1. Mukonda dyahi tuzwela kwila o kikalakalu kyakubhanga maxibulu kibhulula myenyu?

KUBHANGA maxibulu kikalakalu kyakubhulula myenyu! Mukonda dyahi tuzwela kiki? Kyoso Jezú kyabhana o kitumu kiki kyosoneke mu divulu dya Matesu 28:19, 20, mwene wambe: “Enuphe ndenu, mwakalonge jixibulu . . . ni kwabatizala.” Mukonda dyahi o muthu wabhingi kumubatizala? Mukonda phala kubhuluka o muthu a tokala kumubatizala. O muthu wamesena kumubatizala watokala kuxikina kwila, utena ngó kukala ni mwenyu wakalelaku mukonda dya kufwa ni kufukunuka kwa Jezú. Kiki kyene kyabhangesa poxolo Phtetele kwambela o Jikidistá ni akwá kwila: “O Batizu [yene] yala kumibhulula mu lelwidi . . . , kwijila mukufukunuka kwa Jezú Kidistu.” (1 Phe. 3:21) Kyenyki, kyoso o dixibulu kyamubatizala, mwene ukala ni kidyelelu kyakutambula o mwenyu wakalelaku.

2. Kala kilondekesa 2 Timote 4:1, 2 twatokala kukala alongexi a kidifwa kyahi?

² Phala kubhanga maxibulu twabhingi kubandekesa o ‘uhete wetu wakulonga.’ (Tanga 2 Timote 4:1, 2.) Mukonda dyahi? Mukonda Jezú watutendelesa: “Enuphe ndenu, mwakalonge jixibulu.” Poxolo Phawulu watwambela phala ‘kukolokota’ mukikalakalu kiki, “kuma mukubhaga kiki, wanda kwila ni eye mwene ubhuluka, ene we abhuluka oso akwivwa.” Mukonda dyakiki, Phawulu watwambela: “Dilange eye mwene ni ulongelu we.” (1 Tim. 4:16) Kuma twatokala kulonga o athu n’a kituke maxibulu, twamesena kubandekesa o uhete wetu wakulonga.

3. Yalungu ni kulonga maxibulu, ihi itwandadilonga mumbandu yiyi?

 ³ Etu twamulonga o kidi kya Bibidya ku mazunda ni mazunda a athu mu ngongo yoso. Maji kala kitwadilongo mu milongi yatundumu, etu twamesena kwijiya kyebhi kitutena kwakwatekesa phala n’a abatizale kala maxibulu a Jezú Kidistu. Mumilongi yiyi twandadilonga ima itanu yatokala kubhanga o aboki phala kukwatekesa o maxibulu kukula katé kubatizu.

4. Mukonda dyahi mukulonga o dixibulu o muboki watokala kudilanga? (Tala kulwiji.)

⁴ Etu twawabhela o kidi kyala mu Mak’â Nzambi. Kyenyiki, se kitudilange tutena kuzwela kyavulu mukulonga akwetu. Maji kikale se twamukwendesa o Milongi ya Mulangidi, o Milongi ya Bibidya mu Kilunga, mba twamulonga muthu kubhata dyê, kitwatokala kuzwela kyavulu. Se mulongexi wamesena kulonga kyambote bhukaxi ka Bibidya, watokala kudilanga phala kazwele lwavulu, mukusota kujimbulula yoso yejiya yalungu ni milongi mba velusu ya Bibidya. * (Nzwá 16:12) Sokesa o kwijiya kwa Bibidya ku wexilenaku kyoso kyakubatizala, ni kwijiya kuwala naku lelu. Kyoso kyakubatizala nange eye wejidile ngó ima yofele yalungu ni Bibidya. (Jihe. 6:1) Kwabhiti mivu yavulu phala kwijiya o ima iwejiya kindala. Kyenyikiphe kana kulonga kudixibulu o ima yoso muveji imoxi.

5. (a) Kala kilondekesa 1 Tesalonika 2:13, etu twamesena kwila o dixibulu dyetu utendela ihi? (b) Kyebhi ki twatokala kuswinisa o maxibulu kuzwela o maka amudilonga?

