1. Mukonda dyahi Jihova wabhange o ima yoso?

KUDIMATEKENU, Jihova wexile ubheka wê. Maji kiki kikyamubhangesa kuluwala. Jihova kabhingile muthu kumbandu yê phala kumusangulukisa. Maji Nzambi wamesenene kwila, akwa akala we ku mwenyu, n’a sanguluka we kala mwene. Mukonda dya henda, Jihova wamateka kubhanga o ima yoso.—Jisá. 36:9; 1 Nzwá 4:19.

2. Kyebhi jezú ni Ji anju kyadivu yalungu ni ibhangelu yoso ya Jihova?

² Kyadyanga, Jihova wabhange mon’ê Jezú. Mukusuluka, “Ima yoso Nzambi wa ibhangela” bhu kaxi ka Mon’ê, kala o ji anju. (Kol. 1:16) Jezú wasangulukile kyavulu mu kukalakala ni Tat’ê. (Jisa. 8:30) Ni ji anju o twana twa Nzambi, exile ni ima yavulu phala kusanguluka. Ene amono, kyoso Jihova ni Mukalakadi wê Wakatunda mba Dixibulu dyê, Jezú, kyabhange o dyulu ni ixi. Kyebhi kyadivu o ji anju? Ene “anga akala mutana mba asangulukile kyavulu” kyoso Nzambi kyabhange o ngongo, sé phata, asulunga jinga ni kutana kyoso Jihova kyayi ni kubhanga o ima, bengebenge kyoso kyabhange o athu. (Jobe 38:7; Jisa. 8:31) Ibhangelu yoso ilondekesa o henda ni unjimu wa Jihova.—Jisá. 104:24; Loma 1:20.

3. Kala kilondekesa 1 Kolindu 15:21, 22, o sata yakukula ya Jezú yatubhekela mbote yahi?

³ Jihova wamesenene kwila, o athu akala ni mwenyu wakalelaku, mu ixi yayuka yabhangele. Maji kyoso Ada ni Eva kyabhukumukina o Tata yâ yahenda, o kituxi ni kufwa kwadimwange kumundu  woso. (Loma 5:12) Ihi yabhange Jihova? Se kulaleka, mwene waxindi kyebhi kyeji bhulula o mundu wê. (Dim. 3:15) Jihova weji bhana mon’ê Jezú, kala sata yakukula. Kiki kyeji bhangesa kwila, o twana twa Ada ni Eva, abhulule mu ituxi ni mu kalunga. Mwene wehela kwila, kala muthu usola kumusidivila phala n’a tambule o mwenyu wakalelala.—Nzwá 3:16; Loma 6:23; tanga 1 Kolindu 15:21, 22.

4. Ibhwidisu yebhi itwandadilonga mu mbandu yiyi?

⁴ O kikanenu kya Nzambi kyalungu ni difukunukinu dya athu, kibhekela ibhwidisu yavulu. Mukifika, nange kyebhi kyandabhita o difukunukinu? O kwila twandatena kwijiya o jindandu jetu jakazola kyoso kyandakwafukununa? Mumawukexilu ebhi o difukunukinu dyandatubhekela o kusanguluka? Kyebhi o kuxinganeka mu difukunukinu kutena kubandekesa o kisakidilu kyetu mu henda, mu unjimu ni mu mwanyu wa Jihova? Twandadilonga ibhwidisu yiyi.

5. Mukonda dyahi tutena kukingila kwila athu oso kandakwafukununa mu kithangana kimoxi?

⁵ Tutena kukingila kwila, kyoso Jihova ni Mon’ê kyandafukununa o mazunda a athu, kokwila enyoso andakwafukununa mu kithangana kimoxi, kana. Mukonda dyahi tutambwijila kiki? Mukonda se athu adibandekesa kyavulu mu ngongo mukithangana kimoxi kwandakala kavwanza. Maji Jihova, kenemubhanga kima ni kavwanza. Mwene wejiya kwila, kala kima ni kididi kyé, phala o athu atunge ni kutululuka. (1 Kol. 14:33) Jihova Nzambi, ni mwanyu woso, wakalakala ni Jezú mu kuyudika o ixi phala o athu kutungamu. Kumbandu yengi, Jezú wandalondekesa we unjimu ni mwanyu mu Utuminu wê wa Midi ya Mivu, kyoso kyandakalakala kumoxi ni yó abhuluka mu Alumajedone, mukupelepalala o ixi phala kutambulula oso andakwafukununa.

