1. Ihi itena kufunyisa o diyala mu ukexilu wakutalatala o muhatu ni twana?

MUDYE ihi ilombolola kukala “mutwameni” wamwiji? Sayi mayala ehela o ijila mba o ukexilu wa asase kwa funyisa mu ukexilu wakutalatala o ahatu ni twana. Sayi phange watungu ku Europa, amwixana Yanita, wambe: “Kungatungu o athu abanza kwila o mayala ala dingi ni valolo o ahatu ndenge, ni kwila o ahatu a avwala phala kusidivila ngó omayala.” Phange yamukwa amwixana Luka watungu ku Estados Unidos, wambe: “Sayi jitata alonga o twana twa kwila, o ahatu phala kwa tala ngó, ki phala kwa bhana matwi, o ixinganeku yâ kiyala ni valolo.” Maji Jihova kamesena kwila o mayala atalatala o ahatu mu ukexilu yú. (Sokesa ni Máluku 7:13.) Kyenyiphe kyebhi o diyala kyatena kukala mutwameni wambote wamwiji?

2. Ihi yabhingi kwijiya o mutwameni wa mwiji ni mukonda dyahi?

² Odiyala dyamesena kukala “mutwameni” wambote wamwiji, kyadyanga watokala kutendela ihi ikingila Jihova kokwê. Mwene watokala we kutendela se mukonda dyahi Jihova wasolo muthu phala kukala mutwameni, ni ihi yatokala kubhanga o muthu phala kukayela o phangu ya Jihova ni Jezú. Mukonda dyahi kima kyambote o atwameni a miji kwijiya o maka enya? Mukonda Jihova wa a bhana o ungana. Kyenyiki, Jihova ukingila kwila ene akalakala kyambote ni ungana watambula.—Luka 12:48b.

3. Omukanda wa 1 Kolindu 11:3 itulonga ihi yalungu ni ungana mba kukala kupholo?

³ Tanga 1 Kolindu 11:3. O velusu yiyi ilondekesa kyebhi Jihova kyasokejeka o mwiji wê mungongo yoso. O kukala mutwameni mba kukala kupholo, kwalungu ni ima iyadi: O kukala ni ungana ni kubhakula jikonda. Jihova mwéne “omutwameni”  mba mwéne wabetakota mu kukala ni ungana. O an’ê oso kikale kudyulu mba mu ixi atokala kumubhakula jikonda. (Loma 14:10; Efe. 3:14, 15) Jihova wabhana kwa Jezú o ungana wakutumina o kilunga. Maji Jezú watokala kubhakula jikonda kwa Jihova mu ukexilu wamutalatala o kilunga. (1 Kol. 15:27) Jihova wabhana we kudiyala, o ungana wakwendesa o muhatu ni twana. Maji o diyala wandabhakula jikonda kwa Jihova ni Jezú mu ukexilu utalatala o mwiji.—1 Phe. 3:7.

4. Jihova ni Jezú ala ni ungana wakubhanga ihi?

⁴ Kuma Jihova mwéne Omutwameni wamwiji wê, kikale kudyulu mba mu ixi, mwene wala ni ungana wakubhana ijila. Mwene ukingila kwila o twana twê abelesela o ijila yiyi. (Iza. 33:22) Mukonda dyakukala o mutwameni wakilunga, Jezú wala we ni ujitu wakubhana itumu, ni kukingila kwila o Jikidistá a ibelesela.—Nga. 6:2; Kol. 1:18-20.

5. O atwameni a miji ala ni ungana wakubhanga ihi, ni mukonda dyahi tuzwela kwila o ungana wâ wala ni mbambe?

⁵ Kala Jihova ni Jezú, o atwameni a miji ala ni ungana wakubhana itumu ku miji yâ. (Loma 7:2; Efe. 6:4) Maji o ungana wâ, wala ni mbambe. Mukifika, o itumu yabhana, yatokala kulunga ni itumu yala mu Mak’â Nzambi. (Jisa. 3:5, 6) O atwameni a miji kala ni ungana wakubhana ijila kwa yó katokala ku miji yâ. (Loma 14:4) Kumbandu yamukwa, kyoso o twana kyakula anga atunda kubhata dya jitata jâ, ene atokala kusuluka mukuxila o tata, maji ene kala dingi bhoxi dya ungana wa tata.—Mat. 19:5.

6. Mukonda dyahi Jihova watubhana o kijila kyakukala atwameni?

⁶ Okijila kyakukala atwameni ujitu watubhana Jihova, mukonda mwene watuzolo. Okukala ni atwameni kukwatekesa omwiji wa Jihova kukala ni kutululuka ni kuyuka. (1 Kol. 14:33, 40) Se kikwexile okijila kiki, omundu wa Jihova keji disokejeka kyambote, o athu keji sanguluka, kana. Mukifika, kweji bhonza kwijiya se nanyi watokala kubatula omaka a moneka mu killunga, ni nanyi watokala kwa belesela.

