1-2. Kyebhi o divulu dya Ndongixi 11:6 dyalungu ni kuboka o njimbu ya Utuminu?

SAYI JIXI, athu avulu kyoso kyevwa o njimbu yambote amesena kudilonga dingi. Kyene o kima kyexile mu kingila! Mu jixi jamukwa o athu kabhana matwi mumaka alungu ni Nzambi mba Bibidya. Mukiki muwatungu okwila avulu ene mubhana matwi mu njimbu yambote? Jihova wamesena kwila tusuluka ni kuboka kate kyandakwila kwabhukya.

² Jihova mwene wejiya o kizuwa, kyandabhwa o kikalakalu kya kuboka, “kyene ngó kya-nda kwiza o dizubhilu.” (Mat. 24:14, 36) Kate kyandabhixila o kizuwa kiki, kyebhi kitutena kubelesela o izwelu ‘lukuaku lwé ki lu nyohe’? *—Tanga Ndongixi 11:6.

3. Ihi itwandadilonga mumilongi yiyi?

³ O milongi yatundumu yazwela yalungu ni ima iwana itutena kubhanga phala kukala ‘athambi ambote a athu.’ (Mat. 4:19) Mu milongi yiyi twandadilongamu mawukexilu atatu atena kutukwatekesa kubandekesa o uhete wetu wakuboka, nemwene ni ibhidi itudibhana nayu. Twandadilonga mukonda dyahi kima kyambote (1) kuta okikalakalu kya kuboka kupholo, (2) kukala ni mwanyu ni (3) kukolesa o kixikanu kyetu.

4. Mukonda dyahi twatokala kuta kupholo o kikalakalu kyakuboka kyatubhana Jihova?

⁴ Jezú watangela omaxibulu mê kyebhi kyejikala o athu ni ihi yejibhita mu izuwa yasukidilaku. Mwene wejidile kwila o ima yiyi yejibhangesa o akayedi yê kukamba kuta okikalakalu kyakuboka  kupholo. Jezú wa dimuna o maxibulu mê phala ‘akolokote mu kudilanga.’ (Mat. 24:42) Mu izuwa ya Nowe kwixile ima yavulu yexile mu landukisa o athu phala kabhane matwi mu kidimwinu kyexile mu bhana Nowe. O ima yiyi itena kutulandukisa we lelu. (Mat. 24:37-39; 2 Phe. 2:5) Mukiki etu twa mesena kuta kupholo okikalakalu kyatubhana Jihova phala kubhanga.

5. Kyebhi o divulu dya Ikalakalu 1:6-8 dijimbulula kwila o kikalakalu kya kuboka eji kibhanga kate kumaxokololo?

⁵ Etu we lelu twabhingi kuta kupholo o kikalakalu kya kuboka o njimbu yambote ya Utuminu. Jezú watangela o maxibulu me kwila, kyoso kyeji fwa ene ejisuluka ni kubhanga o kikalakalu kya kuboka, ene ejibhanga dingi o kyabhangele mwene ndenge. (Nzwá 14:12) Kyoso Jezú kyafu sayi maxibulu avutuka dingi mu kikalakalu kya, kyakutamba. Kyoso Jezú kyamufukununa mwene wabhange madiwanu, wakwatekesa o maxibulu me kukwata jimbiji javulu. Mukithangana kiki, mwene walembalesa kwila okikalakalu kya kukala athambi a athu kyene kyexile okikalakalu kyabetelekota, kikalakalu kyoso kyoso ndenge. (Nzwá 21:15-17) Jezú wambela o maxibulu me kwila o njimbu yambote keji ibokela ngo akwa Izalayele maji eji ibokela we athu akwa jixi jengi. (Tanga Ikalakalu 1:6-8.) Mivu kupholo Jezú wabhangesa poxolo Nzwa kumona kisumwa kyalondekesa ihi yejibhita “mu kizuwa kya Ngana.” * Nzwa wa mono kisumwa kyalungu ni anju yaboko o njimu yambote “ku ifuxi yoso, mu miji yoso, mu madimi moso ni mu madyembu.” (Dij. 1:10; 14:6) Se phata Jihova wamesena kwila, tuboka o njimbu yambote ku athu oso kumundu, kate kyandakwila kwabhu.

