1-2. Mukonda dyahi twene muya mu Lembalasa mu mivu yoso?

 MIDI jiyadi ja mivu kudima, Jezú wabhana o mwenyu wê phala o mbote yetu, kiki kya jikula o njila phala tutambule o mwenyu wakalelaku. Mu usuku ande dya kufwa kwê, Jezú watendelesa o maxibulu mê kulembalala o sata yê mu kubhanga kafesa kejibhinga ngó mbolo ni vinyu.—1 Ko. 11:23-26.

² Etu tubelesela o kitendelesu kya Jezú mukonda twamuzolo kyavulu. (Nzw. 14:15) Mivu yoso, jisemana ande dya Lembalasa ni kyoso kibhita o Lembasala, tulondekesa o kisakidilu kyetu kwa Jezú, mu kusamba ni mu kuxinganeka o mbote ibhekela o kufwa kwê phala o athu oso. Ni kusanguluka kwoso tuboka we dingi, twixana athu avulu phala kukala kumoxi netu mu kizuwa kiki kya katunda. Mu kidi, tubhanga yoso itutena phala kibhukale kima kitufidisa kuya mu Lembalasa.

3. Ihi itwanda dilonga mu milongi yiyi?

³ Mu milongi yiyi, twanda dilonga yalungu ni nguzu yene mubhanga o jiselevende ja Jihova phala kubhanga o Lembalasa ya kufwa kwa Jezú: (1) mu kubhanga o Lembalasa kala kyatumu Jezú, (2) mu kwixana o athu phala kukala kumoxi netu mu Lembalasa, ni (3) mu kubhanga o Lembalasa né mwene ni ibhidi yavulu.

4. Mu mivu yoso mu Lembalasa twene mudilonga ihi, ni mukonda dyahi twatokala kubhana valolo yavulu mu ima yoso itwejiya? (Luka 22:19, 20)

⁴ Mivu yoso mu Lembalasa, twívwa diskulusu dya Bibidya ditambwijila ibhwidisu yavulu. Tudilonga se mukonda dyahi o athu abhindamena kwa kula ni kyebhi o kufwa kwa muthu umoxi kubhulula athu avulu ku ituxi yâ. Atutangela we se o mbolo ni vinyu ilombolola ihi, se ananyi atokala kudya ni kunwa. (Tanga Luka 22:19, 20.) Tubanza mu mabesá andatambula yó andatunga mu ixi. (Iza. 35:5, 6; 65:17, 21-23) Twatokala kubhana valolo yavulu mu ima yoso yiyi itwejiya. Mazunda a athu kejiya o ima yiyi, kyenyiki kabhana valolo mu sata ya Jezú. Ene kene mubhanga o Lembalasa kala kyatumu Jezú ku maxibulu mê kwila atokalele ku ibhanga. Mukonda dyahi?

5. Kyoso o jipoxolo javulu ja Jezú kyafu, kyebhi kyamateka kulembalala o kufwa kwê?

⁵ Kyoso Jezú kyavutuka ku dyulu, mu kubhita mivu jipoxolo javulu ja Jezú afu, Jikidistá ja makutu abokona mu kilunga. (Mat. 13:24-27, 37-39) Ene a “zwela ima ya makutu phala kusunga o maxibulu ku mbandu yâ.” (Ika. 20:29, 30) O Jikidistá jiji amateka kulonga kwila Jezú kabhakula o mukutu wê lumoxi ngó “phala kwambata o ituxi ya athu avulu,” kala kilonga o Bibidya, maji o mukutu wê atokala ku usatela mu veji javulu. Yá makutu! (Jih. 9:27, 28) Lelu athu avulu ala ni mixima yambote axikina mu milongi yiyi ya makutu. Ene adyongeka mu jingeleja semana joso, sayi bhabha izuwa yoso, phala kulembalala o kufwa kwa Jezú. b Jingeleja ja mukwá ki jene mu lembalala o kufwa kwa Jezú mu ithangana yavulu, maji o athu atokalamu katendela o mbote ibhekela o sata ya Jezú. Sayi athu mudyâ adibhwidisa: ‘O kwila Nzambi utena mwene kuloloka o ituxi yami bhukaxi ka kufwa kwa Jezú?’ Mukonda dyahi adibhanga o kibhwidisu kiki? Mukonda a alongo kwila, Nzambi katena kuloloka o ituxi yetu bhukaxi ka kufwa kwa Jezú. Kyebhi o maxibulu a kidi a Jezú akwatekesa o athu kulembalala o kufwa kwê mu ukexilu watokala?

