DAYANA wa bhiti kyá mu 80 a mivu, wa tale hadi yavulu mu mivu ya bhiti. Mwadiw’ê wa katele o uhaxi wa Alzheimer, yú wafu. Twana twê tuyadi twafu wé. O mwene wa kexile mu bhânga ni cancer mba kijimbu ku dyéle. Maji kyoso jiphange kya kexile mu disanga ni Dayana mu yônge mba mu sidivisu, a kexile mu mona kwila mu ithangana yoso mwene wa sanguluka.

Nzwá wexile kafunga ka ilunga mu 43 a mivu ndenge. Mwene wa zolele kyavulu o kikalakalu kyê, kya xinganekene kubhanga dingi kima kyengi. Maji-phe, mwene wa xisa o kikalakalu kya kukunda o ilunga phala kulanga o jindandu já haxila. O jiphange já mwijiya kyambote, kya kexile mu disanga nê mu yônge yonene mba ya makota, a kexile mu mona kwila mwene ka lunguluka, kana. Mwene wa sangulukele hanji kyavulu.

Maji kyebhi Dayana ni Nzwá kya tena kukala ni kusanguluka mba kutana? Kyebhi o wa mu tala o hadi kya kala ni kusangula? Kyebhi o muthu kya tena kusanguluka né mwene se u xisa kikalakalu kya wabhela kyavulu? O Bibidya i tu bhana kitambwijilu. Yene yamba: “Athu ayuka-phe a kà tanena [mba kusangulukila] mwa Jihova.” (Jisálamu 64:10) Phala kutendela o kidi kiki, twa bhingi kwijiya ihi ya-nda tu bhekela o kusanguluka ku nangenena ni ima i kamba ku tu bhekela kusanguluka.

Sayi ima i tena ku tu bhekela ka kisangu-sangu mu ithangana yofele. Mukifika, xinganeka o diyala ni muhatu a dizolo kyavulu, a mu banza kukazala mudyâ. Mba xinganeka diyala mba muhatu wa vwala o mon’a, mba wa tambula ujitu mu kikalakalu kyê kwa Jihova. O ima yiyi, i bhekela kusanguluka mukonda mawujitu a tunda kwa Jihova. Mwéne wa tu bhana o ujitu wa kukazala, wa kuvwala an’â, ni ikalakalu i twa tokala kubhanga mu kilunga kyê.—Dimatekenu 2:18, 22; Jisálamu 127:3; 1 Timote 3:1.

Maji-phe, sayi ima i bhekela o kusanguluka i tena kubhita ni lusolo. Ki luwalesa kwijiya kwila, o muthu u tena kukamba ufiyele ku munum’yê mba muhatu wê, mba kufwa. (Izekiyele 24:18; Hozeya 3:1) O twana tu tena kukamba kubelesela o jitata  ni Nzambi mba a a ta mu kamukonde mu kilunga. Mu kifika, o an’â a Samuwele kexile mu sidivila Jihova mu ukexilu wa tokala, o Davidi we wa dibhana ni jingongo javulu ku mwiji wê mukonda dya kituxi kya tele ni Bateseba. (1 Samuwele 8:1-3; 2 Samuwele 12:11) O ima yiyi, ki yene mu bhekela kusanguluka, kana. Maji i bhekela kuluwala kwa muxima ni jindolo javulu.

Kyene we kimoxi, sayi ithangana kwene mu bhinga kuxisa kikalakalu mu sidivisu ya Jihova mukonda twa kate, twa bhingi kulanga o mwiji wetu mba ima ya lunguluka mu kilunga. Avulu a xisa o ikalakalu yexile na-yu mu kilunga, amba kwila ala ni ngunzu ya kisangu-sangu kyexile na-kyu mu kikalakalu kyâ.

Tu tena kumona-phe kwila, o kusanguluka kwijila mu ima yiyi, sayi bhabha ki kwene mu nangenena. Mu kiki-phe, o kwila kwala kisangu-sangu ki nangenena né mwene kyoso o mwenyu ki u bhonza? Xé. Mukonda Samuwele, Davidi ni athu amukwa, kusanguluka kwâ ki kwabhu sumbala a di bhanene ni ibhidi ku mwenyu.

Jezú wejidile o kusanguluka kuku. O Bibidya i tu tangela kwila, ande dya kwiza mu ixi, mwene wexile mu “kusanguluka ni kukemba bhu pholo [dya Jihova] ithangana yoso.” (Jisabhu 8:30) Maji kyoso kyeza mu ixi, wa dibhanene ni ibhidi yavulu. Maji Jezú wa sange kusanguluka mu kubhanga o vondadi ya Tat’ê. (Nzwá 4:34) Abha, o ya lungu ni ji ola ja xiphaxi ja bhiti ku thaka? Tu tanga mu Bibidya: ‘Mu kusuwa o kusanguluka kwa mu idikisa, wa kolokota mu thaka.’ (Jihebelewu 12:2) Kyenyiki-phe, tu katula madisá avulu mu ima iyadi ya zwela Jezú ya lungu ni kusanguluka kwa kidi.

Sayi kizuwa, o 70 a maxibulu a vutuka kwa Jezú kyoso kya zubha o kuboka. Ene a sangulukile kyavulu mukonda a tenene kubhanga ima yavulu, katé ni kukaya madimonyo. Maji Jezú wa a tangela wixi: “Kana ku sangulukila madimonyo ma mi tolokela; inda mu sangulukila o majina menu kuma a ma soneka ku dyulu.” (Luka 10:1-9, 17, 20) Kyene mwene! Ku tu xikina kwala Nzambi kyene o kima kya beta dingi kota, ku tu bhekela dingi kusanguluka o kikalakalu kyoso-kyoso mu kilunga ndenge.

