1. Mukonda dyahi twa bhingi ku di pelepalala phala o izukutisu?

NGANA yetu Jezú wambe kwila, athu oso eji sola kukala maxibulu mê anda kwa zemba. Mu kiki, mu usuku ande dya kufwa kwê, wa a lembalesa o maka yá. (Nzwá 17:14) Katé lelu, o Jimbangi ja fiyele ja Jihova, ene mu a zukutisa ku athu ka mesena kubheza Jihova. (2 Tim. 3:12) Kuma o dizubhilu dya funza ya mundu yú dya zukama, o izukutisu ya jinguma jetu ya-nda di bandekesa dingi.—Mat. 24:9.

2-3. (a) Ihi i twa tokala kwijiya ya lungu ni wôma? (b) Ihi i twa-nda dilonga mu milongi yiyi?

² Ihi i tu tena kubhanga kindala, phala kukolokota mu ku dibhana ni izukutisu? Ki tu bhingi kuxinganeka mu ima yoso yayibha i tena kubhita n’etu. Se tu bhanga kiki twa-nda botomoka ni wôma ni héle. Se tu xinganeka mu ima yoso i tena kubhita n’etu, twa-nda kala ni wôma wa kusuluka ni kusidivila Jihova, né mwene se ki twa mu di bhana na-yu luwa. (Jisa. 12:25; 17:22) O wôma mubhetu u tu tela “o nguma [yetu] Dyabhu” phala ku tu kwata. (1 Phe. 5:8, 9) Ihi i tu tena kubhanga kindala phala ku di pelepalala mu ku di bhana ni izukutisu?

³ Mu milongi yiyi, twa-nda dilonga ihi i tu tena kubhanga phala kukolesa o ukamba wetu ni Jihova ni mukonda dyahi kima kyambote kubhanga kiki kindala. Twa-nda dilonga we ihi i tu tena kubhanga phala kubandekesa o kuswina kwetu. Ku disukilu, twa-nda mona ihi i tu tena kubhanga kindala, phala kukolokota mu izukutisu.

4. Kala ki londekesa Jihebelewu 13:5, 6, ihi i twa tokala kudyelela ni mukonda dyahi kima kyambote kubhanga kiki?

⁴ Dyelela kwila, Jihova wa kuzolo, ka-nda kuxisa lémbwa. (Tanga Jihebelewu 13:5, 6.) Mivu yavulu kudima, O Mulangidi wambele:  “O muthu wejiya kyambote Nzambi, kyoso ki kumoneka izukutisu wa-nda beta kota ku mu dyelela.” Kidi mwene! Phala kukolokota mu izukutisu twa tokala kuzola Jihova ni ku mu dyelela ni muxima woso; ki tu tokala kukala ni phata ya henda yê ko kwetu.—Mat. 22:36-38; Tiya. 5:11.

5. Ihi ya-nda kukwatekesa kudivwa kwila, Jihova wa kuzolo?

⁵ Tanga o Bibidya izuwa yoso ni mbambe ya kukolesa o ukamba wé ni Jihova. (Tiya. 4:8) Kyoso ki uya ni kutanga, di kwatenene mu idifwa ya henda ya Jihova. Kyoso ki u tanga sota kutendela o henda yê ya dikota kokwé, mu ima ya zwela ni ima ya bhange. (Mak. 34:6) Amoxi kwene mu a bhonza kuxikina kwila, Nzambi wa a zolo mukonda ene kene mu a talatala ni henda. Se kyene ki wene mu divwa, kala kizuwa sota kusoneka o mawukexilu a Jihova a kulondekesa henda kokwé. (Jisá. 78:38, 39; Loma 8:32) Kyoso ki uya ni kuxinganeka mu mawukexilu a Jihova a ku kulondekesa henda ni kyoso ki u xinganeka mu ima i u tanga mu Mak’â mê, wa-nda tena kumona ima yavulu yene mu ku bhangela Jihova. Se u kala ni kifwa kya kusakidila o ima yoso i bhanga Jihova, o ukamba wé ni mwene wa-nda kola dingi.—Jisá. 116:1, 2.

