1. Kyebhi ki wene mubhanga ukamba ni muthu?

PHALA kubhanga ukamba ni muthu woso-woso, twa bhingi kubhita nê kithangana. Kyoso ki muya ni kuzwela o ixinganeku yenu ni kyebhi ki mwa mu divwa, mwanda kituka makamba. Maji-phe, yalungu ni kukala dikamba dya Jezú, sayi ibhidi i tu sanga. Ibhidi yebhi?

2. Kyebhi o kibhidi kyadyanga ki tu dibhana nakyu?

² O kibhidi kyadyanga, kyenyiki: Ki tu tena kumona Jezú pholo ni pholo. Mu hama yadyanga, Jikidistá javulu ka dimwene ni Jezú pholo ni pholo. Né kiki, poxolo Phetele wambe: “Sumbala Kidistu mwene kiluwa mu mu mona, maji mwa mu zola. Sumbala kiki ki mwa mu mono, maji mwa mu xikana.” (1 Phe. 1:8) Kyenyiki-phe, tu tena kukala makambote a Jezú, sumbala ki twa mwijiya pholo ni pholo.

3. Kyebhi o kibhidi kyakayadi ki tu dibhana nakyu?

³ O kibhidi kyakayadi, kyenyiki: Ki tu tena kuzwela ni Jezú. Kyoso ki tu samba, twene mu zwela ni Jihova. Twejiya kwila, tu samba mu dijina dya Jezú. Maji mu misambu ki twene mu zwela ni Jezú. Mu kidi, Jezú ka mesena kwila, tu samba kwa mwene. Mukonda dyahi? Mukonda o musambu, ubhezelu. O muthu u twa tokala ngó kubheza, Jihova. (Mat. 4:10) Maji né kiki, tu tena kulondekesa kwila, twa zolo Jezú.

4. (a) Kyebhi o kibhidi kyakatatu? (b) Ihi i twanda dilonga mu milongi yiyi?

 ⁴ O kibhidi kyakatatu, kyenyiki: Jezú wa tungu ku dyulu. Kyenyiki, ki tu tena kubhita nê kithangana, kala ki tu bhanga ni muthu muxitu. Maji né kiki, tu tena kwijiya ima yavulu yalungu ni Jezú, sé ku mu mona pholo ni pholo. Twanda bhitulula ima iwana i tu tena kubhanga, phala kukolesa o ukamba wetu ni mwene. Maji kyadyanga, tu mone se mukonda dyahi twa tokala mwene kubhanga ukamba ni Kidistu.

5. Mukonda dyahi twa tokala kukala tu makamba Jezú? (Tala we o jikaxa “ O Ukamba ni Jezú u Tu Bhangesa Kukala ni Ukamba ni Jihova” ni “ Xila o Kikalakalu Kya Jezú mu Ukexilu wa Tokala.”)

⁵ Se twa mesena kukala ni ukamba wambote ni Jihova, twa tokala we kukala dikamba dya Jezú. Mukonda dyahi? Tala ngó ima iyadi. Kyadyanga, Jezú wambela o maxibulu mê: “Tata mwène wa mi zola, mukonda enu mwa ngi zola eme.” (Nzwá 16:27) Mwene wambe dingi: “Kana muthu u bhixila kwa Tata, wa kambe kwijila ko kwami.” (Nzwá 14:6) Kusota kukala dikamba dya Jihova, sé kukala dikamba dya Jezú, kwa sokwe ngó ni kusota kubokona mu inzo, sé kubokwena bhu dibhitu. Jezú wa te kifika kya difu kiki, kyoso kya jimbulula kwila, “eme ngi dibhitu dya jimbudi.” (Nzwá 10:7) Kyakayadi, Jezú walondekesa mu ukexilu wayuka, o idifwa ya Tat’ê. Mwene wambela o maxibulu mê: “Woso wa ngi mono eme, wa mono we Tata.” (Nzwá 14:9) Kyenyiki-phe, o ukexilu wa katunda wa kwijiya Jihova, o kudilonga ima yalungu ni mwenyu wa Jezú. Kyoso ki tuya ni kudilonga yalungu ni Jezú, twanda mu zola kyavulu. O kyoso o ukamba wetu ni Jezú ki uya ni kukula, o henda yetu kwa Tat’ê yanda dibandekesa dingi.

