1. Ujitu webhi utwala nawu?

UJITU wadikota utwala nawu kutokala mu kilunga kya Jihova! Etu twala mupalayizu mu nzumbi yezala ni kutululuka, tu mundu wasanguluka, kyebhi o kididi kyê mu kilunga?

2. Kifika kyahi kyate poxolo Phawulu mu mikanda yavulu yasoneka?

² Twandadilonga dingi o maka yâ mukutonginina o kifika kyate poxolo Phawulu mumikanda yasoneka bhukaxi ka nzumbi ikôla. Mu mikanda yiyi, poxolu Phawulu wasokesa o kilunga ni mukutu wamutu. Mwene wasokesa o athu mu kilunga ni idyandu yamukutu.—Loma 12:4-8; 1 Kol. 12:12-27; Efe. 4:16.

3. Madisa ebhi atatu utwandadilonga mu milongi yiyi?

³ Mu milongi yiyi, twandadilonga madisa atatu akatunda itutena kudilonga mu kifika kyate poxolu Phawulu. Kyadyanga, etwenyoso twala ni valolo mu kilunga kya Jihova *. Kayadi, twandazwela se ihi itwatokala okubhanga se kyamutubhonza kumona okididi kyetu mu kilunga. Katatu, twandadilonga se mukonda dyahi twabhingi kukumbidila o kikalakalu kyatubhana ngana Nzambi mu kilunga kyê.

4. Ihi itulonga o divulu dya Loma 12:4, 5?

⁴ O disa dyadyanga ditukatula mukifika kya poxolo Pawulu kyenyiki: Etwenyoso twala ni kididi kumwiji wa Jihova. Phawulu wamateka o kifika kyê mukuzwela: “Mukwâ ni kitwala ni idyandu yavulu mu mukutu umoxi, o idyandu yoso ki isokelaku mu ufunu. Kyene wê ni etu, suke twavulu, maji twala tu mukutu umoxi mwa Kidistu. Etu’oso twala tu idyandu twadisokojeka mu dyetu suke idyandu yoso ki isokela, maji mukutu wene umoxi.” (Loma 12:4, 5) Ihi yamesenene kuzwela Phawulu? Mwene wamesenen kuzwela kwila, etwenyoso twala ni ikalakalu ki idifu mu kilunga, maji etwenyoso twala ni valolo.

5. Mawujitu ebhi “abhana” Jihova phala kulanga o kilunga?

⁵ Kyoso ki wivwa o izwelu oso ala ni kididi mu kilunga, mu kilunji kyé nange ubanza yo amukwendesa o ikalakalu mu kilunga. (1 Tes. 5:12; Jihe. 13:17) Twejiya kwila bhukaxi ka Kidistu, Jihova wabhana “mawujitu” phala o kilunga kyê. (Efe. 4:8) O “mawujitu” yâ o jiphange atokala ku Kibuka kya Utuminu, o akwatekexi a Kibuka kya Utuminu, o Ibuka ya Jifiliyale, o tufunga twa ilunga, o alongexi a jixikola mu kilunga, o tufunga mu ilunga ni akwatekexi atufunga. O jiphange joso jiji a asolo bhukaxi ka nzumbi ikôla phala kulanga o jimbudi ja Jihova ni kusidivila o kilunga.—1 Phe. 5:2, 3.

6. Kala kilondekesa o mukanda wa 1 Tesalonika 2:6-8, o jiphange asolo bhukaxi ka nzumbi ikôla abhanga nguzu phala kubhanga ihi?

⁶ O jiphange jiji asola bhukaxi ka nzumbi ikôla phala kubhanga ikalakalu yavulu. O idyandu yamukutu, ikalakala kumoxi kala o inama ni maku phala ombote yamukutu woso. O jiphange jiji asolo bhukaxi ka nzumbi ikôla, akalakala we ni nguzu yoso phala o mbote ya kilunga kyoso. Ene kene musota o fuma yâ ene. Muveji dya kiki, abhanga yoso phala kuswinisa ni kukolokotesa o jiphange jâ. (Tanga 1 Tesalonika 2:6-8.) Tusakidila Jihova mukutubhana o jiphange jiji jamala ata ku pholo o ibhindamu yakwa muveji dyakuta ku pholo o ibhindamu ya ene!