7. Kala kilondekesa Efezu 5:25, 28, Jihova wamesena kwila o anumi atalatala kyebhi o ahatwâ?

⁷ Se okijila kyakukala mutwameni kijila kyambote, mukonda dyahiphe sayi ahatu adivwa kala amwatalatala kyayibha ku anumyâ? Kiki kibhita mukonda sayi anumi kene mubelesela o ijila ya Jihova phala omiji. Ene akayela o ifwa ni ijila ya ixi yâ. Ene nange atalatala kyayibha o ahatu’â, phala kusuwa ngó ojihanji jâ jayibha. Nange omunumi utalatala kyayibha muhatu phala kudivwa ngó kyambote, phala kulondekesa “se nanyi utumina kubhata”. Mwene nange ubanza: Eme kingitokala kujijidika omuhatu wami kungizola, maji ngitena kubhanga kima phala mwene kungikwatela woma. Kuma omuhatu wala ni woma we, odiyala nange uya ni kumutatesa. * Okuxinganeka mu ukexilu yú, kutena kufidisa omayala kuxila o ahatu ni kwa bhana okijingu kya atokala. Jihova kamesena kwila o anumi abhanga kiki.—Tanga Efezu 5:25, 28.

8. Kyebhi o diyala kyatena kudilonga kukala mutwameni wambote wamwiji?

⁸ Odiyala utena kudilonga kukala mutwameni wambote wamwiji, mukukayela o ukexilu wa Jihova ni Jezú, wakukalakala ni ungana wâ. Kyadyanga twandamona idifwa iyadi ya  Jihova ni Jezú kyoso kyalondekesa o ungana wâ. Mukusuluka twandamona kyebhi o atwameni amwiji kyatena kukayela o idifwa yiyi mukudibhana ni ahatu ni twana twâ.

9. Kyebhi Jihova kyalondekesa okulenduka?

⁹ Kulenduka. Kikale mudyulu mba mu ixi, Jihova mwéne Omuthu wabetakota mukukala ni unjimu. Nékiki, mwene wivwa o ixinganeku ya jiselevende jê. (Dim. 18:23, 24, 32) Jihova uxikina we o jindunge jâ. (1 Jis. 22:19-22) Jihova muthu wayuka, maji kindala, mwene kakingila kwila ojiselevende jê abhanga o ima ni kuyuka kwoso. Muveji dyakiki, mwene ukwatekesa ojiselevende jê phala kumusidivila mu ukexilu wafwama kabasa onguzu yâ. (Jisá. 113:6, 7) Kiki kyene kibhangesa o Bibidya kwixana Jihova kala “mukwatekexi” wetu. (Jisá. 27:9; Jihe. 13:6) Sobha Davidi wamono kwila mwene watena ngo kuditunda kyambote mukikalakalu kyê, mukonda dyakulenduka kwa Jihova.—2 Sam. 22:36.

10. Kyebhi Jezú kyalondekesa kwila wexile muthu walenduka?

¹⁰ Tumone ophangu ya Jezú. Mwene wexile Mesene ni Ngana yamaxibulu mê. Maji nékiki wa asukula o inama. Mukonda dyahi Jihova watumu kusoneka o musoso yú mu Bibidya? Sé phata mwene wabhange kiki phala o atwameni amiji ni athu amukwa kukayela ophangu yambote ya Jezú. Jezú wambe: “Kuma eme ngamibhana phangu, enu ni mu bhange kyoso ki nga bhange eme.” (Nzwá 13:12-17) Sumbala mwene wexile ni ungana, maji Jezú kakexile mukingila kwila o athu a musidivila, mwéne wexile musidivila akwa.—Mat. 20:28.

