1-2. Kala kilondekesa Matesu 5:11, kyebhi kitwatokala kudibhana ni ibhidi?

JEZÚ wakanene ku maxibulu mê kwila, ene ejikala ni kusanguluka kwakidi. Mwene watangele we kwa yó amuzolele kwila, ejidibhana ni ibhidi ni izukutisu. (Mat. 10:22, 23; Luka 6:20-23) Etu tusanguluka mukukala maxibulu a Kidistu. Maji kyebhi kitudivwa kyoso kyatuzukutisa kujindandu jetu, ni jinguvulu, mba kyoso ojikoleka jetu jasalu mba jaxikola kya tuswinisa kubhanga kima kyayibha? Okuxinganeka mu ima yiyi kutena kutubhekela hele.

² Athu avulu kasanguluka kyoso kyabhita mu izukutisu. Maji o Mak’â Nzambi atutangela kwila twabhingi kusanguluka. Mukifika, Tiyaku wasoneka kwila kitutokala kuluwala kyoso kitudibhana ni maka, maji twatokala kusanguluka. (Tiya. 1:2, 12) Jezú wambe kwila twatokala kusanguluka nemwene kyoso kyatuzukutisa. (Tanga Matesu 5:11.) Kyebhi ki tutena kusanguluka sumbala ni ibhidi? Tutena kukatula mbote mu itendelesu yabhana Tiyaku ku Jikidistá jadyanga. Kyadyanga tudilonge o ibhidi yadibhana nayu o Jikidistá jadyanga.

3. Ihi yabhiti kyoso Tiyaku kyakituka dixibulu dya Jezú?

³ Kyoso Tiyaku phange ya Jezú, kya kituka dixibulu, ojikidistá ku Jeluzaleme amateka kwa zukutisa. (Ika. 1:14; 5:17, 18) Kyoso dixibulu Xitevá kya mujibha, Jikidistá javulu alenge, “ene oso anga a mwanganena mu jixi ja Judeya ni Samádya,” mukusuluka alengela ku Xipele ni ku Andyokya. (Ika. 7:58–8:1; 11:19) Tutena kumona kwila omaxibulu adibhanene ni ibhidi yavulu. Ne mwene kiki, ene aboko onjimbu yambote ni kuswina kwoso kabasa kididi mwaditela. Ene ajikula ilunga  mu ididi yavulu, ya akwatekesa athu avulu kukituka Jikidistá. (1 Phe. 1:1) Maji mukubhita ithangana, ene adibhana dingi ni ibhidi yavulu.

4. Ibhidi yebhi dingi yadibhana nayu o Jikidistá jadyanga?

⁴ O Jikidistá jadyanga adibhana ni ibhidi yavulu. Mukifika, kumuvu wa 50 K.K., omwenexi wa Loma, Kilawudyu, watumu kukaya o Jijudé joso ku Loma. Kyenyiki, ojijudé joso jakitukile Kidistá, abhingile kuxisa ojinzo jâ phala kuya mu ididi yengi. (Ika. 18:1-3) Kumuvu wa 61 K.K., poxolo Phawulu wasoneka kwila Jikidistá javulu a axongwena bhupholo ya athu, a ate mukaleya, a atambula o ima yâ. (Jihe. 10:32-34) Kala o athu amukwa, o Jikidistá jadyanga exile mudibhana we ni mawuhaxi ni wadyama.—Loma 15:26; Fil. 2:25-27.

5. Ibhwidisu yebhi itwanda tambwijila?

⁵ Kyoso Tiyaku kyasoneka omukanda wê ande dyamuvu wa 62 K.K., mwene wejidile kyambote o ibhidi yexile mudibhana nayu ojiphange jê. Jihova watumu Tiyaku kusonekena o Jikidistá, phala kwabhana jindunge jeji kwakwatekesa kusanguluka, sumbala exile mudibhana ni ibhidi. Kindala twandadilonga omukanda wa Tiyaku ni kutambwijila o ibhwidisu yiyi: Ihi ilombolola okusanguluka kwatumbula Tiyaku? Ihi itena kubhangesa o Kidistá kukamba kusanguluka? Kyebhi o unjimu, kixikanu ni kuswina, kutukwatekesa kusanguluka jinga kabasa ibhidi itudibhana nayu?

