1-2. Ihi itwandadilonga mumbandu yiyi?

SAYI KITHANGANA, tumona kwila omwenyu wabutu, ‘wavulu malamba.’ (Jobe 14:1) Mukonda dya kiki, tutendela se mukonda dyahi sayi kithangana tuluwala mba tuzoza. M’ukulu jiselevende javulu ja Jihova adivwe kiki. Sayi yâ kate amesenene kufwa. (1 Jis. 19:2-4; Jobe 3:1-3, 11; 7:15, 16) Muveji javulu Jihova Nzambi wakondo malamba ni kwakolokotesa. Omisoso yâ osoneke mu Bibidya phala kutuximbakatesa kyoso kitu itanga.—Loma 15:4.

² Mumbandu yiyi twandadilonga omisoso ya jiselevende ja Jihova akolokota mu ibhidi, omajinamâ enya: Zuze mona a Jakobo, omutudi Nowemi, omukaji amon’ê Lute, o Levita wasoneka o Salamu 73, ni poxolo Phetele. Jihova wakolokotesa kyebhi? Mbote yahi itukatula mumisoso yâ? O itambwijilu ya ibhwidisu yiyi itudyelesa kwila “Jihova wazukama kwa ya atoloka o muxima,” ni kwila mwene “u bhulula oso a talamana mba aluwala mu nzumbi.”—Jisá. 34:18.

3-4. Ihi yabhiti ni Zuze munzangala wê?

³ Kyoso kyexile ni 17 dya mivu Zuze waloto nzonji jiyadi, Nzambi mwene wamubhangesa kwanjiwa onzonji jiyadi jiji. Onzoji jiyadi jiji jexile mulondekesa kwila Zuze wejikala ni kutena omwiji we wejimuxila kyavulu. (Dim. 37:5-10) Mukubhita twitangana omwenyu wa Zuze walunguluka ni lusolo. Mukithangana kyenyokyo o jiphange jê kamuxila anga amukwata amusumbisa kala mubhika mukabhitangu kamasoladi ka Ijitu amwixana Potifale. (Dim. 37:21-28) Mwenyu wa Zuze walunguluka mukithangana ni mbandu mwene kexile dingi mudibhata  dya tat’ê wamuzolele kyavulu, wakituka mubhika mu Ijitu wexile mukalakela diyala kejidile Jihova.—Dim. 39:1.

⁴ Mukusuluka, ohadi ya Zuze yadibandekesa dingi. Omuhatu wa Potifale wamutatela makuta kwila Zuze wamesenene kuzekané. Sekusota kwijiya se makutu mba kana Potifale wate Zuze mukaleya, kwene kwamukutila mumalumbambu. (Dim. 39:14-20; Jisá. 105:17, 18) Xinganeka kyebhi kyadivu omunzangala Zuze kyoso kyamutatela kwila wamesenene kuzeka ni muhatu wa Potefale. Okwila o athu keji xinganeka ima yayibha yalungu ni Nzambi ya Zuze Jihova, kyoso kyeji kwivwa omaka enya? Se phata yoso yiyi yaluwalesa Zuze!

5. Phala kaluwale kyavulu ihi yabhange Zuze?

⁵ Kyoso Zuze kyexile mubhika ni mukaleya mwene katenene kubhanga kima phala kulungululula kima kumwenyu wê. Ihi yamukwatekesa kusuluka kukala ni kixinganeku kyambote? Muveji dyakulungila omesu mu ima yalembwele kubhanga, mwene walungila omesu mu ima yatenene kubhanga. Maji okima kyabetakota Zuze walungila omesu kwa Jihova. Mukonda dya kiki Jihova wexile mubeswola Zuze mu ima yoso yexile mubhanga.—Dim. 39:21-23.

6. Nange kyebhi Zuze kyasange kiximbakatesu mujinzo jê?

⁶ Zuze nange wasange kiximbakatesu mujinzoji jamubhele Jihova m’ukulu. Onzo jojo jexile mulondekesa kwila mwene wejidisanga dingi ni mwiji wê, ni kwila omwenyu wê wejiwabhana dingi. Kiki kyene mwene kyabhiti. Kyoso Zuze kyexile ni 37 amivu ojinzoji jê jamateka kudikumbidila m’ukulexilu ka ufikile!—Dim. 37:7, 9, 10; 42:6, 9.