⁵ Etu twamesena kwila, o maxibulu atendela kuma o ima yamudilonga yatundu mu Mak’â Nzambi. (Tanga 1 Tesalonika 2:13.) Kyebhi ki tu bhanga kiki? Swinisa o maxibulu kuzwela o maka amudilonga. Muveji dya kumujimbulwila o jivelusu joso ja Bibidya, mubhinge phala mwene n’a kujimbulwile naju. Kwatekesa o dixibulu kumona kyebhi kyatena kukumbidila o Mak’â Nzambi ku mwenyu we. Mubhange ibhwidisu imubhangesa kuzwela yamukala ku muxima. (Luka 10:25-28) Mukifika, mwibhudise: “Kidifwa kyebhi kya Jihova kiwamono muvelusu yiyi?” “O milongi yiyi ya Bibidya itena kukukwatekesa kyebhi?” “Kyebhi ki udivuwa yalungu ni ima iwadilongo?” (Jisá. 20:5) O kima kyabetakota ko kwijiya kwala naku o dixibulu, kana, maji o henda yê kwa Nzambi ni vondadi yakukumbidila kumwenyu o ima yamudilonga.

6. Mukonda dyahi kima kyambote kuya kulonga o dixibulu ni aboki ala ni uhete?

⁶ O kwila wendele kya ni aboki ala ni uhete wakulonga, kubhata dya dixibulu dyê?  Se kibhita, utena kwa ebhudisa se kyebhi ki waditundu mu kulonga o Bibidya kudixibulu dyê. Wa ebhwidisa we se walongo mwene kyambote bhukaxi ka Bibidya. Phala kubandekesa o uhete we wakulonga, watokala ulenduka. (sokesa ni Ikalakalu 18:24-26.) Mukusuluka, ebhudisa o aboki ala ni uhete, se mukixinganeku kyâ, o dixibulu dya mutendela mwene o maka, inga kana. Utena we kubhinga kumuboki mwenyú phala kulonga o dixibulu, se eye wende njila. Kiki kyanda kwatekesa o dixibulu phala kabhiti jisemana sé kudilonga, kyanda mulondekesa we o valolo yakudilonga o Bibidya. Kana kuxinganeka kwila, o dixibulu dya Bibidya “dya kutokala eye,” muthu wengi katokala kumulonga. Kuma eye wamesena o mbote ya dixibulu, wandamesena kwila mwene usuluka ni kukula mu nzumbi, ni kudilonga o kidi.

7. Ihi itena kukwatekesa o dixibulu kuwabhela o ima yamudilonga?

⁷ O dixibulu dya Bibidya watokala kumona kwila, eye wazolo, waxikina mu ima ilonga o Bibidya. (1 Tes. 1:5) Kyenyiki, mwene wandatena kuwabhela we o ima yamudilonga. Se kibhana umutangela o mbote iwene mukatula mukukayela o itumu ya Bibidya ku mwenyu wê. Mwene wandamona kwila o milongi ya Bibidya itena we kumukwatekesa.

8. Ihi dingi i utena kubhanga phala kukwatekesa o dixibulu, ni mukonda dyahi eye watokala kubhanga kiki?

⁸ Mukithangana kya kudilonga, tangela ku dixibulu o misoso ya jiphange atolola o ibhidi yamudibhana nayu mwene. Se mukilunga kyê mwala phange wadibhana kyambote ni ibhidi yene mudibhana nayu o dixibulu, mwixane phala wendenê kumulonga o Bibidya. Mbaphe utena kusanga misoso iswinisa mu jw.org, mu milongi “O Bibidya Ilungulula O Ukexilu Wa Athu.” * O misoso ni jividyu jiji, jitena kukwatekesa o dixibulu kumona kwila, unjimu kukayela o itumu ya Bibidya ku mwenyu wé.

