1. Kixanu kyebhi kyabhange Jezú ku maxibulu mê ni kyebhi ene kyatambwijila?

O maxibulu, Phetele, Mandele, Tiyaku ni Nzwá exile ni ufunu wakutamba ni kusumbisa jimbiji. Xinganeka kyebhi Jezú kyabhana o kixanu kiki: “Ngi kayedyenu, ngi mi bhange kukala mu atona a athu.” * Ene atambwijila kyebhi? O Bibidya yamba: “Anga a xa manda-mâ bhenhobho, hé a mu kayela.” (Mat. 4:18-22) O kima kyeji sola kyeji lungulula omyenyu yâ kate kuhádya ni hádya. Muveji dya kukwata jimbiji mu menya, ene ejikituka “atona mba atambi a athu.” (Luka 5:10) Lelu, Jezú wamusuluka ni kwixana o athu alenduka, azolo okidi. (Mat. 28:19, 20) O kwila eye waxikina kyá okixanu kya Jezú kya kukituka mutambi a athu?

2. Mukonda dyahi o kusola kukala mutambi’a athu kikima kyakutonoka? Ihi yandakutukwatekesa kukala tu atambi’a athu?

² Nange eye wamudilonga kyá o Bibidya muthembu yavulu, walungulula kyá o ukexilu wa mwenyu wé anga wamesena kukala umuboki wa njimbu yambote. Se wala ni hele wakuxikina o kixanu kya Jezú, kana kuluwala. Nange wala ni hele yakuxikina mukonda eye wejiya kuma yâ ki maka akutonoka. Mukidi o Bibidya yamba kuma mu “kithangan’okio” ni lusolo lwoso Phetele ni makamba mê abwazeka o makamba ni mawanda mâ. Maji Phetele ni makamba mê axinganeka hanji ande dya kusola kubhanga kiki. Ene amwijidile kya, mukonda samanu dya jimbeji kudima, ene adisangele kya ni Jezú ya amuxikinine kwila mwene o Mexiya. (Nzwá 1:35-42) Kyene kimoxi we, nange udivwa kuma wadilongo kya ima yasoko yalungu ni Jihova ni Jezú, anga wamesena kusuluka kukula mu nzumbi. Maji ande dya kusola se wandakituka  muboki, eye watokala kuxinganeka kyambote yalungu ni maka yâ. Ihi yakwatekesa Phetele, Mandele ni akwa kusola kyambote o maka yâ?

3. Idifwa yebhi yandabandekesa o hanji yé yakuxikina o kixanu kya Jezú?

³ O maxibulu adyanga a Jezú, exile ni hanji ya kukalakala, ejidile kubhanga kyambote o kikalakalu kyâ, aswinine, exile polondo phala kubhanga kate mwene ni ima yabhonzo. O idifwa yiyi yene we yakwatekesa kukituka amuboki ambote a njimbu yambote. Mumilongi yiyi twandadilonga kyebhi ki utena kukituka muboki wambote ni kulonga akwenu.

4. Ihi yakwatekesa Phetele kukala mutambi ajimbiji?

⁴ Phetele wakexile mukwata jimbiji phala kudikila o mwiji wê, maji kexile mu bhanga ngó kiki mukonda dya kudikila o mwiji, kana. Nange Phetele wazolele o ufunu wakutamba jimbiji. (Nzwá 21:3, 9-15) Mwene we wadilongo we kuzola kukala mutambi a athu. Ni kikwatekesu kya Jihova, Phetele wakituka mukalakadi wambote.—Ika. 2:14, 41.

