1. Ihi yabhana Jihova kujiselevende jê jafiyele?

NI HENDA yoso Jihova wabhana ku jiselevende jê jafiyele kididi mu kilunga kyê. Sumbala o ikalakalu itubhanga kiyadifu, maji etwenyoso twala ni vololo twadibhindamena mudyetu. Poxolo Phawulu watukwatekesa kutendela o disá didi dya katunda. Kyebhi?

2. Kala kilondekesa Efezu 4:16, mukonda dyahi twatokala kudibhana valolo ni kukalakala kumoxi?

² Kala kya kisoneka mu velusu yiyi yamilongi, Phawulu wambe kuma seku muthu watokala kwambela kuselevende ya Jihova ni mukwa kwila: “Eye ki ngi ku bhindamena.” (1 Kol. 12:21) Phala kilunga kikale ni kutululuka, etwenyoso twatokala kudibhana valolo ni kukalakala kumoxi. (Tanga Efezu 4:16.) Kyoso kitukalakala kumoxi enyoso mu kilunga twandadivwa kwila atuzolo, o kilunga kyandakola dingi.

3. Ihi itwandazwela mu milongi yiyi?

³ Mu mawukexilu ebhi utena kulondekesa kwila tuxila o Jikidistá ni akwetu mu kilunga? Mu milongi yiyi, twandazwela kyebhi o tunfunga kyatokala kuxila o tufunga ni akwa. Twandazwela kyebhi etwenyoso tulondekesa kwila tubhana valolo ku jiphange kakazala luwa. Kudisukilu twandilonga kyebhi kitutena kulondekesa henda kwa yó kamuzwela hanji kyambote o dimi dyetu.

4. Kitendelesu kyahi kyasoneka Phawulu mu mukanda kwakwa Loma 12:10 kyatokala kukayela o tufunga twoso?

⁴ O tufunga twoso mu kilunga a asolo bhukaxi ka nzumbi ikôla ya Jihova. Ne kiki o tufunga ala ni mawuhete ni jindunge ki jadifu. (1 Kol. 12:17, 18) Amoxi a asolo kindala kala tufunga, kyenyiki kyala ni uhete kala o uhete wala nawu o tufunga amusidivila kyá mu thembu yavulu. Akamukwa katena dingi kubhanga ima yavulu mukonda dya kukuka ni mawuhaxi. Ne kiki seku kafunga watokala kuzwela ku kafunga ni mukwa kwila, “Eye ki ngi ku bhindamena.” Muveji dya kiki o tufunga twoso atokala kukayela o itendelesu itusanga mu mukanda wa Phawulu, kwakwa Loma 12:10.—Tanga.

5. Kyebhi o tufunga kyalondekesa kwila axila o tufunga ni akwá?

⁵ O tufunga alondekesa kuxila ku tufunga ni akwa kyoso kyevwa ni mwanyu woso o kafunga ni mukwa. Ene atokala kubhanga kiki bengebenge kyoso kyadyongeka phala kubatula maka adikota. Mukonda dyahi? Tala kyambe O Mulangidi wadyanga wa Kamusasadi wa 1988, mu kingileji: “O tufunga atokala kutendela kwila Kidistu bhukaxi ka nzumbi utena kukwatekesa kafunga kosokoso mu kilunga phala kutumbula velusu ya Bibidya yandakwakwatekesa kubatula maka oso oso. (Ika. 15:6-15) O nzumbi ikôla ikwatekesa o tufunga twoso, ki kikwatekesa ngó kafunga kamoxi mukilunga.”

6. Kyebhi o tufunga kya kalalakala kumoxi? Mbote yahi yandakatula se abanga kiki?

⁶ O kafunga uxila o tufunga ni akwá kandasota kudyanga kuzwela mu yônge yoso ya tufunga. Ki mwene ngo uzwela, kabanze kuma mu ithangana yoso o ixinganeku yê yene yatokala. Muveji dya kiki, mwene uzwela o ixinganeku yê mu ukexile walenduka ni kuditulula. Mwene wivwa kyambote akwa kyoso kyamuzwela. O kyabeta dingi kota mwene usota kutumbula jivelusu ja Mikanda Ikôla ni kukayela o itendelesu ya “selevende’oyo ya fiyele, ya dimuka.” (Mat. 24:45-47) Se o tufunga abatula o maka ni henda ni kudixila o nzumbi ikôla Nzambi yandakala mukaxi ka, yandakwa endesa phala kubatula o maka mu ukexilu uswinisa o kilunga.—Tiya. 3:17, 18.