7. Kala kilondekesa omukanda 1 Phetele. 5:10, ihi yandakutukwatesa kukolokota mu ibhidi?

⁷ Ihi itwadilongo. Omusoso wa Zuze utulembalesa kwila omundu yú ututalatala kyayibha, o athu andatutalatala se kuyuka. Némwene phange mukilunga utena kutuluwalesa.  Maji se tutala Jihova kala ndanji yetu mba dilengelu dyetu, kitwandaluwala kyavulu mba kuxisa osidivisu ya Jihova. (Jisá. 62:6, 7; tanga 1 Phetele 5:10.) Lembalala kwila Zuze wexile ngo ni 17 dya mivu kyoso Jihova kyamubhangesa kwanjiwa ojinzoji jojo. Kiki kilombolola kwila Jihova udyelela kujiselevende jê ni némwene se minzangala hanji. Mu izuwa yalelu minzangala avulu edi kala Zuze. Ene ala we ni kixikanu kyakolo kwa Jihova. Sayi minzangala ate mukaleya, atalatala se kuyuka, mukonda ene amesena kubelesela Nzambi ni ufiyele woso.—Jisá. 110:3.

8. Ih yabhiti ni Nowemi ni Lute?

⁸ Mukonda dyanzala yavulu, Nowemi ni mwiji we axisa odibhata dya ku ixi ya Juda, ya ayi kutunga mumbanza ya Mowabhi. Kwenyokyo Edimeleke mwadi wa Nowemei wafu. Wamuxisa ni twana tuyadi twamala. Mukubhita ithangana otwana tuyadi tutu akazala ni ahatu a Mowabhi, Lute ni Olofa. Mukubhita dikwinyi dyamivu otwana tuyadi twa Nowemi twafu we, kaxisa twana. (Lute 1:1-5) Ahatu atatu yâ axala ni ndolo ni kuluwala kwamuxima! Kuma Lute ni Olofa, exile hanji minzangala ejitena kukazala. Majiphe nanyi weji langa Nowemi wakukile kyá? Mukonda dya ndolo yavulu kumuxima Nowemi wasuku mukuzwela kiki: “Kana ku ng’ila Nowemi, kale mu ng’ila Mala, mukonda Muteni-a-yoso mwenyu wami wa uludisa kyavulu mwene lokoso!” Mukonda dya kubhita mumalamba yoso yâ, Nowemi wasolo kuvutuka ku Beleme ni Lute wamukayela we.— Lute 1:7, 18-20.

9. Kala kilondekesa Lute 1:16, 17, 22, kyebhi Lute kyaswinisa Nowemi?

⁹ Ihi yakwatekesa Nowemi? Ohenda yakidi. Mukifika, Lute walondekesa ohenda yakidi mukudikwatenena kwa Nowemi. (Tanga Lute 1:16, 17, 22.) Mubeleme Lute wakalakala ni nguzu yoso phala kudikila o ibhindamu yê ni ya Nowemi. Mukonda dya kubhanga kiki o athu oso atenene kumona kwila Lute wexile kidimakaxi.—Lute 3:11; 4:15.

10. Jihova walondekesa henda ku athu abhindama kala Nowemi ni Lute mumawukexile ebhi?

¹⁰ Jihova wabhele kijila kwa Izalayele kyexile mukwatekesa o athu abhindama kala Nowemi ni Lute. Jihova wambele kumundu we kwila mukithangana kyakubongolola idima atokalele kuxisa kama phala ojingadyama. (Iji. 19:9, 10) Kyenyiki, Nowemi ni Lute kabhingile kubhinga jimola phala kudya.

11-12. Ihi yabhange Bowaji yasangulukisa Nowemi ni Lute?

¹¹ Lute wexile munona sevada mudibya dyangene, dyatokalele ku diyala dyexile mvwama, dijina dye Bowaji. Kyawabhela kyavulu Bowaji kyoso kyevu kwila Lute wexile fiyele kwa ukowe Nowemi, wamuzolele kyavulu. Mukonda dya kiki mukubhita kithangana Bowaji wasumbu kibhela kya Nowemi, anga wakazala ni Lute. Kyenyiki, otwana twa Lute ejitena kulundula okibhela kyenyiki. (Lute 4:9-13) Bowaji ni Lute avwala mona wadiyala amuluku odijina dya Obedi, mwene wakituka kuku wa Sobha Davidi.—Lute 4:17.

