1. Mukonda dyahi o Jimbangi ja Jihova athu a sanguluka? (Tala foto ya dyanga.)

O JIMBANGI JA JIHOVA, athu a sanguluka. Ithangana yoso ya kala kumoxi, ki kale mu yônge ya semana, yônge ya makota mba mu itonokenu, ene olela a di zwelesa mudyâ. Mukonda dyahi ene a sanguluka kyavulu? Kiki kibhita mukonda ene ejiya Jihova, ‘o Nzambi ya kusanguluka.’ Ene a mu bheza, a bhanga yoso phala kukayela o phangu yê. (1 Timote 1:11; Jisálamu 16:11) Jihova mwene o Fixi ya kusanguluka, kyenyiki, mwene wa mesena kwila tu sanguluka we. Mwene u tu bhana ima yavulu i tu bhekela o kusanguluka.—Matendelelu 12:7; Ndongixi 3:12, 13.

2, 3. (a) Kusanguluka kulombolola ihi? (b) Mukonda dyahi nange kubhonza o kusanguluka?

² Abha eye? O kwila wa sanguluka we? Kusanguluka kulombolola kudivwa kyambote, kutana ni mwenyu wê mba kukemba kyavulu. O Bibidya ilondekesa kwila, oso a a besowala kwala Jihova, a tena ku sanguluka mu kidi. Maji mukonda  dyahi, kwene mu bhonza kusanguluka ku mundu yú?

³ Kubhonza kusanguluka kyoso ki kumoneka ibhidi kala, o kufunda ndandu, mba a mu te kamukonde mu kilunga, mba ukaza wetu ubhwa, ni kyoso kya tu kaya ku salu. Kubhonza we kusanguluka se ki kwala kutululuka kubhata, mukonda dya kuzoka ithangana yoso, kyoso kya tu lokalala ku koleka ya salu mba ya xikola, mba kyoso kya tu zukutisa mba a tu ta mu kaleya mukonda dya kubheza Jihova. Nange sawidi yetu ki yala dingi kyambote, twa kwata uhaxi ki wivu milongo mba twa toloka o muxima. Maji twa tokala kulembalala kwila Jezú Kidistu, ‘Ngana wa sanguluka, mukwa Kutena,’ mba Mwenexi, wa zolo kukonda o malamba a athu ni ku a sangulukisa. (1 Timote 6:15; Matesu 11:28-30) Mu Diskulusu dyê ku Mulundu, Jezú wa tumbula idifwa i tena ku tu kwatekesa kusanguluka, né mwene kyoso ki tu bhita mu maka avulu, a moneka ku mundu yú wa Satanaji.

4, 5. Ihi i twa tokala kubhanga phala kusuluka ni kusanguluka?

⁴ O kima kya dyanga kya tumbula Jezú kyala ni valolo ya dikota. Mwene wambe: ‘A zediwa yó ejiya kwila a bhindamena Nzambi, mukonda o Utuminu wa dyulu wa a tokala.’ (Matesu 5:3) Se tu xikina kwila twa bhindamena Nzambi, twa-nda xikina kwila twa bhingi kwijiya Nzambi ni kwila twa bhingi o kikwatekesu kyê phala ku twendesa. Kyebhi ki tu bhanga kiki? Mu kudilonga o Bibidya, kubelesela Nzambi, ni ku ta o ubhezelu wetu kwa mwene ku pholo. Kubhanga kiki, kwa-nda tu bhekela kusanguluka. O kixikanu kyetu mu kikumbidilu kya ikanenu ya Nzambi, kya-nda kola dingi. O “kidiyelelu kya kusanguluka” ki tu sanga mu Bibiya, kya-nda tu swinisa.—Tito 2:13.

⁵ Se twa mesena kusanguluka sumbala ni ibhidi i tu dibhana nayu, twa tokala kusuluka ni kukolesa o ukamba wetu ni Jihova. Poxolo Phawulu wa soneka: “Enu-phe, sanguluka jing’enu mwa Ngana. Ngi tona o ku ki zwela: Sangulukenu!” (Filipe 4:4) Phala kukala ni ukamba wambote ni Jihova, twa bhingi kukala ni unjimu u tunda kwa Nzambi. O Mak’â Nzambi amba: “Wazediwa o muthu woso wa bongo o unjimu, ni muthu woso wa tambula o kwijiya. Oso a u kwata, a bongo muxi wa mwenyu; azediwa athu oso a u jijila.”—Jisabhu 3:13, 18.

