MBANDU YAKUDILONGA 38
Londekesa Unjimu mu Kithangana Kya Kutululuka
“Ixi ya tululukile kyambote, kuma mu mivu yene’oyo kikwakexile woso u lwanê ita; mukonda amubhana kunyoha kwala Jihova.”—2 MAL. 14:6.
MWIMBU 60 Njimbu ya Kubhuluka
ITWANDADILONGA *
1. Kusidivila Jihova kubhonza dingi mu kithangana kyebhi?
MUDYE, kusidivila Jihova kubhonza dingi mu kithangana kyebhi? Kibhita kyoso ki udibhana ni ibhidi yavulu, inga kyoso ki ukamba ibhidi? Kyoso kitudibhana ni ibhidi, kikutubhonza kudyelela kwa Jihova. Abha se kwatululuke, kifwa kitwa mudibhanetu ni kibhidi, ihi itubhanga? O kwila kitena kubhita kujimba kwila twatokala kubheza Jihova? Jihova wadimuna akwa Izalayele mukilwezu kiki.—Mate. 6:10-12.
Sobha Aza wamubhanga yoso phala kuzubha o ubhezelu wa iteka (Tala o kaxi 2) *
2. Phangu yebhi yambote yabhana Sobha Aza?
2 Sobha Aza phangu yambote yadiyala dyalondekesa unjimu, mu kudyelela Jihova ni muxima woso. Mwene kasidivila ngó Jihova mu ithangana ya ibhidi, wamusidivila we mu ithangana yatululuka. “Aza muxima wê wa yukile mu kukayela jinga Jihova izuwa yoso ya mwenhu wê,” tunde undenge. (1 Jis. 15:14) Aza walondekesa kwila wexile mubheza Jihova ni muxima woso, kuzubha o ubhezelu wamakutu ku Juda. O Bibidya yamba kwila, “jikalatódyo ja jinzambi jengi wajikatula, o matala mâ wa ma sengulula; o iteka yâ wa ibulabula, o mixitu yâ wa ikokela bhoxi.” (2 Mal. 14:3, 5) Ni kukwe Mahaka, wexile muhatu wadyanga mu utuminu mba mvwale, wamukatuku. Mukonda dyahi? Mukonda wexile mu swinisa o athu kubheza o iteka.—1 Jis. 15:11-13.
3. Ihi itwandadilonga mu milongi yiyi?
3 Aza kabulu ngó o iteka. Mwene wakwatekesa we o mundu wa Juda kubheza dingi Jihova. Jihova wabesowala Aza ni akwa Izalayele, mukwabhana kithangana kyakutululuka. * Mu utuminu wa Aza, o“ixi ya tululukile kyambote” mu dikwinyi dya mivu. (2 Mal. 14:1, 4, 6) Mu milongi yiyi, twandadilonga ihi yabhangele Aza mu kithangana kya kutululuka. Mukusuluka, twandadilonga o phangu ya Jikidistá mu hama yadyanga, alondekesa unjimu mu kithangana kyakutululuka, kala kyabhangele Aza. Kudisukilu, o milongi yandatambwijila o kibhwidisu kiki: Se watungu mu ixi mwala ufolo wakubheza Jihova, kyebhi ki utena kulondekesa unjimu mu kithangana kyakutululuka?
IHI YABHANGELE AZA MU KITHANGANA KYA KUTULULUKA?
4. Kala kilondekesa 2 Malunda 14:2, 6, 7, ihi yabhangele Aza mu kithangana kyakutululuka?
4 Tanga 2 Malunda 14:2, 6, 7. Aza wambela o mundu: Jihova “watubhana o kutululuka mu jimbandu joso.” Aza kabanzele kwila, o kithangana kyakutululuka kyokyo, kyexile ngó kyakudya, kunwa ni kuzeka. Muveji dyakiki, mwene wamateka kutunga jimbanza, imbaka, jinzu ja matala ni mabhitu. Mwene wambela dingi o mundu wa Juda: “Ixi yala hanji ni kutululuka.” Ihi yamesenene kuzwela Aza? Mwene wexile muzwela kwila, kikwexile jinguma jeji kwakwatekesa woma wa kwenda mba kwafidisa kutunga. Mwene wadimuna o mundu wa Juda kulondekesa unjimu mu kithangana kiki kyakutululuka.
