KYOSO akwetu kya tu bhanga o mbote, mu kidi ki tu bhangesa kudivwa kyambote. Kwijiya kwila ene a tu zolo ku tu ximbakatesa. Se tu sakidila kyoso akwetu kya tu bhanga o mbote kyebhi ki tu tena kukala athu ambote?

O muthu wambote u londekesa ku akwa kwila wa a zolo bhu kaxi ka izwelu ni ibhangelu yê. Mu veji dya kuxila ngó athu, mwene u a bhangela mbote mukonda mwene wa a zolo u tendela kyebhi kya mu divwa. Kya beta kota o kwijiya o kwila kubhanga mbote ki bhanga mbandu kya kibundu kya nzumbi ikôla ya Nzambi. (Ngalásya 5:22, 23) Jihova wa mesena kwila, tu kala ni kifwa kya kubhanga o mbote. Kyenyiki-phe, tu mone kyebhi mwene ni mon’ê kya londekesa o ukexilu wa kubhanga o mbote ni kyebhi ki tu tena kukayela o phangu yâ.

Jihova u bhanga o mbote ku athu oso kate mwene “athu a kambe kusakidila, a bhukumuka.” (Luka 6:35) Mu kifika, Jihova “mukwa kubhangesa dikumbi dyê di bandela athu a bhukumuka ni athu ambote, u tumikisa mvula ni kwa ya ayuka ni ku isweya.” (Matesu 5:45) Athu oso a tena kusanguluka ni kukatula mbote mu ukexilu wa Jihova wa kulendukila athu, katé mwene yó a dituna kuxikina kwila Jihova mwene o Mubhangi wa yoso.

Jihova wa londekesa o ukexilu wé wa kubhanga o mbote ku ima ya bhange kwa Adá ni Eva. Kyoso kya te o kituxi, “a tunga máfwe ma mufiku, anga a ma kutila mu mbunda ni jiphonda ja yudika.” Maji, Jihova wejidile kwila ku mbandu yengi ya jaludim ene eji bhindamena izwatu ni kikwatekesu kyê, mukonda o ixi yo bhubhidile ya zalele ni “minya ni holokoso.” Mu kiki Jihova mu henda yê wa bhange o mbote mu kwa bhana ‘izwatu ja lebha, anga u a zuika.’—Dimatekenu 3:7, 17, 18, 21.

Sumbala Jihova u londekesa o mbote ku athu “abhukumuka ni athu ambote,” mwene u londekesa dingi o mbote yê ku jiselevende jê ja fiyele. Mu kifika, mu thembu kyoso Zakadiya kyexile polofeta sayi anju wa thandanganyele mukonda akwa Izalayele kya kexile dingi kutunga o tembulu ya Jihova mu Jeluzaleme. Jihova wevu o izwelu ya anju, yú wa mu tambwijila ni ku mu ximbakatesa ni “maka a mbote, maka a tululwisa muxima.” (Zakadiya 1:12, 13) Jihova wa lange polofeta Elija mu ukexilu umoxi. Kyene kyexile o kithangana kyoso polofeta kyexile ni kikote ku muxima yu wa bhingile kwa Jihova phala ku mu katula o mwenyu wê. Jihova wa londekesa kwila wa zolele Elija yu wa tumikisa anju phala ku mu swinisa. Mwene wa londekesa kwila o polofeta kyexile u bheka kana. O mbote ya londekesa Jihova ya swinisa Elija phala kusuluka mu kikalakalu kyê. (1 Jisobha 19:1-18) Maji bhu kaxi ka jiselevende jê joso, mu kixinganeku kyé, nanyi wa kayela mu ukexilu wa katunda o phangu ya Jihova ya kulondekesa o mbote?

Kyoso Jezú kyexile mu ixi, o athu exile mu mona o mbote yexile mu bhanga. Mwene kexile mukwa njinda kexile mu talatala akwa ni undanda, mba ku a jijidika kubhanga o ima ya mesenene. Wa zolele akwa, mwene wambe: “Zenu kokwami enu oso mwa bhwila, enu mwa tate ni imbamba ya  mi nemena, eme nda ngi mi nyohese. . . Mbata o ima yami yoso i ngi m’inda na-yu, ki i bhonzo.” (Matesu 11:28-30) Mukonda wexile mu londekesa mbote yavulu, o athu exile mu kayela kabasa kidi. Mukonda dya henda, Jezú wa a bhana kudya, wa a sake, wa a longo “ima yavulu” ya lungu ni Tat’ê.—Marku 6:34; Matesu 14:14; 15:32-38.

