1. Kyebhi o kima kyabetakota kitena kubhanga o muthu?

MUVEJI javulu o ima isola o jitata ifwinyisa we o mwenyu watwana twâ. Se o jitata asola kyayibha, andabhekela maka kutwana twâ. Maji se asola kyambote, andakwatekesa o twana twâ kuzediwa kumwenyu. Maji o twana atokala we kusola kyambote. O kima kyabetakota kitena kubhanga o muthu o kusola kusidivila Jihova Nzambi yetu yahenda.—Jisá. 73:28.

2. Ima yahi yambote yasolo Jezú ni jitata jê?

² Zuze ni Madiya amesenene kyavulu kukwatekesa o twana twâ kusidivila Jihova. O kima kyasolo ene kyalondekesa kwila, o kusidivila Jihova kyexile o kima kyabetelekota ku mwenyu wâ. (Luka 2:40, 41, 52) Jezú wasolo we ima yambote kumwenyu, yamukwatekesa kubhanga o vondadi ya Jihova. (Mat. 4:1-10) Kyoso kyakulu, Jezú wakituka muthu wambote, wafiyele, waswína. O jitata joso azola Jihova ejisanguluka kyavulu mukukala ni mona wadifu kiki.

3. Ibhwidisu yebhi itwandatambwijila mumilongi yiyi?

³ O milongi yiyi yandatambwijila o ibhwidisu yiyi: Ima yahi yambote yasolo Jihova yalungu ni Jezú? Ihi itena kudilonga o jitata mukilunga mu ima yasolo Madiya ni Zuze? Ihi itena kudilonga o minzangala mukilunga yalungu ni ima yasolo Jezú?

4. Ihi yasolo Jihova yalungu ni Monê?

⁴ Jihova wasolo jitata jambote phala Jezú. (Mat. 1:18-23; Luka 1:26-38) O musambu wabhange Madiya kala kya usoneka mu Bibidya ulondekesa kwila mwene wazolele kyavulu Jihova, wazolele we o Maka mê. (Luka 1:46-55) O ukexilu wa  Zuze kubelesela o itendelesu ya Jihova, yalondekesa kwila mwene wazolele Nzambi yu wamesenene kumusangulukisa.—Mat. 1:24.

5-6. Jihova wehela monê kudibhana ni ibhidi yahi?

⁵ Jihova kasolo athu exile jimvwama phala kukala jitata ja Jezú. O jisata jabhele Zuze ni Madiya kyoso kyavwala Jezú, jilondekesa kwila ene exile jingadyama. (Luka 2:24) Zuze nange wexile mubhanga o kikalakalu kya kalupindelu kubhata dyê mumbanza ya Nazalé. Bhene bhexile musumbisila o imbamba yê. Ene kexile ni ima yavulu, bengebenge kyoso kyadibandekesa o mwiji, kyeza mukala ni sambwadi dya twana.—Mat. 13:55, 56.

⁶ Jihova walange kyambote Mone Jezú, maji kamulange mu ibhidi yoso. (Mat. 2:13-15) Mukifika, sayi jindandu ja Jezú kamuxikina. Sayi athu atokala ku mwiji wê, kudimatekenu kaxikina kwila Jezú mwene wexile o Mexiya. Séphata kiki kyamuluwalesa kyavulu. (Mál. 3:21; Nzwá 7:5) Kyamukwá, nange Zuze wafu kyoso Jezú kyexile hanji munzangala. Kiki kyexile we kibhidi kyadikota phala mwene. Kuma Jezú mwene wexile o mona wadyanga, watokalele kubhanga o kikalakalu kyexile mubhanga tatê phala kulanga o mwiji. (Mál. 6:3) Kyoso Jezú kyayi ni kukula mwene wadilongo we kulanga o mwiji wê. Wakalakala kyavulu phala kudikila o ibhindamu ya mwiji. Jezú wijidile o kutohoka kwa muthu wabhiti o kizuwa kyoso ni kukalakala.