5. Mukonda dyahi Aza waswinisa o kifuxi kyê kya masoladi?
5 Mu kithangana kyakutululuka Aza waswinisa we o kifuxi kyê kya masoladi. (2 Mal. 14:8) Kiki kilombolola kwila mwene kadyelele kwa Jihova? Kana. Aza wejidile kwila, kukwatekesa o mundu mu ibhidi yeji moneka ku hadya, kyexile kikalakalu kye, mukonda mwene wexile o sobha. Aza wejidile we kwila, o kithangana kya kutululuka ku Juda, kikyeji nangenena. Kidi mwene, kikyanangenene.
IHI YABHANGELE O JIKIDISTÁ MU HAMA YADYANGA MU KITHANGANA KYAKUTULULUKA?
6. Kyebhi o Jikidistá mu hama yadyanga kyalondekesa unjimu mu kithangana kyakutululuka?
6 Sumbala o Jikidistá mu hama yadyanga a azukutisa kyavulu, ene exile we ni ithangana ya kutululuka. Ihi yabhange mu ithangana yiyi? O mayala ni ahatu afiyele yo, aboko o njimbu yambote sekubhwila. O musoso mu divulu dya Ikalakalu wamba kwila, “akexile mu belesela Jihova.” Asuluka ni kuboka o njimbu yambote, mukubhanga kiki, “o ilunga yexile mu dibandekesa.” Sephata, Jihova wabesowala o nguzu ya yakuboka ni kuswina mu ithangana yakutululuka.—Ika. 9:26-31, nwt.
7-8. Ihi yabhangele Phawulu ni akwa kyoso kyexile ni kithangana? Jimbulula.
7 O Jikidistá jadyanga exile muboka ithangana yoso. Mukifika, kyoso Phawulu kyamono kwila, wejibokela athu avulu ku Efezu, mwene katunduku ni lusolo, waboko, wabhange maxibulu mu mbanza yenyoyo.—1 Kol. 16:8, 9.
8 Phawulu ni Jikidistá ni akwa, ejitena we kubokela athu avulu ku muvu wa 49 K.K., kyoso jipoxolo ni tufunga ku Jeluzaleme kya batula o maka alungile ni kusaya. (Ika. 15:23-29) Kyoso Phawulu ni akwa kyabhana o ngolokela mu ilunga yalungu ni kyebhi kya batwile o maka, enoso akalakala kyavulu mu kuboka “o njimbu yambote yalungu ni mak’â Jihova.” (Ika. 15:30-35, nwt) Ihi yabhiti? O Bibidya yamba kwila, “o ilunga ya kexile mu swina dingi mu kixikanu, anga i kala mu dibandekesa izuwa yoso.”—Ika. 16:4, 5, nwt.
LELU LONDEKESA UNJIMU MU ITHANGANA YAKUTULULUKA
9. Ihi yamubhita mujixi javulu lelu? Ihi itutena kudibhwidisa?
9 Mujixi javulu twala ni ufolo wakuboka. O kwila mu ixi mu watungu mwala ufolo wakubheza Jihova? Se kyene dibhwidise: ‘Ihi ingamubhanga ni ufolo ungala nawu?’ O izuwa isukidilaku yene mubhekela mbote kumundu wa Jihova, mukonda ene amubhanga ima yavulu mukikalakalu kyakuboka ni kulonga kumundu woso. (Mál. 13:10) Kwene ima yavulu itutena kubhanga mukikalakalu kiki.
Jiphange javulu amutambula mabesá avulu mukubokela athu ku jixi jengi mba yo azwela dimi dyengi (Tala o jikaxi 10-12) *
10. O divulu dya 2 Timote 4:2, dituswinisa kubhanga ihi?
10 Kyebhi ki utena kukatula mbote mukithangana kyakutululuka? (Tanga 2 Timote 4:2.) Xinganeka mu kithangana kiwala nakyu mba kyala nakyu muthu ku mwiji we. O kwila kibhana kudisokelesa phala kuboka mu ididi mwabhingi dingi aboki mba kukala muboki wa thembu yoso? Kiki kikithangana kyakusota umvwama ni jimbote. Ima yiyi, kitwandabhuluka nayu mukithangana kyahadi yadikota.—Jisa. 11:4; Mat. 6:31-33; 1 Nzwá 2:15-17.