5. Kala kilondekesa Luka 5:8-11, mukonda dyahi Phetele wexile ni wôma? Ihi itena kukwatekesa kutolola o wôma yú?

⁵ Etu tuboka mukonda twazolo Jihova; kiki kyene o kima kyadyanga kitubhangesa kubhanga o kikalakalu kiki kya kuboka. O henda yetu kwa Jihova itena kutukwatekesa kulonga akwetu yalungu ni mwene, né mwene se tu divwa kwila, kitwala ni uhete. Kyoso Jezú kyexana Phetele phala kukala mutambi a athu, mwene wamuswinisa ni izwelu: “Ku kale ni wôma.” (Tanga Luka 5:8-11.) Phetele kexile ni wôma walungu ni ihi yejibhita ni mwene mu kukituka dixibulu dya Jezú. Mwene wadiwana mukonda dya madiwanu abhangele Jezú, akwatekesa o mala kukwata jimbiji javulu, Phetele wejidile kwila Jezú mwene wabhangele o madiwanu yó, mukonda dya kiki  Phetele wadivu kwila kafwamene kukalakala kumoxi ni Jezú. Kala Phetele, eye nange ukala ni wôma. Nange uthandanganya mukuxinganeka o ima iwandabhanga phala kukituka dixibulu dya Kidistu. Se kyene, kolesa o henda yé kwa Jihova, kwa Jezú ni ku jivizinyu jê, o kubhanga kiki kyandakukwatekesa kuxikina o kixanu kya Jezú, kya kukituka mutambi a athu.—Mat. 22:37, 39; Nzwá 14:15.

6. Ima yahi dingi itubhangesa kuboka?

⁶ Tala dingi ima yamukwa yenemutubhangesa kuboka. Etu twamesena kubelesela o kitumu kya Jezú: “Ndenu mwa ka longe jixibulu.” (Mat. 28:19, 20) Etu we tuboka mukonda o athu a ‘mwa tatesa ni kwa lundujula’ kyenyiki ene abhingi kudilonga o kidi kyalungu ni Utuminu. (Mat. 9:36) Jihova wamesena kuma atho oso eza mukwijiya o kidi phala n’a bhuluke.—1 Tim. 2:4.

7. Kyebhi o mukanda kwa akwa Loma 10:13-15 kilondekesa kwila o kuboka kikalakalu kyabetakota?

⁷ Kyoso kituxinganeka yalungu ni kikalakalu kyetu kya kuboka, kikalakalu kibhulula o athu, etu twandamesena kuboka dingi. O mutambi wajimbi, mwene usumbisa mba udiya o mbiji yakwata. Maji etu “tukwata” athu kifwa, tubhanga maxibulu phala kubhulula o myenyu yâ.—Tanga Loma 10:13-15; 1 Tim. 4:16.

8-9. Ihi yatokala kwijiya o mutambi wajimbiji ni mukonda dyahi?

⁸ Mu izuwa ya Jezú mu Izalayele, o mutambi ajimbiji watokalele kwijiya se mbiji yebhi yatokalele o kukwata. (Iji. 11:9-12) Mwene we watokalele kwijiya se kwebhi kweji tena kusanga o mbiji yiyi. Mukidi, o jimbiji jikala mu kididi mwala menya a wabhela ene ni mukididi mwala o kudya kwavulu. O kwila o mutambi watokala kusola se kithangana kyebhi kyatokala o kutamba? Yalungu ni kithangana kyatokala kya kutamba o jimbiji, tala yazwela o mukunji wajixi jenge ku Ikolo ya Pacífico. O mukunji yú wambe, “twandadisanga mungu mukame mu divwa dya ola.” O phange wamutambwijila, “Eye kiwatendela kyambote. Etu twandaya mukithangana kyatokala phala o jimbiji, kitwandaya mukithangana kyatokala phala etu.”

⁹ Kyene kimoxi we, o maxibulu a Jezú akituka atambi a athu exile muya mu ididi mwexile o athu. Mukifika, akayedi a Jezú exile muboka, mutembulu, mumalombe ni nzo n’inzo. (Ika. 5:42; 17:17; 18:4) Etu twabhingi kwijiya o ijila ya athu atungu mumbambe yetu. Twabhingi kukala polondo phala kulungulula o ukexilu wetu wakuboka ni kuya mukithangana ni mu ididi mutwandasanga o athu.—1 Kol. 9:19-23.