6. Kala kilondekesa Luka 6:22, 23, mukonda dyahi o Kidistá utena kusanguluka kyoso kyadibhana ni ibhidi?

⁶ Athu avulu axinganeka kwila atena kusanguluka se akala ni sawidi yambote, kitadi kyavulu mba kutululuka kumwiji. Maji okusanguluka kwasoneka Tiyaku kubhanga mbandu  kukibundu kya nzumbi ya Nzambi. Kyenyiki, kabasa kima kitena kubhita kumwenyu wetu, etu tutena kusanguluka. (Nga. 5:22) O Kidistá utena kusanguluka mukwijiya kwila wamusangulukisa Jihova, ni kukayela ophangu ya Jezú. (Tanga Luka 6:22, 23; Kol. 1:10, 11) Tutena kusokesa okusanguluka kwetu ni mukengeji wakandeya. Okandeya akasweka phala ka kajime kwala okithembu mba mvula. Etu tutena kusanguluka jinga nemwene ni ibhidi itudibhana nayu kumwenyu. Ne mwene setukamba kitadi mba tukata, twandasanguluka jinga. Twandasanguluka we ne mwene kya tuxongwena mba kyatuzukutisa kumwji mba ku athu engi. Tutena kusanguluka ne mwene kyoso athu amukwa kyasota kutuluwalesa. O ibhidi itudibhana nayu mukonda dya kixikanu kyetu, ilondekesa kwila etu tumaxibulu akidi a Kidistú. (Mat. 10:22; 24:9; Nzwá 15:20) Kyene kyabhangesa Tiyaku kusoneka: “Enu jiphange jami, kitenukyu kuzediwa kwoso, se mubhita ni malamba mavulu o matelu.”—Tiya. 1:2.

7-8. Mukonda dyahi okixikanu kyetu kikola dingi kyoso kitudibhana ni ibhidi?

⁷ Tiyaku uzwela se mukonda dyahi o Jikidistá ala polondo phala kudibhana ni ibhidi yavulu. Mwene wambe: “Kyazubha kumilola o kixikanu kyenu, kimibhangesa dingi kukolokota.” (Tiya. 1:3) O ibhidi atena ku isokesa ni túbhya atemesa nayu ofelu. Kyoso ofelu kya itemesa anga a italalesa, yene ikola dingi. Kyene kimoxi we, kyoso kitukolokota mu ibhidi, okixikanu kyetu kikola dingi. Kiki kyene kyabhangesa Tiyaku kusoneka: “O kukolokota kwenuphe, swinenu naku, phala ku mizubhile kikalakalu kyê mbe mutenene mukale kivimba.” (Tiya. 1:4) Kyoso kitumona kwila o ibhidi itwamudibhana nayu yamukolesa okixikanu kyetu, tutena kusanguluka.

⁸ Mumukanda wê, Tiyaku wasoneka we o ima itena kutubhangesa kukamba kusanguluka. Ima yebhi ni kyebhi kitutena ku itolola?

9. Mukonda dyahi twabhingi kukala ni unjimu?

⁹ Ihi itena kutuluwalesa? Okukamba kwijiya itwandabhanga. Kyoso kitubhita ni maka kumwenyu, twamesena kusota okikwatekesu kya Jihova phala ni tusole ima yanda musangulukisa, yanda kwatekesa we ojiphange jetu, ni kutukwatekesa kukolokota mu ufiyele wetu kwa Jihova. (Jel. 10:23) Twabhingi kukala ni unjimu phala kwijiya ihi itwandabhanga ni ihi itwandazwela kwa yó atuzukutisa. Okukamba kwijiya ihi itwandabhanga, kutena kutuluwalesa.

10. Kala kyambe Tiyaku 1:5 ihi itwatokala kubhanga phala kukala ni unjimu?

¹⁰ Ihi iwatokala kubhanga phala kusanguluka jinga? Bhinga unjimu kwa Jihova. Se twamesena kusanguluka kyoso kitudibhana ni ibhidi,  kyadyanga twatokala kubhinga kwa Jihova bhukaxi kamusambu, phala kutubhana unjimu utwabhindamena, phala ni tusole kyambote. (Tanga Tiyaku 1:5.) Ihi itwatokala kubhanga se tudivwa kwila Jihova ka mutambwijila omisambu yetu ni lusolo? Tiyaku wambe kwila twatokala ‘kusuluka ni kubhinga’ kwa Nzambi. Jihova kadivu kyayibha se tumubhinga jinga o unjimu muveji javulu. Mwene kandathathamana netu. O Tata yetu yadyulu mukwa ‘kubhana ni henda yoso,’ kyoso ki tumubhinga unjimu phala kudibhana ni ibhidi. (Jisá. 25:12, 13) Mwene umona o ibhidi itudibhana nayu, uluwala kyoso kitutala hadi, ubhanga yoso phala kutukwatekesa. Sé phata, kiki kitusangulukisa kyavulu! Kyebhi Jihova kyatubhana unjimu?