9. Kyebhi ki utena kuswinisa o dixibulu phala kutangela kujindandu ni makambamê o ima yamudilonga?

⁹ Se o dixibulu dikaza, o kwila kazolakê wamudilonga we? Se kamudilonga, mwixane phala adilonge kumoxi. Swinisa o dixibulu phala kutangela kujindandu ni makambamê, o ima yamudilonga. (Nzwá 1:40-45) Kyebhi ki utena kubhanga kiki? Mwibhudise: “Kyebhi kiweji jimbulula o kidi kiki ku muthu watokala kumwiji we?” mba “Velusu yebhi ya Bibidya iweji tanga phala kukwatekesa kamba dyê kuxikina  o milongi yiyi?” Mukubhanga kiki, wamukwatekesa o dixibulu kukala we mulongexi. Hadya kyanda kala muboki, wandatena kuboka kumoxi ni kilunga. Utena we kumwibhudisa se wejiya muthu wengi wamesena we kudilonga o Bibidya. Se ukulondekesa muthu, umusota phala kumateka kumulonga o Bibidya. Mulondekese o vidyu Kyebhi kyalonga o Bibidya? *

10. Kala kilondekesa 1 Tesalonika 2:7, 8, kyebhi o muboki kyatena kukayela o phangu ya Phawulu?

¹⁰ O aboki atokala kulondekesa henda kumaxibulumâ. Atokala kwijiya kwila kuhádya ene andakala jiphange jê mukilunga. (Tanga 1 Tesalonika 2:7, 8.) Kitena kwabhonza kweha o makambamâ kabheza Nzambi, ni kubhanga yoso phala kusidivila Jihova. Mukyenyiki, twatokala kwakwatekesa kusanga makamba akidi mukilunga. Kala udikamba dya dixibulu dyê, mukukatula kithangana phala kukalanê, kana ngó phala kumulonga o Bibidya, maji we mu ithangana yengi. Utena kumuxinda mumutelembe, kumusonekena kanjimbu, mba kumukunda mu izuwa yoyo ki mwene mudilonga. Kubhanga kiki, kilondekesa kwila eye wamusuwu.

11. Twamesena kwila o maxibulu metu asanga ihi mukilunga, ni mukonda dyahi?

¹¹ Ene muzwela kwila, “kwabhingi sanzala yamuvimba phala kusasa o mona.” Etu tutena kuzwela kwila: “Kwabhingi kilunga kyamuvimba phala kulonga o dixibulu.” Mukonda dyakiki, o aboki ala ni uhete akwatekesa o maxibulumâ kwijiya o jiphange mukilunga. O jiphange jiji, jitena kumukwatekesa kuzukama kwa Jihova, kukala dikamba dya Jihova, ni kumuswinisa kyoso kyabhita mu ibhidi. Twamesena kwila o maxibulu oso adivwa kwila atokala mukilunga ni kwila abhanga mbandu ku mwiji wetu mu nzumbi. Twamesena we kwila o maxibulu adikwatenena ku mwiji wetu wa Ukidistá. Setubhanga kiki, kikwanda mubhonza kubatula o ukamba ni yó kamusidivila Jihova. (Jisa. 13:20) Se o makambamê okulu amubhana dikunda, mwene wandamona kwila, utena kusanga makamba akidi mukilunga kya Jihova.—Mál. 10:29, 30; 1 Phe. 4:4.

12. Mukonda dyahi twatokala kuzwela ni dixibulu yalungu ni kudibakula ni kudibatizala

¹² Zwela muveji javulu ni dixibulu kwila, o Jikidistá atokala kudibhakula ni kudibatizala. O kima kitubhangesa kulonga o Bibidya ku athu, o kwa kwatekesa kusidivila Jihova ni kwa batizala. Mujimbeji jadyanga kyoso  dixibulu kyamateka kudilonga o Bibidya, kotelele kyoso kyamateka kuya muyônge, mwene watokala kwijiya kwila, etu twamesena kumukwatekesa kukituka Mbangi ya Jihova.

13. Ihi yatokala kubhanga o dixibulu phala kumubatizala?

¹³ Bhofelebhofele, o muthu wamesena mwene kusidivila Jihova, wandabhixila katé kubatizu! Kyadyanga, o dixibulu wandakwijiya ni kuzola Jihova, ni Kumuxikana. (Nzwá 3:16; 17:3) Mwene wandakala dikamba dya Jihova, wandamateka kudilunga ni jiphange. (Jihe. 10:24, 25; Tiya. 4:8) Kudisukilu, o dixibulu dyandaxisa o ibhangelu yayibha, wandadyela o ituxi yê. (Ika. 3:19) Mwene wandamateka we kutangela akwâ o ima yamudilonga kindala. (2 Kol. 4:13) Kyenyiki, wandadibhakula kwa Jihova ni kumubatizala. (1 Phe. 3:21; 4:2) O kizuwa kya batizu, kizuwa kya kusanguluka kwadikota! Se o dixibulu dyamudisunga phala kumubatizala, eye watokala kumuximana. Muswinise kusuluka ni kubhanga jinga kyenyiki.