7. (a) Ibhwidisu yebhi yatokala kudibhanga o makaza amesena kukwatekesa o twana kukala? (b) O divulu dya Jisabhu 2:1-6 ditena kukwatekesa kyebhi mukikalakalu kyakusasa o twana?

⁷ O makaza amesena kuvwala twana atokala kudibhwidisa: ‘O kwila twalenduka twazolo Jihova ni Maka mê? O kwila Jihova watusolo phala kulanga o mona utwamesena kuvwala?’(Jisá. 127:3, 4) Se wala kyá ni mona, dibhwidise: ‘O kwila ngamulonga mon’ami kukala mukalakadi waswína?’ (Ndo. 3:12, 13) ‘O kwila ngamubhanga yoso ingitena phala kulanga mon’ami ku ima yayibha ya mundu yú wa Satanaji?’ (Jisá. 22:3) Eye kutena kulanga mon’ê mu ibhidi yoso yandadibhana nayu, Seku muthu utena kubhanga kiki. Maji bhofelebhofele, eye utena kumupelepalala ni henda yoso phala o ibhidi yandadibhana nayu kumwenyu ni kumulonga kyebhi kyatena kukayela o itendelesu ya Bibidya. (Tanga  Jisabhu 2:1-6.) Mukifika, sekukala muthu ku mwiji udituna kubheza Jihova, eye watokala kukwatekesa mon’ê bhukaxi ka Mak’â Nzambi kwila kima kyambote kusuluka ni ufiyele wetu kwa Jihova. (Jisá. 31:23) Semufunda ndandu, londekesa kwa mon’ê jivelusu ja Bibidya, jitena kumukwatekesa kudibhana ni kuluwala ni kusanga kutululuka.—2 Kol. 1:3, 4; 2 Tim. 3:16.

8. Kitendelesu kyahi kyakayela Madiya ni Zuze kitusanga mudivulu dya Matendelelu 6:6, 7?

⁸ Zuze ni Madiya akwatekesa Jezú kukala muthu amuxikina kwala Nzambi kyoso kyakulu. Ene akayela o kitendelesu kyabhana Jihova ku jitata. (Tanga Matendelelu 6:6, 7.) Zuze ni Madiya azolele kyavulu Jihova. Mukusasa o twana o kima kyakexile kupholo, o kwakwatekesa kuzola we Jihova.

9. Ihi yakexile mubhanga Zuze ni Madiya?

⁹ Zuze ni Madiya akexile mubheza Jihova kumoxi ni twana twâ. Séphata semana joso ene akexile muya muyônge mu dilombe mu Nazalé. Lumoxi ku muvu ene akexile mubanda mu Jeluzaleme phala kuya mu Fesa ya Phasu. (Luka 2:41; 4:16) Mukwenda o jinjila jiji katé mu Jeluzaleme, ene exile mulonga kwa Jezú ni jiphange jê, misoso yalungu ni mundu wa Jihova nange ni kuya mwatalesa o ididi yotumbule mu Mikanda Ikôla. Kyoso o mwiji ki wayi ni kukula, nange kyabhonzele phala Zuze ni Madiya kusuluka ni kubhanga o ubhezelu wâ, maji kusuluka kubhanga kiki, kwa abhekela mbote yavulu! Mukonda dyakuta o ubhezelu wakidi kupholo, o mwiji wâ wexile ni ukamba wambote ni Jihova!

10. Ihi itena kudilonga o jitata kuphangu ya Zuze ni Madiya?

¹⁰ Ihi itena kudilonga o jitata kuphangu ya Zuze ni Madiya? Kyabetakota, watokala kulondekesa kutwana twê bhukaxi ka izwelu ni ibhangelu yé kwila eye wazolo kyavulu Jihova. O ujitu wadikota utena kubhana kutwana twê, o kwa kwatekesa kuzola Jihova. O kima kyamukwá, eye utena kwakwatekesa kukala ni kifwa kya kudilonga o Bibidya, kusamba, kuya muyônge ni kuboka. (1 Tim. 6:6) Eye watokala we kudikila o ibhindamu ya twana twê. (1 Tim. 5:8) Lembalala kwila yandabhulula monê kumundu yú wayibha wa Satanaji ko jimbote kana, maji o ukamba wê ni Nzambi  wene wandamukwatekesa kubokona ku mundu wawubhe. *—Ize. 7:19; 1 Tim. 4:8.