6. Kala kilondekesa Ikalakalu 24:15, ananyi andakala bhukaxi ka yo andakwafukununa kwala Jihova?

 ⁶ O kyabetakota mu ima yoso o kwijiya kwila, o yó andabhuluka mu Alumajedone, andalonga yó andakwafukununa yalungu ni Utuminu ni ijila ya Nzambi. Mukonda dyahi? Mukonda mazunda ni mazunda a athu andafukununa, andabhanga mbandu ya kibuka kya athu a atumbula mu Bibidya kala athu ‘akambe o kuyuka.’ (Tanga Ikalakalu 24:15.) Phala kutambula o mabesá a sata yakukula ya Jezú, ene andabhinga kubhilula o ukexilu wa mwenyu wâ. Twandakala ni kikalakalu kyadikota kya kulonga o mazunda athu andakwafukununa, phala nejiya o kidi kyalungu ni Jihova. O kwila kala muthu andamulonga ubheka wê kala kitwene mulonga o maxibhulu a Bibidya lelu? O kwila o athu andakwafukununa, andakwatula mu ilunga ni kwalonga, phala mukubhita kithangana n’a longo we athu amukwa andakwafukununa? Kitwejiya. Twejiya ngó kwila, kudisukilu dya Utuminu wa Midi ya Mivu ya Kidistu, o “ixi yoso ya kèzala ni kwijiya [kwa] Nzambi.” (Iza. 11:9) Se phata, mu Midi ya mivu yiyi, twandakala ni ikalakalu yavulu!

7. Mukonda dyahi o mundu wa Nzambi wandadibhana kyambote mu kulonga o athu afukunuka?

⁷ Mu kithangana kya Utuminu wa Midi ya mivu ya Kidistu, o an’â a Jihova andakala mu ngongo, andabhinga kusuluka jinga ni kulungulula o ima ku myenyu yâ, phala kusangulukisa Nzambi. Kyenyikiphe, enyoso andakala makamba, kyoso kyandaya ni kukwatekesa yo a afukununa kubhânga ni ukexilu wâ wa ituxi, kyoso kyandaya ni kukayela o itumu ya Jihova ku mwenyu wâ. (1 Phe. 3:8) Sé phata, o yó andavutuka ku mwenyu andazukama jinga ku mundu walenduka wa Jihova, amubhanga yoso “phala n’a mone o kubhuluka.”—Fil. 2:12.

8. Mukonda dyahi tutena kuxinganeka kwila, o athu andatambulula o jindandu ja andafukunuka andatena kutonginina kwila o yú nganji?

⁸ Ima yavulu ituxikinisa kwila, o yó andatambula o jindandu jâ afukununa, andatena kutonginina kwila yú nganji, o yuna nganji. Ima yahi itubhangesa kuxinganeka kiki? Mukifika, kala kyabhiti ni athu a afukununa kwala Jihova mukulu, tutena kudyelela kwila, Jihova wandafukunununa o athu ni pholo yexile nayu, ukexilu wâ wakuzwela ni ixinganeku kala kyexile andi dya kufwa. Lembalala kwila, Jezú wasokesa o kufwa ni kilu, o difukunukinu wadisokesa ni kuphaphumuka ku kilu. (Mat. 9:18, 24; Nzwá 11:11-13) Kyoso o athu kyabalumuka ku kilu, o pholo yé yene imoxi, o ukexilu we wene umoxi kala kyoso kya muzeka, o ibanzelu yê yoso ka ijimbi. Tala ngo yabhiti ni Lazalu. Tunde kyafu kwabhitile kya izuwa iwana, o mukutu we wabolele kya. Nékiki, kyoso Jezú kyamufukununa, o jiphange jê atena kutonginina kwila yú Lazalu, o mwene se phata watonginina kwila, yâ ene o jiphange jami.—Nzwá 11:38-44; 12:1, 2.