6. Kala ki londekesa Sálamu 94:17-19, kujikula o muxima wé mu musambu ku kukwatekesa kyebhi?

⁶ Samba ithangana yoso. Xinganeka mona ndenge wala mu homba ya tat’ê ya kazola. O mona u divwa kyambote, ka kala ni wôma wa kutangela tat’ê kikale o ima yambote ki kale o ima yayibha ya di bhana na-yu mu kizuwa kyenyókyo. Eye we u tena kukala ni ukamba wa difu kiki ni Jihova, se u zukama kwa mwene izuwa yoso mu ku mu jikwila o muxima bhu kaxi ka misambu. (Tanga Jisálamu 94:17-19.) Kyoso ki uya ni kusamba kwa Jihova, “lundulula o muxima wé kala menya” bhu pholo yê; tangela kwa Tata yé ya kazola o ima yoso ya mu kukwatesa wôma ni ima ya mu ku thandanganyesa. (Kud. 2:19) Ihi ya-nda bhita? Wa-nda mona i zwela o Bibidya kyoso ki yamba: “O kutululuka kwa Nzambi kwa somboka o kitongolwelu kyoso kya muthu.” (Fil. 4:6, 7) Kyoso ki uya ni kusamba jinga mu ukexilu yú, wa-nda zukama dingi kwa Jihova.—Loma 8:38, 39.

7. Mukonda dyahi eye wa tokala kudyela kwila, o ikanenu ya bhange Nzambi ya lungu ni Utuminu wê ya-nda di kumbidila mwene?

⁷ Dyelela kwila o mabesá a Utuminu wa Nzambi a-nda di kumbidila ni kidi kyoso. (Dya. 23:19) Se kuxikina kwila, o mabesá a Utuminu wa Nzambi a-nda di kumbidila, ki kwa-nda bhonza phala Satanaji ni yó a mu a tumina kwala mwene, ku kukwatesa wôma. (Jisa. 24:10; Jihe. 2:15) Kyebhi ki u tena kukolesa o kixikanu kyé mu Utuminu wa Nzambi kindala? Sota kithangana phala kudilonga o ikanenu ya Nzambi ya lungu ni Utuminu ni mukonda dyahi u tena kudyela kwila, ya-nda di kumbidila mwene. Kubhanga kiki, kukwatekesa kyebhi? Xinganeka o phangu ya Stanley Jones, a mu tele mu kaleya  mu sambwadi dya mivu mukonda dya kixikanu kyê. * Ihi ya mu kwatekesa kukolokota mu ufiyele? Mwene wambe: “O kixikanu kyami kya kolele dingi mukonda ngejidile ya lungu ni Utuminu wa Nzambi ni ihi yeji bhanga. Ki ngi kexile ni phata. Mu kiki, sé-ku muthu weji ngi bhangesa kubhana dikunda kwa Jihova.” Se u kala ni kixikanu kya kolo mu ikanenu ya Nzambi, wa-nda zukama kwa Jihova, ki wa-nda kwehela o wôma ku kufidisa kusuluka ni ku mu bheza.—Jisa. 3:25, 26.

