KU MUVU wa tundu-mu, phange javulu ku mundu woso a a solo kala tufunga ni akwatekexi a tufunga. Se wala bhu kaxi ka jiphange jiji, sé phata wa sanguluka mu kusidivila Jihova ni jiphange jê mu ukexilu yú.

Nange u kala ni hele; maji ki kima kyayibha kudívwa kiki. Jason, kafunga maji munzangala hanji, wambe: “Kyoso kya ngi solo kala kafunga, o ikalakalu ya ubhe ya ngi bhanene, nga i mono kunema.” Kyoso Mozé ni Jelemiya kya a bhana ikalakalu ya ubhe kwala Jihova, ene a dívu kala ka kexile ni uhete wa sokó phala ku i bhanga. (Makatukilu 4:10; Jelemiya 1:6) Se kyene we ki wa mu dívwa, ihi i tena ku kwatekesa kukolesa o kidyelelu kyê, phala kusuluka ni kukula mu nzumbi? U tena kudilonga jindunge javulu mu phangu ya Timote.—Ikalakalu 16:1-3.

Kyoso Timote kya mateka kwenda ni poxolo Phawulu, nange wa kexile ni 20 a mivu. Kyoso kya mu solo mu veji ya dyanga, nange Timote wa divu kwila keji tena kulonga ni kubhana itendelesu ku akwa, mukonda wexile hanji munzangala. (1 Timote 4:11, 12; 2 Timote 1:1, 2, 7) Maji mwene wa suluka ni kukula mu nzumbi; mu kubhita dikwinyi dya mivu, Phawulu wambela akwa Filipe: ‘Nga kingila-phe mwa Ngana Jezú kuma, kindala ngi mi tumikisa Timote ku mwal’oko.’ Mukonda dyahi Phawulu wa divwile kiki? Mwene wa jimbulula wixi: “Kuma ki ngala dingi ni muthu wa sokela-nê muxima”.—Filipe 2:19, 20.

Mukonda dyahi Timote phangu yambote phala o tufunga? Tu mone ima isamanu.

1. Mwene wa lange o athu ni henda yoso. Phawulu wa kanena ku jiphange akwa Filipe kwila, Timote weji ku a tambula konda ni “mwanu wa kidi.” (Filipe 2:20) Timote wa mesenene kwila, o jiphange a kala ni ukamba wambote ni Jihova. Mwene wa kexile polondo phala kubhana o kithangana ni nguzu yê phala kukwatekesa akwa.

William, kafunga mu 20 a mivu, mu kuzwela ni tufunga twa ubhe, wamba: “Zola o jiphange. Tala kyambote o ibhindamu yâ, mu veji dya kutandanganya ngó ni kusokelesa o ima mu kilunga.” Ku kale kala o mwendexi a maximba, u thandanganya ngó ni kubhixila mu kithangana kya tokala mu veji dya kwambata o athu.

2. Mwene wa tele o sidivisu ya Jihova ku pholo. Phawulu wambe kwila, Timote ka difwile ni “akwa ene oso a bhindamena ima yâ-ene, ka bhindamena ima ya Jezú Kidistu.” (Filipe 2:21) Phawulu wa mono kwila, o jiphange ja kondolokele Timote a thandanganyele dingi ni myenyu yâ. Sayi ithangana, ene a kexile mu ta o ibhindamu yâ kupholo ya sidivisu ya Jihova. Maji ki kyene kyexile mu bhanga Timote! Kyoso ki kwa moneka kithangana kya ku sanzumuna o sidivisu yê kwa Nzambi, mwene ka xinganeka luyadi. Mwene wa bhange kala Izaya, kyoso kyambe: “Eme’ami-ú, Ngana, ngi tume eme.”—Izaya 6:8.

Kyebhi ki u tena kulanga o ibhindamu yê ni ibhindamu ya kilunga mu kithangana kimoxi? Kya dyanga kayela o kitendelesu kya Phawulu: ‘Sola o ima ya beta dingi kota.’ (Filipe 1:10) Ta kupholo o sidivisu ya Jihova. Kayadi, ditune itonokenu mba ima ya-nda ku nyana kithangana kyavulu mba nguzu. Phawulu wambela Timote: “Jihânji-phe ja unzangala, lenga-ju, u kayele o kuyuka, ni kuxikana, ni henda, ni paze.”—2 Timote 2:22.

3. Mwene wa kalakala ni nguzu yoso mu sidivisu ya Jihova. Ya lungu ni Timote Phawulu wambe: ‘Mukwâ ni mon’a u di tuma ni tat’â, mwéne kyene we kya di tumu ni eme, mu ku sanzumuna o njimbu yambote.’  (Filipe 2:22) Timote kexile kimonya kana. Mwene wa kalakala ni nguzu yoso ni Phawulu, o kiki kya a zukamesa dingi.