Jezú wexile mu kwívwa o ndolo ya athu, wa kexile mu a talatala mu ukexilu wambote. Mu kidi, mwene wexile mu kwatekesa athu oso akexile mu mu sota né mwene mu ithangana ya bhonzele. (Luka 9:10, 11) Xinganeka ya bhitile ni muhatu wa kexile ni kibhubhe kya manyinga. Mwene wa mesenene ku mu saka, mu kiki, wa kwata mu kizwatu kya Jezú. Maji mu kijila kya bhanene Nzambi kwa Mozé, mwene ka tokalele kukwata mu kizwatu kya Jezú mukonda wa xidile. (Ijila 15:25-28) Ihi ya bhange Jezú? Mwene ka zwela-nê ni njinda. Mwene wa mono kwila, o muhatu wa kexile mu tala hadi, wa mu kwatela henda, mukonda wa kexile kyá ni uhaxi yú mu 12 kya mivu. Mwene wa mwambela: “Mona, o kuxikana kwé, kwa ku bhulula. Ndeye ni kutululuka, u di sanze ku uhaxi wé.” (Marku 5:25-34) Sé phata Jezú wexile mukwa kubhanga mbote!

Mu ifika i twa mono, twa dilongo kwila, se tu akwa kubhanga o mbote twa-nda bhanga ima phala kukwatekesa akwetu. Jezú wa londekesa o valolo ya kubhanga kiki, kyoso kya tange o musoso wa mukwa Samadya. O mukwa Judá a mu nyana o kitadi, a mu beta, a mu xisa phala kufwila mu kikoka. O mukwa Samadya wa kexile mu bhita, wa mu kwatela henda, sumbala akwa Samadya ni Jijudé exile ni unguma. O henda ya mu bhangesa kukwatekesa o diyala dya kumbamene. Mwene wa mu kutu o jifidila yú wa mwambata mu inzu ya kuzalela o ajitu. O mukwa Samadya wa futu o mukwa inzu phala kulanga o mukwa Judá, wa mu kanena we ku mu futa o ima yamukwá yeji bhinga.—Luka 10:29-37.

O henda ya-nda tu kwatekesa kukala ni ixinganeku yambote ni kuswinisa akwetu mu ibhangelu ni mu izwelu. O Bibidya yamba: ‘O kubhindama kwa muxima, kwene mu bhelesa o muthu; maji mbimbi yambote, i mu sangulukisa.’ (Jisabhu 12:25) Kyoso o henda i tu bhangesa kubhanga o mbote phala kuzwela ima i swinisa akwetu, twa-nda sanguluka. * (Tala kulwiji.) O izwelu yetu ya henda ya-nda londekesa kwila, twa a zolo, ki kya-nda ku a bhonza kukolokota kyoso kya dibhana ni maka.—Jisabhu 16:24.

Etwenyoso twala ni uhete wa kubhanga o mbote, mukonda Nzambi wa tu bhange mu kifwanganu kyê. (Dimatekenu 1:27) Mu kifika, Julyu, kabhitangu mukwa Loma wexile ni kikalakalu kya kuzwela ni poxolo Phawulu ku Loma, ‘wa bhange mbote kwa Phawulu, wa mwehela kuya mu di mona ni makamba mê, n’a kale ku usonyi, mbé a tambule yoso ya bhindamene,’ mu mbanza ya Sidonya. (Ikalakalu 27:3) Kyoso Phawulu ni akwa kya bobele ni ulungu mu njila yende katé ku kikôlo kya Melita, o athu kwenyóko a a ‘bhangela mbote ya dikota,’ a a wikila katé mwene ni túbhya phala kwota. (Ikalakalu 28:1, 2) O athu yó a bhangele kima kyambote. Maji phala kusangulukisa Jihova o muthu ka tokala kubhanga ngó mbote lumoxi wa tokala kubhanga o mbote ithangana yoso.

Jihova wa mesena kwila, o mbote i kala kidifwa kyetu ni ukexilu wetu wa mwenyu. Mukonda dya kiki mwene u tendelesa ‘kulondekesa’ o mbote. (Kolose 3:12) Maji kubhonza kubhanga o mbote ithangana yoso. Mukonda dyahi? Nange tu fula kubhanga o mbote mukonda tu akwa jisonyi, twala ni héle mba tu akwa lwimbi. Nange ki tu bhonza kubhanga o mbote kwa yó a tu talatala kyayibha. Maji se tu samba mu kubhinga o nzumbi ikôla phala kukayela o phangu ya Jihova mwene u tena ku tu kwatekesa kubhanga o mbote.—1 Kolindo 2:12.