6. Ku muvu wa 1872, mu kudilonga o Mikanda Ikôla ihi yatendela o adilongi a Bibidya?

⁶ Ku muvu wa 1870, sayi kibuka kya adilongi a Bibidya kyamateka kudilonga kyavulu o Bibidya. Charles Taze Russell mwéne wexile mu kwendesa o kibuka kiki. Ene amesenene kwijiya o kidi kyalungu ni valolo ya sata ya Jezú ni kyebhi o Jikidistá kyatokala kulembalala o kufwa kwê. Ku muvu wa 1872, mu kudilonga o Mikanda Ikôla ene atendela kwila Jezú wafu phala kukúla o athu oso mu ngongo. O ima yadilongo ka ibhake ngó phala ene. Mu veji dya kiki, ene amateka ku ibokela bhukaxi ka madivulu. Mu kukayela o phangu ya Jikidistá ku hama ya dyanga, amateka kubhanga o Lembalasa ya kufwa kwa Jezú lumoxi ngó ku muvu.

7. Mbote yebhi itukatula mu ima yatokwesa o Jikidistá jojo mu mivu kudima?

⁷ Lelu tukatula mbote yavulu mu ima yatokwesa o Jikidistá jojo mu mivu kudima. Kyebhi? Jihova utukwatekesa kutendela kyebhi o kufwa kwa Jezú kubhekela mbote kokwetu ni ku athu oso. (1 Nz. 2:1, 2) Twejiya we kwila o Bibidya itulonga kuma o athu abheza Nzambi adyelela mu ima iyadi. O kidyelelu kyadyanga, o kuya ku dyulu ni kutambula o mwenyu ki ubhwa. O kidyelelu kya mukwá, o mwenyu wakalelaku phala mazunda ni  mazunda a athu andakala mu ixi. Kyoso kitudilonga yalungu ni henda yala nayu Jihova kokwetu ni mbote itubhekela o sata ya Jezú, tuzukama dingi kwa Jihova. (1 Ph. 3:18; 1 Nz. 4:9) Kala o jiphange jetu jafiyele mu ukulu, twixana o athu phala kuya mu Lembalasa ni ku ibhanga kala kyatumu Jezú.

8. Mu mivu yavulu o Jimbangi ja Jihova abhange ihi phala kwixana o athu phala kuya mu Lembalasa? (Tala o foto.)

⁸ Tunde ukulu, o Jimbangi ja Jihova ene mu kwixana o athu phala kuya mu Lembalasa. Ku muvu wa 1881, o jiphange jetu ku ixi ya Estados Unidos a exana phala kudyongeka mu inzo ya phange mu dyembu dya Allegheny, mu mbanza ya Pennsylvania, phala o kizuwa kiki kyakatunda. Mu kusuluka kala kilunga abhange o Lembalasa ubheka wê. Ku mbeji ya Katanu wa 1940, o aboki a aswinisa phala kwixana o athu amesenene kwijiya dingi, mu mbambe yâ. Ku muvu wa 1960, o Betele yabhana ku ilunga ixanu mu jiphaphela muveji yadyanga. Tunde o kithangana kyenyókyo, mazunda ni mazunda a ixanu ya Lembalasa ene mu ibhana ku athu avulu. Mukonda dyahi tubhanga nguzu yavulu phala kwixana o athu?