6. Ihi dingi i twa tokala kubhanga phala kusanguluka?

⁶ Phala kusanguluka jinga, kima kyambote kusuluka ni kukumbidila o milongi ya Bibidya. Jezú wa londekesa o valolo ya maka yá, kyoso kyambe: “Ima yiyi se mwa ijiya, mu zediwa se yene i mu bhanga.” (Nzwá 13:17; tanga Tiyaku 1:25.) Kyene ki twa tokala kubhanga se twa mesena kudikila o ibhindamu yetu mu nzumbi ni kukala ni kusanguluka kwa kidi. Maji kyebhi ki tu tena kusanguluka kyoso ki ku moneka ima yavulu  i tena ku tu katula o kisangusangu kyetu? Tu mone ihi ya zwela dingi Jezú mu Diskulusu dyê ku Mulundu.

7. Kyebhi o yó a mu dila atena kusanguluka?

⁷ ‘A zediwa yó a dila, mukonda a-nda kwa konda o malamba.’ (Matesu 5:4) Eu tu tena kudibhwidisa, ‘Kyebhi o athu a mu dila kya tena kusanguluka?’ Jezú kexile mu zwela ya lungu ni oso eji dila. Athu avulu a yibha ene mu dila mukonda dya kubhita mu ibhidi mu “izuwa ya sukidilaku” ya “jithembu jabhonzo.” (2 Timote 3:1) Maji ene a di banza ngó mudyá, ka banze Jihova, kyenyiki ka tena kukala ni ukamba ni mwene, mu kiki-phe ka tena kusanguluka. Jezú wa kexile mu tumbula yó ejiya o ibhindamu yâ mu nzumbi. Ene a dila mukonda a mona kwila mundu wavulu a dituna Nzambi mba kala ni ukexilu wa mesena Nzambi. Ene a xikina we kwila a kwa ituxi, a mona o ima yayibha yene mu bhita ku mundu. Jihova u mona athu yó a dila mu kidi, u a konda o malamba bhu kaxi ka Mak’â mê, u a bhana kisangusangu ni mwenyu.—Tanga Izekiyele 5:11; 9:4.

8. Kyebhi o kukala muthu wa lenduka ku tena ku ku kukwatekesa kusanguluka?

⁸ ‘A zediwa yó a lenduka, mukonda a-nda lundula o ixi.’ (Matesu 5:5) Kyebhi o kukala muthu wa lenduka ku tena ku ku kukwatekesa kusanguluka? Athu avulu a dibhana ni maka ku mwenyu mukonda dya kukala indanda, ni akwa jimvunda. Maji kyoso kya dilonga o kidi, ene a bhilula o ukexilu wâ anga a zwata “muthu wobhe.” Lelu ene a londekesa “muxima wanengana, ni kunyephuka, ni kubatama, ni kubelesela, ni kuxidikika.” (Kolose 3:9-12) Mu kusuluka ene a kala ni paze, ukamba wambote ni akwá, ni kusanguluka. O Mak’â Nzambi a kanena kwila “ene a-nda lundula o ixi.”—Jisálamu 37:8-10, 29.

9. (a) Ihi yexile mu lombolola Jezú kyoso kyambe kwila oso a lenduka a-nda “lundula o ixi”? (b) Kyebhi o “akwa kubhanga ima a yuka a ku kwatela nzala ni dinyotha” a tena kuzediwa?

⁹ Ihi yexile mu lombolola Jezú kyoso kyambe kwila oso a lenduka anda “lundula o ixi”? O Jikidistá a a undu a-nda lundula o ixi kyoso kya-nda tumina kala Jisobha kudyulu. (Dijingunwinu 20:6) Mazunda ni mazunda a athu kala ni kidyelelu kya kuya ku dyulu, a-nda lundula o ixi kyoso kya-nda ku ehela ku tunga-mu katé ku hádya ni hádya. Ene a-nda kala athu a yuka, a-nda kala ku paze ni kusanguluka. O athu yá a bhanga mbandu ku yó a tumbula Jezú kwila: “a zediwa yó, o kubhanga ima ya yuka a ku kwatela nzala ni dinyota, mbata hádya ekuta.” (Matesu 5:6) O vondadi yâ ya kumona o kuyuka, a-nda ku i kumbidila kyoso Jihova kya-nda zubha o kuyibha kwoso. (2 Phetele 3:13) Ku mundu wobhe, o athu a yuka a-nda sanguluka ni kwila ka-nda dila dingi mukonda dya ima ya yibha yene mu bhanga o athu.—Psalm 37:17.

10. Ihi ilombolola ku kwatela henda?

¹⁰ ‘A zediwa akwa henda, mukonda a-nda ku a kwatela henda.’ (Matesu 5:7) Kukala muthu wa henda kulombolola kutalatala akwenu ni kilendu, kunengana ni kwa kwatela henda. Kifwa, kwivwa o ndolo ya yó a tala hadi. Mu kiki-phe o kukwatela henda ki kima ki twivwa ngó ku muxima. O Bibidya i longa kwila kukala muthu  u kwatela henda kulombolola kubhanga kima phala kukwatekesa akwetu.