7. Kyebhi Jezú kyakexile mu tala o ukudi?

⁷ Mu kilunga kya Jihova lelu mwala miji ni makaza. Mwala we jiphange jamala ni jahatu kakazala. Kyebhi kitwatokala kutala o akudi? Tala kyebhi Jezu kya tale o ukexilu wa ukudi. Mu kithangana kyê kya ukunji mu ixi Jezú kyakazala. Mwene wasuluka mu ukundi, walungu o kithangana ni unguzu mu kikalakalu kyê. Jezú kalongo kuma o Jikidistá atokala kukazala mba kukala akudi. Muveji dya kiki, mwene wambe kuma sayi Jikidistá eji sola kukala akudi. (Mat. 19:11, 12) Jezú wexile muxila oso kakazalele. Mwene kexile muxinganeka kwila o athu akazala abetakota o athu kakazala ndenge.

8. Kala kilondekesa o mukanda 1 Kolindu 7:7-9, Phawulu waswinisa o Jikidistá phala kubhanga ihi?

⁸ Kala kyabhange Jezú, poxolo Phawulu wakumbidila o ukunji wê woso mu ukudi. Phawulu nuka walongele kwila kima kyayibha o Jikidistá kukazala. Mwene wejidile kuma kala kidista mwene watokala kusola se ukazala mba kana. Ne kiki Phawulu waswinisa o Jikidistá se atena kusidivila Jihova kala akudi. (Tanga 1 Kolindu 7:7-9.) Se phata Phawulu kexile muxinganeka kwila o Jikidistá akazala abetelekota o akudi ndenge. Mu kidi, mwene wasolo o muzangala Timote dikudi, phala kubhanga ikalakalu yavulu. * (Fil. 2:19-22) Se phata kima kyayibha kuxinganeka kwila, o atokala kutambula mawujitu mu kilunga o jiphange akazala o makudi kana.—1 Kol. 7:32-35, 38.

9. Ihi itutena kuzwela yalungu ni ukaza ni ukudi?

⁹ Kikale Jezú, kikale Phawulu, kalongo kwila o Jikidistá atokala kukazala mba atokala kukala jinga akudi. Ihiphe ituzwela yalungu ni kukazala ni kukala dikudi? O Mulangidi wadyanga wa Kamusasadi, 2012, wajimbulula kyambote o maka yâ: “Kikale [o ukaza ni ukudi] tutena kujimbulula kala ujitu utunda kwa Nzambi. . . . Jihova katale o [ukudi] kala kima kibhekela jisonyi mba kuluwala.” Ni milongi yiyi mu kilunga twabhingi kuxila o kididi kya jiphage akudi mu kilunga.

10. Kyebhi kitutena kulondekesa o kuxila ku jiphange jetu akudi?

¹⁰ Kyebhi kitutena kuxila o ukexilu udivwa o jiphange jetu akudi ni ima yadibhana nayu kumwenyu? Twabhingi kulembalala kuma sayi Jikidistá ene mwene asolo kukala hanji akudi. O Jikidistá jamukwa amesena kukazala, maji kasange luwa o muthu watokala. Amukwa hanji afundu kazola kâ. Kabasa kima, kibhangesa o phange mu kilunga kukala  dikudi, o kwila phange mu kilunga watokala kwibhwidisa ku kidistá se mukonda dyahi mwene kakazala luwa mba kumusotela muhatu mba diyala phala kukazane? Mu kidi, sayi Jikidistá akudi atena kubhinga kikwatekesu. Maji se mwene kakubhingi kikwatekesu kiki, kyebhi kyandadivwa o dikudi, se phange udibhakula phala kumusotela kazola? (1 Tes. 4:11; 1 Tim. 5:13) Kindala twandadilonga o ima yazwela o jiphange jetu jafiyele akudi.

11-12. Se kitudilange kyebhi kitutena kuluwalesa o akudi?

¹¹ Sayi kafunga ka ilunga wene mu ditunda kyambote mu kikalakalu kyê udivwa kwila kukala hanji dikudi kwene mumubhekela mbote yavulu. Ne kiki, mwene watonginina kwila kitena kumuluwalesa kyoso o jiphange jamala ni jahatu amesena kumukwatekesa anga amwibhwidisa: “Eye kiwakazala hanji mukonda dyahi?” Sayi phange dikudi wamusidivila ku Betele wambe: “Sayi ithangana o jiphange angibhangesa kudivwa kwila o akudi atokala kwakwatela henda. Kiki kitena kungibhangesa kudivwa kwila o kukala dikudi kimbamba kyaneme, muveji dya kutala kala ujitu wa Nzambi.”