6. Kima kyebhi dingi ki tu bhangesa kubhanga ukamba ni Jezú? Jimbulula.

 ⁶ Twa tokala we kukala makamba a Jezú, phala Jihova n’a tambwijila o misambu yetu. Kiki kilombolola kwila, twa tokala kubhanga dingi, mu veji dya kuzwela ngó “mu dijina dya Jezú” ku disukilu dya misambu yetu. Twa tokala kutendela kyebhi Jihova kya tambwijila o misambu yetu, bhu kaxi ka Jezú. Jezú wambela o jipoxolo jê: “Yoso i mu bhinga kwa Tata mu dijina dyami, eme ngi i bhanga.” (Nzwá 14:13) Sumbala Jihova mwene wívwa o misambu yetu, mwene wa bhana kwa Jezú, o kutena phala ku kumbidila o vondadi Yê. (Mat. 28:18) Kyenyiki-phe, ande dya kutambwijila o misambu yetu, Nzambi umona se twene mu kayela o kitendelesu kya Jezú. Mu kifika, Jezú wambe: “Enu o athu se mu a loloka o ikuma yâ ya mi bhanga, Tat’enu ya dyulu u mi loloka wenu. Se mu kamba-phe kuloloka athu ikuma yâ, ni Tat’enu wene ku dyulu ka mi loloka we ikuma yenu.” (Mat. 6:14, 15) Kyenyiki-phe, twa tokala kubhanga yoso phala kutalatala akwetu, kala kya tu talatala Jihova ni Jezú!

7. Ananyi anda katula mbote mu sata ya kukula ya Jezú?

⁷ O athu ala ni ukamba ni Jezú, ene ngó anda katula mbote mu sata ya kukula. Kyebhi ki twejiya o maka ya? Jezú wambe kwila, mwene weji “bhana mwenyu wê bhu kididi kya makamba-mê.” (Nzwá 15:13) O athu a sidivila Jihova ande dya Jezú kwiza mu ngóngo, anda bhinga kudilonga yalungu ni Jezú ni ku mu zola. O mala ni ahatu kala Mbalahamu, Sala, Mozé ni Lahaba, anda ku afukununa. Maji né mwene o jiselevende jiji ja Jihova, anda bhinga kubhanga ukamba ni Jezú, phala kutambula o mwenyu wa kalelaku.—Nzwá 17:3; Ika. 24:15; Jihe. 11:8-12, 24-26, 31.

8-9. Kala kilondekesa Nzwá 15:4, 5, o ukamba ni Jezú u tu bhekela mbote yahi ni mukonda dyahi kiki kima kya tokala?

⁸ Etu twala ni kisangusangu kya kukalakala kumoxi ni Jezú, mu sidivisu ya kuboka ni kulonga o njimbu yambote ya Utuminu. Kyoso Jezú kyexile mu ixi, mwene wexile mulongexi. Tunde kya vutuka ku dyulu, kala mutwameni wa kilunga, Jezú wa mu suluka ni kwendesa o sidivisu ya kuboka ni kulonga. Mwene wene mu mona, ubhana valolo ku nguzu i ubhanga, phala kukwatekesa o athu ku mwijiya, ni kwijiya we Tat’ê. Mu kidi, tu tena ngó ku kumbidila o kikalakalu kiki, ni kikwatekesu kya Jihova ni Jezú.—Tanga Nzwá 15:4, 5.