Mu kithangana kyengi, kyoso Jezú kya zubha kulonga kibuka kya athu avulu, kwa moneka muhatu mukwa Judé, wa diwana ni ulongelu wê, wa mwambela kwila, many’â wa tokalele kusanguluka mu kukala ni mona yó. Maji Jezú wa tambwijila  wixi: “Kyene, maji a beta o kuzediwa oso évwa o maka ma Nzambi anga a ma lunda!” (Luka 11:27, 28) Kukala ni an’a a tu zelesa o muxima ku tu sangulukisa. Maji ku tu bhekela kusanguluka kunangenena o kubelesela Jihova ni kukala ni ukamba wambote ni mwene.

Ku muxima ku tu zela kyengi, kyoso ki tu divwa kwila, twa bhange kima kya sangulukisa Jihova. Sumbala tu dibhana ni ibhidi, yene ki i tena ku tu katula o kusanguluka kuku. Mu kidi, kyoso ki tu kolokota mu ufiyele sumbala ni ibhidi, o kusanguluka kwetu ku di bandekesa dingi. (Loma 5:3-5) Ku mbandu yengi, Jihova u bhana o nzumbi yê kwa yò a mu dyelela. O kusanguluka kubhanga mbandu ya kibundu kyima o nzumbi yiyi. (Ngalásya 5:22) Kiki ki tu kwatekesa kutendela mukonda dyahi o divulu dya Jisálamu 64:10 yamba: “ayuka-phe a kà tanena [mba kusangulukila] mwa Jihova.”

Kyene-phe we kya bhangesa Dayana ni Nzwá kukolokota ni kusanguluka sumbala ni ibhidi ya dibhana na-yu. Dayana wambe: “Nga lengela kwa Jihova, kala ki lengela o mona ndenge kwa tat’ê.” Mwene wambe dingi: “ngi divwa kwila, mwéne wa ngi bhana o dibesá dya kukala ni uhete wa kuboka mu ithangana yavulu ni kisangusangu kupholo yami.” Ihi ya kwatekesa Nzwá kusanguluka ni kuboka mu ithangana yavulu, kyoso kya xisa o kikalakalu kyê? Mwene wambe: “Tundé ku muvu wa 1998 kya ngi bhana o kikalakalu kya ku longa mu Xikola ya Ukunji wa Nzambi; ithangana yami ya kudilonga ubheka nga i bandekesa.” Mwene wa jimbulula kwila, ki kya bhonzele phala mwene ni muhatw’ê kuxikina o ilungulwilu yiyi, mukonda ithangana yoso ene exile polondo phala kubhanga yoso ya bhinga Jihova. Mwene wa bandekesa: “Twa bhange o ima yoso yiyi sé kudyela.”

Avulu a mono kya ku myenyu yâ kwila, o izwelu mu Sálamu 64:10 ya kidi mwene. Tala ngó ya bhiti ni dikaza a sidivile kyá ku Betele ya Estados Unidos mu 30 a mivu ndenge. Ene a a solele phala kukala aboki a katunda. Ene a xikina ni kidi kyoso kwila: “U tena kuluwala kyoso ki u xisa kikalakalu ki wa zolele kyavulu.” Maji ene a bandekesa exi: “Eye ki wa-nda tena kuluwala katé ku hádya ni hádya.” Kyoso kya bhixila mu kikalakalu kyâ kya ubhe, a mateka kuboka ni kilunga kya sange. Ene ambe we kiki: “Mu misambu twa kexile mu tumbula o ima i twa bhindamene. O kumona o itambwijilu ya misambu yetu, kwa kexile mu tu ximbakatesa kyavulu. Kyoso ki twa bhixila, mu kubhita tu ithangana avulu a mateka kukalakala kala aboki a thembu yoso. Etu twa tambula o ujitu wa kulonga dixibulu dya kulu mu nzumbi.”

Twejiya kwila, kubhonza kusanga o kusanguluka. Kwa-nda moneka ithangana i twa-nda luwala mwene. Maji Jihova wa tu bhana o kidyelelu ki tu sanga mu Sálamu 64:10. Né mwene kyoso ki tu luwala, ki twa tokala kujimba kwila, se tu kolokota mu ufiyele sumbala ni ibhidi, twa “kà tanena [mba kusangulukila] mwa Jihova.” Tu tena we kuxinganeka ku hádya kyoso o kikanenu kya Jihova kubhanga “mawúlu mobhe ni [ixi] yobhe” ya-nda di kumbidila. Mu kusuluka, oso a-nda kala athu a yuka, a-nda kala ni ‘kusanguluka katé ku hádya’ mukonda dya ima ya-nda bhanga JIhova.— Izaya 65:17, 18.

Xinganeka ngó kyebhi kya-nda kala o ima mu ixi. Twa kà kala ni sawidi yambote, ya tenena, izuwa yoso twa-nda balumuka ni nguzu ya soko. Ima yoso ya tu luwalesa m’ukulu ki ya-nda tu bhekela dingi dilamba mba ku tu luwalesa. Jihova u tu kanena kwila “o ima ya bhiti kyá ki bhu kala dingi ku i banza, né ngó kwiza mu kilunji, lémbwa.” Twa kà tambulula dingi o jindandu jetu jafu kyá. Twa-nda divwa kala kya divu o jitata ja munzangala wa 12 kya mivu a mu fukununa kwala Jezú: “Enyoso kithangan’okyo anga a diwana kisuma kya dikota.” (Marku 5:42) Ku disukilu, athu oso mu ixi a-nda kala athu a yuka, a ka “tanena [mba kusangulukila] mwa Jihova” katé ku hádya ni hádya.