6. Kyebhi kitutena kuta o kikalakalu kya kuboka kupholo?

⁶ Tutena kuta okikalakalu kya kuboka kupholo mukuxinganeka mu yoso yene mubhanga Jihova phala kutukwatekesa. Mukifika, mwene wamubhana kudya kwa vulu  mu nzumbi. Madivulu, milongi yongalavale kala ji awdyu jividyu ni milongi ya broadcasts. Xinganeka ngó: Mu sayite yetu, mwala milongi mu 1.000 a madimi ndenge! (Mat. 24:45-47) O athu kumundu adiwane mukonda ene mu kayela o ixinganeku ya jinguvulu ni ya jingeleja ni kwila amoxi jimvwama amukwa jingadyama. Maji kwene dinake dya mazunda a jiselevende ja Nzambi ndenge akalakala kumoxi mu ngongo yoso. Mukifika kya sesa mu mbeji ya Kasamanu kizuwa kya 19 ka 2019, o Jimbangi ja Jihova kumundu woso adyongekele phala kumona o diskulusu ya velusu ya kizuwa. Mu usuku wenyo, kwa dyongeka 20.919.041, phala kulembalala o Kufwa kwa Jezú. Etu twamesena kukala ni ima yavulu phala kubhanga mu kikalakalu kya Utuminu kyoso kituxinganeka mu ujitu utwala nawu wakubhanga mbandu mu kikalakalu kiki.

7. Kyebhi o phangu ya Jezú itukwatekesa kuta o kikalakalu kya kuboka kupholo?

⁷ Ukexilu wamukwa utwa tokala kuta o kikalakalu kya kuboka kupholo o kukayela o phangu ya Jezú. Mwne kehela kima kumulandukisa o kubhana o umbangi wa kidi. (Nzwá 18:37) Kyoso Satanaji kyamulondekesa ‘o mawutuminu moso a ngongo ni fuma yâ’; ni kyoso kyamesenene kubhanga sobha, mwene waditunu. (Mat. 4:8, 9; Nzwá 6:15) Mwene kehela o jimbote kumulandukisa; kexile ni wôma wakizukutisu wa jinguma jê. (Luka 9:58; Nzwá 8:59) Tutena kuta o kikalakalu kyetu kya kuboka kupholo kyoso kyalola okixikanu kyetu se tukayela okitendelesu kya poxolo Phawulu. Mwene waswinisa o Jikidistá kukayela o phangu ya Jezú phala ka ‘bhwile’!—Jihe. 12:3.

8. Mwanyu ihi? Mukonda dayhi twabhindamena okifwa kiki bengebenge kindala?

⁸ Mwanyu o uhete wakukingila kima se kulalama mba kuthandanganaya. Se twamukingila kima kyambote kubhita mba kima kyayibha kubhita kubhinga mwanyu. Habakkuk o polofeta wexile mukinigila o kithangana kyejibhwa o usweya mu Juda. (Haba. 1:2) O maxibhulu a Jezú exile mukingila o “kutukuluka” wa Utuminu ni kukingila okithangana kyejitambula o utuminu wa akwa Loma. (Luka 19:11) Twamesena kwila o Utuminu wa Nzambi uzubha o kuyibha ni kubheka o mundu wa ubhe kwandakala athu andabelesela Nzambi. (2 Phe. 3:13) Twabhingi kukala ni mwanyu ni kukingila Jihova kubhanga o ima mu kithangana kyê. Tumone mawukexilu a Jihova akutulonga kukala ni mwanyu.

9. Misoso yebhi ilondekesa o mwanyu wa Jihova?

⁹ Jihova mwene o phangu yayuka yakukala ni mwanyu. Mwene wabhana kithangana kyasoko kwa Nowe kya kutunga o alaka ni kukala “mujimbwidi wa maka mayuka.” (2 Phe. 2:5; 1 Phe. 3:20) Kyoso Mbalahamu kyamubhangele ibhwidisu yavulu yalungu ni kibwika kya athu ayibha atungile ku Sodoma ni Ngomola Jihova wamwivu ni mwanyu woso. (Dim. 18:20-33) Jihova walondekesa mwanyu ku kifuxi kya Izalayele mu mivu yavulu. (Neh. 9:30, 31) Tu tena kumona o mwanyu wa Jihova lelu, mukonda mwene wabhana kithangana kya soko ku athu oso amesena mwene kwila a kala makamba me “eza mu kudyela.” (2 Phe. 3:9; Nzwá 6:44; 1 Tim. 2:3, 4) O phangu ya Jihova itukwatekesa kyoso kituya ni kuboka ni kulonga. Mwene utulonga we kukala ni mwanyu bhukaxi ka kifika kyala mu Maka mê.