7. Mabesá ebhi avulu ene mutambula o jiphange adibhakula mu sidivisu ya thembu yoso?

⁷ Sayi jiphange mu kilunga a asola phala kukala kala akunji ajixi jengi, aboki akatunda mba aboki athembu yoso. Mukidi, o jiphange mu ngongo yoso ene mubhakula o mwenyu wâ woso mu kikalakalu kya kuboka ni kubhanga maxibulu. Mukubhanga kiki, ene mukwatekesa athu avulu kukituka maxibulu a Jezú Kidistu. Sumbala o jiphange jiji akalakala musidivisu ya thembu yoso, kala ni ima yavulu, Jihova udikila o ibhindamu ya mwenyu wâ. (Mál. 10:29, 30) Twazolo kyavulu o jiphange jiji, tusakidila kyavulu mukukala nawu kumoxi mukilunga!

8. Mukonda dyahi o aboki oso a njimbu yambote ala ni valolo kumesu a Jihova?

⁸ O kwila o tufunga, o akwatekexi atufunga, o jiphange ala musidivisu yathembu yoso ene ngó ala ni kididi mu kilunga? Kana ngana! Oso ene muboka o njimbu yambote ala ni valolo yavulu bhu phulo ya Nzambi ni mu kilunga kyê. (Loma 10:15; 1 Kol. 3:6-9) Mukidi, o kima kyabetakota mu kilunga o kikalakalu kya kubhanga maxibulu a Ngana yetu Jezú kidistu. (Mat. 28:19, 20; 1 Tim. 2:4) Aboki oso, kikale abatizala ni yo ka abatizala lwa, asota kuta ku pholo o kikalakalu kiki ku mwenyu wâ.—Mat. 24:14.

9. Mukonda dyahi twazolo kyavulu o jiphange jetu ja ahatu?

⁹ Jihova wabhana ku jiphange ja ahatu kikalakalu kya ujitu mu kilunga. Mwene ubhana valolo kwahatu, kujimama, kwatudi ni akudi  amu musidivila ni ufiyele woso. Muveji javulu o Mikanda Ikôla itumbula ahatu aditungula mukusangulukisa Nzambi. Ene a aximana mukonda dya phangu ya yambote mukulondekesa unjimu, kixikanu, kukalakala ni kufulujuka, kuswina, kubhana ni kukala ni wendelu wambote. (Luka 8:2, 3; Ika. 16:14, 15; Loma 16:3, 6; Fil. 4:3; Jihe. 11:11, 31, 35) Tusakidila kyavulu Jihova mukutubhana o Jikidistá jiji ja ahatu mu ilunga yetu, ene mulondekesa o idifwa yiyi yafwama!

10. Mukonda dyahi tubhana valolo kujiphange jetu akuka kyá?

¹⁰ Tusakidila we kyavulu mu kukala ni jiphange javulu akuka kyá. Sayi ilunga ala ni jiphange jamala ni ja ahatu akuka kyá, asidivila ni ufyele woso Jihova mu mwenyu wâ woso. O jiphange jamukwa akuka kyá, nange adilongo o kidi kindala. Kikale se adilongo ukulu mba kindala, o jiphange jetu jiji atena kudibhana ni mawuhaxi avulu mukonda dya kukuka. Mukonda dya mawuhaxi ene katena kubhanga dingi yoso yamesenene kubhanga mukilunga ni musidivisu yakuboka. Nekiki o adyakime yâ, abhanga yoso yatena mu ukunji ni nguzu yoso yala nayu hanji ni kusota kulonga akwa mu kilunga! Etu tukatula mbote mu ima yavulu yadilongo. Se phata ene awabha bhu mesu a Jihova ni bhu mesu metu.—Jisa. 16:31.

11-12. O minzangala mu kilunga kyê ene mukuswinisa kyebhi?

¹¹ Xinganeka we o minzangala yetu. Kyoso kyaya ni kukula ene adibhana ni ibhidi mukonda Satanaji Dyabhu wene musota kwafwinyisa bhukaxi ka wenji mba jifilosofya jê. (1 Nzwá 5:19) Nekiki etu tusanguluka kyavulu mukumona o minzangala yetu amutambwijila mu yônge, amuboka, amuzokela o ixikanu yâ ni kuswina kwoso mbaphe se wôma. Sephata, eye umunzangala wala ni kididi mu kilunga kya Jihova, wala ni valolo!—Jisá. 8:2.

¹² Maji sayi jiphange jetu, kyene mwabhonza kuxikina kwila ene ala ni kididi mu kilunga. Ihi itena kutukwatekesa kumona kwila kala muthu wala ni kididi mu kilunga? Tumone.

13-14. Mukonda dyahi amoxi adivwa kwila kala ni kididi mukilunga?