9-10. A nanyi dingi akatula mbote kyoso kitwixana o athu phala o Lembalasa? (Nzwá 3:16)

⁹ Etu twixana o athu phala kuya mu Lembalasa mukonda twamesena kwila o yó ayaku muveji yadyanga a dilonga o kidi kyalungu ni ima ya yabhange Jihova ni Jezú phala o mbote yetu. (Tanga Nzwá 3:16.) Etu twamesena kuma yoso yanda dilonga ni yanda kwivwa mu Lembalasa, ya abhangesa kukituka jiselevende  ja Jihova. O athu amukwa akatula we mbote.

¹⁰ Etu twixana we yó kamusidivila dingi Jihova. Tubhanga we kiki phala kwalembalesa kwila Nzambi wa azolo hanji. Avulu mudyâ axikina o kixanu kyetu, tusanguluka kyavulu kyoso ki tu amona. O kukala mu Lembalasa kwa alembalesa o kusanguluka kwexile naku kyoso kyexile hanji mu sidivila Jihova. Tala o phangu ya mana Monica. c Mwene wavutuka kuboka mu kithangana kya COVID-19. Kyoso kyayi mu Lembalasa mu muvu wa 2021, mwene wambe: “O Lembalasa yiyi yexile kima kya katunda phala eme. Mu 20 a mivu, yiyi yexile o veji yadyanga ingatenene kwixana o athu phala o Lembalasa. Ngabhange yoso ingatena mukonda ngisakidila kyavulu Jihova ni Jezú mu yoso yabhange phala eme.” (Jisá. 103:1-4) Kikale se o athu axikina o kixanu kyetu mba kana, tubhanga nguzu yavulu mu kwixana o athu phala o Lembalasa, mukonda twejiya kwila Jihova usanguluka mu kutumona kubhanga kiki.

11. Kyebhi Jihova kyabesowala o nguzu itubhanga mu kwixana o athu phala o Lembalasa? (Ajew 2:7)

¹¹ Jihova ubesowala kyavulu o nguzu itubhanga mu kwixana o athu phala o Lembalasa. Ku muvu wa 2021, né mwene ni ibhidi ya COVID-19, o athu exile mu Lembalasa exile 21.367.603 a athu. O athu yá asomboka o Jimbangi ja Jihova mu ngongo yoso mu luyadi! Mu kidi, Jihova kasuwu ngó o kuvula kwa athu aya mu Lembalasa. Maji mwene usuwa muthu ni muthu uyaku. (Luk. 15:7; 1 Ti. 2:3, 4) Tuxikina kwila kyoso kitubhana o kixanu ku athu, Jihova wa mu tukwatekesa kusanga o athu ala ni mixima yambote.—Tanga Ajewu 2:7.

12. Ihi itena kutubhonzesa kubhanga o Lembalasa? (Tala o foto.)

¹² Jezú wambe kwila mu izuwa isukidilaku twejidibhana ni ibhidi yavulu kala, izukutisu ku mwiji mba ku jinguvulu, ita, mauhaxi, ni ibhidi yengi. (Mat. 10:36; Mál. 13:9; Luk. 21:10, 11) Sayi bhabha o ibhidi yoso yiyi itubhonzesa o kubhanga o Lembalasa. Ihi yabhange o jiphange jetu phala kutolola o ibhidi yiyi, ni kyebhi Jihova kya akwatekesa?

13. Kyebhi Jihova kyabesowala o nguzu ya manu Alutulu phala kubhanga o Lembalasa né mwene mu kaleya?

¹³ Kukala mu kaleya. O jiphange jetu ala mu kaleya mukonda dya kubheza Jihova, abhanga yoso phala kulembalala o ufwilu wa Jezú. Tala o phangu ya manu Alutulu. Ku muvu wa 2020, mu jisemana ande dya Lembalasa ni kyoso kyabhiti o Lembalasa, mwene wexile mu kaleya kofele kumoxi ni jipelezu jitanu. Né mwene mu kaleya, mwene watenene kukala ni ima phala kubhanga o Lembalasa, mwene wadisokejeka phala kubhanga o diskulusu phala mwene. Maji o jipelezu ja mukwá akexile mubwakula kyavulu ni kuxinga we jindaka jabolo ithangana yoso. Ihi yabhange mwene? Mwene wa abhingi phala kaxinge ni kubwakula makanya mu ola imoxi. O exile nê mu kaleya ambe kwila, kejibwakula né kuxinga mu kithangana kya Lembalasa. Kiki kyabhangesa manu Alutulu kudiwana kyavulu! Mwene wambe: “Ngadibhakula phala kwatangela yalungu ni Lembalasa.” Sumbala ene ambe kwila kamesenene kwivwa o diskulusu, kyoso kyevu ni kumona manu Alutulu kubhanga o Lembalasa, ene amubhangele ibhwidisu yavulu yalungu ni Lembalasa.