⁹ O Mak’â Nzambi a tu longa kwila, twa tokala kuzola jinga Jezú phala kusangulukisa o muxima wa Jihova. Kyenyiki-phe, tu mone ima iwana i tu tena kubhanga, phala kukituka makamba a Jezú.

10. Kima kyebhi kyadyanga ki twa tokala kubhanga phala kukituka makamba a Jezú?

¹⁰ (1) Sota kwijiya kyambote Jezú. Tu tena kubhanga kiki, mu kutanga o madivulu a Matesu, Máluku, Luka ni Nzwá. Kyoso ki tu xinganeka mu musoso wa Bibidya, walungu ni mwenyu wa Jezú, twiza mu zola ni kuxila Jezú, mukonda dya ukexilu we wambote wa kudibhana ni athu. Sumbala mwène wexile o mesene, ka talatala o maxibulu mê kala abhika. Mu veji dya kiki, mwene wa atangela o ixinganeku yê ni kyebhi kyexile mu divwa. (Nzwá 15:15) Kyoso ene kya luwalele, mwene wa luwalele we, wa didile nawu kumoxi. (Nzwá 11:32-36) Kate mwene o jinguma jê, amono kwila, oso a xikinine o njimbu ya Jezú, akituka makamba mê. (Mat. 11:19) Kyoso ki tu kayela o ukexilu wa Jezú kudibhana  ni maxibulu mê, o ukamba wetu ni akwetu udibandekesa, tu sanguluka dingi. Kiki ki tu bhangesa kuzola ni kuxila dingi Kidistu.

11. Kima kyebhi kyakayadi ki twa tokala kubhanga phala kukituka makamba a Jezú ni mukonda dyahi kiki kima kya tokala?

¹¹ (2) Kayela o phangu ya Jezú mu kuxinganeka ni kubhanga o ima. Kyoso ki twijiya ni ku mu kayela kyambote, twanda mu zukama dingi. (1 Kol. 2:16) Kyebhi ki tu tena kukayela o phangu ya Jezú? Xinganeka ngó mu phangu yiyi. Jezú wa soto kukwatekesa dingi akwa, o kudisangulukisa mwene ndenge. (Mat. 20:28; Loma 15:1-3) Mukonda dya kukixinganeka kiki, mwene wexile mu ta kupholo o mbote ya akwa ni kuloloka. Mwene kexile mu dizangala ni kama koso-koso ka zwela akwa, yalungu ni mwene. (Nzwá 1:46, 47) Mwene kehela o itondalu ya akwa kufunyisa o ukexilu wa ku atala, sumbala kwa bhiti kya ithangana yavulu. (1 Tim. 1:12-14) Jezú wambe: “Kyene kya m’ijidila ku athu oso, kuma mwala mu jixibulu jami, se mwa di zolo mu dyenu.” (Nzwá 13:35) Kyenyiki-phe, kima kyambote kudibhwidisa: “O kwila nga mu bhanga yoso i ngi tena phala kukala jinga ni kutululuka ni jiphange jami?”

12. Kima kyebhi kyakatatu ki twa tokala kubhanga phala kukituka makamba a Jezú, ni kyebhi ki tu bhanga kiki?

¹² (3) Kwatekesa o jiphange ja Kidistu. Jezú utala yoso i tu bhanga phala o jiphange a a undu, kala kima ki twa bhange kwa mwene. (Mat. 25:34-40) O ukexilu wa beta-kota wa kukwatekesa o Jikidistá a a undu, o kuboka o Utuminu ni kubhanga maxibulu, kala kya tu tumina Jezú. (Mat. 28:19, 20; Ika. 10:42) O jiphange ja Kidistu, anda tena ngó kukumbidila o kikalakala kyadikota kya kutula o njimbu ku mundu woso, ni kikwatekesu kya “jimbudi jamukwá.” (Nzwá 10:16) Se wa tokala ku jimbudi jamukwa, lembalala kwila, ithangana yoso i ukalakala mu sidivisu ya kuboka, wa mu londekesa o henda yê ku jiphange ja Kidistu, ni kwa Jezú.