10. Jifalamenda jebhi jitubhana o kilunga kya Jihova phala kuboka?

¹⁰ O mutambi ajimbiji watokala kwijiya kyambote o jifalamenda jê ni kyebhi kyatokala kukalakalanaju. Etu we twabhingi kukala ni jifalamenda jatokala phala o kikalakalu kyetu kya kuboka. Twabhi kwijiya kyebhi kitwatokala kukalakalanaju. Jezú watangela kumaxibulu mê kyebhi kyeji bhanga o kikalakalu kya kuboka o njimbu yambote. Mwene wa atangela ihi yejikwambata, kwebhi kweji boka ni ihi yejizwela. (Mat. 10:5-7; Luka 10:1-11) Lelu, o kilunga kya Jihova kitubhana o Kitutu kya Jifalamenda jitukwatekesa kubhanga kyambote o kikalakalu kyetu. * O kilunga kya Jihova kitulonga kyebhi kitwatokala kukalakala ni jifalamenda jiji. O ilongesuyiyi itukwatekesa kuzwela se hele, ibandekesa o uhete wetu wakubhanga kyambote o kikalakalu kyetu kyakuboka.—2 Tim. 2:15.

11. Mukonda dyahi o mutambi wajimbiji watokala kuswina?

¹¹ O kikalakalu kya mutambi kibhinga kuswina. Sayi kithangana ene mudibhana ni ibhidi mu musanza wa kalunga. Mukonda ene muveji javulu akalakala mu usuku mu menya,  kyenyikiphe mukithangana ni mbandu kutena kumoneka jinzanji. O mutambi wa athu ubhinga we ukala muthu waswina. Kyoso kitumateka kuboka ni kuzwela kwa akwetu kwila tu Jimbangi ja Jihova, o jindadu jetu nange atuzukutisa, o makamba metu atusebhulula, nange sayi athu andadituna kwivwa o njimbu yambote. Maji kiki kikitusasumukisa dingi. Jezú wadimwine kya kwila weji tuma akayedye mu ididi yabhonzo.—Mat. 10:16.

12. Kala kilondekesa Josuwé 1:7-9, ihi itena kukwatekesa kukolesa o kuswina kwetu?

¹² Kyebhi ki utena kubandekesa o kuswina kwé? Kyadyanga, watokala kuxikina kuma Jezú wamukwendesa o kikalakalu kiki tunde kudyulu. (Nzwá 16:33; Dij. 14:14-16) Mukusuluka, kolesa o kixikanu kyé ku ikanenu ya Jihova yakwila mwene wandakulanga. (Mat. 6:32-34) Se ukolesa o kixikanu kyé, o kuswina kwé kwandadibandekesa we. Phetele ni makamba mâ alondekesa kixikanu kya dikota kyoso kyabwazeka omawanda phala kukayela Jezú. Kyene kimoxi we, eye ulondekesa kixikanu kyakolo ki utangela kumakamba mê ni jindadu jê kwila wamateka kudilonga o Bibidya ni Jimbangi ja Jihova ni kuya mu kyônge! Se phata, eye walungulula kya o wendelu ni ukexilu wa mwenyu we phala kukayela o itumu yayuka ya Jihova. Kubhanga kiki kubhinga kixikanu ni kuswina. Kyoso ki usuluka ni kubandekesa o kuswina kwé, eye utena kudyelela ni kidi kyoso kwila, ‘Jihova, Nzambi yé, wala-nê kumoxi kwoso-kwoso ku uya.’—Tanga Josuwé 1:7-9.

