1. Etu tu kalakala ni Jihova mu mawukexilu ebhi?

KYOSO Jihova kya bhange o athu mwene wa mesenene kwila ene a kala akalakadi‘ê, a mu belesela. Sumbala lelu o athu akwa ituxi, o yo ala ni ufiyele a tena kukalakala ni Jihova kizuwa ni kizuwa. Mu kifika etu twala tu jingunza,“tu kalakala kumoxi phala Nzambi.” (1 Kolindo 3:5-9) Ujitu wa dikota o Mubhangi ni mutenya yoso ku tu bhana o kikalakalu kiki kya ungungu! Maji kuboka ki wene ngó o ukexilu u tu tena kukalakala ni Jihova. Mu milongi yiyi, twa-nda dilonga, kyebhi ki tu tena we kukalakala ni mwene kyoso ki tu kwatekesa o jindandu, ni jiphange mu kilunga, kyoso ki tulondekesa o ukexilu wa kuzalela, kyoso ki tu kwatekesa o ikalakalu ya kutunga mu kilunga ku mundu woso ni kyoso ki tu sanzumuna o kikalakalu kyetu kwa Jihova.—Kolose 3:23.

2. Mukonda dyahi ki tu tokala ku di sokesa ni akwetu mu kubhanga ima phala Jihova?

² Kyoso ki tuya ni ku dilonga o milongi yiyi, kima kyambote kulembalala kwila, o athu oso ka difu. O kitala kyetu, sawidi  ibhindambu ni mawuhete a difu kyengi. Mu kiki, kana kusokesa o kikalakalu ki u bhanga phala Jihova ni kyene mu bhanga akwenu. Poxolo Phawulu wambe: “Kala muthu a lole o wendelu wê, mbé o kya ta nzabala, i kale ya kibhangelu kyê-mwene, sé kubhindamena kudifikisa mu wendelu wa athu engi.”—Ngalásya 6:4.

3. Mukonda dyahi twamba kwila, oso a langa o ibhindamu ya mijiyâ a mu kalakala ni Nzambi?

³ Jihova wa mesena kwila tu langa o mwiji wetu. Mu kifika, eye nange wa bhingi kusota kitadi phala kudikila o ibhindamu ya mwiji wé. Mama jávulu, a bhingi kukala kubhata phala kulanga o tu bwetele. Se jitata jetu ka tena dingi kudilanga ubheka wâ, kwa bhingi wé kwa langa. Yoso yiyi, ima ya bhingi ku i bhanga. O Bibidya yamba: ‘Muthu-phe kya kamba kutambula konda ya ene a mu tokala, kota-kota dingi o dyanda dyê-mwène, muthu mwenyó wa ditunu o kuxikana, wa tûndu mu kwiyibha, yó kiluwa a xikana ala ndenge.’ (1 Timote 5:8) Se wala ni ikalakalu ya kulanga o mwijii, nange ki wa mu bhanga phala Jihova yoso i wa mesenene. Maji kana kubhwila! Jihova u sanguluka kyoso ki u dikila o ibhindamu ya mwiji wê—1 Kolindo 10:31.

4. Kyebhi o jitata kya tena kuta o Utuminu kupholo? Ihi i bhita kyoso kya bhanga kiki?

⁴ O jiphange ala ni twana, a tena kukalakala ni Jihova, mu ku kwatekesa o twana twâ kukala ni jimbambe mu kilunga. Jitata javulu, kyene kya bhange. Mu kubhanga kiki, kupholo dya kwenda o twana twâ a solo kusidivila Jihova mu sidivisu ya thembu yoso, né mwene se kwa bhingile kuya dikanga. Sayi yá akunji a jixi jengi, amukwa a mu sidivila kala aboki a thembu yoso mu ididi mwa bhindamena aboki, amukwa a mu sidivila ku Betele. Mu kidi kyoso o an’a kya kala dikanga, o jitata ka tena kubhita na-u kithangana kyavulu kala kya mesena. Maji ene ala ni ukexilu wa kubhana. Kyenyiki, a swinisa o twana twa kusuluka kusidivila Jihova kabasa kididi. Mukonda dyahi? Mukonda ene a sanguluka kyavulu mu ku mona o twana twâ ku ta Jihova kupholo. (3 Nzwá 4) Sayi jitata jiji a divwa kala Ana wambe kwila nga “lumbila” mon’âmi Samuwele kwa Jihova. Ene a divwa kwila ujitu wa dikota kukalakala ni Jihova mu ukexilu yú.—1 Samuwele 1:28.

