1-2. (a) Kyebhi kitutena kuxinganeka ku mwenyu wa Jezú ni mu ukunji wê? (b) Ihi itwandamona mu milongi yiyi?

 KYOSO muthu twamuzolo kyavulu kyafwa, etu tukala ni ngunzu yavulu ya muthu yú! Kudimatekenu eye uluwala kyavulu, nange umateka kuxinganeka se ihi yabhiti ni mwene ande dyakufwa, bengebenge se mwene watale hadi yavulu. Maji mu ithangana kupholo eye utena kumateka kusanguluka mu kuxinganeka mu ima yabhange mba yazwelele ya kubhangesa kwolela.

² Kyene we kimoxi, tu luwala kyavulu kyoso kitumona o ibhidi mba o hadi yatale Jezú ande dya kufwa. O kukala ni kixinganeku kiki kyanda tukwatekesa kumona o valolo yala nayu o sata yakukula yalondekesa Jezú kukwetu. (1 Ko. 11:24, 25) Maji né kiki etu tusanguluka kyavulu mu kuxinganeka mu ima yoso yabhange Jezú kyoso kyexile mu ixi. Kitusangulukisa we kyavulu mu kubanza mu ima yamubhanga lelu phala etu ni yanda bhanga we ku hádya. Kala kitwandamona mu milongi yiyi, o kuxinganeka mu ima yenyiyi ni mu henda ya Jezú kokwetu, yandatubhangesa kulondekesa o kisakidilu kyetu mu maukexilu avulu.

3. Mukonda dyahi tusakidila kyavulu mu sata ya kukula?

³ Kyoso kituxinganeka ku mwenyu ni ku ufwilu wa Jezú, tusakidila kyavulu mu ima yiyi. Kyoso Jezú kyexile mu ixi, mwene walongo o athu kuma o Utuminu wa Nzambi wandabheka  mabesá avulu. Tubhana valolo yavulu mu njimbu ya Bibidya yalungu ni sata yakukula. Etu tusakidila kyavulu mu sata ya kukula ya Jezú mu ku tujikwila o njila phala tukale ni ukamba wa kidi ni Jihova ni Jezú. O yó ala ni kixikanu kwa Jezú, ala ni kidyelelu kya kwila andakala ni mwenyu wakalelaku ni kwila anda tambula we o jindandu ja jafu kya. (Nzw. 5:28, 29; Lom. 6:23) Etu kitwabhange kima kitubhangesa kutambula o mabesá yá, etu we kitwandatena kufuta o ima yoso yabhange Nzambi ni Kidistu phala etu. (Lom. 5:8, 20, 21) Maji tutena kulondekesa kuma twasakidila kyavulu. Kyebhi?

4. Kyebhi Madiya dya Manda kyalondekesa o kisakidilu kyê kwa Jezú? (Tala o foto.)

⁴ Tala o kifika kya muhatu mukwa Judá amwixana Madiya dya Manda. Mwene akexile mu muzukutisa ku sambwadi dya madimonyo, wexile mutala hadi yavulu. Wexile muxinganeka kuma seku muthu wejitena kumukwatekesa. Nange tutena kuxinganeka o kisakidilu kya mwene kyoso Jezú kyatolola o madimonyo enyó! O ukexilu yu wamukwatekesa kukala dixibulu dya Jezú, wabhange yoso phala kudibhakula ni nguzu yê, kithangana ni jimbote jê phala kukwatekesa o ukunji wa Jezú. (Luk. 8:1-3)Mwene wasakidila kyavulu o kikwatekesu kya Jezú, maji nange Madiya kexile mu xinganeka se ihi dingi yejibhanga Jezú ku hádya phala mwene. Jezú wejibhana o mwenyu wê phala etwenyoso, “phala woso u muxikana káfwe, maji akale ni mwenyu wakalelaku.” (Nzw. 3:16) Maji ne kiki, Madiya walondekesa o kisakidilu kyê kwa Jezú mu kukala fiyele kwa mwene. Kyoso Jezú kya mu phaphele kutaka ni kutala hadi yavulu, Madiya wexile ku mbandu yê, phala kumuswinisa ni kuswinisa we akwâ. (Nzw. 19:25) Kyoso Jezú kyafu, Madiya ni ahatu ayadi, asumbu ima inuha kyambote, phala kuwaya o kimbi kya Jezú. (Mál. 16:1, 2) Madiya watambula mabesá avulu mukonda dya ufiyele wê. Mwene watambwile o ujitu wa kudisanga ni Jezú ni kuzwela nê kyoso kya  mufukununa. Maxibulu ofele ngó exile ni ujitu yú.—Nzw. 20:11-18.