14. Ihi yabhange o jiphange phala kubhanga o Lembalasa né mwene mu kithangana kya uhaxi wa COVID-19?

 ¹⁴ O uhaxi wa COVID-19. Mukonda dya uhaxi wa COVID-19, o jiselevende ja Jihova katokalele kubhanga o Lembalasa pholo ni pholo. Maji kiki ki kya afidisa kubhanga o Lembalasa. d O ilunga yexile ni internete yabhange bhukaxi ka jividyu. Maji ihi yabhange o ilunga yakambele o internete? Sayi jixi, o jiphange ku filiyale asokejeka o ima phala o jiphange atenene kutala o diskulusu mu mutelembe wa izuzumbya mba kwivwa mu rádio. O jiphange angalavala we o diskulusu mu 500 ja madimi ndenge phala yó ala ku maxokololo atenene we kubhanga o Lembalasa. O jiphange abhixidisa o diskulusu kwa yó abhindamene.

15. Ihi itudilonga mu phangu ya dixibulu dya Bibidya amwixana mana Suzete?

¹⁵ Izukutisu ku mwiji. Sayi athu o kibhidi kya dikota kyadibhana nakyu phala kubhanga o Lembalasa, o izukutisu ya mwiji. Tala o phangu ya dixibulu dya Bibidya amwixana mana Suzete. Ku muvu wa 2021, mu kizuwa kya Lembalasa,  mana Suzete wambe kwa mulongexi wê wa Bibidya kwila mukonda dya izukutisu ya mwiji wê kubhata, kejitena kubhanga o Lembalasa. O mulongexi watange o divulu dya Luka 22:44, anga wajimbulula kwa mana Suzete kuma, mu ithangana ya ibhidi twatokala kukayela o phangu ya Jezú mu kusamba kwa Jihova ni ku Mu dyelela ni muxima woso. Mu kizuwa kya kayela, mana Suzete wakwata o mbolo ni vinyu, yu wamono o Ubhezelu wa Matina mu jw.org. Mu usuku wenyó, mwene wevu o diskulusu dya Lembalasa mu dixilu dyê ubheka, bhukaxi ka mutelembe. Mu kusuluka, mana Suzete wasonekena o mulongexi wê wa Bibidya: “Maza wangiswinisa kyavulu. Ngabhange yoso ingatenene phala kumona o Lembalasa, Jihova wangikwatekesa kyavulu. Ki ngejiya kuzwela se kyebhi kingisakidila Jihova ni kyebhi kingamudivwa we!” O kwila uxikina kuma Jihova utena we ku kukwatekesa se udibhana ni kibhidi kiki?

16. Mukonda dyahi tudyelela kwila Jihova wandatubesowala kyoso kitulondekesa o kisakidilu kyetu mu yoso itubhanga phala o Lembalasa? (Loma 8:31, 32)

¹⁶ Jihova ubhana valolo yavulu mu nguzu itubhanga phala kuya mu Lembalasa ya kufwa kwa Jezú. Tutena kudyelela kwila mwene wandatubesowala kyoso kitulondekesa o kisakidilu kyetu mu yoso yabhange phala etu. (Tanga Loma 8:31, 32.) Tubhange yoso ni yoso phala kuya mu Lembalasa ku muvu yú. Mu jisemana ande dya Lembalasa ni kyoso kyandabhita o Lembalasa tubhange dingi mu sidivisu yetu kwa Jihova.