13. Kyebhi o kuxinganeka ni kusamba kutena kubandekesa o kuswina kwé?

¹³ Kyebhi dingi ki utena kubandekesa o kuswina  kwé? Bhinga kuswina bhukaxi ka musambu. (Ika. 4:29, 31) Jihova wandatambwijila o misambu yé, mwene nuka wandakukwehelela. Mwene wandakubhana o kikwatekesu kiwabhindamena jinga. Eye utena kuxinganeka kyebhi Jihova kyabhulula o athu mu ukulu. Xinganeka we, kyebhi mwene kyene mukukwatekesa phala kutolola o ibhidi ni nguzu ikubhana phala kulungulula o ukexilu wa mwenyu wé. Se phata, o Yó wendesa o mundu wê mukaxi ka Kalunga Kakusuka utena kukwatekesa kukala dixibulu dya Kidistu. (Mak. 14:13) Eye utena kukala ni kixikanu kala kyakexile nakyu o mukwa jisalamu kyoso kyambe: “Jihova wala bhu mbandu yami, ki ngi kala dingi ni wóma; hé kima, muthu u ngi bhanga-hi?”—Jisá. 118:6.

14. Ihi iwadilongo mu phangu ya phange Masae ni Tomoyo?

¹⁴ O ukexilu wakamukwa wakubandekesa o kuswina o kudilonga kyebhi Jihova kyakwatekesa o athu exile akwa jisonyi, maji adilongo kukala athu aswina. Tala yabhiti ni phange amwixana Masae. Mwene wexile mukwa jisonyi wadivwele kuma nuka kejitena kubhanga o kikalakalu kyakuboka. O kuzwela ni athu kejiya kyamubhonzele kyavulu, kyedile kala wamubanda o mulundu wonene, waxinganekele kuma nuka wejitena kubhanga o kikalakalu kiki. Kyenyiki, mwene wabhange nguzu yavulu phala kubandekesa o henda yê kwa Nzambi ni kujivizinyu jê. Mwene wamono kwila o kithangana kyakuboka kyatolo, wabhingi kikwatekesu bhukaxi kamusambu phala kubandekesa o hanji yê yakuboka. Mwene watolola ohele yê anga wamateka kukalakala kala muboki wa thembu yoso. Jihova utena kukwatekesa kate o muboki wa ubhe “kukala muthu waswina.” Tala yabhiti ni phange ya muhatu amwixna Tomoyo. Kyoso mwene kyamateka kuboka inzo n’inzo, o muhatu wadyanga wadisangenê wamwambela: “Eme kingamesena kuzwela ni Jimbangi ja Jihova!” yu wamujikila o dibhitu kupholo dyê. Tomoyo ni kuswina kwoso wazwela kwa phange wexile muboka ne wixi: “Eye wakivu? Eme kingazwelane nekya ngo diba dimoxi, maji o muhatu wangitonginina kwila ngi Mbangi ya Jihova. Eme ngasanguluka kyavulu!” Kindala Tomoyo wamusidivila kala muboki wathembu yoso.

15. Kyoso o kikalakalu kyakuboka kitubhonza kukibhanga kyebhi kitutena kukayela o atambi ajimbiji? Mukonda dyahi kiki kima kyambote phala o jikidistá?

¹⁵ Phala o mutambi ajimbiji kuditunda kyambote, watokala kukala ni uhetu wakubhanga o ima yabhonzo ku ibhanga. Kifwa “o uhete wakubhanga o ima yatokala ku ibhanga.” O mutambi a jimbiji watokala kubalumuka selu, kukala polondo phala kubhanga okikalakalu kiki nemwene se kwamunoka mba kwatema kyavulu. Etu we twabhingi kukala polondo phala kubhanga okikalakalu kyatokala kukibhanga, se tukolokota twandakumbindila o kikalakalu kyetu.—Mat. 10:22.

