O KWILA eye udimona kala u muthu wala ni kisakidilu? Etwenyoso twa bhingi kuxinganeka mu kibhwidisu kiki. O Bibidya ya kanena kwila athu avulu mu izuwa yetu eji “kamba kusakidila.” (2 Tim. 3:2) Eye nange wejiya muthu ukingila kuma athu a tokala ku mu bhangela kima mba ku mu bhana kima. Ene a divwa kuma a tokala kwa bhangela kima, maji ene ka londekesa kisakidilu mu ima ya tambula. O kwila weji wabhela kukala ku mbandu dya muthu yú?

Ku mbandu yengi o jiselevende ja Jihova a zwela: “Mwila we ni kusakidila.” Twa bhingi kukayela o kituminu kiki: ‘Sakidilenu mu ima yoso.’ (Kol. 3:15; 1 Tes. 5:18) Mu kidi, kukala ni kifwa kya kusakidila ki tu bhangesa kudivwa kyambote. Kwene ima yavulu phala kulondekesa kisakidilu

O kima ki tu bhangesa kukala jinga athu a kisakidilu, o kwijiya kwila ki tu bhangesa kudivwa kyambote. Kyoso ki tu londekesa o kisakidilu mu kima ki twa tambula nange twanda divwa kyambote. O yó wa tambula o kisakidilu udivwa dingi kyambote. Mukonda dyahi o kulondekesa o kisakidilu ki tu sangulukisa etu ni athu amukwa? Mbo, tu tale o kifika kiki: Se sayi muthu wala polondo phala kukatula kithangana kyé phala ku kubhangela kima, mwene u mona kuma kya kutokala. Ene a ku suwu. Kyoso ki u mona kuma a ku suwu, eye u divwa kyambote. Tu tena kuxinganeka kwila kiki kyene kya bhiti ni Lute. Bowaji wa londekesa henda kwa Lute. Se phata kiki kya sangulukisa kyavulu Lute mu kwijiya kwila sayi muthu wa mu suwu.—Lute 2:10-13.

Twa tokala kulondekesa kisakidilu benge-benge kwa Nzambi. O kwila eye wene mu xinganeka mu mawujitu avulu a kubhana ni ene mu ku bhana, kikale mu nzumbi kikale mu xitu? (Mate. 8:17, 18; Ika. 14:17) Maji mu veji dya kubhanza ngó mu mbote yene ku kubhangela Nzambi, ki kima kyambote mwene kukatula kithangana phala kuxinganeka mu mabhesa avulu u wa tambula eye ni yó wa a zolo? O kuxinganeka mu kubhana kwa Mubhangi wê kwanda kolesa o kisakidilu kyé kwa mwene ni kidyelelu kyé kya kwijiya kuma mwene wa ku suwu, wa kuzolo.—1 Nzwá 4:9.

Twa tokala we kuxinganeka mu mbote i tu bhana Nzambi ni ku mu sakidila we bhu kaxi ka henda yê. (Jisá. 100:4, 5) Sayi musoneki wambe: “O kusakidila akwetu kubhangesa o athu kusanguluka dingi.”

O kima kyamukwa ki tu bhangesa kulondekesa o kisakidilu o kukwijiya kwila kima kikolesa o ukamba ni athu. Etwenyoso twa mesena kwila a tu bhana valolo. Kyoso ki u sakidila muthu ni kidi kyoso mukonda dya kima kyambote kya bhange, kiyadi kyenu mu kolesa o ukamba wenu. (Loma 16:3, 4) Mu kiki-phe, o muthu a mu londekesa o kisakidilu nange u tena kukwatekesa dingi muthu wengi. Mukonda mwene u mona kyoso akwa kya mu bhanga mbote, kiki ki mu bhangesa n’a kulondekesa o mbote. Kyene mwene. O kukwatekesa akwetu yene o njila i kwambata mu kisangusangu. Kiki kyene kyambe Jezú:“O kubhana kota mu kuzediwisa, o kutambula ndenge.”—Ika. 20:35.

Robert Emmons wala kupholo dya Xikola ya katunda ya California adilonga ya lungu ni kisakidilu, wambe kiki: “Phala kukala athu a kisakidilu, twa bhingi kutendelela kwila, etu we twa bhindamena akwetu. Sayi kithangana tu bhana maji mu kithangana kya mukwa a tu bhana we.” Phala kukala ku mwenyu ni kukala ni kisangusangu ku mwenyu, etu twa bhindamena akwetu mu mawukexilu avulu. Mu kifika, ene a tena ku tu bhana kudya ni ku tu  langa mu uhaxi. (1 Kol. 12:21) O muthu wa kisakidilu u bhana valolo ku ima ya mu bhanga akwá. Kyenyiki-phe, o kwila eye wala ni ukexilu wa kulondekesa kisakidilu kyoso akwenu kya kubhangela kima?