11. Ihi dingi itwatokala okubhanga phala kukala ni unjimu?

¹¹ Jihova utubhana unjimu bhukaxi ka Maka mê. (Jisa. 2:6) Phala kukala ni unjimu twabhingi kudilonga o Mak’â Nzambi ni madivulu metu. Maji kukala ni kwijiya kwavulu kikisoko, twatokala kubhanga yoso itutuma Nzambi. Tiyaku wasoneka: “Kalenu mu abhangi a maka, kana akwa kwivwa ngó.” (Tiya. 1:22) O kubelesela yoso ituma Nzambi, kutubhangesa kukala akwa kutululuka, akwa kuxila o ixinganeku ya akwâ, ni akwa kuloloka. (Tiya. 3:17) O idifwa yiyi itukwatekesa kusanguluka jinga nemwene kyoso kitudibhana ni ibhdi.

12. Mukonda dyahi twatokala kwijiya kyambote o Bibidya?

¹² O Mak’â Nzambi edi kala lumwenu, atukwatekesa kumona bhebhi bhutwatokala kudisokejeka dingi ni kyebhi kitutena kubhanga kiki. (Tiya. 1:23-25) Mukifika, kyoso kitudilonga o Mak’â Nzambi, tutonginina kwila twatokala kusosolola onjinda yetu. Ni kikwatekesu kya Jihova, tutena kumona ihi itwatokala kubhanga phala kutululuka kyoso athu mba maka, kyatubhekela njinda. Okutululuka kwa  muxima kutukwatekesa kuditunda kyambote kyoso kitudibhana ni maka. Twandatena kuxinganeka dingi kyambote ni kusola we kyambote. (Tiya. 3:13) Kyenyikiphe, twatokala kwijiya kyambote o Bibidya!

13. Mukonda dyahi twatokala kudilonga ophangu ya athu a atumbula mu Bibidya?

¹³ Sayi bhabha tudimuka ngó kyoso kitudibhana kya ni ibhidi. Maji yú ki wene o ukexilu wambote wakudilonga. O ukexilu wambote wakukala ni unjimu, okudilonga ni itondala ya akwetu, ni ima yambote yabhanga. Kyene Tiyaku kyatuswinisa kukayela ophangu ya athu a atange mu Bibidya kala: Mbalahamu, Lahaba, Jobe ni Elija. (Tiya. 2:21-26; 5:10, 11, 17, 18) Ojiselevende jiji jafiyele ja Jihova, akolokotele kyoso kyadibhanene ni ibhidi yeji kwa katula okisangusangu. Ophangu yâ yakukokolota, itulondekesa kwila ni kikwatekesu kya Jihova, etu we tutena kukolokota.

14-15. Mukonda dyahi twatokala kuzubha ojiphata jetu kumuxima?

¹⁴ Okibhidi: Okukala ni jiphata yalungu ni ima ituxikina. Sayi bhabha kutubhonza kutendela milongi itusanga mu Bibidya. Mba nange Jihova katambwijila omisambu yetu kala kitwakingile. Kiki kitena kutubhekela jiphata. Se kitubhange kima kujiphata jiji, jene jitena kuzozesa okixikanu kyetu, ni kuzanga o ukamba wetu ni Jihova. (Tiya. 1:7, 8) Kate jitena kutubhangesa kukamba okidyelelu kyetu kyalungu ni hádya.

¹⁵ Poxolo Phawulu wasokesa okidyelelu kyetu ni kifikidilu kya ulungu. (Jihe. 6:19) O kifikidilu kiki, kikwatekesa o ulungu phala kukala mu kididi kimoxi nemwene kyoso kikumoneka kithembu, phala we ki idiphuphe kumatadi. Maji okifikidilu kikala ngó ni valolo se akikuta mwene ni mukolo wakolo kyambote, ki ibatuke. O mukolo wakambe nguzu ki utena kukwata o ulungu. Kyene we kimoxi, setukala ni jiphata, okixikanu kyetu kyanda zoza. Kyoso kikumoneka maka, omuthu wala ni jiphata kanda dyelela kwila Jihova wanda kumbidila o ikanenu Yê yoso. Se tukamba okixikanu, tukamba we okidyelelu. Kala kyambe Tiyaku, omukwa jiphata “usokela ni dibhuku ku musanza, dyalu kayakaya kwala o kithembu ni kudizabujula ku mbandu joso.” (Tiya. 1:6) O muthu ukala kiki, katena kusanguluka!

