Mukonda dyahi o kilunga kya Jihova kyene mu fidisa ku ta o madivulu metu mu ji site ja mukwa mu Internete mba ji rede social?

Kuma twene mu bhana o madivulu metu sé kubhinga kima, sayi athu a fika kwila, ene a tena ku ta o madivulu metu ki kale mu ji site já mukwa ja internete, mba mu ji rede social. Maji kubhanga kiki ku tena kubhekela maka avulu, ku kamba kutumaka o Ijila i Langa o Site yetu (Termos de Uso). * (Tala ku lwiji) maka a lungu ni ijimbwete yetu. O Ijila yiyi, ijimbulula kyambote kwila, seku muthu wa tokala ku ta, jifikula, madivulu, kidimbu (marca registrada), mimbu, jividyu, jifoto ni milongi ya kijimbwete kiki mu internete, (site yoso-yoso, kikale ya ku ditumikisa ima, jividyu, mba rede social).” Mukonda dyahi kwa bhingi ijila yiyi?

Ima yoso yala mu site yetu, yo lange ni kijila a kixana direitos autorais. Kifwa muthu ka tokala kuwana-wana yoso ya katula mu site. Kwa bhingi kulanga o site yetu kiki, phala athu oso-oso kabhange kavwanza. O athu a balukila o kilunga mba akwa kulungulula o kidi, ni athu amukwa a mesena kufidisa o kikalakalu kyetu kya kuboka, sayi bhabha a ta o madivulu metu mu ji site jâ, phala kusunga o Jimbangi ja Jihova ni athu amukwa. Maji mu ji site jiji, mwala we milongi i bhangesa o athu kukala ni phata. (Jisálamu 26:4; Jisabhu 22:5) Amukwa ene mu kalakala ni jifalamenda jetu, kala o kidimbu kya site yetu jw.org mu jingolokela jâ ja wenji, mu ji aplikativu, ni ima ya sumbisa. Kuma o jifalamenda jetu jo lange bhu kaxi ka kijila a kixana (copyright), se twa ki mesena, oso ene mu bhanga kiki, tu tena kwa ambata mu inzo ya kufundisa, phala mungu ka ki bhange dingi. (Jisabhu 27:12) Maji se twehela o athu, né mwene phange jetu ku ta o madivulu metu mu ji site jengi, mba twa ehela ku ta o kidimbu kya site yetu jw.org mu ima ya sumbisa, o jinzo jya kufundisa ki jya-nda tu kwatekesa dingi.

Kilwezu kya dikota kukatula o madivulu metu mu ji site jengi. Kikale ngó mu jw.org. Jihova u tu bhana ngó kudya mu zumbi, bhu kaxi ka ‘kimbadi kya fiyele, kya dimuka.’ (Matesu 24:45) O “kimbadi” kiki, kyene mu dikila ngó o ibhindamu yetu mu nzumbi bhu kaxi ka site jitatu jiji—www.pr418.com/kmb, tv.pr418.com, ni wol.pr418.com. O yalungu ni mitelembe ya kafwetele, twala ngó ni ji aplikativu jitatu—JW Languag^®, JW Library^®, ni JW Library Sign Language^®. Mu ji site ni ji aplikativu jiji, ki twa-nda sangu-mu jingolokela jya wenji mba kima kyoso-kyoso kya mundu wa Satanaji. Maji se tu katula o madivulu metu mu ji site jengi, twa-nda dita mu kilwezu kya kutanga madivulu o lungulule.—Jisálamu 18:26; 19:8.

Ku mbandu yengi, se tu ta o madivulu metu mu ji site, mwa bhingi muthu woso-woso u tena kuzwela yoso ya xinganeka, kifwa twa mu bhana kithanga kwa yó a balukila o kilunga, mba akwa kulungulula o kidi, ni athu amukwa, kuxongwena o kilunga kya Jihova. Kubhanga kiki, kubhekela dingi lusebhu kwa Jihova. Kuzwela ni athu yâ mu internete, ki wene o ukexilu wa tokala, phala kulungulula o ixinganeku yâ yayibha, phala n’eza mu kwijiya o kidi. (1 Timote 6:3-5; 2 Timote 2:23-25) Sayi we athu, a jikula jikonda mu ji site ni ji rede social, a dilondekesa wila a tokala ku kilunga kya Jihova, amukwa a di londekesa kala a tokala ku Kibuka Kya Utuminu. Maji yá makutu. Ku jiphange já tokala ku Kibuka kya Utuminu, seku phange wala ni Site yê mba wa jikula konda mu ji rede social.

Kyoso ki tu londekesa o site jw.org ku athu, twa mu kwatekesa o kikalakalu kya kuboka o “njimbu yambote.” (Matesu 24:14) O ji site ni ji aplikativu jetu, ja mu fwama dingi kizuwa ni kizuwa. Twa mesena kwila athu oso a katula mbote ku ji site ni ji aplikativu jetu. Twala ni ujitu wa kutumikisa o madivulu metu ku athu bhu kaxi ka ji e-mails, mba tu a tumikisa link yambata ku site yetu. Se kyene ki tu bhanga, twa mu kwendesa o athu ku fixi, mwene mu tunda o kudya mu nzumbi. O fixi yiyi, “o kimbadi kya fiyele, kya dimuka” kyene mu kalakala ni Jihova phala kubhana o kudya kuku.