8. O ukexilu wetu wa kumona o yônge u londekesa ihi? Jimbulula.

⁸ Ndé mu yônge ya Ukidistá semana joso. O yônge i tu kwatekesa kuzukama kwa Jihova. Kuya mu yônge kijimbwete ki londekesa kwila, twa-nda di tunda kyambote mu ku dibhana ni izukutisu ya-nda moneka ku hádya. (Jihe. 10:24, 25) Mukonda dyahi tu zwela kiki? Se twehela ima yofele ku tu fudisa kuya mu yônge kindala, ihi ya-nda bhita se kumoneka kithangana ki bhinga kuta o mwenyu wetu mu kilwezu phala kudyongeka ni jiphange? Ku mbandu ya mukwá, se tu kolokota mu kuya mu yônge ki twa-nda bhwila se jinguma jetu ji tu fidisa kudyongeka. Kindala kyene o kithangana kya kubandekesa o henda yetu mu yônge. Se tu zola kuya mu yônge, sé-ku kizukutisu, né kijila kya jinguvulu kya-nda tu fidisa kubelesela Nzambi mu veji dya athu.—Ika. 5:29.

9. Mukonda dyahi o kubhaka jivelusu mu kilunji ukexilu wambote wa kukala polondo phala o izukutisu?

⁹ Bhaka mu kilunji kyê o jivelusu ja Bibidya ji wa wabhela dingi. (Mat. 13:52) Etu ki twala ni kilunji kya yuka, maji Jihova bhu kaxi ka nzumbi yê ikôla, u tena ku tu kwatekesa kulembalala o jivelusu ji twa bhake mu kilunji. (Nzwá 14:26) Tala ya zwela phange a mu tele mu kaleya wexile ubheka we bhu kididi kya vundile ku Alemanha Oriental: “Nga sangulukile kyavulu mu kudilonga jivelusu javulu ja Bibidya ni ku ji bhaka mu kilunji! Mu izuwa i ngexile mu kaleya, nga tena kuxinganeka mu ima yavulu ya Bibidya.” O jivelusu jojo ja kwatekesa phangi’etu kuzukama kwa Jihova ni kukolokota mu ufiyele.

10. Mukonda dyahi twa tokala kubhaka o mimbu mu kilunji kyetu?

¹⁰ Imba mimbu i ximanesa Jihova, bhaka-yu mu kilunji. Kyoso Phawulu ni Sila kya kexile mu kaleya ku Filipe, ene exile mu kwimba mimbu phala kuximanesa Jihova, ya bhakele mu kilunji. (Ika. 16:25) Kyene we kya bhiti ni jiphange jetu ku antiga União Soviética a a balakalele ku  Sibéria. Ihi ya a kolokotesa? Phange ya muhatu Mariya Fedun wa lembalala: “Twexile mu kwimba o mimbu yoso i twejidile, ya kadivulu ka kwimba.” Mwene wambe kwila o mimbu yoyó ya kwatekesa ene oso, ya a kwatekesa kudivwa kwila, a zukamene kwa Jihova. O kwila u dívwa kala a kuswinisa, kyoso ki wimba o mwimbu u wa wabhela dingi? Mu kiki, bhaka o mimbu yiyi, mu kilunji kyé kindala!—Tala o kaxa, “ Ngi Swinise, Tata.”

11-12. (a) Kala kilondekesa 1 Samuwele 17:37, 45-47, mukonda dyahi Davidi wa swinine? (b) Disá dyebhi dyambote di tu dilonga mu musoso wa Davidi?

¹¹ Phala kukolokota mu izukutisu, wa bhingi kuswina. Ihi i u tena kubhanga se u divwa kwila, ki wala u muthu wa swina? Lembalala kwila, o kuswina kwa kidi, ki tu tena ku kuzonga ni kitala, nguzu mba uhete. Xinganeka mu phangu ya munzangala Davidi, kyoso kya bhânge ni Ngoliya. Se tu mu sokesa ni dizonda dyódyo, Davidi wexile ndenge, ka kexile ni nguzu yavulu, ka kexile ni ima ya soko phala kubhânga. Né ngó xibhata Davidi ka kexile na-yu. Maji, mwene wexile ni kuswina kwavulu. Ni lusolo lwoso wayi mu bhânga ni dizonda, dya kambele kuxila.