O kima kya mukwa ki tu bhangesa kukala ni kifwa kya kisakidilu, o kwijiya kwila kiki ki tu kwatekesa kukala ni kixinganeku kyambote mu veji dya kukala ni kixinganeku kyayibha. Mu ukexilu yú, o kixinganeku kyé kyanda kalakala kala, muswalu. Kyene kimoxi we, kyoso ki tu lungila o kixinganeku kyetu ku ima yambote o yayibha ikala kudima. Eye wanda tala dingi o ima mu ukexilu wambote, mu veji dya kudi kwatenena mu maka. Kyoso ki u bhandekesa o ukexilu wé wa kisakidilu eye wanda tena kutala dingi o ima mu ukexilu wambote. Se eye u xinganeka mu ima i kubhangesa kulondekesa kisakidilu, kiki kyanda kukwatekesa kubhanga o ima ya swinisa poxolo Phawulu, kyoso kyambe: “Enu-phe sanguluka jing’enu mwa Ngana.—Fil. 4:4.

O kukala muthu wala ni kisakidilu ki kukwatekesa kuxinganeka mu ukexilu wambote. “Mukonda o muthu wa kisakidilu ka tena kukala ni lwimbi, kuluwala ni difuba mu kithangana kimoxi.” O athu ala ni kisakidilu ka bhanze kyavulu mu jimbote. Ene a bhana valolo mu ima yala nawu, ka xinganeka kubandekesa-ku dingi.—Fil. 4:12.

Kuma u Kidistá, eye wejiya kwila, Satanaji wa mesena ku kuluwalesa ni ku kuzozesa bhu kaxi ka ibhidi i u dibhananayu mu izuwa yiyi ya sukidilaku. Satajani weji ki wabhela se uxinganeka kya ngó ku ima yayibha ni kudikalanganza mu kama koso-koso. Se kyene ki u kala, o athu kanda tena kwivwa kyambote o njimbu i wa abokela mu ukunji. Mu kidi, o kisakidilu kyenda kumoxi ni kibundu kya nzumbi ya Nzambi. Mu kifika, tu sanguluka ni ima yoso yambote ya tu bhana Nzambi, twa xikana mu ikanenu yê yoso ya lungu ni hádya.—Nga. 5:22, 23.

Kuma eye wa tokala ku mundu wa Jihova, nange u xikina mu ima yoso i twa soneka mu milongi yiyi ya lungu ni kisakidilu. Né kiki, eye wejiya kuma, sayi ithangana kyanda bhonza kulondekesa o kisakidilu ni kukala ni ixinganeku yambote. Kana kuluwala mukonda dya kudivwa kiki. Eye utena kukala ni kifwa kya kusakidila. Kyebhi ki ubhanga kiki? Izuwa yoso, xinganeka mu ima i wala nayu ku mwenyu, i ku bhangesa kusakidila. Se u bhanga kiki, o kisakidilu kyé kyanda dibandekesa. Kiki kyanda kusangulukisa dingi, o athu a xinganeka ngó mu ibhidi ya mwenyu ndenge. Xinganeka mu ima yambote ibhanga Nzambi ni makamba mê phala ku kuswinisa ni ku kusangulukisa. Se kibhana utena ku isoneka. Izuwa yoso, soneka ima iyadi mba itatu ya bhiti ku mwenyu wé i kubhangesa kusakidila.

Sayi athu a dilongo o maka yâ, ambe kwila: “kulondekesa o kisakidilu izuwa yoso, kulungulula o ukexilu ukalakala o wongo wetu, ku tu bhangesa we kukala ni ixinganeku yambote ni kusanguluka ku mwenyu wetu. O mukwa kusakidila, ukala dingi ni kisangusangu. Kyenyiki-phe, xinganeka jinga mu ima yoso yambote i wa tambula ku mwenyu, sanguluka ni ima yambote ya kubhiti kyá, enda ni kulondekesa jinga o kisakidilu! Mu veji dya kubanza kwila, o ima yoso i wala nayu ya kutokala mwene, eye wa tokala kubelesela o kitendelesu kiki: “Sakidilenu Jihova, kuma mwene mukwa kubhanga mbote.” Kyene mwene, wa tokala kusakidila “Nzambi mu ima yoso.”—1 Mal. 16:34; 1 Tes. 5:18.