5. Kyebhi kitutena kulondekesa o kisakidilu kyetu kwa Jihova ni kwa Jezú mu yoso yabhange phala etu?

⁵ Etu we tutena kulondekesa o kisakidilu kyetu kwa Jihova ni kwa Jezú mu yoso yabhange phala etu, mu kubhana o kithangana, o nguzu yetu ni jimbote jetu, phala kuboka o njimbu ya Utuminu wa Nzambi. Mu kifika, etu tutena kudibhakula phala kukwatekesa mu ikalakalu ya kuyudika ni kutunga o ididi ya ubhezelu phala Jihova.

6. Mukonda dyahi utena kuzwela kuma o sata yakukula ujitu wadikota phala eye?

⁶ Kyoso ki tuxinganeka mu henda ya Jihova ni ya Jezú kokwetu, o henda yetu kwa ene idibandekesa dingi. (1 Nz. 4:10, 19) Twazola dingi kyoso ki tutendela kwila Jezú wafwila kala muthu mudyetu. Poxolo Phawulu walondekesa o kisakidilu kyê kwa Jezú kyoso kyasoneka: “Mon’a Nzambi . . . wa ngi zolo yu wabhana o mwenyu wê mukonda dyami.” (Nga. 2:20) Bhukaxi ka sata ya kukula, Jihova wakuzukamesa kwa mwene, phala eye utene kukala u dikamba dyê. (Nzw. 6:44) O kwijiya kuma Jihova wamono kima kyakatunda kokwé, wa kukulu phala utene kukala u dikamba dyê, o kiki ki ki kusangulukisa o muxima? O kwijiya o maka yá ki kikubhangesa kwazola dingi? Twatokala kudibhwidisa: ‘O henda yiyi ingiswinisa kubhanga ihi?’

7. Kala kitwamumona mu foto, kyebhi ki tutena kulondekesa o henda yetu kwa Jihova ni kwa Jezú? (2 Kolindu 5:14, 15; 6:1,2)

⁷ O henda yetu kwa Nzambi ni kwa Kidistu, itubhangesa ku zola dingi akwetu. (Tanga 2 Kolindu 5:14, 15; 6:1, 2.) Tulondekesa o henda yiyi mu kuboka ni nguzu yoso o njimbu yambote ya Utuminu. Etu tuzwela ni athu oso utusanga mu ukunji. Kitwene mutala se muthu  watokala ku ixi yengi, o kikonda kyê, se wadilongo kyavulu mba kana. Ni ukexilu yu etu twandabhanga o vondadi ya Jihova ya “kwila, athu a maukexilu oso abhuluke, anga eza mu kwijiya o kidi.”—1 Timote 2:4.

8. Kyebhi kitutena kulondekesa kuma twazolo o jiphange jetu?

⁸ Etu tulondekesa o henda yetu kwa Jihova ni kwa Jezú mu kuzola o jiphange jetu. (1 Nzwá 4:21) Tusuwa enyoso, twakwatekesa kyoso kyabhita ni ibhidi. Se phange wafundu ndandu, tumukonda o malamba mê, se wamukata tumukunda, se waluwala tubhanga yoso ni yoso phala kumuswinisa. (2 Ko. 1:3-7; 1 Te. 5:11, 14) Tukolokota mu kwasambela mukonda, “o musambu wa muthu wayuka wala ni kutena kwadikota.”—Tiy. 5:16.

9. Webhi o ukexilu wa mukwá wa kulondekesa kuma twazolo o jiphange jetu?

⁹ O ukexilu wa mukwá wa kulondekesa o henda yetu ku jiphange, o kukala ku paze ni ene. Jihova mwene wabeta kota mu kuloloka, mu kiki tutena kukayela o phangu yê. Se Jihova wabhana Mon’ê nafu mukonda dya ituxi yetu, o kwila kitutena we kuloloka o jiphange jetu? Etu kitwamesena kukayela o phangu ya mubhika amutumbula mu kifika kya Jezú. Kyoso o ngana yê kyamuloloka o dikongo dyadikota, mwene kaxikina kuloloka o dikongo dyofele dyamutele mubhika ni mukwâ. (Mat. 18:23-35) Se eye wala ni maka ni phang’yé mu kilunga, o kwila utena kubatula hanji o maka ni phang’yé ande dya kuya mu Lembalasa? (Mat. 5:23, 24) Se ubhanga kiki wandalondekesa kwila eye wazolo Jihova ni Jezú.

