MBANDU YAKUDILONGA 41
Kyebhi Kitutena Kukwatekesa o Maxibulu a Bibidya Katé kyanda kwa Batizala—Mbandu Yadyanga
“Mwala mu mukanda wetu, enu, wosoneke kumixima yetu . . . Kidistu mwene wasoneka o mukanda wenyu.”—2 KOL. 3:2, 3.
MWIMBU 78 ‘Longa o Mak’â Nzambi’
ITWANDADILONGA *
O kilunga kyoso kisanguluka kyavulu mukumona dixibulu dya Bibidya wazolo Jihova anga amubatizala. (Tala o kaxi 1)
1. Ihi yamba 2 Kolindu 3:1-3 itukwatekesa kutendelela kwila, kulonga o Bibidya ku athu kate kya a batizala ujitu wadikota watubhana Jihova? (Tala o foto ya kapa.)
KYEBHI ki udivwa kyoso ki umona dixibulu dya Bibidya mu kilunga a mu mubatizala? Sé phata, eye usanguluka kyavulu. (Mat. 28:19) Se eye wamulongo o Bibidya, o kisangusangu kyê kivula dingi mukumona kwila amubatizala! (1 Tes. 2:19, 20) O maxibulu a abatizala kindala edi kala “mikanda yosoneke,” kana ngó kwa yo wamulongo, maji phala o kilunga kyoso.—Tanga 2 Kolindu 3:1-3.
2. (a) Twabhingi kuxinganeka mu kibhwidisu kyebhi kyabetakota ni mukonda dyahi? (b) Mukithangana kyebhi tutena kuzwela kwila o muthu twene muzwelanê dixibulu dyetu dya Bibidya? (Tala kulwiji.)
2 Kisangusangu kyadikota kwijiya kwila, ku mivu iwana yasukina, mbeji joso twalongo o Bibidya ku 10.000.000 * a athu ku mundu woso. Kifwa kumuvu umoxi, mu mivu iwana yiyi, 280.000 a athu a abatizala kala Jimbangi ja Jihova, maxibulu a ubhe a Jezú Kidistu. Kyebhi kitutena kukwatekesa dingi o mazunda a athu amudilonga o Bibidya n’a abatizala we? Jihova wamubhana hanji kithangana phala athu kukituka Jimbangi jê. Kiki kyene kituswinisa kubhanga yoso phala kukwatekesa akwetu amudilonga o Bibidya kusola kwa batizala sé kulaleka. Kithangana kyabutu kyá!—1 Kol. 7:29a; 1 Phe. 4:7.
3. Ihi itwanda dilonga mu mbandu yiyi yalungu ni kulonga o Bibidya?
3 Kuma o kikalakalu kyabetakota o kubhanga o maxibulu, o Kibuka kya Utuminu kyebhwidisa o jiphange ala kupholo ku Jifiliyale se ihi itutena kubhanga phala kukwatekesa o maxibulu a Bibidya kwa abatizala. Mu mbandu yiyi ni mumbandu yakayela, twandamona se ihi itutena kudilonga ni jiphange ala ni uhete wakulonga, kala o aboki athembu yoso, akunji ajixi jengi ni tufunga twa ilunga. * (Jisa. 11:14; 15:22) Ene ajimbulula yatokala kubhanga o alongexi ni maxibulu a Bibidya phala kuditunda kyambote. Mumbandu yiyi, twandadilonga ima itanu yatokala kubhanga o maxibulu a Bibidya phala kubhixila katé kubatizu.