16. Ihi itwatokala okubhanga se twala ni jiphata?

¹⁶ Phala kubatula ojiphata jé: Watokala kukolesa okixikanu kyé. Batula omaka ni lusolo, kana kukala ni mixima iyadi. Mu izuwa ya polofeta Elija, omundu wa Jihova wexile ni jiphata, kadyelele dingi mu ima yexile muxikina. Elija wa atangela: ‘Kumbi kuxi di mwandu lembwa kutengwina bhu kaxi ka ixinganeku iyadi? O Jihova se mwéne Nzambi, mukayedyenu; maji ki kila o Bahale mwa mumono kuma mwéne watokala, mukayedyenu!’ (1 Jis. 18:21) Lelu we kyene kimoxi, twatokala kubhanga kima ni lusolo. Twatokala kutokwesa phala kudixikinisa kwila, Jihova mwéne Nzambi, o Bibidy yéne o maka mê, o Jimbangi ja Jihova, éne omundu wê. (1 Tes. 5:21) Okubhanga kiki kwandazubha ojiphata ni kukolesa okixikanu kyetu. Se twabhindamena kikwatekesu phala kuzubha ojiphata kumuxima, tutena kubhinga kutufunga. Twatokala kubhanga kima ni lusolo phala tukale ni kusanguluka mukusidivila Jihova!

17. Ihi yandabhita se tukamba kuswina?

¹⁷ O kibhidi: Kyoso ki tuluwala. O Mak’â Nzambi azwela: “Bhu kizuwa kya phaxi, se ubeleketa, kwabhu, ni nguzu yé itola.” (Jisa. 24:10) Okizwelu mu Hebalayiku “kubeleketa,” kitena kulombolola “kukamba kuswina.” Se ukamba kuswina mba kukolokota, ki wanda tena we kusanguluka.

18. Ihi ilombolola okizwelu kukolokota?

¹⁸ Ihi iwatokala kubhanga? Bhinga okuswina kwa Jihova, phala utene kukolokota. Twabhingi  kuswina phala kudibhana ni ibhidi. (Tiya. 5:11) Bhabha okizwelu “kukolokota” kyatumbula Tiyaku, kwalungu ni muthu wemana bhu kididi kyê. Kiki kitena kutubhangesa kuxinganeka disoladi dyaswina, wemana bhukididi kyê muveji dya kulenga ojinguma jamukwiza.

19. Ihi itutena kudilonga mu phangu yatuxila Phawulu?

¹⁹ Yalungu ni kuswina ni kukolokota, poxolo Phawulu watuxila phangu yambote. Sayi ithangana mwene wadivwile we kwila wexile muzoza, maji watenene kukolokota mukonda wadyelele kwa Jihova, yó watenene ku mubhana o nguzu yabhindamene. (2 Kol. 12:8-10; Fil. 4:13) Kala Phawulu, etu we tutena kukala ni kixikanu kyakolo ni kukolokota, se tuxikina ni kulenduka kwoso kwila twabhindamena okikwatekesu kya Jihova.—Tiya. 4:10.

20-21. Kidyelelu kyahi ki utena kukala nakyu?

²⁰ Tutena kudyelela kwila, o ibhidi itudibhana nayu, ki kaxtiku ka Jihova. Tiyaku wa tudyelelesa kwila: “O muthu kya dyanguka mu ithangana yamalamba yenyiyi, kele wixi: ‘Nzambi mwéne wangi dyangula.’ Mukonda Nzambi kene ku mudyangula ku kima kyayibha kyosokyoso, o mwene we, kene mu dyangula muthu.” (Tiya. 1:13) Se tudyelela mu izwelu yiyi, twandazukama dingi kwa Tata yetu yadyulu.—Tiya. 4:8.

²¹ Jihova “kene ni kwaluluka mba kulunguluka.” (Tiya. 1:17) Mwene wakwatekesa o Jikidistá jadyanga kutolola o ibhidi yadibhana nayu. Lelu, mwene we wandatukwatekesa kala muthu mudyetu. Ni nguzu yoso, bhinga kwa Jihova phala kukukwatekesa kukala ni unjimu, kixikanu ni kuswina. Mwene wandatambwijila omisambu yé. Utena kudyelela kwila, mwene wandakukwatekesa kusanguluka jinga, kyoso ki udibhana ni ibhidi!