesa Jihova ni Jezú? A nanyi a katula mbote mu henda yâ?

¹³ Jezú wa londekesa kyambote o henda ya dikota ya tu kwatela Jihova, mu ima yoso ya bhange. (Tanga Nzwá 15:9; 1 Nzwá 4:8-10.) Kya beta kota, ni muxima woso, Jezú wa bhana o mwenyu wê phala o mbote yetu. Kikale se a tu undu mba twa tokala ku “jimbudi jamukwá,” etwenyoso tu katula mbote ku henda ya tu kwatela Jihova ni Mon’ê, bhu kaxi ka sata. (Nzwá 10:16; 1 Nzwá 2:2) Xinganeka we o vinyu ni mbolo ya bhange na-yu o Lembalasa. Yene i londekesa o henda ni ujitu wa kexile mu bhana Jezú ku maxibulu mê. Kyebhi?

14. Mu ukexilu webhi Jezú wa londekesa o henda ku maxibulu?

¹⁴ Jezú wa londekesa henda ku maxibulu mê a a undu ni nzumbi ikôla, mu ku bhanga kima kya kambe kubhonza, kifwa phala n’á tale. Mu kubhita kithangana, o maxibulu a undu eji bhinga kubhanga o Lembalasa mu mivu yoso, kikale mu ididi ya ubhezelu mba mu kaleya. (Dij. 2:10) O kwila ene a belesela o kitumu kya Jezú? Ene a belesela mwene!

15-16. Amoxi a tena kyebhi kubhanga o Fesa ya Lembalasa mu ithangana ya bhonzo?

¹⁵ Tunde mu hama ya dyanga katé mu izuwa ya lelu, o Jikidistá ja kidi, jene mu bhanga nguzu phala ku bhanga o lembalasa ya kufwa kwa Jezú. Ene a sota kubhanga o Lembalasa kala kya bhange Jezú, katé bhwoso bhwa tena, sayi bhabha a i bhanga ni ibhidi yavulu. Tala ngó yene mu bhita. Kyoso kyexile mu kaleya ku ixi ya Xina, o phange Harold King wa bhingi ku sanga ndunge phala kubhanga o lembalasa. Mwene wa pelepalala o jimblema phala o Lembalasa mu kaswekele ni ima yexile na-yu bhu maku. Mwene wa kondala kyambote o jimbeji ni izuwa, phala kubhanga o Lembalasa kumoxi ni jiphange ku mundu woso. Kya bhixila o kithangana kya lembalasa, ubheka mu kaleya, wembila, wa sambe yú wa bhange diskulusu.

¹⁶ Sayi dingi musoso. Jiphange ja ahatu mu kibende kya kukalakala mu thembu ya Ita ya kayadi ku Mundu woso, a tele myenyu yâ mu kilwezu phala kubhanga o Fesa ya Lembalasa. Maji, kuma o Lembalasa ki ya bhonzele ku i bhanga, ene a tena ku i bhanga mu kaswekele. Ene ambe: “Twa xikama kumoxi, bhu kaxi k’etu twa tula bangu yo fute ni dilasola dya zele, bhene bhexile o vinyu ni mbolo ya  lembalasa. Twexile ni vela ya kexile mu tu mwikina, mukonda se twa tele lampada nange eji tu mona . . . . Twa bhitulula o kikanenu kyetu kya kubhanga yoso i tu tena phala ku zokela ni muxima o dijina dikôla dya Tata yetu.” Sé phata, ene a londekesa kixikanu kya dikota! Jezú wa londekesa we henda ya dikota, mu ku tu kwatekesa phala ku bhanga o Lembalasa, sumbala bhu kaxi ka ibhidi!

17. Ibhwidisu yebhi i tu tena kudibhanga?

¹⁷ Mu kumona kwila o kizuwa kya Lembalasa kya zukama, kima kyambote ku dibhwidisa: ‘Kyebhi ki ngi tena ku kayela o phangu ya Jezú mu ku londekesa o henda? O kwila ngene mu xinganeka o ibhindamu ya jiphange jami, inga ngene mu di xinganeka ngó eme? O kwila ngene mu jijila kuyuka ku jiphange jami, inga ngejiya kwila, ene akwa ituxi wa?’ Tu tena kukayela o phangu ya Jezú ithangana yoso, mu ku bhanga yoso phala kukala ni “kixinganeku kimoxi.”—1 Phe. 3:8.

18-19. (a) Ihi i tu tena kukingila ni kidi kyoso? (b) Ihi i wa mesena kubhanga?

¹⁸ O kitumu kya kubhanga o lembalasa ya kufwa kwa Kidistu ki kya-nda kalela-ku, kana. Kyoso kya “kêza” Jezú mu kithangana kya hadi ya dikota, mwene wa-nda kwambata “athu’ê ósole” ku dyulu. Kya-nda bhita o izulukutu yiyi, o lembalasa ki twa-nda i bhanga jinga dingi.—1 Kol. 11:26; Mat. 24:31.

¹⁹ Sumbala o Lembalasa ka-nda i bhanga dingi, tu tena kwijiya kwila, o mundu wa Nzambi wa-nda lembalala jinga o mbolo ni vinyu kala kilondekesu kya kulenduka, kuswina ni henda i tu londekesa. Mu kithangana kyenyókyo, oso a kexile ni ujitu wa ku ya mu lembalasa yiyi yonene, sé phata, a-nda tangela akwa. Maji phala ku tambula o mbote kindala kiki, twa tokala kubhanga yoso phala kukayela o kulenduka, o kuswina ni henda ya Jezú. Se kyene ki tu bhanga, tu tena ku dyelela kwila, twa-nda tambula o futu yetu kwa Jihova.—2 Phe. 1:10, 11.