¹² Mukonda dyahi Davidi wa swinine kyavulu kiki? Mwene wa dyelele ni kidi kyoso kwila, Jihova wexile ni mwene. (Tanga 1 Samuwele 17:37, 45-47.) Davidi ka di kwatenena mu uzonda wa Ngoliya. Mu veji dya kiki, mwene wa di kwatenena mu unene wa Jihova. Ku mesu mê Ngoliya wexile kabwetele. Ihi i tu dilonga mu musoso yú? Twa-nda divwa kwila twa swina se tu dyelela kuma Jihova wala n’etu ni kwila o jinguma jetu ja tolo mu nguzu mu ku a sokesa ni Nzambi Muteni-a-Yoso. (2 Mal. 20:15; Jisá. 16:8) Kyebhi ki tu tena kubandekesa o kuswina kwetu kindala, ande dya kwiza o izukutisu?

13. Kyebhi ki tu tena kubandekesa o kuswina kwetu? Jimbulula.

¹³ Tu tena kubandekesa o kuswina kwetu mu kubokela akwetu o njimbu yambote ya Utuminu wa Nzambi. Mukonda dyahi tu zwela kiki? Mukonda kyoso ki tu boka, tu dilonga kudyela dingi kwa Jihova, ki twa-nda kala ni wôma wa athu. (Jisa. 29:25) O tulwingi twetu tu kala dingi ni nguzu kyoso ki tu tungutisa o mukutu. Kyene kimoxi we ni nguzu yetu, i di bandekesa dingi kyoso ki tu boka nzo ni inzo, mu ididi mu bhita athu avulu, kyoso ki kumoneka kithangana ni mu ididi ya kusumbisa. Se tu swina kindala mu kuboka, twa-nda kala polondo phala  kusuluka ni kuboka né mwene se a fidisa o kikalakalu kyetu ku jinguvulu.—1 Tes. 2:1, 2.

14-15. Ihi i tu tena kudilonga ni Nancy Yuen ni Valentina Garnovskaya?

¹⁴ Tu tena kudilonga ima yavulu mu phangu jiyadi ya jiphange ja ahatu ja fiyele mu kulondekesa kuswina kwa dikota. Nancy Yuen wexile ngó ni metulu imoxi ni kaxaxi, mu kitala maji mwene kexile ni wôma. * Mwene kehela ku mu fidisa kuboka o njimbu yambote ya Utuminu wa Nzambi. Mukonda dya kiki, a mu tele mu kaleya mu 20 a mivu ndenge. O masoladi akexile mu mu fundisa a zwela kwila mu ixi yâ “ki kwa kexile muthu wa jijile kala mwene.”

¹⁵ Kyene we kimoxi ni Valentina Garnovskaya, a mu tele mu kaleya mu ithangana itatu ki ya difwile, ku atinga União Soviética, o ithangana itatu yiyi ya tenesa 21 a mivu. * Mukonda? Mwene wa mesenene kuboka ni nguzu yoso, katé o jinguvulu ambe: O muhatu yú “kilwezu kya dikota.” Ihi ya bhangesa o ahatu a yadi yâ a fiyele kuswina kiki? A dyelele kwila Jihova wexile ni ene.

16. Yebhi o kima ki tu bhangesa kukala ni kuswina kwa kidi?

¹⁶ Kala ki twa mono, phala kubandekesa o kuswina, ki tu tokala ku di kwatenena mu nguzu ni mu uhete wetu. Mu veji dya kiki, twa tokala kudyelela kwa Jihova kwila mwene wala kumoxi n’etu ni kwila, mwene ngó wa mu bhânga mu kididi kyetu. (Mate. 1:29, 30; Zak. 4:6) Kiki kyene o kima ki tu bhana o kuswina kwa kidi.

17-18. Kala ki twa mono mu divulu dya Nzwá 15:18-21, kidimwinu kyahi kya tu bhana Jezú? Jimbulula.