¹² Xinganeka okusanguluka kwa Nowemi kyoso kyondeleka omulawul’ê Obedi, kiki kyamubhangesa kubhanga musambu kwa Jihova ni muxima woso! Maji okusanguluka kwa Nowemi ni Lute kwandadibandekesa dingi kyoso kyandakwafukununa, ene andakwijiya kwila Obedi wakituka kuku wa Mexiya Amukanene, Jezú Kidistu!

13. Ihi itudilonga mumusoso wa Nowemi ni Lute?

¹³ Ihi itwadilongo. Kyoso kitudibhana ni ibhidi tutena kuluwala mba kukala ni kutata kwa muxima. Nange tuxinganeka kwila omaka  metu kandabwa dingi. Mu ithangana yiyi twatokala kudyelela ni muxima wetu woso kwa Tata yetu yadyulu Jihova ni kuzukama dingi kujiphange jetu mukilunga. Sayi ithangana Jihova kakatula o ibhidi itwamudibhana nayu. Mukifika, Jihova kafukununa omwadi wa Nowemi ni twana twê tuyadi. Maji mwene wandatukwatekesa kudibhana ni ibhidi, sayi ithangana bhukaxi kahenda katulondekesa ojiphange jetu mukilunga.—Jisa. 17:17.

14. Mukonda dyahi omukwa Levita waluwalele kyavulu?

¹⁴ Omusoneki wa Jisálamu 73 wexile mukwa Levita. Kyenyiki mwene wexile ni ujitu wakusidivila mutembulu ya Jihova. Né kiki, sayi ithangana kumwenyu mwene waluwalele. Mukonda dyahi? Mukonda mwene wamateka kukala ni lwimbi lwa athu ayibha, kimukonda wamesenene kubhanga ima yayibha, kana, maji mukonda wexile mwamona kala amuditunda kyambote kumwenyu. (Jisá. 73:2-9, 11-14) Ene edile kala, ala ni sawidi yambote, mwenyu wambote, kexile ni ibhidi. Mukumona o ima yiyi o Levita waluwalele kate wambe: “Kifwaze eme ngatale ngó hadi yakudizelesa omuxima ni kusukula omaku’ami n’a bhwe omaxaka.” Séphata kuxinganeka kiki kyejimufidisa kusuluka ni kusidivila Jihova.

15. Kala kilondekesa o Jisálamu 73:16-19, 22-25, ihi yabhange o Levita wasoneka Jisálamu phala kutolola okuluwala kwê?

¹⁵ Tanga Jisálamu 73:16-19, 22-25. O Levita wa “bokona mu tembulu ya Nzambi.” Mu inzo ya Nzambi mwene wexile we ni athu engi exile musidivila Jihova, kwexile kutululuka, watenene kuxinganeka kyambote ni kutungulula o ibhdi yê. Kyenyiki mwene watonginina kwila kexile muxinganeka kyambote, se kadilangele mwene wejizanga o ukamba we ni Jihova. Mwene watendela kwila o athu ayibha ala mu “ididi yaxanana” ni kwila “kuhadya akajimuka.” Phala kaluwale ni kukala ni lwimbi, o Levita watokalele kumateka kutala o ima kala kitala Jihova. Kyoso mwene kyamateka kubhanga kya kiki, omuxima we waluwalele, wamateka kya kusanguluka. Mwene wambe: “O mu ngongo we kanamu dingi ngamu windi, mukutunda eye [Jihova]!”

16. Ihi itutena kudilonga ni ima yabhiti ni mukwa Levita?

 ¹⁶ Ihi itwadilongo? Twadilongo kwila kitwatokala kukala ni lwimbi lwa athu amoneka kala amuditunda kyambote kumwenyu. Okusanguluka kwâ kwandajimuke, ene kandakala ni mwenyu wakalelaku. (Ndo. 8:12, 13) Sétukala ni lwimbi lwa ene, twandaluwala kumuxima, kate mwene tutena kuzanga o ukamba wetu ni Jihova. Kyenyiki, se umona kwila wamumateka kukala ni lwimbi lwa athu amoneka kala amuditunda kyambote kumwenyu kayela ophangu ya mukwa Levita. Belesela o itendelesu ya Nzambi, dilunge ni akwenu enemubhanga ovondadi ya Jihova. Se uzolo we Jihova o ima yoso ndenge, wandakala ni kusanguluka kwakidi. Wandakala we munjila yambata ku “mwenyu wa kidi.”—1 Tim. 6:19.