5. Kyebhi ki u tena kukwatekesa o jiphange mu kilunga kyé? (Tala o foto ya dyanga.)

⁵ Se ki wala luwa ni ikalakalu yavulu ku mwiji, o kwila u tena kukwatekesa o jiphange ja haxila mba a sungu-ku kyá mu kitala? Mba u tena ku kwatekesa yó a mu a langa? Sota woso wa bhindamena o kikwatekesu kiki mu kilunga kyé. Mu kifika, nange mwala phange ya muhatu wa mu langa tata wa kuka. O kwila u tena kukala ni tat’ê phala ku mu bhana kithangana kya kubhanga ima yengi? Nange u tena kukwatekesa muthu mu ku dibhakula phala ku mwambata mu yônge, ku mu sumbila kama mu kitanda, mba kukunda muthu mu inzo ya kusaka. Kyoso ki u bhanga kiki, wa mu kalakala ni Jihova, phala ku kutambwijila musambu.—Tanga 1 Kolindo 10:24.

6. Kyebhi ki tu tena kulondekesa o ukexilu wa kuzalela?

⁶ O jinguza ja Nzambi a ejiya kala akwa kuzalela. Mu Bibidya o kizwelu mu Ngeleku ‘kuzalela,’ kilombolola “kulondekesa henda ku asonyi.” (Jihebelewu 13:2) Mu Mak’â Nzambi tu sanga-mu misoso yavulu i tu longa kyebhi ki tu tena kulondekesa o ukexilu yú wa kubhanga o mbote. (Dimatekenu 18:1-5) Etu ki tu tena ngó maji twa tokala we ku a kwatekesa kyoso ki kumoneka kithangana phala kubhanga kiki, kikale se ene a “tokala mu dyanda dya kuxikana” mba kana.—Ngalásya 6:10.

7. Mbote yebhi i tu katula mu kuzalela o jiphange ala mu sidivisu ya thembu yoso?

⁷ O kwila u tena kukalakala ni Jihova mu ku tambulula kubhata dyê o jiphange ala mu sidivisu ya thembu yoso? (Tanga 3 Nzwá 5, 8.) Se tu bhanga kiki ene a-nda katula mbote; etu we tu katula. O Bibidya ixana o maka ya kala ku “di konda malamba.” (Loma 1:11, 12) Xinganeka o musoso wa Olaf. Kyoso kyexile kamunzangala o kafunga ka ilunga wexile dikudi, wa ile mu kunda o kilunga kyê wa bhindamene kididi phala kukala, maji seku muthu mu kilunga wa tenene ku mu kwatekesa. Olaf wa bhingi ku jitata jê kexile Jimbangi, phala ku mwehela kuzalela o kafunga ka ilunga kubhata dyâ. Ene a xikina, maji ambela Olaf kwila, mwene weji zeka ku sofá. Olaf wa xikina. Mwene wa bhiti semana yambote ni kafunga ka ilunga! Mu izuwa yoso mu kamene ka selu kyoso kyexile mudya, ene a kexile ku dikunda maka ambote. O kafunga ka ilunga wa swinisa kyavulu Olaf, mukonda dya kiki mwene wa solo kumateka kusidivila Jihova mu thembu yoso. Olaf wa mu sidivila kala mukunji wa jixi jengi mu 40 a mivu, mu jixi javulu.

8. Mukonda dyahi twa tokala kulondekesa henda, né mwene se akwetu ka londekesa kisakidilu kudimatenu? Bhana phangu.

⁸ Tu tena kulondekesa henda ku asonyi mu mawukexilu avulu, né mwene se a kamba kisakidilu ku dimatekenu. Mu kifika, sayi phange ku ixi ya Espanya wa longo o Bibidya kwa Yesica, muhatu wa tundile ku Ecuador. Sayi kizuwa, kyoso kyexile mu dilonga, Yesica wa kexile mu dila. Phange wa mwibhula ihi yexile ku mu didisa. Yesica wambe kwila ande dya kwiza ku Espanya, mwene wexile ngadyamelele. Sayi kizuwa mwene ka kexile ni kudya phala mon‘ê wa muhatu, wa kexile ngó ni menya. Mu kithangana kyexile mu zekesa mon‘ê Yesica wa sambe phala kubhinga kikwatekesu. Ki kubhiti thembu yavulu Mbangi jiyadi ayi mu mu kunda anga a mu bhana divulu. Maji mwene ka a tambwijila kyambote, wa tandula o divulu dya mu bhana, yu wambe: “Kuku kwene o kudya ku mwa mesena kwila ngi kubhana mon’âmi?” O jiphange ja mesene ku mu konda o malamba, maji Yesica ka xikina kwivwa. Mu ngoloxi, o jiphange ambata kinda kya kudya ku dibhitu dyê. Kyoso kyexile mu dilonga mwene wa kexile dingi mu dila, mukonda wa mono kwila wa xongwena o kitambwijilu kya Nzambi kya musambu wê. Maji Yesica wa kexile polondo phala kusidivila Jihova. Mu kidi o ukexilu wa kuzazela wa londekesa o jiphange jojo, wa bhana ibundu yambote.—Ndongixi 11:1, 6.

