MU BIBIDYA tu sanga-mu izwelu ya mayala a fiyele a kexile ni “jihânji jene jimoxi ni etu.” (Tiya. 5:17) Mu kifika, tu tena kuxikina o izwelu ya Phawulu i tu sanga mu mukanda wa Loma 7:21-24: “Kyoso eme ki ngi sola kubhanga yawabha, yayibha yene ya ngi zukama. . . . Kokolo dyami dya kuxixima kiki!” Se twa mu bhânga ni itondalu yetu, o kwijiya kwila katé mwene ni mala a fiyele kala Phawlu exile mu divwa we kiki, ki tu ximbakatesa.

Phawulu wa zwela ya lungu ni jihânji jengi jexile mu di bhana na-ju. Mwene wambe: “Mon’a Nzambi . . . wa tenene ku ngi zola ni ku di bhakula mukonda dyami.” (Ngalásya 2:20) Phawulu wa xikinine ni kidi kyoso mu kixinganeku kiki! O kwila kyene we ki wene mu divwa? Nange kana.

Se twa di bhanene kyá ni kikote mukonda dya kituxi ki twa tele m’ukulu, ki tena ku tu bhonza kuxikina kwila o henda ni muloloki wa Jihova, katé mwene o sata ya kukula ujitu wa tu tokala. O kwila Jezú wa mesena kuma tu tala o sata ya kukula kala kya tale mwene? Se kyene, ihi i tena ku tu kwatekesa kubhanga kiki? Tu di longe ibhwidisu iyadi.

Jezú wa mesena kwila, kala muthu mu dyetu tu mona o sata ya kukula kala ujitu wê. Kyebhi ki tu tena kubhanga kiki? Xinganeka o musoso wosoneke mu divulu dya Luka 23:39-43. O diyala dya phaphela ku taka bhu mbandu ya Jezú, u xikina kwila wala ni kikuma mukonda dya ituxi ya tele m’ukulu. O kikuma kyexile kya dikota, mukonda o athu a kexile mu a phaphela ku taka, yó ngó a tele kituxi kya dikota. O diyala didi dya thandanganya kyavulu ni mwenyu wê, mwene u dyondela Jezú: ‘Ngi lembalale kyoso ki wa-nda bokona mu Utuminu wé.’

Ihi yeji bhanga Jezú? Xinganeka o ndolo yevu Jezú kyoso kya lungulula o mútwe phala kutala o dyala dyódyo. Mwene wambe: “Lelu, ngi ku tangela o kidi kwila: Eye wa kà kala n’eme mu Palayízu.” Jezú hinu wambela ngó o diyala kwila, ‘o Mon’a muthu weza . . . phala kusidivila ni kubhana o mwenyu wê kala sata ya kukúla o mundu.’ (Mat. 20:28) Mu veji dya kiki, ni henda yoso Jezú wa kwatekesa o diyala kumona kwila o sata ya kukula ya mu tokala. Mwene wa zwela kala o diyala dyexile kamba dyê mu kutumbula o izwelu “eye” ni “eme.” Jezú wa londekesa o mbote yeji katula o diyala mu sata yê mu kuzwela kwila, mwene weji kala mu palayízu mu ixi.

Sé phata Jezú wa mesenene kwila, o diyala di tendela kuma o sata ya bhakula Jezú, yeji mu bhekela mbote. Se kyene kya divu Jezú ya lungu ni kifumbe wa kambele kubheza nzambi, tu tena kudyelela kwila, wa-nda bhanga dingi ku Jikidistá a a batizala, a bheza Nzambi. Ihi i tena ku tu kwatekesa kudivwa kyambote sumbala ni ituxi i twa te m’ukulu?