¹² O phange ya muhatu dikudi wamusidivila ku Betele wambe: “Sayi aboki axingeneka kwila o akudi oso amusota athu phala kukazala, abanza we kuma kyoso akudi kyaya mu jifesa bhwazala o mundu axinganeka ngó kusanga muthu phala kukazalané. Sayi kizuwa ngexile mukwenda njila mukonda dya kikalakala kyami ku Betele, eme ngabhixila tadidi mu kyônge. O phange yamuhatu wangizalela wangitangela kwila kwexile jiphange jiyadi jamala mu kilunga kyê ala mu kitala kyami. Mwene wangambela kuma kamungisotela diyala. Mwene wangambata phala kungilondekesa ku jiphange jiyadi jamala. Kitatu kyetu sonyi jatukwata.”

13. Phangu yahi yaswinisa phange yamuhatu dikudi?

¹³ O phange yamukwa yamuhatu dikudi wamusidivila ku Betele wambe: “Eme ngejiya aboki engi adiyakime kyá ala musidivisu ya thembu yoso, ejiya o jimbambe jâ, ala polondo phala kukwatekesa akwa, asanguluka we kyavulu, ene akwatekesa kyavulu o kilunga. Ene atala kyambote o ukexilu wa ukudi, ene kaxinganeka kwila ene abeta kota mukonda ene akudi, kana. Kaxinganeka kwila kasanguluka luwa mukonda kakazala luwa mba kala ni twana.” O kilunga kifwama dingi kyoso ki udivwa kwila oso akuxila, akubhana valolo. Eye wejiya kwila o jiphange jê kyakumona kwila eye umuthu waluwala, kakukwatela difuba, ene akusuwu, kakumono kuma eye wabeta kota ene ndenge. Eye wejiya ngó kwila ene akuzolo kyavulu.

14. Kyebhi kitutena kuxila o akudi?

¹⁴ O jiphange jetu jamala ni jahatu andasakidila kyavulu se twabhana valolo mukonda dya idifwa yambote yala nayu, kana ngó dya kukala akudi. Muveji dya kuditenda mu kididi kyâ, kima kaymbote se tubhana valolo ku ufiyele wâ. Se kyene kitubhanga o jiphange jetu jamala ni jahatu kandadivwa kwila eye wamwa ambela: “Eye ki ngi ku bhindamena.” (1 Kol. 12:21) Muveji dya kiki, ene andakwijiya kwila twaxila tubhana valolo ku kididi kyâ mu kilunga.

15. Sayi aboki abhange ihi phala kusanzumuna dingi o ukunji wâ?

¹⁵ Mivu kudima, aboki avulu adibhakula kuya mu ididi muzwela dimi dyengi phala kusanzumuna o ukuji wâ. Kubhanga kiki, kwalungulula o ukexilu wa mwenyu wâ. O jiphange jiji jamala ni jahatu a xisa o kilunga kizwela o dimi dyâ dya uvwalukilu, ayi musidivila mu  kilunga mwa bhindamena aboki. (Ika. 16:9) O Jikidistá ene asola kubhanga kiki, ene asolo kusidivila mu ididi mwa bhindamena dingi aboki phala kusidivila kyambote Jihova. Sumbala kubhinga mivu yavulu phala ene kwijiya kuzwela kyambote o dimi dya ubhe maji ene akwatekesa kyavulu o kilunga kya ubhe mu mawukexilu avulu. O idifwa yâ yambote ni mawuhete ala nawu kyâ aswinisa o kilunga. Etu tubhana valolo ku jiphange jiji adibhakula mudyâ!

16. O tufunga katokala kuxinganeka mu ihi phala kumona se phange utena mba kana kukala kafunga mba mukwatekexi wa tufunga?

¹⁶ O kibuka kya tufunga katokala kuxinganeka kwila o phange katokala kukala kafunga mba mukwatekexi wa tufunga mukonda kejiya kuzwela kyambote o dimi dya kilunga. O tufunga andasola se phange utena mba kana kukala kafunga mba mukwatekexi wa tufunga bhukaxi ka itendelesu ya Mikanda Ikôla, kana mukonda dya kuzwela kyambote o dimi dya kilunga mba kana.—1 Tim. 3:1-10, 12, 13; Tito 1:5-9.