MWATOKALA KUDILONGA MUSEMANA JOSO
Ebhudisa o dixibulu se mutena kuxikama phala kudilonga o Bibidya (Tala o kaxi 4-6)
4. Ihi itwabhingi kwijiya yalungu ni kulonga o Bibidya bhumwelu wamukwa dibhata?
4 Jiphange javulu amulonga o athu bhumwelu dya jinzo ja mukwa dibhata. Sumbala yiyi ndunge yambote phala kubandekesa o hanji yamuthu yakudilonga o Bibidya, maji katokala kubhanga kiki mukithangana kyavulu né kudilonga mujisemana javulu. Phala kubandekesa o hanji yamuthu, sayi jiphange abhinga o kijimbwete kya mukwadibhata anga amusonekena kanjimbu ni jivelusu ja Bibidya. Sayi bhabha ene abhanga kiki mujimbeji, maji ka tumbula hanji o muthu kala dixibulu dya Bibidya. O kwila o dixibulu * wandatena kudibhakula ni kudibatizala se ukamba kubandekesa o kithangana kyakudilonga o Mak’â Nzambi? Nange kana.
5. Ihi yazwela Jezú mudivulu dya Luka 14:27-33, itutena kukwatekesa nayu o maxibulu metu a Bibidya?
5 Sayi kizuwa, Jezú wajimbulula se ihi yatokala kubhanga o muthu wamesena kukala dixibulu dyê. Jezú wambe kwila o mutungi watokala “kuxikama hanji, ni kuxinganeka o ngasu” phala kumona se wandatena kuzubha kutunga o sabhalalu. Mwene wambe we kwila o sobha watokala “uxikama hanji, ni adilongese ni jitata ja dyembu dyê,” phala kumona se wala ni masoladi asoko phala kutolola o sobha yamukwá. (Tanga Luka 14:27-33.) Kyene kimoxi, Jezú wejidile kwila, woso wamesenene kukala dixibulu dyê, wabhingile kutonginina kyambote ihi yatokala kubhanga phala kumukayela. Kyenyiki, twabhingi kuswinisa o maxibulu metu kudilonga o Bibidya semana joso. Kyebhi kitutena kubhanga kiki?
6. Ihi dingi itwatokala kubhanga phala kukwatekesa o dixibulu kukula ni lusolo?
6 Mateka mukubandekesa o kithangana ki wene mudilonga ni muthu bhumwelu. Muveji dyakudilonganê ngó velusu imoxi ya Bibidya, kyoso ki uvutuka phala kumukunda, bandekesaku dingi velusu imoxi. Kyoso o mukwadibhata kyamateka kudivwa kyambote phala kudilonga milongi yavulu, mwibhwidise se mutena kuxikama phala musuluke ni kudilonga. O kitambwijilu kya mukwadibhata kyandalondekesa se mwene wamesena mwene kudilonga o Bibidya mba kana. Phala kumukwatekesa kukula ni lusolo, utena kumwibhula se mwene uxikina kudilonga veji jiyadi musemana. Maji kudilonga lumoxi mba luyadi kusemana kikusoko, kwabhingi dingi kima.
DIPELEPALALE KYAMBOTE ANDE DYA KULONGA DIXIBULU
Pelepalala kyambote ande dya kuya mulonga o Bibidya, longa o dixibulu kyebhi kyatena kupelepalala (Tala o kaxi 7-9)
7. Kyebhi o muboki kyatokala kudipelepalala ande dya kuya mulonga dixibulu?
7 Kuma umulongexi, eye watokala kudipelelala kyambote ande dya kuya mulonga o Bibidya ku muthu. Mateka ni kutanga o milongi yoso, tanga we o jivelusu ja Bibidya. Sota kubhaka mu kilunji o jipondo jabetokota. Xinganeka mudyambu dya milongi, tudyambu twofele, ni mu ibhwidisu. Tanga o jivelusu joso jala ni kijimbwete “tanga”, tala we o jifoto mba vidyu ijimbulula o maka uwanda longa. Mukusuluka, xinganeka mu dixibulu dyê, ni kyebhi ki utena kumujimbulwila o maka mu ukexilu wabhebhuluka, phala atene ku itendela kyambote ni ku itumaka.—Neh. 8:8; Jisa. 15:28a.