¹³ O disa dya kayadi ditutena kudilonga mukifika kya poxolo Phawulu. Ki tubhangesa kuxinganeka mu maka ane mudibhana nawu athu mu izuwa ya lelu, avulu kyene mwabhonza kuxikina kwila ene ala ni kididi mba valolo mu kilunga kya Jihova. Pawulu wasoneka: “O kinama se k’ila, eme mukonda nga lémbwa kukala ngi lukwaku, ku mukutu ni ngala-ku, né mbe kyene, ku mukutu ki ki kambe kutokala-ku. O ditwi we se d’ila, eme mukonda nga lémbwa kukala ngi dyesu, ku mukutu ki ngala-ku, né mbe kyene ku mukutu ki di kambe kutokalaku.” (1 Kol. 12:15, 16) Ihi yamesenene kuzwela poxolo Phawulu?

¹⁴ Se wenda ni kudisokesa ni akwenu mu kilunga, kiwandamona o valolo iwala nayu. Sayi jiphange mu kilunga ala ni uhete wakulonga, asokejeka kyambote o ima, ala ni uhete wakuximbakatesa ni kuswinisa akwa. Nange udivwa kwila eye kiwala ni uhete wakubhanga o ima yene mubhanga ene. Se kyene kiwamudivwa, eye umuthu walenduka u mukwa kuditulula. (Fil. 2:3) Maji aluka. Se wenda ni kudisokesa ni akwenu ala ni uhete, wandadiluwalesa eyemwene. Eye wandamateka kuxinganeka kwila, kiwala ni kididi mu kilunga, kala kyatumbula Phawulu. Ihi itena kukukwatekesa kudibhana ni maka yâ?

15. Kala kilondekesa 1 Kolindu 12:4-11, ihi itwatokala kwijiya yalungu ni mawuhete utwala nawu?

¹⁵ Tala ngó: Ku hama yadyanga Jihova wabhele kutena bhukaxi ka nzumbi ikôla ku jikidistá phala kubhanga madiwanu, maji o kwila o Jikidistá joso atambwile o kutena kuku. (Tanga 1 Kolindu 12:4-11.) Jihova k’abhana mawujitu ni mawuhete adifu, maji o Jikidistá joso exile ni valolo. Lelu we, etu kitwala ni kutena kwakubhanga madiwanu bhukaxi ka nzumbi ikôla. Sumbala kitwala ni mawuhete adifu, etwenyoso twala ni valolo bhu mesu a Jihova.

16. Kitendelelsu kyebhi kyabhana poxolo Phawulu kitwatokala kukumbidila etwenyoso?

 ¹⁶ Muveji dya kudisokesa ni Jikidistá ni akwetu, etwenyoso twatokala kukumbidila o kitendelesu kiki kyabhana Phawulu, bhukaxi ka nzumbi ikôla: “Kala muthu a lole o wendelu wê, mbé o kya ta nzabala, i kale ya kibhangelu kyê-mwene, sé kubhindamena kudifikisa mu wendelu wa athu engi.”—Nga. 6:4.

17. Mbote yahi itwandakatula se tukayela o kitendelesi kya poxolo Phawulu?

¹⁷ Se tukayela o kitendelesu kyabhana poxolo Phawulu, anga tutonginina o ibhangelu yetu, twandamona kwila, mbe twala we ni mawuhete akatunda. Mukifika, o kafunga utena kukamba o uhete wa kulonga mu ditala, maji nange wala ni uhete mu kikalakalu kya kubhanga maxibhulu. Mba, nange kala ni uhete wakusokejeka kyambote o ima kala o tufunga twamukwa, maji mwene kafunga kahenda, o jiphange adivwa kyambote mukuzwelanê, phala kubhinga itendelesu yalungu ni Mikanda Ikôla. Mbaphe hanji, wala ni uhete wakuzalela. (Jihe. 13:2, 16) Kyoso kitumona kyambote o mawuhete utwala nawu, twandadivwa kyambote ni kikwatekesu kitubhana phala kuximbakatesa o kilunga. Se kyene kitubhanga, kitwandakala ni lwimbi lwa jiphange ala ni mawuhete engi.

18. Kyebhi kitutena kubandekesa o uhete wetu wakulonga?

¹⁸ Kabasa o kididi kitwala nakyu mu kilunga, etwenyoso twatokala kukala ni hanji yakubhanga kyambote o sidivisu yetu, ni kusota kubandekesa o uhete wakubhanga o kikalakalu ki twamubhanga. Phala kubandekesa o uhete wetu, Jihova wenemutulonga bhukaxi ka kilunga kyê. Mukifika, mu kyônge kya kaxi ka semana, twenemutambula itendelesu itukwatekesa kuditunda kyambote mu ukunji wetu. O kwila wenemukumbidila o itendelesu yenemutubhana mu kyônge kiki?