10. Ihi itulonga o kifika kyalungu ni kidimakaji kyala mu divulu dya Tiyaku 5:7, 8?

¹⁰ Tanga Tiyaku 5:7, 8. O kifika kyalungu ni kyebhi kikula o idima kumabhya ki tulonga kyebhi kitutena kulondekesa mwanyu. Mu kidi, sayi mixi mba idima ikula lusolo. Maji mixi yavulu mba idima ilaleka kukusuka mba kukola, bengebenge yoyo ibhana ibundu ya  kudya. Ku Izalayele yokulu o idima yexile mu bhanga mbeji jisamanu phala kukula mba kukusuka. O kidimakaji ukuna o idima ye mu mvula yadyanga mba mu kudinji, ujibhongolola ande dya kusonoka omvula ya sukidilaku yakukungulula o musoke. (Mál. 4:28) Twandalondekesa unjimu mu kukayela o phangu ya mwanyu ya kidimakaji. Maji nange kubhonza kubhanga kiki.

11. O mwanyu utukwatekesa kyebhi mu ukunji wetu?

¹¹ O athu akwa ituxi amesena kumona o mbote ya ikalakalu yâ ni lusolo mba tunde kudimatekenu. Maji se twamesena kwila o idima ku dibhya dyetu ima ikula kyambote ni tu bhongololaku kima, kubhinga nguzu. Kubhinga kudima o mavu, kukuwa, kukuna, ni ku itekela. Kubhanga maxibulu kubhinga we nguzu. Kubhinga kithangana phala kukwatesa o maxibulu a Bibidya kutolola o katombo ni kulondekesa henda. O mwanyu wandatukwatekesa kukolokota se athu kamesena kutwivwa. Kyoso athu kyamesena kwivwa ni kudilonga twabhingi kukala ni mwanyu. Kitutena kujijidika dixibulu dya Bibidiya kukala ni kixikanu. Nemwene o maxibulu a Jezú, sayi ithangana, exile mulaleka kutendela o kilombolwelu kya milongi ya Jezú. (Nzwá 14:9) Tulembalale kwila o kikalakalu kyetu o kuboka ni kulonga, Nzambi mwene wandakwatekesa o athu kukala ni kixikanu.—1 Kol. 3:6.

12. O mwanyu utukwatekesa kyebhi kyoso kitubokela o jindandu jetu kamubheza Jihova?

¹² Nange kubhonza kukala ni mwanyu kyoso kitubokela o jindandu jetu kamubheza luwa Jihova. O milongi itusanga mu divulu dya Ndongixi 3:1, 7 itena kutukwatekesa. Yene yamba: “Sayi kithangana kya kuzwela ni kithangana kya kudixibha.” O wendelelu wetu wambote utena kukwatekesa o jindandu jetu kukala ni vondadi ya kwivwa o njimbu yetu. Twabhingi kukala polondo phala kwabhana umbangi kyoso kikumoneka kithangana. (1 Phe. 3:1, 2) Twatokala kuboka ni kulonga ni  kuswina. Maji twatokala kulondekesa mwanyu ku athu oso, kate ni ku jindandu jetu.

13-14. Misoso yebhi yalungi ni mwanyu itutena kukayela?

¹³ Tutena kudilonga kulondekesa mwanyu mu misoso ya athu a fiyele a atange mu Bibidya ni athu afiyele a izuwa yetu. Habakuke wamesenene kumona o dizubhilu dya usweya, maji o mwanyu we wadilondekesa mu izweluye kyoso kyambe: “Nganda kukala bhu kathôndo mba kididi kyami kya kilangidilu.” (Haba. 2:1) Poxolo Phawulu wambe kwila wamesenene “kuzubha” o ukunji wê. Maji mwene wasuluka ni “kubhana umbangi wa Njimbu yambote” ni mwanyu woso.—Ika. 20:24.

¹⁴ Xinganeka mu musoso wadikaza wabhange o xikola ya Ngiliyade. Mu ixi mwa atumikisa kimwala Jimbangi javulu ja Jihova. O athu avulu dingi mu ixi yoyo, kabheza Nzambi. Athu ofele ngó amesenene kudilonga o Bibidya. Maji o jiphange jadilongo kumoxi o xikola ya Ngiliyade, exile mu sidivila mu jixi jamukwa exile mwatangela yalungu ni maxibulu mâ a Bibidya exile mu kula kyambote mu nzumbi. Maji o dikaza dyasuluka ni kuboka ni mwanyu woso sumbala o athu kamesenene kwa evwa ene dingi a vudile. Mukubhita dinake dya mivu ni kuboka mumbambe yiyi, ene evu o kusanguluka kwa kumona dixibulu dimoxi dyexile mu dilongane o Bibidya kumubatizala. Ihi itulonga o misoso yiyi, kikale yokulu kikale ya izuwa yetu? O athu a fiyele ya kexile ni usudi, maku mâ kanyoha, Jihova wabesowala o mwanyuwâ. Tu “kayele o phangu ya yó bhukaxi ka kixikanu kyâ, ni mwanyu wâ, atambula o ima ya akanena.”—Jihe. 6:10-12.