Lelu, mu kilunga kya Jihova mwala ikalakalu yavulu phala kubhanga. O ikalakalu yeniyi ya-nda kusangulukisa, ya-nda kukwatekesa we kukolesa dingi o ukamba wé ni Jiphange. Kyenyiki, ithangana yoso wa tokala u “swina jinga mu kikalakalu kya Ngana.”—1 Kolindo 15:58.

4. Mwene wa kumbidila yoso ya dilongo. Phawulu wa sonekena Timote: “Eye-phe wa kayela jinga ulongelu wami, ni wendelu, ni ukanenu wa mwenyu wami, kuxikana kwami ni kuxididika, ni henda, ni kinyenge, ni mu malebhu, ni mu jiphaxi.” (2 Timote 3:10) Timote wa kumbidila yoso ya dilongo, yu wa tambula dingi ikalakalu yengi.—1 Kolindo 4:17.

Sota kafunga wa kulu kyá phala u kayele o phangu yê. Tom, wa mu sidivila kala kafunga mu mivu yavulu, u lembalala kwila sayi kafunga ka mu kwatela henda, wa mu longo kyambote. Mwene wambe: “Eme ngexile mu bhinga itendelesu ithangana yoso ni ku ikumbidila. Kiki kya kolesa o kidyelelu kyami ni lusolo.”

5. Mwene wa suluka mu ku dilonga. Phawulu wa tendelesa Timote: “Sota jinga kudilonga o ima ya nzumbi, u mone ki uya ku pholo mu kuxila Nzambi.” (1 Timote 4:7) Né mwene se o mukwa kulenga wala kyá ni mesene, mwene wa bhingi ku dilonga ubheka wê dingi. Phawulu wa swinisa Timote: “Ta muxima wé mu kutanga o Mikanda ya Ngana bhu pholo ya mundu, ni mu kulombolola o Njimbu Yambote, ni mu kulonga oso a xikana. . . Kolokota ni kubhanga ima yenyi’yi, suwa ngó yene mu yene, athu oso a ku mone ki uya kyambote ku pholo.”—1 Timote 4:13-15.

Eye we wa bhingi kusuluka ni kubandekesa o uhete wé. Enda ni kudilonga o Bibidya ithangana yoso, tonginina mba ejiya o milongi ni itendelesu ya ubhe ya kilunga. Kana kudyelela kyavulu mu unjimu wé. Kima kyayibha kubanza kwila wala ni uhete wavulu, wa kwila utena kubatula o maka oso-oso sé kutokwesa dingi. Kala kya bhange Timote, “dilange eye-mwène, ni ulongelu wé.”—1 Timote 4:16.

6. Mwene wa dyelele mu nzumbi ikola ya Jihova. Mu kuzwela ya lungu ni ukunji wa Timote, Phawulu wa mu lembalesa: ‘O kima kyambote’okyo kya ku bhana kulûnda, langa-kyu mu ngunzu ya nzumbi ikôla i twene na-yu.’ (2 Timote 1: 14) Timote wa bhingile ku dyelela mu nzumbi ikola ya Nzambi.

Donald, kafunga mu mivu yavulu, wambe: “O jiphange ala kupholo, kifwa o tufunga ni akwatekexi a tufunga, a bhingi kukolesa o ukamba wâ ni Nzambi. Oso a bhanga kiki, ‘o ukamba wâ ni mwene, wa-nda ya ni kudibandekesa dingi.’ Se a bhinga o nzumbi ikola ya Nzambi mu musambu, anga a bhanga yoso phala kukala ni ibundu ima o nzumbi, ene a-nda kala dibesá dya dikota phala o jiphange mu kilunga.”—Jisálamu 84:7; 1 Phetele 4:11.

Ki swinisa muxima kutala akwatekexi a tufunga ni tufunga twa ubhe, a mu suluka ni kukula mu sidivisu yâ kwa Jihova, kala ki wa mu bhanga eye. Jason, twa mu tumbula kya ku dimatekenu, wambe: “Tundé ki nga mateka kusidivila kala kafunga, nga dilongo kyá ima yavulu. Kidyelelu kyami kya dibandekesa dingi. Lelu ngi tena kuzwela ni kidi kyoso kwila, nga wabhela o kikalakalu kyami, ngi ki mona kala ujitu wa dikota!”

O kwila wa-nda suluka ni kukula mu nzumbi? Se u kayela o phangu ya Timote, eye we wa-nda kala u dibesá dya dikota phala o jiphange mu kilunga kyê.