13. Kyebhi ki tu tena kukumbidila o kitendelesu kya Jezú ki tu sanga mu divulu dya Luka 16:9?

¹³ Tu londekesa we o ukamba wetu kwa Jihova ni Jezú, mu ku kwatekesa ni kitadi kyetu o kikalakalu kya mu kwendesa ene. (Tanga Luka 16:9.) Mu kifika, tu tena kubhana kitadi phala kukwatekesa o kikalakalu kya kuboka ku mundu woso. O kikalakalu kiki kyalungu ni kukwatekesa kuboka mu ididi mu a bhidamena aboki, kulanga o Ididi ya Ubhezelu, Ididi ya yônge ya makota, ni kukwatekesa o jiphange abhita mu mavuwa ni ibhidi yamukwa. Bhu kaxi ka kitadi ki tu sangela tu tena kukwatekesa o kilunga kyetu ni jiphange ja bhindama. (Jisa. 19:17) Ya ene o mawukexilu u tu tena kukwatekesa o jiphange ja Kidistu.

14. Kala kilondekesa o mukanda kwa Efezu 4:15, 16, kima kyebhi kyakawana ki twa tokala kubhanga phala kukituka makamba a Jezú?

¹⁴ (4) Kwatekesa o kilunga kya Jihova. Etu tu kolesa dingi o ukamba wetu ni Jezú o mutwameni wa kilunga, kyoso ki tu belesela yo a solo phala ku tu langa. (Tanga Efezu 4:15, 16.) Mu kifika, kindala twa mu bhanga yoso phala kulanga kyambote o Ididi yetu ya Ubhezelu. Phala kubhanga kiki, sayi ilunga a ibundu ni ilunga ya mukwa, o jimbambe a jisokejeka we. Mu ukexilu yú o kilunga kyene mu phopheka dingi kitadi kyene mu sangela o kilunga kya Jihova. Kyenyiki, sayi aboki ene mu tambula kikalakalu kyengi. O aboki ya afiyele nange a sidivila mu mivu yavulu mu kilunga, a bhange ukamba wa kidi ni jiphange. Maji kindala a bhingi phala kuya kusidivila mu kilunga kyengi. Jezú u sanguluka kyoso kya mona o jiphange jiji ja fiyele a mu belesela o ima ilunguluka mu kilunga!

15. Kyebhi o kukala dikamba dya Jezú kubandekesa o kusanguluka kwetu ku hádya?

¹⁵ Yo a a undu ni nzumbi ikôla, ala ni kidyelelu kya kukala ni Jezú kate ku hádya ni hádya ni ku tumina nê mu Utuminu wa Nzambi. Mu kidi, ene anda mu mona, anda zwela nê ni kubhita nê kithangana. (Nzwá 14:2, 3) O yo ala ni kidyelelu kya kutunga mu ixi anda tambula o henda ya Jezú ni kwa suwa. Sumbala ene kanda mona Jezú anda kituka makamba akidi, anda sanguluka ku mweyu mu yoso yanda tambula kwa Jihova ni Jezú.—Iza. 9:6, 7.

16. Mabesá ebhi u tu tambula mu kukala makamba a Jezú?

¹⁶ Kyoso ki tu xikina o kixanu kya Jezú phala kukituka makamba mê, tu tambula mabesá. Mu kifika, né mwene kindala tu katula kyá mbote mu henda ni kikwatekesu kyê. Twala ni ujitu wa kukala ni mwenyu wa kalelaku ku hádya. O kya beta dingi kota, o ukamba wetu ni Jezú, wanda tu bhekela kima kyala ni valolo ya katunda, o ukamba ni Jihova o Tata ya Jezú. Se phata, ujitu wa katunda kutwixana makamba a Jezú!