15. Mu ukexilu webhi o kixikanu kyetu kibandekesa o vondadi yetu ya kuboka?

¹⁵ Etutuxikina mu njimbu ituboka, twamesena ku ibokela ku athu oso ututena. Twadyelela mu ikanenu yala mu Mak’â Nzambi. (Jisá. 119:42; Iza. 40:8) Twene mumona o ikanenu ya Bibidya yadikumbidila mu izuwa yetu. Twenemumona kyebhi o athu kyenemulungulula o myenyuyâ kyoso kyamateka kubelesela o itumu ya Bibidya. Ima yiyi, itudyelelesa dingi kwila, o maka alungu ni Utuminu ene o njimbu yatokala kwivwa athu oso.

16. Kyebhi o divulu dya Jisálamu 46:1-3, ditukwatekesa kutendela kwila tukala dingi ni vondadi yakuboka se tukala ni kixikanu kwa Jihova ni Jezú?

¹⁶ Twala we ni kixikanu kwa Jihova o Mukwa njimbu itwene mu boka, ni kwa Jezú am’undu kala Sobha ya Utuminu. (Nzwá 14:1) Kabasa kima kibhita kumwenyu wetu, Jihova wandakala dilengelu dyetu ni nguzu yetu. (Tanga Jisálamu 46:1-3.) Kikyene ngó, twejiya we kwila Jezú bhukaxi kakutena ni ungana wamubhana Jihova, wamukwendesa o kikalakalu kyakuboka tunde kudyulu.—Mat. 28:18-20.

17. Bhana kifika kimoxi kilondekesa kwila twatokala kusuluka ni kuboka.

¹⁷ O kixikanu kitudyelelesa dingi kwila Jihova wandabesowala o nguzu yetu, sayi ithangana m’ukexilu kitu ufikile. (Ndo. 11:6) Mukifika izuwa yoso athu ene mumona o meza ni kadikalu ka madivulu kutwenemubhana naku umbangi. O kwila yiyi, ndunge yambote yakuboka? Sephata, ndunge yambote! Mu Kikalakalu Kyetu Kya Utuminu kya mbeji ya Kamoxi ka 2014, mwala musoso wa munzangla wexile mudilonga muxikola yakatunda wamesenene kusonekena ku Jimbangi ja Jihova. Mwene katenene kusanga o Kididi kya Ubhezelu, maji mwene wasange meza amadivulu metu mumbandu axikola yê, wasange o milongi yamesenene, phala o kikalakalu kyê kyaxikola. Kupholo amubatizala kala Mbangi ya Jihova, lelu muboki wathembu yoso. O musoso yu, utuswinisa kusuluka ni kuboka, mukonda ulondekesa kwila, kwene hanji athu abhingi kusanga ni kwivwa o njimbu ya Utuminu.

18. Mukonda dyahi tuxikina kwila o kikalakalu kya kuboka o Utuminu kyandabhwa mu kithangana kyasolo Jihova?

¹⁸ Tutena kudyelela kwila, o kikalakalu kya kuboka o Utuminu kyandabwa mukithangana kyatokala. Xinganeka mu ima yabhiti mu izuwa ya Nowe. Jihova walondekesa kwila mwene wenemubhanga o ima mukithangana kyatokala. Jihova wasolele o kithangana kyejibhita o Diluvyu dya menya 120 a mivu kudima. Jihova watumu Nowe kutunga o alaka mivu yavulu kupholo. Nange 40 mba 50 a mivu ande dyakumateka o Diluvyu, Nowe wexile hanji mukalakala ni nguzu yoso. Sumbala o athu kamesenene kumwivwa, mwene wasuluka ni kuboka phala kudimuna o athu kate Jihova kyamutangele kwila o kithangana kya kubokwesa o ibhaku mu alaka kyabhixila. ‘Jihova wajika o alaka’ mukithangana kyatokala.—Dim. 6:3; 7:1, 2, 16.

19. Ihi itwandamona se kitwehela o maku metu kunyoha?

¹⁹ Kwakambe ngó Jihova wandatutangela kwila o kithangana kya kuboka o njimbu yambote ya Utuminu kyabhu. Wandabwika o mundu wa Satanaji, wandabheka o mundu wa ubhe wandakwizala ni athu abelesela Nzambi. Kyoso kituya ni kukingila o kithangana kiki, tukayele o phangu ya Nowe, Habakuke ni jiphange ja mukwa kehela o maku mâ kunyoha. Tute o kikalakalu kya kuboka kupholo, tukale ni mwanyu, tukolese o kixikanu kyetu kwa Jihova ni mu ikanenu yê.