11. Sayi jiphange ene mu bhanga ihi, phala kuwatekesa athu avulu kwivwa o njimbu yambote?
11 Aboki avulu ene mu dilonga dimi dyengi phala kukwatekesa o athu kwiya Jihova. O kilunga kya Nzambi kyene mubhanga ima yavulu phala kwakwatekesa kuboka mu madimi avulu. Mu kifika, ku muvu wa 2010, nange twexile ni madivulu 500 amadimi. Lelu twala kya ni 1.000 amadimi ndenge!
12. Mbote yebhi yene mu katula o athu mukwivwa o njimbu ya Utuminu mu dimi dya uvwalukilu? Bhana phangu.
12 Ihi ibhita kyoso athu kyevwa okidi kya Mak’â Nzambi mu dimi dyâ dya uvwalukilu? Xinganeka mumusoso wa phange ya muhatu wa katula mbote mu kyonge kya dikota kya bhitile ku Mênfis, Tennessee, Estados Unidos. O kyônge akibhange mu dimi dya, Quiniaruanda o dimi dya uwalukilu dya akwa Ruanda, Congo (Kinshasa), ni mu dimi dya akwa Uganda. Kyoso kyabhu o kyônge, mwne wambe: “Ngatenesa kya 17 amivu tunde kingeza ku Estados Unidos kuku. Kiki kyene o kithangana kyadyanga kingatendela kyambote o milongi yoso ya kyônge kyadikota.” Sephata, phangyetu o milongi yevu mu dimi dyê dya uvalukilu, dya mutula kumuxima. O kwila utena kudilonga dimi dyengi phala kukwatekesa o athu mu mbambe yé, se kithangana kyé kibhana? Nange kubhinga kubhanga kiki, mukonda mu mbambe ya kilunga kyé mwala athu adivwa dingi kyambote mukuzwela nawu mu dimi dyengi. Jihova wandabesowala o nguzu yé.
13. Kyebhi o jiphange jetu ku Russia kya londekesa unjimu mu kithangana kyakutululuka?
13 Kojiphange joso ala ni ufolo wakuboka. Sayi jixi o jiphange jetu kala ni ufolo wakuboka mukonda o jinguvulu ene mu fidisa o kikalakalu kyetu. Mukifika, xinganeka ku jiphange jetu ku Russia. Ene a azukutisa mu mivu yavulu, mu mbeji ya Katanu ka muvu wa 1991, o nguvulu ya ixi wa a abhana ufolo wa kubheza. Mu thembu ina ku Russia kwexile 16.000 a aboki a utuminu. Mukubhita makwinyi ayadi a mivu, kwexile kya 160.000! Sephata, jiphange jetu alondekesa unjimu kyoso kyexile ni ufolo wa kuboka. Maji o kithangana kyakutululuka kikinangenena. Sumbala o ima ku ixi yiyi yalunguluka, o jiphange hanji a swina mu ubhezelu wâ kwa Jihova. Ene mu bhanga yoso yatena phala kusuluka ni kumubheza.
O KITHANGANA KYAKUTULULUKA KIKYANDANANGENENA
Kyoso Sobha Aza kyasambe ni kuswina Jihova wakwatekesa akwa Juda kutolola o jinguma jâ, sumbala avudile (Tala o kaxi 14-15)
14-15. Kyebhi Jihova kyakwatekesa Aza bhukaxi kakutena kwê?
14 Mu izuwa ya Aza, o kutululuka kikunangenena. Kwa atudila kifuxi kyadikota kya masoladi akwa Etyiopya, mu kwakondala, kazunda ndenge. O mutwameni wâ Zela wadyelele kwila ejitolola akwa Juda. Maji, Sobha Aza kadyelela kukifuxi kya masoladi, wadyelela kwa Jihova. Aza wasambe: “Tukwatekesephe, eye u Jihova, dya Nzambi yetu, mukonda twadyelela kokwé, o mu dijina dyé mwene mu twejila mu kúluwa ni kifuxi kiki.”—2 Mal. 14:11.
15 Sumbala o masoladi akwa Etyopya avudile dingi, Aza wejidile kwila, Jihova wala ni kutena weji kwatekesa o mundu Wê. Jihova wa akwatekesa mwene; ene atolola akwa Etyopiya.—2 Mal. 14:8-13.