8. O izwelu ya Phawulu mu Kolose 1:9, 10 itulonga ihi yalungu ni kutumbula o maxibulu metu mumusambu?
8 Mu kudipelepalala, samba kwa Jihova yalungu ni ibhindamu ya dixibulu dyê. Bhinga phala Jihova n’a kukwatekese kulonga bhukaxi ka Bibidya, phala o milongi itene kutula ku muxima wa muthu. (Tanga Kolose 1:9, 10.) Xinganeka se sayi pondo yandabhonza o dixibulu ku itendela mba ku ixikina. Kana kujimba kwila, eye wamesena kumukwatekesa katé kyanda mu batizala.
9. Kyebhi o muboki kyatokala kukwatekesa o dixibulu dyê kupelelapalala o milongi? Jimbulula.
9 Kudilonga o Bibidya semana joso, kwanda kwatekesa o dixibilu kubhana valolo ku ima yoso yabhange Jihova ni Jezú, wandamesena kwijiya dingi. (Mat. 5:3, 6) Phala kukatula mbote, o dixibulu dya tokala kuxinganeka mu ima yamudilonga. Phala kubhanga kiki, mutangele kwila, semana joso, ande dya kudilonga, mwene watokala kudipelepalala, mukutanga o milongi yoso, ni kuxinganeka kyebhi kyatena ku ikumbidila ku mwenyu we. Kyebhi o mulongexi kyatena kumukwatekesa? Pelepalala disá dimoxi ni dixibulu, ni umulondekese kyebhi kyatokala kudipelepalala ubheka we. * Mujimbulwile kyebhi kyatena kusanga o itambwijilu, jimbulula we kyebhi o kuxinda o izwelu yabetakota kwanda mukwatekesa kulembalala o itambwijilu. Mukusuluka, mubhinge phala kutambwijila mu izwelu yê. Kyoso mwene kyatambwijila mu izwelu yê, wandatena kumona se wamutendela o milongi mba kana. Eye utena kuswinisa o maxibulu mê kubhanga dingi kima.
LONGA O DIXIBULU KUZWELA NI JIHOVA IZUWA YOSO
Longa o dixiubulu kyebhi kyatena kudizwelesa ni Jihova (Tala o kaxi 10-11)
10. Mukonda dyahi kima kyambote kutanga o Bibidya izuwa yoso? Ihi yatokala kubhanga o dixibulu phala kukatula mbote mukitangelu kya Bibidya?
10 Katuku o kudilonga semana joso, o dixibulu watokala we kubhanga kimakimoxi ubheka wê. Mwene watokala kuzwela ni Jihova. Kyebhi kyabhanga kiki? Mwene ubhanga kiki mukwívwa Jihova ni kumutangela o ibhidi yê. O dixibulu utena kwívwa Nzambi mukutanga o Bibidya izuwa yoso. (Josu. 1:8; Jisá. 1:1-3) Mulondekese kyebhi kyatena kukayela o “Programa ya kutanga o Bibidya” yala mu saite jw.org. * Phala kumukwatekesa kukatula o mbote mukitangelu kya Bibidya, watokala kumuswinisa kuxinganeka mumilongi ya Bibidya yalungu ni Jihova ni kyebhi kyatena kukumbidila kumwenyu wê o ima yamudilonga.—Ika. 17:11; Tiya. 1:25.
11. Kyebhi o dixibulu kyandakwijiya kusamba mu ukexilu watokala? Mukonda dyahi kima kyambote o dixibulu kusamba kwa Jihova izuwa yoso?
11 Swinisa o dixibulu dyê kuzwela ni Jihova bhukaxi ka musambu izuwa yoso. Samba ni muxima woso ande dyakumateka kudilonga ni dixibulu ni kudisukilu, mutumbule mumisambu yê. Mukwívwa o misambu yé, mwene wandakwijiya kusamba kwa Jihova Nzambi ni muxima ni kidi kyoso mudijina dya Jezú Kidistu. (Mat. 6:9; Nzwá 15:16) O kutanga o Bibidya izuwa yoso (kifwa kwívwa Jihova) ni kusamba (kifwa kuzwela ni Jihova) kwanda kwatekesa o dixibulu dyê kuzukama dingi kwa Nzambi. (Tiya. 4:8) O ima yiyi, yandamubhangesa kukala ni kima kyengi kyandamukwatekesa kudibhakula ni kudibatizala. Kima kyahi?