16. Ihi itena kutukwatekesa kubhanga o ima yabhonzo ku ibhanga?

¹⁶ Etu katuvwala ni uhete wakubhanga ima yabhonzo ku ibhanga. Muveji dyakiki o ukexilu wetu waxitu o kumesena o kubhanga o ima ki ibhonzo ku ibhanga. Kwabhingi kuditumina o jihanji phala kubhanga o ima yabhonzo. Kyenyikiphe, twabhingi kikwatekesu phala kudilonga kubhanga o ima yabhonzo ku ibhanga. Jihova utubhana o kikwatekesu kiki bhukaxi ka nzumbi yê ikôla.—Nga. 5:22, 23.

17. Kala kilondekesa 1 Kolindu 9:25-27, ihi yambe poxolo Phawulu? Ihi yabhange phala kukala ni uhete wakubhanga ima yabhonzo ku ibhanga?

¹⁷ Poxolo Phawulu, wexile ni uhete wakubhanga o ima yatokala o kubhanga. Mwene waxikina kwila, wabhingile ‘kubhana jihuxi’ ku mukutu we phala kubhanga o ima yatokala. (Tanga 1 Kolindu 9:25-27.) Mwene wadimuna akwa phala nakale ni uhete yú wakubhanga o ima yoso “mu ujitu, ni mu uyukilu wê.” (1 Kol.  14:40) Etu twatokala kukalakala ni nguzu yoso phala ni tusuluke mukubheza Jihova, kuboka ni kulonga o njimbu yambote izuwa yoso.—Ika. 2:46.

18. Se twamesena kuma Jihova umona kwila twamuditunda kyambote mu kikalakalu kyetu kyakuboka ihi itwatokala kubhanga?

¹⁸ O mutambi udivwa kwila wakalakala kyambote se ukwata jimbiji javulu, maji se kakwate jimbiji udivwa kwila kakalakala kyambote. Kumbandu yengi, etu kitumono kuma twamuditunda kyambote mukonda dya athu utwamukwatekesa kubokona mukilunga kya Nzambi, kana. (Luka 8:11-15) Se tukolokota mu kikalakalu kyetu kya kuboka ni kulonga o njimbu yambote, Jihova wandamona kuma twamuditunda kyambote mukikalakalu kiki. Mukonda dyahi? Mukonda etu twamusuluka mukubanga o ima yamesena Jihova ni Mon’ê.—Mál. 13:10; Ika. 5:28, 29.

19-20. Ima yebhi dingi yabetakota itubhangesa kuboka kindala?

¹⁹ Sayi jixi o atambi ajimbiji a ehela ngó kutamba mutumbeji. Mu jixi jiji, o atambi kyoso kyamona o kithangana kyamubwa, ene amona kwila kithangana kya kutamba ni lusolo lwoso. Kuma tu atambi athu, etu we twala ni ima itubhangesa kuboka ni lusolo kindala: O dizubhilu dya mundu dyazukama! O kithangana kyabutu phala kuboka o njimbu itena kubhulula o myenyu ya athu. Kana kukingila kwila o ima yoso kumwenyu wé ikala kyambote kyene kiwa ki ubhanga o kikalakalu kiki kyakatunda.—Ndo. 11:4.

²⁰ Kindala kyene o kithangana kyakukolesa o hanji yé yakuboka, kyakubandekesa o hanji yé ya kudilonga o Bibidya, kyakubandekesa o kuswina kwé ni kukala ni uhete wakubhanga o ima yabhonzo ku ibhanga. Tukalakala kumoxi ni dinake dyamazunda athu ala kumundu woso amubhanga o kikalakalu kiki kyakuboka o njimbu yambote, se eye ubhanga kiki wandatambula o kusanguluka kubhana Jihova. (Neh. 8:10) Dibhakule mukikalakalu kiki kyakuboka, bhanga yoso i utena ni kusuluka o kubhanga kiki kate kyoso Jihova kyandazwela kwabhu. Kumbandu yandakayela, twandamona ima itatu yandakutukolokotesa kusuluka kubhanga o kikalakalu kyetu kyakuboka kala tu, atambi a athu.