17. Ihi yabhingi kusola o jitata kyoso o mwiji wâ ki uya mu ixi yengi?

¹⁷ Sayi miji ya Jikidistá, axisa ixi yâ, mukonda dya ita mba phala kusota salu. Se kiki kibhita, o twana twâ atena kudilonga dimi dyengi dizwela mu ixi ya ubhe yayi kutunga. O jitata nange andabhinga kudilonga o dimi dya ubhe mu ixi mwayi phala kusanga kikalakalu. Ihi itwamba se mu ixi mwayi asangamu kilunga mba kibuka mu dimi dyâ dya uvwalukilu? O mwiji watokala kuya mu kyônge mu kilunga kyebhi? O kwila atokala kuya mu kilunga muzwela o dimi dya ixi mwayi inga mu kilunga muzwela o dimi dyâ dya uvwalukilu?

18. Kala kilondekesa Ngalásya 6:5, kyebhi kitutena kulondekesa kwila tuxila o kima kisola o mutwameni wa mwiji?

¹⁸ O mutwameni wa mwiji mwene watokala kusola se o mwiji wandatokala mu kilunga kyebhi. O maka yâ atokala ku mutwameni wa mwiji, mwene watokala kusola o kima kyandabhekela o mbote ku mwiji wê. (Tanga Ngalásya 6:5.) Kuma mwene watokala kusola, etu twatokala kuxila o kima kisola o mutwameni wa mwiji. Kabasa o kima kisola ene, etu twatokala kwatambulula kyambote mu kilunga, kwa bhana valolo, mukonda atokala mu kilunga kyetu.—Loma 15:7.

19. O mutwameni wa mwiji watokala kuxinganeka kyambote ni kusamba yalungi ni maka ebhi?

¹⁹ Kumbandu yengi sayi miji, nange atena kusidivila mu kilunga muzwela o dimi dya uvwalukilu dya jitata, maji o twana nange kazwela kyambote o dimi didi. Se o kilulnga kiki kikala mumbaza muzwela o dimi dizwela athu oso mu ixi, nange o anandenge andatala hadi phala kutendela o kyônge, kyandatena kukula kyambote mu nzumbi. Mukonda dyahi? Mukonda o twana mu xikola andadilonga mu dimi dizwela o athu oso, kana mu dimi dizwela o jitata jâ. Se kiki kibhita o mutwameni wa mwiji watokala kuxinganeka kyambote ni kubhinga  unjimu bhukaxi kamusambu phala kusola kima kitena kukwatekesa o twana twâ kuzukama kwa Jihova ni ku kilulnga kyê. Mwene utena kusola kukwatekesa o twana twê kwijiya kyambote o dimi dyê dya uvwalukilu mbaphe utena kuxinganeka kuya mu kilunga kyengi muzwela o dimi ditendela kyambote o twana twê. Kabasa kima kisola o mutwameni wa mwiji, o kilunga kyasolo kuya kyatokala kubhangesa o mutwameni wa mwiji ni mwiji wê kudivwa kwila a axila, a abhana valolo.

20. Kyebhi kitutena kulongekedesa o kuxila ku jiphange amudilonga o dimi dya ubhe?

²⁰ Mukonda dya ima itwazwela bhabha, ilunga yavulu mwala jiphange amubhanga ngunzu yavulu phala kudilonga dimi dya ubhe. Kitena kwabhonza kuzwela o ima yamuxinganeka. Maji se kituxinganeka ngó mu ukexilu wakuzwela o dimi dya ubhe, twandamona o henda yâ kwa Jihova ni hanji yâ yakumusidivila. Se tumona o idifwa yiyi yambote, twandabhana valolo ni kuxila kyavulu o jiphange jiji. Kitwandazwela kwila “Eye ki ngi ku bhindamena” mukonda kejiya kuzwela kyambote o dimi dyetu.

21-22. Ujitu webhi wakatunda utwalanawu?

²¹ Tu sakidila kyavulu Jihova mukonda mwene wabhana o kikalakalu mu kilunga kyê. Kikale se tu mala mba tu hatu, kikale se tu akudi mba tu makaza, tu adyakime mba tu mizangala, se tuzwela kyambote o dimi mba kana, etwenyoso twala ni valolo ku mesu a Jihova ni ku mesu akwetu.—Loma 12:4, 5; Kol. 3:10, 11.

²² Tubhange yoso phala kukumbidila o madisa ambote mu kifika kya phoxolo Phawulu kyalungu ni mukutu wa muthu. Kubhanga kiki kyandatukwatekesa kutonginina se ihi itutena kubhanga phala kuswinisa o jiphange jetu. Kyandakutukwatekesa we kuzola ni kuxila jinga o jiphange jetu mu kilunga kya Jihova.