Kuma Jezú wa bhana kikalakalu kya kuboka kwa Phawulu, mwene wa tendela kwila Jezú wafu phala ku mu bhulula. Kya bhiti kyebhi? Mwene wa jimbulula: “Eme nga sakidila Kidistu Jezú, Ngana  yetu, wa ngi bhana o kutena kwa kubhanga o kikalakalu kyami. Nga mu sakidila mwène, kuma wa ngi mono kukala fiyele, yú wa ngi bokwesa mu ungunza wê phala ku mu bhikila. Mwène wa ngi bhange kyenyiki, sumbala m’okulu nga dyangele ku mu zwela kyayibha, ni ku mu zukutisa, ni kumu sombola.” (1 Tim. 1:12-14) Sumbala Phawulu wa bhangele ima yayibha m’ukulu, o kikalakalu kya mu bhana Jezú kya mu londekesa kwila a mu zolele a mu dyelele kyavulu kwala Jezú. Kyene kimoxi we. Jezú wa tu bhana o kikalakalu kya kuboka o njimbu ya mbote. (Mat. 28:19, 20) Kyebhi o kikalakalu kyetu kya kuboka ki tena ku tu kwatekesa kutendela kwila Jezú wafu mukonda dyetu?

Albertu wa vutuka kindala mu kilunga, a mu tele kamukonde mu 34 a mivu, wa jimbulula wixi: “Izuwa yoso ngene mu lembalala o ituxi i nga tele m’ukulu. Maji kyoso ki nga mu boka, ngi divuwa kala kya divwile poxolo Phawulu, nga tambula o ungunza yú kwa Jezú. Kubanza kiki, ku ngi sangulukisa dingi, ku bhangesa kukala ni ixinganeku yambote ya lungu ni hádya.”—Jisá. 51:3.

Allan, wexile kiswéya ande dya kudilonga o kidi, wa xikina ni kidi kyoso kwila: “Ngene mu banza hanji ku kuyibha kwoso ku nga bhange ku athu. Sayi ithangana, o ibanzelu yiyi i ngi luwalesa kyavulu. Maji ngene mu sakidila Jihova, mu kwehela o mukwa ituxi kala eme, ku tudila o njimbu yambote ku akwa. Kumona o athu a mu xikina o njimbu yambote, ku ngi lembalesa o henda ya tu kwatela Jihova. Ngi divwa kwila, bhu kaxi kami Jihova wa mu kwatekesa o athu a bhangele ima yayibha m’ukulu kala eme.”

O ukunji wetu, u tu kwatekesa kulunga o nguzu yetu mu ibhangelu ni ixinganeku yambote. Kubhanga kiki, ku tu dyelelesa kwila, Jezú wa tu zolo, wa tu dyelela, u tu londekesa o kyadi kyê.

Kuma twa mu kingila hanji o kibwikilu kya mundu yú wayibha wa Satanaji, o muxima wetu utena hanji ku tu tatela mukonda dya ituxi i twa tele m’ukulu. Ihi ya-nda tu kwatekesa kutolola o ixinganeku yiyi?

Jean wene mu di tatela mukonda mu unzangala wexile muthu wa pholo jiyadi, wambe: “Nga wabhela kwijiya kwila, ‘Nzambi wala kota o muxima wetu ndenge.’” (1 Nzwá 3:19, 20) Etu we tu tena kutambula kiximbakatesu mu kwijiya kwila, Jihova ni Jezú, a tu tala mu ukexilu wambote, sumbala tu akwa ituxi. Kana kujimba kwila, ene a bhana o sata ya kukula ni henda yoso, phala o athu akwa ituxi, ka i bhana ku athu ayuka.—1 Tim. 1:15.

Twa-nda dyelela ni kidi kyoso kwila o sata ya kukula ujitu u twa tambula, se tu xinganeka ni muxima woso mu ukexilu wa Jezú wa kutalatala o athu akwa ituxi, anga tu bhanga yoso phala ku kumbidila o ukunji wa tu bhana mwene. Mu kubhanga kiki, kala Phawulu, twa-nda tena kuzwela we kwila: “Mon’a Nzambi . . . wa tenene ku ngi zola ni ku di bhakula mukonda dyami.”