9. O athu andakwafukununa kanda vutuka luwa ni kilunji kyayuka mba mukutu wa yuka. Mukonda dyahi?

⁹ Tala dingi o kima kyakayadi. Jihova wakanena kwila, o athu andatunga mu ngongo mu kithangana kya Utuminu wa Jezú, kandazwela dingi ‘Ngamu kata.’ (Iza. 33:24; Loma 6:7) Kifwa, o athu andakwafukununa, andakala ni sawidi yayuka. Maji phala kukituka athu ayuka, kwandabhita kithangana. Mukonda se a afukununa kya ni mukutu wayuka, o jindandu jawu kandatena kutonginina kwila, yú nganji. Yoso ilondekesa kwila, mu kithangana kya Utuminu wa Kidistu wa Midi ya mivu, o athu andakituka athu ayuka bhofelebhofele. Jezú wandavutula o Utuminu kwa Tat’ê kudisukilu dya midi yamivu. Mu kithangana kiki, o Utuminu wandazubha  kukumbidila o kikalakalu kyê kyoso, ni kubheka dingi o kuyuka kwa athu.—1 Kol. 15:24-28; Dij. 20:1-3.

10. O difukunukinu dyandatubhangesa kudivwa kyebhi?

¹⁰ Xinganeka ngó! Kyebhi kiwandadivwa kyoso kiwandadisanga dingi ni jindandu jê kazola, afwile? O kusanguluka kwandakubhangesa kwolela inga kudila? Wandakwimba mimbu phala kuximana Jihova? O kima kitwejiya kyenyiki, eye wandazola dingi Tat’ê Jihova, ni Mon’ê Jezú, mukutubhana o ujitu wadifukunukinu.

11. Kala kilondekesa o izwelu ya Jezú yosoneke mu Nzwá 5:28, 29, ihi yandabhita ni athu yo abhilula o myenyu yâ phala kubelesela o itumu ya Nzambi?

¹¹ Xinganeka o kisangusangu kyandakala nakyu o athu a afukununa, kyoso kyandaya ni kubhilula o ukexilu wa mwenyu wâ, phala kutumaka o itumu ya Nzambi. O yó andabhilula o ukexilu wamwenyu wâ, andakwahela kukala ni mwenyu wakalelaku. Kumbandu yengi, o athu abukumukina Nzambi, kandakwa ehela kukatula o kutululuka wa Palayízu.—Iza. 65:20; tanga Nzwá 5:28, 29.

12. Mu ukexilu webhi o athu mu ngongo andakwa besowala kwala Jihova?

¹² Kyoso o Utuminu wandamateka kutumina, o mundu woso wa Nzambi wandamona kwila, o izwelu ya Jisabhu 10:22 ya kidi mwene: “Dibesá dya Ngana dyene di mwesa jimbôngo; o umvuama utunda kwa mwene ki ubheka dilamba.” Ni kikwatekesu kya nzumbi ikôla ya Jihova, o mundu wa Nzambi wandakula mu nzumbi, kifwa ene andadifwa dingi ni Kidistu, andaya ni kukula kate kyakituka athu ayuka. (Nzwá 13:15-17; Efe. 4:23, 24) Kumbandu yengi, izuwa yoso, o mikutu yâ yandakala dingi ni sawidi yambote, andakituka athu abetadingikota. Sé phata ene andakala ni kusanguluka kwavulu kumwenyu! (Jobe 33:25) Kyebhiphe o kuxinganeka mudifukunukinu kutena kutukwatekesa kindala mwene kiki?