16. Kyebhi kitwejiya kwila o kithangana kyakutululuka kikwandanangenena?
16 Sumbala kitwejiya kyambote ihi yandabhita netu kuhadya, twejiya kwila o kutululuka kwalanaku o mundu wa Jihova lelu, kikwandanangenena. Mukidi Jezu wakanena kwila, mu izuwa isukidilaku o maxibulu mê eji “kwa zemba kwala akwa jixi joso.” (Mat. 24:9, nwt) Kyene we kimoxi kyambe Poxolo Phawulu, “ene oso kyá a sola kwenda mu ukidistá kala kyandala Nzambi mwa Kidistu Jezú, andú tala hadi ni ku a zukutisa!” (2 Tim. 3:12) Satanaji wala ni “njinda yavulu,” kitutena kulenga o ima ijila mu njinda yê.—Dij. 12:12.
17. Nange okixikanu kyetu andakilola mumawukexilu ebhi?
17 Kwakambe ngó, etwenyoso andalola okixikanu kyetu. “Kwa kà kala hadi yadikota, kiluwa ibhita tundé kudimatekenu dya ngongo katé kindala.” (Mat. 24:21, nwt) Mukithangana kiki, jindandu jetu andatulungulukila, o kikalakalu kyetu, andakifidisa. (Mat. 10:35, 36) O kwila kala muthu mudyetu, wandadyelela mu kikwatekesu ni kilangidilu kya Jihova, kala kyabhangele Aza?
18. Kala kilondekesa Jihebelewu 10:38, 39, ihi yandatukwatekesa kudipelepalala phala o kithangana kyandakwila okutululuka kwabhu?
18 Jihova wenemutukwatekesa kyá kukolesa o kixikanu kyetu kindala mukonda dya ima yandakwiza kupholo. Mwene wamukwendesa o “kimbadi kya fiyele kya dimuka” phala kutubhana kudya kwambote munzumbi “mu kithangana kyatokala” phala kutukwatekesa kukolokota. (Mat. 24:45, nwt) Maji kala muthu mudyetu watokala kubhanga ombandu yê phala kukolesa o kixikanu kyê kwa Jihova.—Tanga Jihebelewu 10:38, 39.
19-20. Kala kilondekesa 1 Malunda 28:9, ibhwidisu yebhi itwatola kudibhanga. Mukonda dyahi?
19 Twabhingi “kusota Jihova,” kala kyabhangele Sobha Aza. (2 Mal. 14:4; 15:1, 2) Twamateka kusota Jihova, kyoso kitwadilongo yalungu ni mwene ni kyoso kyatubatizala. Tubhanga yoso itutena phala kukolesa o henda yetu kwa Jihova. Phala kwijya kyebhi kitwamuditunda mumbandu yiyi, tutena kudibhwidisa: ‘O kwila ngenemuya muyônge yoso?’ O yônge itubhana nguzu phala kusuluka ni kubheza Jihova, tutambulamu we kiswinisu kya jiphange jetu. (Mat. 11:28) Tutena we kudibhwidisa: ‘Ngene mudilonga o Bibidya izuwa yoso? Se eye wala ni mwiji, okwila wenemubhanga o ubhezelu kumwiji semana joso? Se eye wala ubheka, o kwila wenemusota kithangana phala kudilonga ubheka? Okwila wenemubhanga yoso i utena phala kuboka ni kulonga akwenu?’
20 Mukonda dyahi kima kyambote kukidibhwidisa kiki? O Bibidya itwambela kwila, Jihova usolokota o ixinganeku yetu ni ima yala mu mixima yetu. (Tanga 1 Malunda 28:9.) Se tumona kwila sayi kima kitwabhingi kubhilula, twatokala kubhinga kwa Jihova phala kutukwatekesa kubhanga kiki. Kiki kyene okithangana kya kudisokejeka phala o ima yandakwiza kupholo. Kana kwehela kima kukufidisa kulondekesa unjimu mu kithangana kyakutululuka!
MWIMBU 62 O Mwimbu wa Ubhe
^ kax. 5 Mu ixi mu watungu mwala ufolo wakubheza Jihova? Se mwala ihi iwamubhanga ni ufolo yú? O milongi yiyi, yandakukwatekesa kukayela o phangu ya Sobha Aza mukwa Juda ni Jikidistá mu hama yadyanga. Mu ithangana ya ufolo ene alondekesa unjimu mu kuboka ni kukolesa o kixikanu kya.
^ kax. 3 IZWELU YOJIMBULULE: O kizwelu “kutululuka,” kikilombolola ngo kukamba ita. Mu Hebelewu o kizwelu kiki, kibhana o kixinganeku kya kukala ni sawidi yambote, kukondama, ni kukala kyambote.