11. Ihi i tu longa o kifika kya Jezú kya lungu ni Diyala mukwa Samádya?

¹¹ Tanga Luka 10:30-37. O kifika kya Jezú kya lungu ni mukwa Samádya, kilondekesa kyambote ihi ilombolola ku kwatela henda. O mukwa Samádya wevu o ndolo, yú wa kwatekesa o diyala dyexile mu tala hadi. Kyoso Jezú kya zubha kuta o kifika kiki mwene wixi: “Eye we ndé, kà bhange we kyenyókyo.” Mu kiki, tu tena kudibhwidisa: ‘O kwila nga mu bhanga kala kya bhange o mukwa Samádya? Kyoso akwetu kya tala hadi ngene mu a kwatela henda? Ngi tena kubhanga kima phala ku a kwatekesa? O kwila ngi tena kukwatekesa mwadyakime, mutudi mba munzangala kala ni jitata mu kilunga? Ngi tena ku ‘swinisa oso a toloka mixima’ phala ku ximbakatesa?’—1 Tesalonika 5:14; Tiyaku 1:27.

12. Mukonda dyahi tu sanguluka kyoso ki tu kwatela henda ku akwetu?

¹² Mukonda dyahi tu sanguluka kyoso ki tu kwatela henda? Kyoso ki tu londekesa henda ku akwetu, twa mu bhana. O kubhana-phe ku tu sangulukisa, kala kya zwela Jezú. Ku mbandu ya mukwa twejiya kwila kubhanga kiki ku sangulukisa Jihova. (Ikalakalu 20:35; tanga Jihebelewu 13:16.) Sobha Davidi wa zwela yalungu ni muthu u londekesa henda: “Jihova u mu kondeka, u mu bhana mwenyu; u mu bhana o kukala ni dibesá mu ngongo.” (Jisálamu 41:1, 2) Se tu londekesa henda ku akwetu, Jihova wa-nda tu kwatela we henda, twa-nda tena kukala ni kusanguluka kwa kalela-ku.—Tiyaku 2:13.

13, 14. Mukonda dyahi kima kyambote ku ‘zela o mixima’?

¹³ Jezú wambe: ‘A zediwa yó a zele o muxima, mukonda a-nda mona Nzambi.’ (Matesu 5:8) Phala kukala ni muxima wa yuka, twa bhingi kulanga ni kuzelesa o ixinganeku yetu. Kale tu ki bhanga, se twa mesena kwila Jihova u xikina o ubhezelu wetu.—Tanga 2 Kolindo 4:2; 1 Timote 1:5.

¹⁴ O athu ala ni mixima ya zele a tena kukala ni ukamba wambote ni Jihova, yó  wamba: “Azediwa oso a sukula izwatu yâ.” (Dijingunwinu 22:14) Ihi ilombolola o izwelu ene a ‘sukula izwatu yâ’? Phala o Jikidistá a a undu, kiki kilombolola kwila, Jihova u a mona kala athu a zele, mwene wa-nda a bhana mwenyu ki wabwa ku dyulu, ka-nda fwa dingi. A-nda kala ni kusanguluka kwa kalela-ku. Phala o jimbudi ja mukwa ala ni kidyelelu kya kukala mu ixi, kiki kilombolola ku a ehela kubhanga-nê ukamba, mukonda mwene u a mona kala athu ayuka. O Bibidya yamba kwila, “ene a sukula izwatu yâ, ya a izelesa mu manyinga ma Kambudi.”—Dijingunwinu 7:9, 13, 14.

15, 16. Kyebhi-phe o athu a zele o mixima kya “mona Nzambi”?

¹⁵ Jihova wambe: “Kana muthu u tena ku ngi mona n’a laye.” (Makatukilu 33:20) Kyebhi-phe o athu a zele o mixima “a mona Nzambi”? O kizwelu “kumona” mu Ngeleku ki tena kulombolola kuxinganeka, kutendela mba kwijiya. “Kumona Nzambi” kulombolola kutendela o ukexilu wa Muthu ni kuzola o idifwa yê. (Efezo 1:18) Jezú wa kayela kyambote o idifwa ya Nzambi; wambe: “Woso wa ngi mono eme, wa mono we Tata.”—Nzwá 14:7-9.

¹⁶ Ku mbandu ya mukwa tu “mona Nzambi” kyoso ki tu mona o kikwatekesu kyê ku mwenyu wetu.” (Jobe 42:5) Tu tena we “kumona” mba ku di kwatenena mu ima yambote ya kanena Jihova kubhanga kwa yó a zele o muxima, a mu sidivila ni ufiyele. O Jikidistá a a undu a-nda mona Jihova kyoso kya-nda fukunuka phala kuya ku dyulu.—1 Nzwá 3:2.