13. Kala kilondekesa Jisálamu 139:1-4, o difukunukinu dilondekesa kyebhi kwila Jihova watwijiya kyambote?

¹³ Kala kitwamono mu dimatekenu dya milongi yiyi, kyoso Jihova kya fukununa o athu, ene kajimbile o ima yejidile kyá, afukunuka ni idifwa yexile nayu ande dya kufwa. Kiki kilondekesa ihi? Kiki kilombola kwila, Jihova watuzolo kyavulu, kate usota kwijiya o ixinganeku yetu, kyebhi kitudivwa, o ima ituzwela ni ima itubhanga. Kyenyiki, kikyanda mu bhonza kukufukununa ni ibhanzelu yé yokulu, o ukexilu wé ni idifwa iwexile nayu. Sobha Davidi wejidile kwila, Jihova watwijiya kyambote etwenyoso. (Tanga Jisálamu 139:1-4.) Kyebhi kitudivwa, mukutendela kwila, Jihova watwijiya kyambote?

14. Kyebhi kitwatokala kudivwa, mukwijiya kwila Jihova watwijiya kyambote?

¹⁴ Kutendela kwila Jihova watwijiya kyambote, kikwatokala kututhanganyesa, mu kuxinganeka kwila mwene wamutonginina o itondalu yetu. Mukonda dyahi? Lembala kwila, Jihova wamesena kyavulu mbote yetu. Mwene ututalatala ni kilendu utumona kala tu athu a katunda phala mwene. Mwene wejiya o ima yoso itwabhiti nayu kumwenyu wetu. Kwijiya o maka yâ kututululukisa kyavulu! Kyenyikiphe, kana kudivwa kwila, eye wala ubheka. Ithangana yoso, izuwa yoso, Jihova wala kumbandu yetu, usota kutuswinisa, wamesena kyavulu kutukwatekesa.—2 Mal. 16:9.

15. Kyebhi o kidyelelu kya difukunukinu kilondekesa o unjimu wonene wa Jihova?

¹⁵ Kyoso o athu kya kala ni wôma wakufwa, o jinguma jâ a jijidika kubhanga ima kyejitena  ku ibhanga, mukonda dya wôma wa ku ajibha. O athu amwa endesa kwala satanaji, asota kujijidika o athu kunganala o makamba mâ mba kudituna o ixikanu yâ. Maji ene katena kutujijidika kubhanga kiki. Twejiya kwila, ne mwene se atujibha, Jihova wandatufukununa. (Dij. 2:10) Twejiya kwila, séku kima kibhanga ene, kitena kutubatukisa ku ukamba wetu ni Jihova. (Loma 8:35-39) O kidyelelu kya difukunukinu, kilondekesa o unjimu wonene wa Jihova! Mukonda dya kidyelelu kiki, etu kitwala ni wôma, né mwe se o jiselevende ja Satanaji, akusa kutujibha se tukamba kubhanga o ima yamesena ene. O kidyelelu kiki, kitubhana kuswina phala kusuluka ni ufiyele wetu kwa Jihova.

16. Ibhwidisu yebhi itwabhingi kudibhanga? Kyebhi o itambwijilu ya ibhwidisu yiyi itukwatekesa kwijiya se twadyelela kwa Jihova?

¹⁶ Se o athu azembe Jihova amba kwila andakutujibha, o kwila eye wandadyelela mu kikanenu kya Jihova kya difukunukinu? Kyebhi kitutena kwijiya se twadyelela? Ukexilu umoxi o kudibhwidisa: ‘O kwila o ima yofele ingene musola izuwa yoso, ilondekesa kwila ngadyelela kwa Jihova?’ (Luka 16:10) O kibhwidisu kyamukwa kyenyiki: ‘O kwila o ukexilu wamwenyu wami ulondekesa kwila ngadyelela mu kikanenu kya Jihova kya kulanga o ibhindamu yami se ngidyanga kusota o Utuminu wê?’ (Mat. 6:31-33) Se watambwijila xé o ibhwidisu yiyi, wamulondekesa kwila, wadyelela kwa Jihova. Wala polondo phala kudibhana kabasa ibhidi imoneka kumwenyu wê.—Jisa. 3:5, 6.

17. (a) O difukunukinu dilondekesa kyebhi o mwanyu wa Jihova? (b) Kyebhi kitutena kulondekesa okisakidilu kyetu mu mwanyu wa Jihova?