11. Kyebhi o atwameni amiji kyatena kukayela o kulenduka kwa Jihova ni wa Jezú?

¹¹ Madisá phala etu. Omutwameni wamwiji utena kulondekesa okulenduka mumawukexilu avulu. Mukifika, mwene kakingila kwila o muhatu ni an’ê a bhanga o ima yoso ni kuyuka. Né mwene se sayi athu ku mwiji kaxikina o kima kya mesena mwene, o diyala usota kwa évwa. Marley, watungu ku Estados Unidos, wambe: “Sayi bhabha eme ni mwadiwami ki tuxikina mukima kimoxi, maji ngimona kwila mwene ubhana valolo ni kuxila o ima ingizwela. Ande dyakubhanga kima kyosokyoso, mwene usota kungivwa hanji.” O atwameni a miji alenduka, a sota kukala polondo phala kukwatekesa mu ikalakalu kubhata,  né mwene kyoso o athu mumbanza azwela kwila kiki ki kikalakalu phala o mayala. Sayi bhabha kubhonza kukala muthu walenduka. Mukonda dyahi? Sayi phange amwixana Rachel wambe: “Mumbanza mwangi sase, se o diyala ukwatekesa o muhatu kusukula o malonga, ni kuxixila kubhata, o jivizinyu ni jindandu amateka kudibhwidisa: ‘Okwila yú diyala mwene?’ Ene a banza: Mwene kamutena kutumina muhatwê.” Se mumbanza muwatungu o athu ala we ni kibhanzelu kiki, lembalala kwila Jezú wasukula o inama yamaxibulu mê, sumbala okikalakalu kiki kyexile kya abhika. Omutwameni wambote wa mwiji kathandanganya ni ima yanda zwela mba yanda xingakena athu engi; phala mwene, okyabeta okota omuhatwê ni twana twê kukala kyambote. Maji sayi dingi kidifwa kyamukwa kyabetakota kyatokala kukala nakyu omutwameni wambote wa mwiji. Kidifwa kyebhi?

12. Kyebhi Jihova ni Jezú kyalondekesa kwila atuzolo?

¹² Henda. Ohenda yene iswinisa Jihova kubhanga o ima yoso. (1 Nzwá 4:7, 8) Mwene ulondekesa kwila watuzolo mukudikila o ibhindamu yetu munzumbi, bhukaxi ka maka mê, o Bibidya, ni bhukaxi kakilunga kyê. Mwene utukwatekesa kudivwa kwila, mwene watuzolo. Abha o ibhindamu yetu muxitu? O Bibidya yamba kwila Jihova utena kutubhana “o ima yoso yakuzediwa phala o mbote yetu.” (1 Tim. 6:17) Kyoso kituta kituxi, Jihova utubazela, maji kakambe kutuzola. Ohenda ye kokwetu, yene yamubhangesa kubhana osata yakukula. Jezú walondekesa we kwila watuzolo mukubhana omwenyu wê phala kutubhulula. (Nzwá 3:16; 15:13) Kanaku kima kitena kubhwisa ohenda ya Jihova ni Jezú kwa yó akolokota mu ufiyele wâ.—Nzwá 13:1; Loma 8:35, 38, 39.

13. Mukonda dyahi kima kyambote omutwameni wamwiji kulondekesa kwila wazolo omuhatu ni twana twê? (Tala we okaxa “ Ihi Itena Kubhanga Odiyala Dyakazala Kindala Phala Omuhatwê Kumuxila?”)

¹³ Madisá phala etu. Ohenda yene yatokala kuswinisa omutwameni wamwiji kubhanga o ima yoso. Mukonda dyahi kiki kima kyambote? Poxolo Nzwá wambe: “Woso ukamba kuzola  phangi’ê [mba mwiji wê], wa mumumona ni mesu, katena kuzola Nzambi, kiluwa a mumona.” (1 Nzwá 4:11, 20) Omutwameni wamwiji wazolo omuhatu ni twana twê, ukukayela ophangu ya Jihova ni Jezú, ulanga o ibhindamu yamwiji mu nzumbi ni muxitu. (1 Tim. 5:8) Mwene ulonga otwana, u abazela we. Mwene usola ima iximanesa Jihova, ibhekela mbote kumwiji. Kindala, twandamona kyebhi o atwameni amiji kyatena kukayela o phangu ya Jihova ni Jezú mukubelesela o itendelesu yiyi.

14. Kyebhi omutwameni wamwiji kyalanga o ibhindamu munzumbi yamuhatu ni twana twê?

¹⁴ Kulanga o ibhindamu ya mwiji munzumbi. Mukukayela ophangu ya Jihova, Jezú wakexile mulanga o ibhindamu ya akayedi yê munzumbi. (Mat. 5:3, 6; Mál. 6:34) Kyene kimoxi we, o atwameni amiji ejiya kwila okikalakalu kyabetakota kyalanakyu ene, okulanga o ibhindamu munzumbi yamiji yâ. (Mate. 6:6-9) Omutwameni wamwiji ubhanga kiki mukutanga ni kudilonga o Mak’â Nzambi ni mwiji wê, kuya mu yonge, kuboka o njimbu yambote, phala akale jinga makamba a Jihova.

15. Kyebhi omutwameni wamwiji kyatena kubhangesa omuhatu ni twana kudivwa kwila wa azolo?

¹⁵ Kuximana omwiji. Jihova walondekesa kwila wazolele kyavulu Mon’ê, Jezú, kate mwene bhupholo ya athu. (Mat. 3:17) Kyene we kyabhange Jezú ku akayedi yê. Jezú walondekesa kwila wa azolele bhukaxi ka izwelu ni ibhangelu yê. Mukonda dyakiki o maxibulu mê alondekesa we kwila amuzolele. (Nzwá 15:9, 12, 13; 21:16) Omutwameni wamwiji utena kulondekesa ohenda yê kumuhatu ni twana, mu ima yabhanga. Mukifika, mukudilonga nawu o Bibidya, mukubhana valolo ku muhatu ni twana, mukwaximana kate mwene bhupholo ya athu, se kibhana.—Jisa. 31:28, 29.