KWATEKESA O DIXIBULU KUKALA NI UKAMBA NI JIHOVA
12. Kyebhi o muboki kyatena kukwatekesa o dixibulu dyê kukala ni ukamba ni Jihova?
12 O ima idilonga o dixibulu dya Bibidya, ki itokala ngó kukala mu kilunji, maji yatokala kumutula ku muxima wê, phala akale ni vondadi yakukumbidila yoso yadilonga. Jezú walongo ima yavulu ku athu, ene awabhelele kumwívwa. Maji o athu akexile ngó kumukayela mukonda o maka mê akexile mwatula kumuxima. (Luka 24:15, 27, 32) O dixibulu dyê watokala kumona Jihova kala Muthu wakidi, utena kukala kamba dyê, watokala kumutala kala Tat’ê, Nzambi yê ni Kamba dyê. (Jisá. 25:4, 5) Mukulonga o dixibulu, jimbulula kyambote o idifwa ya Nzambi yetu. (Mak. 34:5, 6; 1 Phe. 5:6, 7) Bhanga kiki kabasa o milongi imwamudilonga. Kwatekesa o dixibulu dyê kwijiya o idifwa ya Jihova, kala o henda, o kubhanga o mbote, ni kuloloka. Jezú wazwela kwila, “o kijila kyadyanga, kyadikota” o ‘kuzola Jihova Nzambi yê.” (Mat. 22:37, 38) Kwatakesa o dixibulu dyê kuzola Jihova.
13. Bhana phangu ilondekesa kyebhi kitutena kukwatekesa o dixibulu kwijiya o idifwa ya Jihova?
13 Mukudilonga ni dixibulu dyê, mujimbulule se mukonda dyahi eye wazolo Jihova. Kiki kitena kumukwatekesa kumona kwila, mwene we watokala kukala ni ukamba ni Jihova ni kumuzola. (Jisá. 73:28) Mukifika, o kwila mudivulu di mwamudilonga sayi izwelu mba velusu ya Bibidya ilondekesa o henda, o unjimu, o kuyuka ni kutena kwa Jihova? O kwila o idifwa yiyi ya Nzambi ikutula kumuxima? Tangela kudixibulu dyê kwila kiki kyene kikubhangesa kuzola o Tata yetu yadyulu. Sayi dingi kima kyamukwá kyatokola kubhanga o dixibulu dya Bibidya phala kukula katé kubatizu.
SWINISA O DIXIBULU KUYA MU YÔNGE
Swinisa o dixibulu kumateka kuya muyônge sé kuleka! (Tala o kaxi 14-15)
14. Ihi yamba Jihebelewu 10:24, 25 yalungu ni yônge, itena kukwatekesa o maxibulu kukula katé kubatizu?
14 Etwenyoso twamesena kwila, o maxibulu metu akula katé kubatizu. Tutena kwa akwetekesa kubhixila kubatizu mukwaswinisa kuya muyônge. Sayi aboki amba kwila, o maxibulu aya muyônge, akula dingi ni lusolo. (Jisá. 111:1) Sayi aboki atangela o maxibulu mà kwila, sayi ima yandadilonga mukyônge, kandatena kudilonga kubhata. Tanga Jihebelewu 10:24, 25 kumoxi ni dixibulu dyè. Mukusuluka mulondekese o mbote yandakatula se umateka kuya muyônge. Mulondekese o Vidyu Ihi Yene Mubhita Bhu Kididi Kya Ubhezelu? * Mukwatekese kukala ni hanji ya kuya muyônge sé kufonga.