9, 10. (a) Ithangana yebhi ya kexile na-yu akwa Izalayele phala ku di bhakula mu vondadi yâ? (b) Lelu o jiphange a tena kukwatekesa mu kilunga mu mawukexilu ebhi?

⁹ Mu ukulu, akwa Izalayele exile ni ithangana yambote phala kudibakula. (Makatukilu 36:2; 1 Malunda 29:5; Nehemiya 11:2) Lelu, eye we wala ni thembu yavulu, phala kubhakula o kithangana kyé, o ima i wala na-yu ni mawuhete phala kukwatekesa o jiphange je. Se u bhanga kiki, wa-nda sanguluka kyavulu, Jihova wa-nda ku besowala.

¹⁰ O Mak’a Nzambi ene mu swinisa o mayala mu kilunga, a mu kalakala ni Jihova mu kudibhakula; phala kusidivila akwâ kala akwatekexi a tufunga mba tufunga. (1 Timote 3:1, 8, 9; 1 Phetele 5:2, 3) O jiphange a bhanga kiki, a mesena kukwatekesa akwa mu ubhezelu wâ bhu kaxi ka ibhangelu yâ. (Ikalakalu 6:1-4) O kwila tufunga a ku bhingile kyá phala kwa kwatekesa, ki kale kulanga o madivulu, o jimbambe, kubhanga ikalakalu ya kuydika o ima mu kididi kya ubhezelu, mba kima kyengi? O jiphange ene mu bhanga o ikalakalu yiyi, amba exi kya sangulukisa kyavulu.

11. Mabesá ebhi ene mu tambula phange ya muhatu, mu kukwatekesa o ikalakalu ya kutunga?

¹¹ Oso a dibhakula mu kikalakalu kya kutunga ididi ya ubhezelu, éne mu kala ni makamba avulu. Sayi phange a mwixana Margie, wene mu kalakala ni ibuka ya kutunga o ididi ya ubhezelu mu 18 dya mivu. Kubhanga mbandu mu ikalakalu yiyi, ku mu bhana kithangana phala kulondekesa henda ku jiphange ja ahatu minzangala, ni ku a kwatekesa mu ku a longa. Mwene wambe kwila, o ikalakalu yiyi, i bhana kithangana phala o jiphange joso a dibhakula ku di swinisa mudya. (Loma 1:12) Mu kidi, o jiphange jene mu bhanga na-u ukamba mu ikalakalu yiyi, a mu kolokotesa kyoso kya bhiti mu ithangana ya  bhonzo ku mwenyu wê. Wa dibakwile kyá phala kukalakala mu kididi kya kutunga? Eye u tena kukwatekesa o kikalakalu kya kutunga, né mwene se ki wala ni uhete wa kutunga.

12. Kyebhi ki u tena kukwatekesa kyoso ki kubhita mavuwa?

¹² Tu tena we kukala kumoxi ni Jihova, mu ku kwatekesa kyoso ki kubhita divuwa. Mu kifika, tu tena kusangela kitadi. (Nzwá 13:34, 35; Ikalakalu 11:27-30) O ukexilu wa mukwa u tu tena kukwatekesa, o kuyudika o jinzo ni kukomba kyoso ki kubhita divuwa. Gabriela, phange ya muhatu mukwa Polônia, o inzo ye ya budikile mukonda dya mvula. Mwene wa sanguluka kyavulu, mu kumona o jiphange a tokalele mu ilunga ya zukamene, kuya mu mu kwatekesa. Kyoso kya xinganeka mu musoso yú, mwene wamba kwila, ka thandanganya ni imbamba ya texika, mu veji dya kiki, u dikwatenena mu kikwatekesu kya tambula. Mwene wambe: “O kya bhiti n’eme, kilembalesa kwila, ujitu wa dikota kutokala mu kilunga kya Jihova, kubhekela kusanguluka kwavulu.” Avulu a tambula kikwatekesu kyoso kya bhiti divuwa, kyene we kya zwela. O yó oso a kalakala ni Jihova mu kukwatekesa o jiphange jojo, a sanguluka kyavulu.—Tanga Ikalakalu 20:35; 2 Kolindo 9:6, 7.