19. Ihi iwatokala kubhanga phala kudilonga o Xikola ya Akunji a Utuminu?

¹⁹ O ukexilu wamukwa wa Jihova kulonga o jiselevende jê lelu, o Xikola ya Akunji a Utuminu. Atena kubhanga o xikola yiyi, o jiphange jamala ni jahatu, ala kyá mu sidivisu yathembu yoso, ala mu kitala kya 23 ndu 65. Nange eye utena kudivwa kwila nuka wandakala ni ujitu yú. Maji muveji dya kusoneka o ima ikufidisa, eye utena kusoneka se mukonda dyahi eye wamesena kubhanga o xikola yiyi. Sota kubhanga o ima itena kukukwatekesa kubhanga o xikola yiyi. Ni kikwatekesu kya Jihova, kumoxi ni nguzu iwandabhanga eye, wandamona kwila, o kima kyedile kala nzoji, kya kituka kidi.

20. Ihi itutena kudilonga mu divulu dya Loma 12:6-8?

²⁰ O kima kya katatu kitutena kudilonga mukifika kyate poxolo Phawulu tukisanga mu divulu dya Loma 12:6-8. (Tanga.) Mu jevelusu jiji, Phawulu walondekesa dingi kwila, kala muthu mu kilunga, wala ni mawuhete kadifu ni a akwa. Maji kindala mwene wajimbulula dingi kwila, twatokala kuswinisa o kilunga, kabasa o uhete utwalanawu.

21-22. Ihi itudilonga ku phangu ya Robert ni Felice?

²¹ Tala o phangu ya Robert. Kyoso kyazubhana kusidivila mu ixi yengi, amutumikisa ku Betele, ku ixi yamu vwalela. Sumbala o jiphange amudyelelesele kwila, mwene kabhangele kima kyayibha, phange Robert wambe: “Mu ithangana yavulu eme ngaluwalele, mukonda ngexile mu xinganeka kwila, ngabhangele kima kyayibha, ngatondala mu kikalakalu kyami kyokulu. Kate sayi ithangana ngamesenene kuxisa o sidivisu ku betele.” Ihi yamukwatekesa kukala dingi ni kusanguluka? Sayi kafunga ni mukwa wamulembalesa kwila, Jihova utulonga bhukaxi ka ikalakalu itwexile  nayu m’ukulu phala kuditunda kyambote mu ikalakalu itwala nayu lelu. Phange Robert waxikina kwila, mwene katokalele kuyala kudima. Muveji dya kiki, watokalele kuyala mu kikalakalu kyamubhanga kindala kiki.

²² Phange Felice Episcopo, wadibhana we ni ibhidi yadifu kiki. Mwene ni muhatw’ê abhangele o xikola ya Ngiliyade mu muvu wa 1956, ya asidivila mu kikalakalu kya kukunda o ilunga, ku ixi ya Bolivia. Mu muvu wa 1964 ene avwala mona. Phange Felice wambe: “Kyatubhonzele kyavulu kuxisa o kikalakalu ki twazolele. Ngabhiti muvu wam’vimba ni kuditenda, ngaluwalele kyavulu. Maji ni kikwatekesu kya Jihova, ngalungulula o ixinganeku yami, eme ngamateka kuxinganeka dingi mu kikalakalu kya kusasa o mona.” O kwila wadivwile kya kala phange Robert mba Felice? O kwila eye waluwalele kya mukonda kiwala ni ujitu uwexile nawu m’ukulu? Se kyene, utena kukala dingi ni kusanguluka se ulunga o muxima mu kikalakalu ki utena kubhanga kindala kiki mu sidivu ya Jihova, phala kukwatekesa o jiphange jê. Dibhakule ni muxima, kala ni ikalakalu yavulu phala kubhanga, kwatekesa akwenu bhukaxi ka kutena ni mawuhete uwalanawu. Wandasanga kusanguluka mu kikalakalu kya kuswinisa o kilunga.

23. Twatokala kukatula kithangana phala kubhanga ihi? Ihi itwandadilonga mu mbandu yakayela?

²³ Etwenyoso twala ni valolo kumesu a Jihova. Twamesena kutokala ku mwiji wê. Se tusota kithangana phala kuxinganeka mu ima itutena kubhanga phala kukwatekesa o jiphange jetu, anga tubhanga phala kukumbidila kyambote o kikalakalu kyetu mu kilunga, kitwandakala ni phata ya kwila, twala ni kididi, twatokala mwene mu kilunga! Ihi itwamba yalungu ni ukexilu ututala akwetu mu kilunga? Kyebhi ki tutena kulondekesa kwila twa abhana valolo? O milongi yakayela, yandatambwijila o ibhwidisu yiyi.