¹⁷ Etu tu sanguluka kyoso akwetu kya tu xila, maji se amoxi ka tu wabhela, ki tu tokala kubanza kwila, ki twala ni valolo. Jezú wambe: “Mwa zediwa, se athu a mi zembe, a mi katula mu ukamba wâ, a mi lebhula, a mi texi dijina dyenu kuma exi mu athu ayibha, mukonda dya Mon’a Muthu.” (Luka 6:22) Ihi ya mesenene kuzwela Jezú?

¹⁸ Jezú ka mesenene kuzwela kwila, o Jikidistá eji wabhela kwila, a a zemba ku athu. Mu veji dya kiki, mwene wexile mu tu dimuna ya lungu  ima yeji bhita n’etu. Etu ki tu bhange mbandu ya mundu. Etu tu kumbidila o milongi ya Jezú ku mwenyu wetu, tu boka o njimbu ya boko mwene. Mukonda dya kiki, o athu ku mundu a tu zembe. (Tanga Nzwá 15:18-21.) Twa mesena kuximanesa Jihova. Se athu a tu zemba mukonda dya kuzola Tata yetu, yá maka a ene kyá.

19. Kyebhi ki tu tena kukayela o phangu ya jipoxolo?

¹⁹ Kana kwehela kima ki zwela mba ki bhanga o athu ku ku kwatesa jisonyi ja kukala Mbangi ya Jihova. (Mik. 4:5) Tu tena kudilonga kutolola o wôma wa athu, mu kuxinganeka ya bhangele o jipoxolo ku Jeluzaleme, kyoso Jezú kya mu jibha. Ene ejidile kwila, o atwameni a Jijudé a a zembele kyavulu. (Ika. 5:17, 18, 27, 28) Maji ene a suluka ni kuya mu tembulu izuwa yoso ni kulondekesa kwila, exile maxibulu a Jezú mu kusuluka ni kuboka. (Ika. 5:42) Ene kehela o wôma ku a bhangesa kubhwila. Etu we tu tena kutolola o wôma wa athu kyoso ki tu tangela akwetu kwila tu Jimbangi ja Jihova—ku salu, ku xikola ni bhu dyembu bhu twa tungu.—Ika. 4:29; Loma 1:16.

20. Mukonda dyahi o Jipoxolo a sangulukile sumbala a zembele?

²⁰ O jipoxolo ja sangulukile mukonda dyahi? Mukonda ene ejidile kyambote o kima kya kexile mu a bhangesa kwa zemba; phala ene, ku a zemba mukonda dya kubhanga o vondadi ya Jihova, kyexile kijingu kya dikota. (Luka 6:23; Ika. 5:41) Poxolo Phetele wa soneka: “Se enu mwa tale hadi-phe mukonda dya kuyuka, mwa zediwa!” (1 Phe. 2:19-21; 3:14) Kyoso ki tu mona kwila a tu zembe mukonda dya kubhanga ima ya yuka, ki twa-nda kwehela o ima yayibha ku tu fidisa kusidivila Jihova.

21-22. (a) Ihi i wa solo kubhanga phala ku di pelepalala ku izukutisu? (b) Ihi i twa-nda dilonga mu milongi ya-nda kayela?

²¹ Etu ki twejiya o kithangana kya-nda tu zukutisa ku athu mba o kithangana kya-nda fidisa o kikalakalu kyetu ku jinguvulu. Maji etu twejiya kwila, tu tena ku di pelepalala kindala, mu kukolesa o ukamba wetu ni Jihova, mu kubandekesa o kuswina kwetu, ni kudilonga kudibhana ni athu a tu zembe. Ku di pelepalala kindala, kwa-nda tu kwatekesa kusuluka ni kubheza Jihova.

²² Abha se a fidisa o ubhezelu wetu? Mu milongi ya kayela, twa-nda dilonga itumu ya Bibidya ya-nda tu kwatekesa kusuluka ni kubheza Jihova né mwene se a fidisa o ubhezelu wetu.