15. Ihi itutena kubhanga phala kukwatekesa o dixibulu kuya muyônge yoso?
15 Ihi i utena kubhanga se o dixibulu dyê kene muya muyônge, mba wene mufonga lwavulu. Mutangele ni kisangusangu, kima kiwadilongo mukyônge muveji dya kumutangela ngó phala kuyamu. Kiki kitena kumuswinisa dingi. Mubhane o Mulangidi mba kamukanda Ukexilu wa Ukidistá ni Ukunji Wetu Milongi Phala o Yônge yamudilonga mu kilunga. Mulondekese o milongi ya kyônge, anga umwibhudisa se mbandu yebhi yamuwabhela dingi. O ima yandadilonga mwene mukyônge yandabetakota, o ima yoso yevu mu ngeleja yengi ndenge. (1 Kol. 14:24, 25) Mwene wandakwijiya athu andamubhana phangu yambote, anda mukwatekesa kukula katé kubatizu.
16. Ihi itwatokala kubhanga phala kukwatekesa o maxibululu a Bibidya katé kya abatizala? Ihi itwandadilonga mumbandu yakayela?
16 Kyebhi kitutena kukwatekesa o maxibululu a Bibidya katé kya a batizala? Twatokala ku akwatekesa kumona kwila, kudilonga o Bibidya kima kyadikota, kwaswinisa kudilonga mu semana joso, ni kupelepalala kyambote o milongi. Twatokala kwaswinisa we kusamba kwa Jihova izuwa yoso, ni kukala ni ukamba wambote ni Mwene. Twatokala kuswinisa we o maxibulu kuya jinga muyônge. (Tala o kaxa, “ Phala Kukula Katé Ku Batizu o Maxibulu Atokala Kubhanga o Ima Yiyi.”) Maji o milongia yakayela yandajimbulula kwila, o muboki watokala kubhanga we ima itanu phala kukwatekesa o maxibulu kubhixila katé kubatizu.
MWIMBU 76 Kyebhi Ki u divwa?
^ kax. 5 Kulonga o muthu, kulombolola kumukwatekesa “kuxinganeka, kudivwa, mba kubhanga o ima mu ukexilu wengi mba wa ubhe.” O velusu yetu ya muvu wa 2020, Matesu 28:19, itulembalesa o kikalakalu kya katunda kya kudilonga o Bibidya ni athu, ni kwalonga ihi yatokala kubhanga phala kwa batizala kala maxibulu a Kidistu. Mumbandu yiyi ni mumbandu yakayela, twandadilonga kyebhi kitutena kubandekesa o uhete wetu mu kikalakalu kiki kyakatunda.
^ kax. 2 IZWELU YOJIMBULULE: Se wene muzwela ni muthu maka a Bibidya muveji javulu, kifwa mwene dixibulu dyê dya Bibidya. Se wamulongo kyá luyadi tunde kiwamulondekesa kyebhi kiwanda mulonga o Bibidya anga wadyelela we kwila, mwene wandasuluka ni kudilonga, eye utena kumutumbula mu mukanda kudisukilu dya mbeji.
^ kax. 3 Mu mbandu yiyi mwala milongi yatundu mu mbandu “Como Dirigir Estudos Bíblicos Progressivos,” yamoneka mu Kikalakalu Kyetu kya Utuminu ya Kavwa ya 2004 ndu Kasambwadi ka 2005, mu phutu.
^ kax. 4 O maka ya kalungu ngo ni maxibulu ahatu, alungu we ni maxibulu amayala.
^ kax. 9 Tala o vidyu ya ithangana iwana ni dyambu, Kulonga o Maxibulu Metu Kyebhi Kya Tena Kupelepalala. Mu JW Library®, Bweta kumbandu MÍDIA > NOSSAS REUNIÕES E OBRA DE PREGAÇÃO > COMO SER UM PUBLICADOR MELHOR.
^ kax. 10 Bweta mu mbandu MADIVULU > MADIVULU NI TUMIKANDA.
^ kax. 14 Mu JW Library®, bweta kumbandu MÍDIA > AS NOSSAS REUNIÕES E OBRA DE PREGAÇÃO > AJUDAS PARA A PREGAÇÃO.