17. Mukonda dyahi akwa paze athu a sanguluka?

¹⁷ Jezú wambe dingi: ‘A zediwa yó a sota o kutululuka.’ (Matesu 5:9) Tu tena kusanguluka, kyoso ki tu bhanga nguzu phala kumateka kubhanga o paze ni akwetu. Dixibulu Tiyaku wa soneka: “O ibhangelu ya tokala o kuyuka, yene o ibundu ima ku mbutu ja kunu ni kutululuka kwala athu ka moneka mvunda.” (Tiyaku 3:18) Se wa mu bhanga nguzu phala ku di bhana kyambote ni muthu mu kilunga mba ku mwiji wê, bhinga kwa Jihova phala ku kukwatekesa kukala mukwa paze. Mu kubhanga kiki, Jihova wa-nda kubhana o nzumbi yê ikola, ya-nda ku kwatekesa kulondekesa idifwa ya ukidistá, wa-nda sanguluka dingi. Jezú wa londekesa o valolo ya dikota ya kubhanga paze, kyoso kyambe: ‘Mu kyenyiki, se wambata ujitu bhu kalatódiyu, anga u lembalala kwila phang’yé wala ni kikuma kokwé, ujitu wé xe-u ku pholo dya kalatódiyu, anga uye. Dyanga hanji kubhanga o paze ni phang’yé, u vutuke kiwa ni u bhane o ujitu wé.’—Matesu 5:23, 24.

18, 19. Kyebhi o Jikidistá kya tena kusanguluka né mwene kyoso kya a zukutisa?

 ¹⁸ “Mwa zediwa enu, kya mi xinga, kya mi zukutisa, kya mi âmba ima yayibha yavulu ya makutu, mukonda dyami eme.” Ihi ya mesenene kuzwela Jezú? Mwene wambe dingi: “Tanenu-ku mu sanguluke! Kuma kisakidilu kyenu hádya ki kala kya dikota mu dyulu; mbata ni jipolofeta ja mi dyangelele-ku kyene we kya ji bhangele.” (Matesu 5:11, 12) Kyoso o jipoxolo kya a beta ya a fidisa o kuboka, ‘ene a tundu bhu pholo ya Kyonge kya Jitata ni kusanguluka kwavulu.’ Mu kidi, ene ka sanguluka mukonda dya ku a beta. Maji a sangulukile ‘mukonda Nzambi wa a kiti athu a fwama kutambula malebhu’ mu dijina dya Jezú.—Ikalakalu 5:41.

¹⁹ Lelu, o mundu wa Jihova u kolokota we ni kusanguluka, kyoso kya a zukutisa mukonda dya dijina dya Jezú. (Tanga Tiyaku 1:2-4.) Kala kya bhiti ni jipoxolo, etu ki tu sanguluka kyoso kya tu talesa hadi mba kya tu zukutisa. Maji se tu suluka mu kukala fiyele kwa Jihova, mwene wa-nda tu bhana o kuswina ku twa bhingi phala kukolokota. Tala ya bhiti ni Henryk Dornik ni phang’yê. Ku mbeji ya Kakwinyi wa 1944, a a tumikisa mu kibende mba kididi kya ubhika. O jinguma jâ ambe: “Kubhonza ku a jijidika kubhanga kima. O kizukutisu kyà kya a bhekela kusanguluka.” Henryk wa jimbulula: “Sumbala eme ki nga mesenene kutala hadi mba kukala (mártir), nga sanguluka, mu kutala hadi ni kuswina mukonda dya ufyele wami kwa Jihova, kwa ngi bhekela kisangu-sangu.” Mwene wambe dingi: “Kusamba ni kuswina, kwa ngi zukamesa dingi kwa Jihova mwene wa londekesa kwila ka fulu kukwatekesa, tu tena ku mu dyelela.”

20. Mukonda dyahi tu sanguluka mu kusidivila “o Nzambi ya kusanguluka”?

²⁰ Se Jihova, “o Nzambi ya kusanguluka,” u tu xikina, tu tena kusanguluka né mwene se a mu tu zukutisa ku jindandu jetu, se tu kata mba tu kuka. (1 Timote 1:11) Tu tena we kusanguluka mukonda Nzambi yetu, ‘ki mukwa makutu,’ wa-tu kanena ima yavulu yambote. (Tito 1:2) Kyoso Jihova kya-nda kumbidila o ikanenu yê, ki twa-nda lembalala dingi o ibhidi i twala nayu lelu. O mwenyu wambote u twa-nda kala na-u mu Palayzu wa-nda tu bhekela kisangusangu ki tu ki fikile! Twa-nda “kala ku ngalasa ni kutululuka kwavulu.”—Jisálamu 37:11.