10-11. Kyebhi o tufunga kyatena kulondekesa o henda yâ kwa Jihova ni kwa Jezú? (1 Phetele 5:1, 2)

¹⁰ Kyebhi o tufunga kyatena kulondekesa kwila azolo Jihova ni Jezú? Ene atena kubhanga kiki mu kulanga o ibhindamu ya jimbudi ja Jezú. (Tanga 1 Phetele 5:1, 2) Jezú walondekesa o kidi kiki kwa poxolo Phetele. Kyoso Phetele kyaditunu Jezú mu veji jitatu, nange mwene wemesenene kyavulu kulondekesa kwila wazolele Jezú. Kyoso Jezú kya mufukununa mwene webhwidisa Phetele: “Ximá mon’a Nzwá, eye wa ngizolo?” Mu kidi Phetele wejibhanga yoso ni yoso phala kulondekesa kuma wazolo kyavulu Mesene yê. Jezú wambe kiki kwa Phetele: “Inga o tumbudi twami.” (Nzw. 21:15-17) Katé kyafu Phetele walange ni henda yoso o jimbudi ja Jezú, mu kulondekesa kwila wamuzolele kyavulu.

¹¹ Tufunga, mu jisemana ande ni kyoso kibhita o Lembalasa, kyebhi kimutena kulondekesa kuma o izwelu ya Jezú kwa Phetele kima kyakatunda phala enu? Enu mutena kulondekesa kwila mwazolo kyavulu Jihova ni Jezú, mu kuswinisa o jiphange ni kukwatekesa yó kamuboka dingi phala avutuke kwa Jihova. (Ize. 34:11, 12) Enu we mutena kukwatekesa o maxibulu a Bibidya ni athu engi eza mu kizuwa kya Lembalasa, kudivwa kyambote ni kwila twa azolo kyavulu. Mu kidi ene atena we kukituka maxibulu a Kidistu.

12. Mukonda dyahi o ima yazwela Jezú mu usuku ande dya kufwa, ituswinisa? (Nzwá 16:32, 33)

¹² Mu usuku wasukina ande dya kufwa, Jezú wambe ku maxibulu mê: “Mu ngongo mumu mwanda tala hadi, maji swinenu! O ngongo yiyi, eme nga itolola.” (Tanga Nzwá 16:32, 33.) Ihi yakwatekesa Jezú kulondekesa o kuswina kyoso o jinguma jê kyexile mu mutalatala kyayibha ni kukala fiyele katé kyafu? Mwene wadyelele ni muxima woso kwa Jihova. Mwene wejidile kwila o maxibulu mê eji dibhana we ni ibhidi yabhonzo, kiki kyene  kyabhangesa Jezú kubhinga kwa Jihova phala kwalangidila. (Nzwá 17:11) Mukonda dyahi kiki kituswinisa? Mukonda Jihova wabetakota mukutena jinguma jetu ndenge. (1 Nzwá 4:4) Jihova umona yoso ibhita. Mu kiki tutena kudyelela kwa Jihova ni muxima woso, kwila mwene wanda tukwatekesa kutolola o ibhidi yetu ni ku tuswinisa we.

13. Kyebhi Zuze dya Dimateya kyalondekesa o kuswina?

¹³ Tala o phangu ya Zuze dya Dimateya. Mwene exile mu muxila kyavulu ku akwa Jijudé. Mwene watokalele mu inzo ya katunda ya Kufundisa ya Jijudé. Maji mu kithangana kya ukunji wa Jezú mu ixi, Zuze kaswinine hanji kyavulu. Poxolo Nzwá wambe kiki yalungu ni mwene: “Zuze dya Dimateya (wexile dixibulu dya Jezú maji mu kaswekele, mukonda dya wôma wa Jijudé).” (Nzwá 19:38) Zuze wadyelele kyavulu mu njimbu ya Utuminu, maji kexile mudilondekesa kupholo ya akwâ kwila wexile ni kixikanu kwa Jezú. Nange mwene wexile ni wôma wa kwila o athu keji muxila dingi mukonda dya kukala dixibulu dya Jezú. Maji o Bibidya yamba kuma, kyoso Jezú kyafu, Zuze “anga wôma u mu bhwa, uya kwa Pilatu, u mu bhinga o kimbi kya Jezú.” (Mál 15:42, 43) Mu kithangana kyenyókyo athu oso eza mukwijiya kwila, mwene wexile dixibulu dya Jezú mu kaswekele.