11. (a) Kitendelesu kyebhi kitusanga mu 1 Timote 6:17-19 kikwatekesa o jitata kusola kyambote kyoso ene kyamusasa o twana twâ? (b) O mwiji utena kuxinganeka kubhanga ihi? Mabesá ebhi atena kutambula? (Tala o kaxa “ Jimbambe Jebhi Jiwandasuwa?”)

¹¹ O muxima wetu usanguluka kyavulu mukumona o jitata mukilunga amubhanga yoso phala kukwatekesa o twana twâ kukala ni ukamba wambote ni Jihova! Semana joso ene abheza kumoxi, aya kumoxi muyônge yayilunga ni muyônge yamakota. Aboka kumoxi o njimbu yambote. Sayi miji ene muya muboka mu ididi kene mubokelamu kyavulu. Akamukwa aya mukunda o Betele mba akwatekesa kutunga o Ididi ya Ubhezelu. Phala o miji kubhanga o ima yiyi kubhinga kitadi, kitena kwabhekela we tu ibhidi. Maji o mbote yatambula yasangulukisa kyavulu munzumbi. (Tanga 1 Timote 6:17-19.) O twana twasase mumiji ibhanga o ima yiyi, muveji javulu, kyoso kyakula, asuluka ni ku ibhanga, asanguluka kyavulu mu ukexilu wa asase ku jitata jâ! *—Jisa. 10:22.

12. Jezú wexile ni ihi phala kusola kyoso kyakulu?

¹² Jihova, tata ya Jezú, mu ithangana yoso usola kyambote. Zuze ni Madiya asolo we ni unjimu. Maji kyoso Jezú kyakulu, wabhingile kusola o ima mudyé. (Nga. 6:5) Kala etu, mwene wakexile we ni ufolo wakusola o ima yamesenene, se wamesenene, mwene wejitena kusola o ima yé, kana o ima ya Nzambi. Muveji dya kubhanga kiki, Jezú wasolo kukala ni ukamba wambote ni Jihova. (Nzwá 8:29) Kyebhi o phangu ya Jezú itena kukwatekesa o minzangala lelu?

13. Kima kyahi kyabhange Jezú kyoso kyexile hanji munzangala?

¹³ Mu unzangala wê, Jezú wasolo kubelesela o jitata jê. Mwene kaxibhaka o jitata, mukuxinganeka kwila, wexile dingi ni kwijiya ene ndenge. Muveji dyakiki, o Bibidya yamba: “Ukala mukwatumaka.” (Luka 2:51) Jezú wexile o mona wadyanga, kifwa, watokalele kubhanga ikalakalu yavulu. Mwene wakumbidila kyambote o kikalakalu kiki. Wabhange nguzu phala kwijiya o ufunu wakulupindelu ni tat’ê, Zuze, phala kukwatekesa kudikila o ibhindamu ya mwiji.

14. Mukonda dyahi tutena kuzwela kwila Jezú wexile mukwakudilonga o Mak’â Nzambi?

¹⁴ O jitata ja Jezú, nange amutangela o uvwalukilu wê wamadiwanu, ni ima yazwela o ji anju ja Nzambi yalungu ni mwene. (Luka 2:8-19, 25-38) Maji Jezú kasukila bhenyobho, mwene wadilongo we o Mikanda Ikôla ubheka  wé, phala kwijiya kyambote o ima. Mukonda dyahi tutena kuzwela kwila, Jezú wexile mukwa kudilonga kyambote o Mak’â Nzambi? Mukonda kyoso kyexile hanji munzangala, o jimesene jakulonga mu Jeluzaleme ‘adiwana kyavulu o kwijiya kwê ni kyakexile mutambwijila adyakime.’ (Luka 2:46, 47) Kyoso kyexile ngó ni 12 kya mivu, Jezú waxikinine ni kidi kyoso kwila, Jihova mwene Tat’ê.—Luka 2:42, 43, 49.