13. Kyebhi ki tu kolesa o henda yetu kwa Jihova kyoso ki tu bhanga kikalakalu kya ku di bhakula? Bhana phangu.

¹³ Sayi phange ya muhatu a mwixana Stephanie, ni aboki amukwa mu mbambe yê, a kalakala ni Nzambi mu ku kwatekesa o Jimbangi a lengela ku ixi ya Estados Unidos, mukonda dya ita mu ixi yâ. Ene a kwatekesa o jiphange jiji kusanga jinzo ni imbamba. Mwene wambe: “Twa di wana mu kumona o kisangusangu, ni ukexilu wâ wa kusakidila o henda ya a londekesa o jiphange ku mundu woso. O miji yiyi, ya fika kwila etu twa a kwatekesa, maji mu kidi, ene-ku a tu kwatekesa. O henda, kukala ni muxima umoxi, o kixikanu ni kidiyelelu kwa Jihova ku twene mu mona; kwene mu kolesa o henda yetu kwa Jihova ni kidi kyoso. Kiki ki tu bhangesa kusakidila yoso yene mu tu bhana bhu kaxi ka kilunga kyê ni muxima woso.”

14, 15. (a) Ukexilu webhi wa londekesa polofeta Izaya? (b) Kyebhi o Jikidistá kya tena kukayela o phangu ya Izaya?

¹⁴ Eye wa mesena kubandekesa o kikalakalu kyé kwa Jihova? Wala polondo phala kuya mu ididi mwa bhingi dingi aboki? Mu kidi, ki tu bhingi kuya dikanga phala kukala ni ukexilu wa kubhana. Maji kwene Jiphange a tena. Ene ala polondo kala kya kexile polofeta Izaya. Kyoso Jihova kyebhula: “Mukwahi ngi  mu tuma, nayi u tu endela bhu kididi?” Mwene wa tambwijila: “Eme’ami-ú, Ngana, ngi tume eme!”(Izaya 6:8) Se wala ni uhete, o kwila wala pololondo phala kukwatekesa o kilunga kya Jihova? U tena ku kwatekesa mu mawukexilu ebhi?

¹⁵ Ya lungu ni kikalakalu kya kuboka ni kubhanga maxibulu, Jezú wambe: “O mábhya ma nzungule mwene, akalakadi-phe a tolo. Ngana wavu mábhya mê mu sambedyenu, a tume akalakadi mu mábhya mê.” (Matesu 9:37, 38) O kwila u tena kukalakala kala u muboki wa thembu yoso, mu kididi kwa bhingi dingi aboki? Inga u tena kukwatekesa muthu wengi phala kubhanga we kiki? Jiphange javulu a divwa kwila, o ukexilu wa beta kota wa kulondekesa o henda yâ kwa Nzambi ni ku jivizinyu, o kusidivila kala aboki a thembu yoso mu ididi mwa bhingi dingi aboki. O kwila u tena kuxinganeka mawukexilu engi a kubandekesa o sidivisu yé? Se kyene ki u bhanga, wa-nda sanguluka jinga kyavulu.

16, 17. Mu mawukexilu ebhi dingi mu u tena kubandekesa o sidivisu yé kwa Jihova?

¹⁶ Eye wa mesena kyavulu kukalakala ku Betele mba kukwatekesa ibuka ya kutunga, ki kale mu jimbeji mba jisemana, mba izuwa ngó ku semana? O kilunga kya Jihova kya bhindamena athu ala polondo phala kusidivila kabasa kididi, ni kubhanga kikalakalaku kyoso-kyoso kya a bhinga kubhanga né mwene se ala ni uhete wa kubhanga kikalakalu kyengi. Jihova u sanguluka kyavulu ni yó a xisa ima kudima phala kubhanga o vondadi yê, anga a sidivila kabasa kididi kwa mutumikisa.—Jisálamu 110:3.

¹⁷ O kwila wa mesena kubandekesa o mawuhete mé, phala kubhanga dingi mu sidivisu yé kwa Jihova? Nange eye u tena ku di sonekesa phala kubhanga o Xikola ya Akunji a Utuminu. O xikola yiyi, ilonga jiphange a kulu mu nzumbi, a mu sidivila Jihova mu sidivisu ya thembu yoso. O kilunga kya Jihova ki tena ku a longa phala kubhanga dingi. O jiphange a dilonga mu xikola yiyi, a tokala kukala polondo phala kusidivila kabasa kididi kwa a tumikisa. O kwila wala polondo phala kubhana dingi kwa Jihova mu ukexilu yú?—1 Kolindo 9:23.

18. Mabesá ebhi ejila mu kukalakala ni Jihova kizuwa ni kizuwa?

¹⁸ Kuma tu mundu wa Jihova, twa akwa kubhana jinga, tu athu ambote, twa zolo akwetu. Izuwa yoso tu xinganeka o ibhindamu ya akwetu. Kiki, ki tu bhekela kusangula, kutululuka ni kuzediwa. (Ngalásya 5:22, 23) Eye wa-nda sanguluka kyoso ki uya ni kukayela jinga o ukexilu wa Jihova wa kubhana ni kukolokota kukalakala-nê kumoxi né mwene se ki twala ni uhete mba ki tu tena kubhanga ima yavulu!—Jisabhu 3:9, 10.