14. Ihi iwatokala kubhanga se wala ni wôma wa athu?

¹⁴ O kwila eye wexile kyá ni wôma kala Zuze dya Dimateya? O kwila wexile kya ni jisonyi ja kudilondekesa kala u Mbangi ya Jihova ku xikola mba kusalu? O kwila wala ni hele ya kukituka muboki mba ya ku kubatizala mukonda dya wôma wa athu? Kana kwehela o wôma kukufidisa kubhanga o ima iwatokala o kubhanga. Samba kwa Jihova ni kidi kyoso. Mubhinge o kuswina phala ubhange o vondadi yê. Kyoso ki umona kwila, Jihova watambwijila o misambu yê wandakala ni nguzu ni kuswina dingi.—Iza. 41:10, 13.

15. Kyoso Jezú kya moneka ku maxibulu mê, o kusanguluka kwakwatekesa kubhanga ihi? (Luka 24:52, 53)

¹⁵ O maxibulu aluwalele kyavulu kyoso Jezú kyafu. Dite mu kididi kyâ. Ene katexika ngó o dikamba dyâ dya kazola maji akexile mudivwa kala atexikile we o kidyelelu kyâ. (Luk. 24:17-21) Maji ki kwabhiti ithangana yavulu, Jezú wamoneka ku pholo yâ, mwene wakatula kithangana phala kukwatekesa o maxibulu mê kutendela kwila o kufwa kwê kwexile mu kumbidila ikanenu ya Bibidya. Mwene wa abhana we kikalakalu kyakatunda phala kubhanga. (Luk. 24:26, 27, 45-48) Mu kubhita 40 a izuwa  kyoso Jezú kyayi kudyulu, o kuluwala kwa maxibulu kwa kituka kisangusangu. Ene asangulukile mu kwijiya kwila Jezú wafukunukine, mwene wexile polondo phala kwakwatekesa kukumbidila o kikalakalu kya abhele. O kusanguluka kwâ kwakwatekesa kusidivila Jihova sé hele.—Tanga Luka 24:52, 53; Ika. 5:42.

16. Kyebhi ki tu tena kukayela o phangu ya maxibulu a Jezú?

¹⁶ Kyebhi ki tutena kukayela o phangu ya maxibulu a Jezú? Etu tutena kukatula kithangana phala kudilonga yalungu ni Jihova ki mu kithangana ngó kya Lembalasa, maji tutena kubhanga kiki mu muvu woso. Phala kutena kubhanga kiki watokala kuta o Utuminu wa Nzambi kupholo dya mwenyu wê. Mu kifika, jiphange javulu amubhanga kiki sayi ya asokejeka o kithangana kyâ ku salu, phala kuboka dingi ni kutala o yônge ni kubhanga we o ubhezelu ku mwiji semana joso. Akamukwa kamesena kukala ni jimbote javulu jisuwa o athu, ene abhanga kiki phala kubhanga dingi mu kilunga kyâ mba kuya mu ididi mwa bhindamena aboki. Kidi mwene, twatokala kukolokota phala kusidivila Jihova, mwene watukanena mabesá avulu se tudyanga kuta o Utuminu wa Nzambi ku mwenyu wetu.—Jisa. 10:22; Mat. 6:32, 33.

17. Ihi iwamesena o kubhanga mu kithangana kya Lembalasa? (Tala o foto.)

¹⁷ Etu twamukingila ni hanji yoso o kizuwa kya Lembalasa yandabhita kya Telesa, ya mbeji ya Kasamanu mu kizuwa kya 4. Etu ki tutokala ngó kukingila o kithangana kiki phala kuxinganeka mu sata ya Jezú ni mu henda ya yatulondekesa Jihova. Xinganeka mu ima yoso yiyi mu semana ya Lembalasa ni mu jisemana kupholo. Mu kifika, sota kithangana phala kutanga ni kuxinganeka o milongi yala mu Apêndice B12 ni dyambu: “A última semana de Jesus na Terra” itusanga mu Tradução do Novo Mundo da Bíblia Sagrada. Kyoso ki uya ni kutanga sola jivelusu ja Bibidya janda kukwatekesa kulondekesa o kisakidilu, o henda, o kuswina ni kisangusangu. Mu kusuluka utena kuxinganeka mawukexilu akulondekesa o kisakidilu kiki. Mukidi Jezú wandabhana valolo yavulu mu yoso i ubhanga phala kumulembalala mu kizuwa kya Lembalasa.—Dij. 2:19.