15. Kyebhi Jezú kyalondekesasa kwila wamesenene kubhanga o vondadi ya Jihova?

¹⁵ Kyoso Jezú kyeza mukwijiya o vondadi ya Jihova, mwene wasoto ku ibhanga. (Nzwá 6:38) Mwene wejidile kwila, athu avulu eji muzemba. Kiki nange kyamutandanganyesa. Nékiki, mwene wasolo kubelesela Tat’ê Jihova. Kyoso Jezú kyamubatizala kumuvu wa 29 K.K., o kima kyabetelekota kumwenyu wê, o kubhanga o vondadi ya Jihova. (Jihe. 10:5-7) Némwene kyosokyexile mufwa kutaka, mwene wakolokota mukubhanga o vondadi ya tatê.—Nzwá 19:30.

16. Ihi itena kudilonga o twana kuphangu ya Jezú?

¹⁶ Belesela o jitata jê. Kala Zuze ni Madiya, o jitata jê akwa ituxi. Né kiki, ene atambula o kikalakalu kwa Jihova kyakukulanga, kukulonga ni kukwendesa. Se ubhana valolo ku itendelesu yâ, anga uxila o ungana wa abhana Jihova, “yoso yandakwenda kyambote” kumwenyu we.—Efe. 6:1-4.

17. Kala kilondekesa Josuwé 24:15, ihi yatokala kusola o minzangala mudyâ?

¹⁷ Sola se wanda sidivila nanyi. Eye watokala kwijiya kyambote Jihova, kwijiya o vondadi yê, ni kyebhi kiwatokala ku ikumbidila kumwenyu wê. (Loma 12:2) Mukubhanga kiki, wandatena kubhanga o kima kyabetakota kumwenyu wé, o kusola kusidivila Jihova. (Tanga Josuwé 24:15; Ndo. 12:1) Se usota kutanga ni kudilonga o Bibidya semana joso, o henda yé kwa Jihova yandadibandekesa dingi, kixikanu kyé kyandakola dingi.

18. Kima kyahi kyatokakala kusola o minzangala ni ihi andatambula?

¹⁸ Sola kuta o vondadi ya Jihova kupholo. O mundu wa Satanaji wene mukanena kwila, se ulunga o mawuhete mê mukubhanga o vondadi yé, wandazediwa kumwenyu. Maji twejiya kwila, oso alunga o muxima mukusota o jiombote “aditoma mumavuwa mavulu mukwa ni jisongo.” (1 Tim. 6:9, 10) Maji se ubelesela  anga usola kuta o vondadi ya Jihova kupholo, wandasanguluka kumwenyu, o “wendelu we ukala wakubhanduluka.”—Josu. 1:8.

19. Ihi yatokala kulembalala o jitata?

¹⁹ Jitata, bhangenu yoso phala kukwatekesa o miji yenu kusidivila Jihova. Dyelelenu kwa Jihova, o mwene wandamikwatekesa kusola ni unjimu. (Jisá. 3:5, 6) Lembalalenu kwila, o twana twenu twandakayela dingi o ima imubhanga, o imuzwela ndenge. Kyenyikiphe, solenu ima yandakwatekesa o twana twenu kwaxikina kwala Jihova.

20. Mabesá ebhi andatambula o minzangala se asola kusidivila Jihova?

²⁰ Minzangala, o jitata jenu jitena kumikwatekesa kusola o ima ni unjimu, kumwenyu. Maji enu we mwatokala kubhanga kima, phala kusangulukisa Nzambi. Kyenyikiphe, kayelenu o phangu ya Jezú, solenu kusidivila Jihova, o Tatayenu ya dyulu. Se kyene kimubhanga, mwanda kala ni ikalakalu yavulu yandamisangulukisa kumwenyu. (1 Tim. 4:16) O kuhadya mwanda kala ni mwenyu wakalelaku, o mwenyu wabeta dingi kota!