14. Kyebhi o muboki kyatena kumona se o dixibulu dya mukula mu nzumbi mba kana?

¹⁴ Mukukwatekesa dixibibulu katé kya dibhakula ni kumubatizala, twatokala kukala ni mwanyu. Maji twatokala we kusota kwijiya se wamesena mwene kusidivila Jihova Nzambi. O kwila o dixibulu wamulondekesa kwila wamubelesela o itumu ya Jezú? Inga wamesena ngó kubandekesa o kwijiya kwê kwalungu ni Bibidya?

15. Ihi ikwatekesa o muboki kwijiya se o dixibulu wamubhanga yoso phala kumubatizala mba kana?

¹⁵ Mu ithangana ni ithangana, sota kwijiya se o dixibulu dyamukula mwene mu nzumbi, mba kana. Mukifika, o kwila mu izwelu yê ulondekesa kwila wazolo Jihova? O kwila wene musamba kwa Jihova? (Jisá. 116:1, 2) Mwene wawabhela kutanga o Bibidya? (Jisá. 119:97) Wene muya muyônge semana joso? (Jisá. 22:22) O kwila walungulula kima kumwenyu wê kilondekesa kwila wamukumbidila yamudilonga? (Jisá. 119:112) Mwene wamutangela kujindandu ni makambamê o ima yamudilonga? (Jisá. 9:1) O kyabetakota, o kwila mwene wamesena kukala Mbangi ya Jihova? (Jisá. 40:8) Se mu ima yiyi mwene kamubhange kima, sota kumona se mukonda dyahi. Mukusuluka, umuxikamesa, zwelanê ni henda yoso. *

16. Kithangana kyebhi kiwatokala kweha kudilonga ni dixibulu?

 ¹⁶ Mu ithangana ni ithangana, sota kwijia se watokala mwene kusuluka ni kulonga o dixibulu, mba kana. Dibhwidise: ‘O kwila o dixibulu kene mupelepalala o madisá? O kwila mwene kamesena kuya muyônge? O kwila wala hanji ni idifwa yé yayibha? Watokala hanji mungeleja yamakutu?’ Se twatambwijila kyene, twatokala kulembalala kwila, kusuluka kulonga muthu wadifu kiki, kwasoko ni kuzowesa muthu ka mesena kubeta. Abha se o dixibulu kawabhela o ima yamudilonga, kamesena kulungulula o wendelu wê, mukonda dyahi twandasuluka kudilonganê?

17. Kala kilondekesa 1 Timote 4:16, ihi yatokala kubhanga o aboki oso?

¹⁷ Mudyetu o kubhanga maxibulu ki kikalakalu kyakutonoka, kana. Twamesena kyavulu kukwatekesa o maxibulu katé kya abatizala. Kiki, kyene kitubhangesa kulonga bhukaxi ka Bibidya, ni kulondekesa kudixibulu kwila, twazolo o kidi kya Mak’â Nzambi. Kyene we kitubhangesa kuswinisa o maxibulu kukala ni makamba mukilunga. Twandasuluka ni kutangela o maxibulu yalungu ni mbambe yakudibhakula ni kudibatizala. Mu ithangana ni ithangana, twandasota kumona se amukula mwene mu nzumbi. (Tala o kaxa mu difwe 13, “ Phala Dixibulu Kukula Katé Ku Batizu o Muboki Watokala Kubhanga o Ima Yiyi.”) Etu twasanguluka mukonda twala ni ujitu wakukwatekesa mu kikalakalu kiki kibhulula o myenyu! Twamesena kubhanga yoso itutena phala kukwatekesa o maxibulu a Bibidya kukula katé ku batizu.