¹⁷ Jihova wasolo kya o kizuwa ni ola yandabwika o mundu yu wayibha. (Mat. 24:36) Mwene wandasuluka jinga ni kulondekesa o mwanyu kate kyandabhixila o kithangana kiki. Mwene wamesena kyavulu kufukununa o athu afu. Maji mwene wala ni mwanyu. (Jobe 14:14, 15) Wamu kingila kate kibhixila o kithangana kyatokala phala kufukununa yó afu kyá. (Nzwá 5:28) Kyenyikiphe, twala ni ima yavulu yatokala kutubhangesa kulondekesa o kisakidilu ku mwanyu wa Jihova. Xinganeka ngo: Mukonda dya mwanyu wa Jihova, athu avulu, kate mwene etu, twala ni kithangana kya “kudyela.” (2 Phe. 3:9) Jihova wamesena kwila, athu avulu adyela phala kutambula o mwenyu wakalelaku. Kyenyikiphe, tubhane valolo ku mwanyu wê. Kyebhi kitubhanga kiki? Mukubhanga yoso phala kusota yo “afwamena o mwenyu kiwabhwa” ni ku akwatekesa kuzola  ni kusidivila Jihova. (Ika. 13:48) Se kyene kyabhanga, andakatula mbote kumwanyu wa Jihova kala kitwene mu katula we etu.

18. Mukonda dyahi twatokala kutalatala akwetu ni mwanyu?

¹⁸ Jihova wejiya kwila, twandakala ngo tu athu ayuka kudisukilu dya midi ya mivu. Kyenyiki, mwene wandakingila, kate kibhixila o kitangana kyokyo, Jihova wandasuluka jinga ni kuloloka o ituxi yetu. Sé phata, etu we twatokala kutala kyambote akwetu, ni ku akwatela mwanyu. Tala yabhiti ni phange yetu ya muhatu. Mwadiwê wexile ni hele yavulu ku muxima, kate wabhwila kuya mu yônge. Mwene wambe: “Kya ngibhonzele kyavulu. Mwenyu wetu walunguluka mu kithangana kimoxi. Yoso itwamesenene kubhanga kala mwiji, twalembwa ku ibhanga.” Mu ibhidi yoso yiyi, o phange yetu wasuluka ni kutalatala mwadiwe ni mwanyu. Mwene wadyelele kwa Jihova, kabhwila kana. Kala kibhanga Jihova, mwene kalungu o muxima mu maka, maji wasoto kutala o idifwa yambote ya mwadiwê. Mwene wambe dingi: “Mwadiwami wala ni idifwa yambote. Bhoféle bhoféle, wamubhanga yoso phala kutolola o hele yê.” Kyenyikiphe, kima kyambote kulondekesa mwanyu ku jindandu ni jiphange jetu jamudibhana ni ibhidi yabhonzo!

19. Kumuxima we ihi iwamesena kubhanga?

¹⁹ Jezú ni ji anju asangulukile kyavulu kyoso Jihova kyabhange o ixi. Se phata, ene andasanguluka dingi kyavulu kyoso kyandamona kwila, o ixi yezala ni athu azolo, amusidivila Jihova. Xinganeka o kusanguluka kwa yo andakwakatula mu ixi phala kuya kudyulu mutumina kumoxi ni Kidistu. Kyebhi kyandadivwa mukumona o mbote yandakatula o athu mu kikalakalu kyamubhanga ene? (Dij. 4:4, 9-11; 5:9, 10) Xinganeka we kyoso o masoxi akusanguluka andabhingana o masoxi andolo, ni kyoso o mawuhaxi, o kuluwala ni ndolo yakufunda kiyandakalaku dingi kate ku hádya ni hádya. (Dij. 21:4) Kate kibhixila o kithangana kiki, sola kumuxima we kukayela o Tata yetu ya henda, ya unjimu, ya mwanyu. Se kyene ki ubhanga, eye wandasanguluka jinga, né mwene se udibhana ni ibhidi yavulu. (Tiya. 1:2-4) Se phata, tusakidila kyavulu mukonda Jihova wakanena kwila, “hádya kukala difukunukinu”!—Ika. 24:15.