16. Ihi dingi yatokala kubhanga omutwameni wamwiji? Mwene watokala kudilanga mu ihi?

¹⁶ Kulanga o ibhindamu yamwiji, mu xitu. Jihova walange o ibhindamu mu xitu ya akwa Izalayele kate mwene kyoso kyabhukumukine, anga a bhingile kwakaxtikala. (Mate. 2:7; 29:5) Lelu, mwene ulanga we o ibhingamu yetu muxitu. (Mat. 6:31-33; 7:11) Kyene we kimoxi, Jezú wadisa o akayedi’ê. (Mat. 14:17-20) Mwene we wasuwu osawidi yâ. (Mat. 4:24) Omutwameni wamwiji wamesena kusangulukisa Jihova, watokala kulanga o ibhindamu yamwiji mu xitu, maji mwene watokala kukala ni ixinganeku yambote yalungu ni salu. Mwene katokala kwehela osalu kumufidisa kuximana omwiji ni kulanga o ibhindamu yâ munzumbi.

17. Kyebhi Jihova ni Jezú kyatulonga ni kutubazela?

¹⁷ Kulonga. Jihova utulonga, utubazela, maji phala ombote yetu. (Jihe. 12:7-9) Mukukayela o phangu ya Tat’ê, Jezú walongo o akayedi yê ni henda yoso. (Nzwá 15:14, 15)  Mwene ubazela se muthu utondala, maji ukibhanga ni henda. (Mat. 20:24-28) Mwene wejiya kwila etu tu akwa ituxi, ni kwila twene mulweza.—Mat. 26:41.

18. Ihi ilembalala o mutwameni wambote wamwijii?

¹⁸ O mutwameni wamwiji ukayela ophangu ya Jihova ni Jezú, mwene utendela akwa. Mwene wejiya kwila o athu atokala kumwiji wê akwa ituxi we. Kyenyiki mwene “kafutuluka” kyavulu ni muhatu ni twana. (Kol. 3:19) Muveji dyakiki mwene usota kukayela okitendelesu kyala mudivulu dya Ngalásya 6:1, mwene usota kwabazela “ni kubhâtama kwoso,” mukulembalala kwila mwene we mukwa ituxi. Kala Jezú, mwene wejiya kwila o ukexilu wabetakota wakulonga, okubhana phangu yambote.—1 Phe. 2:21.

19-20. Kyebhi omutwameni wambote wamwiji kyatena kukayela o phangu ya Jihova ni Jezú mu kusola ima ni kubatula maka?

¹⁹ Kusola o ima phala o mbote yamwiji. Jihova usola o ima mukuxinganeka o mbote ya akwa. Mukifika, mwene katubhana omwenyu phala ombote yê kana, maji phala okusanguluka kwetu. Séku we muthu wamujijidika kubhana o mwenyu wa Mon’ê phala kutubhulula ku ituxi. Mwene wabhange kiki muvondadi yê mwene, mukubhanza ombote yetu. Jezú wasolo we ima mukuxinganeka mumbote ya akwa. (Loma 15:3) Mukifika, sumbala watohokele mwene wayi mulonga mundu wavulu, muveji dyakunyoha.—Mál. 6:31-34.

²⁰ O mutwameni wambote wamwiji wejiya kwila o kikalakalu kyamubhonzo dingi, o kubhatula maka phala o mbote yamwiji. Mwene umona omaka yá kala maka adikota. Mwene uxinganeka kyambote ande dyakubatula omaka, wehela Jihova kumukwatekesa kusola kyambote. * (Jisa. 2:6, 7) Mukubhanga kiki, mwene uxinganeka jinga mumbote yanda katula omwiji, muveji dyambote yandakatula mwene.—Fil. 2:4.

21. Ihi itwandadilonga mumilongi yakayela?

²¹ Jihova wabhana kikalakalu kyadikota ku atwameni amiji, mwene ukingila kwila ene akumbidila kambote o kikalakalu kiki. Maji omuwatemeni wamwiji ubhanga yoso phala kukayela ophangu ya Jihova ni Jezú, wanda ditunda kyambote. Se o muhatu wê umukwatekesa, ene andakala ni ukaza wazediwa. Kyebhi o muhatu kyatena kumona o ungana wa munumyê? Ibhidi yebhi yadibhana nayu? Twandadilonga omaka yá mumilongi yakayela.