17. Ima yahi yabhangesa Phetele kuluwala kyavulu?

¹⁷ Poxolo Phetele wexile mukwa kufulujuka; mukonda dyakufulujuka kwe sayi ithangana wazwela ni kubhanga ima se kuxinganeka. Mukubhita kithangana wabhingile kudyela. Mukifika, kyoso Jezú kyambela ku jipoxolo jê, kwila mwene wejitala hadi ni kufwa, Phetele wamubazele wexi: “Lukusuke, Ngana! Kyenyiki ki kikubhite.” (Mat. 16:21-23) Mukubhita kithangana Jezú wabazela Phetele. Kyoso okibuka kya athu kyeza phala kukwata Jezú, se kuxinganeka Phetele wakatula xibhata yu wabatula oditwi dya mubhika wa mukunji wadikota. (Nzwá 18:10, 11) Lwamukwa dingi Jezú wabazela Phetele. Kumbandu yengi, Phetele wadinanze kwila némwene se ojipoxolo jamukwa jidituna Jezú, mwene kejidituna! (Mat. 26:33) Maji Phetele kexile ni nguzu yavulu kala kyexile muxinganeka. Tuzwela kiki, mukonda m’usuku wenyu mwene waditunu Jezú mulutatu. Ni ndolo yavulu kumuxima Phetele, “Anga utubhuka, udila kisoxi kyavulu.” (Mat. 26:69-75) Phetele nange wexile mudibhwidisa: Okwila ngana Jezú wandangiloloka?

18. Kyebhi Jezú kyakwatekesa Phetele kutolola okuluwala kwe?

¹⁸ Maji Phetele kehela kwila okuluwala kwe  kumubhangesa kuxisa osidivisu yê kwa Jihova. Sumbala watondalele, mwene wasuluka ni kusidivila Jihova ni jipoxolo jamukwa. (Nzwá 21:1-3; Ika. 1:15, 16) Ihi yamukwatekesa kukala dingi ni kixinganeku kyambote? Phetele walembalala kuma, mu ithangana kudima Jezú wasambele phala okixikanu kya Phetele kikizoze, kumbandu yengi Jezú waswinisa Phetele phala nende kuswinisa ojiphange. Jihova watambwijila omusambu wabhange Phetele ni muxima woso. Mukubhita kithangana, Jezú wamoneka kwa Phetele pholo ni pholo se phata phala kumuswinisa dingi. (Luka 22:32; 24:33, 34; 1 Kol. 15:5) Sayi kizuwa Jezú wamonekena ku jipoxolo jê joso kyoso ene kyabhitele usuku woso se kukwata jimbiji. Mukithangana kiki Jezú webhwidisa kwa Phetele se wamuzolele ni muxima woso. Jezú waloloka Kamba dye dyakazolo, wamubhana dingi ikalakalu yavulu phala kubhanga.—Nzwá 21:15-17.

19. Kala kilondesa o Jisálamu 103:13, 14, kyebhi Jihova kyatutala kyoso kituta kituxi?

¹⁹ Ihi itwadilongo? O ukexile wahenda wa Jezú kudibhana ni Phetele walondekesa kwila mwene mukwa kuloloka kala Tate ya dyulu, Jihova. Kyenyikiphe se tutondala kitwatokala kuxinganeka kwila Jihova kandatuloloka dingi. Lembalala kuma, Satanaji wamesena kwila kyene kituxinganeka. Muveji dyakiki twatokala kuxinganeka kwila Jihova watuzolo, wejiya kwila tu akwa ituxi, mwene wamesena kutuloloka. Etwe twatokala kukayela ophangu ya Jihova kyoso akwetu kyatululwalesa.—Tanga Jisálamu 103:13, 14.

20. Ihi itwandadilonga mumbandu yakayela?

²⁰ Ophangu ya Zuze, Nowemi, Lute, o Levita ni ya Phetele, itulondekesa kwila “Jihova wa zukama kwa yá a toloka mixima.” (Jisá. 34:18) Sayi ithangana Jihova utwehela kutala hadi ni kudibhana ibhdi. Maji kyoso kitukolokota mu ibhdi ni kikwatekesu kya Jihova, okixikanu kyetu kidibandekesa anga kikola dingi. (1 Phe. 1:6, 7) Mumilongi yakayela twandamona kyebhi Jihova kyadibhana ni jiselenvende jê kyoso kyakala ni kuluwa kwamuxima, nange mukonda dya kukamba okuyuka mba ithangana yabhonzo.