 Kyebhi ki tu tena kwijiya bhebhi bhu twa tokala kusokelesa phala kubhanga dingi mbote? Dibhwidise: ‘O kwila ngene mu kwívwa kyambote akwetu ni kusota kutendela kyebhi kya mu dívwa? O kwila ngene mu nona kyoso akwetu kya bhindamena kikwatekesu? Kithangana kyebhi kya sukina ki nga bhange mbote ku muthu ki ndandu yami mba dikamba dya kazola?’ Xinda mbambe ya kwijiya kyambote o athu a ku kondoloka, benge-benge mu kilunga. Mu kubhanga kiki, nange wa-nda mona o ibhidi yene mu dibhana na-yu ni ibhindamu yâ. Mu kusuluka, fikisa kubhanga o mbote ku athu kala ki weji mesena ku ku bhangela. (Matesu 7:12) Mu disukilu bhinga kikwatekesu kwa Jihova, mwene wa-nda besowala o nguzu yê ya kukala u mukwa kubhanga mbote.—Luka 11:13.

Kyoso poxolo Phawulu kya soneka o ima ya kexile mu mu bhangesa kukala mukunji wambote, mwene wa tumbula we o kubhanga o mbote. (2 Kolindo 6:3-6) O athu a wabhelele Phawulu, mukonda mwene wa zwela yú wa bhange o mbote; ene exile mu mona kwila mwene wa a zolele. (Ikalakalu 28:30, 31) Kyene kimoxi we n’etu, se tu bhanga o mbote nange akwetu a-nda mesena kwijiya dingi o kidi. Kyoso ki tu bhanga o mbote ku athu oso, katé mwene ni yó a tu talatala kyayibha, kiki ki tena ku a bhangesa kuxinganeka ni kulungulula o ukexilu wâ. (Loma 12:20) Nange kupholo dya kwenda ene a-nda mesena mwene kudilonga o Bibidya.

Mu Palayízu athu oso a-nda di bhangela jinga o mbote mu dyâ. O athu a-nda fukunuka a-nda kwa bhangela mbote, sayi yá mu veji ya dyanga. Sé phata, kiki kya-nda ku a swinisa kubhanga we mbote ku akwa. Mu kidi, se-ku muthu ka wabhela kubhanga mbote mba ka wabhela kukwatekesa akwa, a-nda mwehela kukala mu Utuminu wa Nzambi. O akwa henda, ni akwa kubhanga o mbote, éne ngó a-nda tunga mu Palayízu katé ku hádya ni hádya. (Jisálamu 37:9-11) O mundu wa-nda kala kididi kya kondama ni kutululuka kwa kidi! Maji né mwene ande kya kubhixila o kithangana kiki, tu tena kyá kutambula mabesá a kubhanga mbote. Kyebhi?

O Bibidya yamba: “Muthu wa mbote, u bhanga mbote ku mwenyu wê. (Jisabhu 11:17) O athu a wabhela kukala ni akwa kubhanga o mbote, ene a a bhangela we mbote. Jezú wambe: “Yoso o nzôngo i mwa zongela akwenu, yene Nzambi ya mi zongela enu’enu. (Luka 6:38) Kyenyiki, ki kubhonzo phala mukwa kubhanga mbote kubhanga makamba ambote ni kudibhana na-u kyambote.

Poxolo Phawulu wambele o jiphange mu kilunga kya Efezo phala ‘ku di kwatekesa mudyâ, ku di xinganeka ni ku di loloka.’ (Efezo 4:32) Se oso mu kilunga a bhanga mbote ni kulondekesa henda, o kilunga ki kola dingi, ki kala ni muxima umoxi. Ki tu tokala, né ngó veji imoxi kulongolola o jiphange jetu, ku a ta jimbwembwe, kuzwela kima ki a xixima ku muxima né mwene mu kutonoka. Mu veji dya kiki, ithangana yoso o ima i tu zwela ya tokala kukwatekesa ni kuswinisa. (Jisabhu 12:18) Mu kubhanga kiki, o kilunga kya-nda sidivila Jihova ni kisangu-sangu.

Kala ki twa dilongo, kubhanga o mbote kidifwa ki tu londekesa mu yoso i tu zwela ni mu yoso i tu bhanga. Kyoso ki tu bhanga o mbote, twa mu kayela o phangu ya Nzambi yetu ya henda mukwa kubhana, Jihova. (Efezo 5:1) Kiki ki bhangesa o kilunga kyetu kukola dingi, ki bhangesa akwetu ku mu sidivila we. Mu kiki, tu bhange yoso i tu tena phala athu a mone kwila o Jimbangi ja Jihova, akwa kubhanga o mbote!