1-2. Mukonda dyahi o Jikidistá joso abhingi kwijiya yalungu ni difukunukinu dya kukala ni mwenyu kudyulu?

ATHU avulu lelu amusidivila Jihova, ala ni kidyelelu kyakutambula omwenyu wakalelaku mu ixi. Maji sayi Jikidistá a a undu, ala ni kidyelelu kyakutambula omwenyu kudyulu. O Jikidistá jiji a a undu, amesena kwijiya kyebhi kyandakala omyenyu yawu kudyulu. Maji mukonda dyahi oyó ala ni kidyelelu kyakukala ni mwenyu mu ixi, amesena we kudilonga yalungu ni ima yenyiyi? Kala kitwandadilonga, odifukunukinu dya athu andaya kudyulu dyandabheka we mabesa phala yo ala ni kidyelelu kyakukala ni mwenyu mu ixi. Mukiki, kikale se twala ni kidyelelu kyakuntunga kudyulu mba mu ixi, etwenyoso twamesena kwijiya yalungu ni difukunukinu dyakuya kudyulu.

² Kuhama yadyanga, Nzambi wabhangesa omaxibulu a Jezú Kidistu kusoneka yalungu ni kidyelelu kyakuya kudyulu. Poxolo Nzwá wajimbulula: “Tu an’a Nzambi, maji kiluwaphe tu k’ijiya kyoso kitwà kala. Inda, twejiya ngó kwila, se mwène Kidistu wedi u tukuluka, etu wetu twa kà di fwangana-nê.” (1 Nzwá 3:2) Kyenyiki, o Jikidistá a a undu kejiya kyebhi kyandakala kyoso kyandakwafukununa ni mukutu mu nzumbi phala kuya kudyulu. Maji kyoso kyandatambula ofutu ya, andamona Jihova. O Bibidya ki izwela o ima yoso yalungu ni difukunukinu dyakuya kudyulu, maji poxolo Phawulu wazwela bofele yalungu ni maka enya. O Jikidistá a a undu andakala kumoxi ni Kidistu kyoso mwene kyandabwika “o mautuminu oso, ni  maungana moso, ni nguzu joso.” Katemwene ni “nguma isukidilaku, o kalunga,” anda kukabwika. Mukusukaku, Jezú ni yó andatuminane kumoxi ni ima yoso, a kaditulula bhoxi dya Ungana wa Jihova. (1 Kol. 15:24-28) Kyanda kala kithangana kyakusanguluka! *

3. Kala kilondekesa 1 Kolindu 15:30-32, okidyelelu kyadifukunukinu kyakwatekesa Phawulu kubhanga ihi?

³ Okidyelelu kyadifukunukinu kyakwatekesa Phawulu kukolokota mu izukutisu. (Tanga 1 Kolindu 15:30-32.) Mwene wambela akwa Kolindu wixi: “Eme okalunga kangizukama izuwa yoso.” Poxolo Phawulu wambe dingi: “Ku Efezu ngabhange mvunda, mukwá ni muthu uluwa ni yama yamukawu.” Nange Phawulu wexile muzwela yalungu ni kubhânga ni yama yakidi mumbanza ya Efezu. (2 Kol. 1:8; 4:10; 11:23) Mba wexile muzwela yalungu ni izukutisu ya Jijude, ni athu akamukwa edile kala “yama yamukawu.” (Ika. 19:26-34; 1 Kol. 16:9) Poxolo Phawulu wadibhana ni izukutisu, maji mwene wasuluka ni kudyelela kwila, kuhádya wejisanguluka.—2 Kol. 4:16-18.

4. Kyebhi okidyelelu kyadifukunukinu kikolokotesa o Jikidistá lelu? (Tala ofoto ya kapa.)

⁴ Etu twatungu mu ithangana yabhonzo. Sayi jiphange jetu enemudibhana ni usweya. Amukwa atungu mu ididi mwabhiti o ita, ala ni wôma wavulu. Jiselevende jamukwa ja Jihova atungu mujixi mwafidisa okikalakalu kyetu kyakuboka ata omwenyu wa mukilwezu. Kyenyiki, ene asidivila Jihova nemwene kwijiya kwila atena kwata mukaleya mba kwajibha. Maji nekiki ojiphange jiji asuluka ni kubheza Jihova. Ene phangu yambote phala etu. Ojiphange jiji kala ni wôma mukonda ene ejiya kwila, némwene se afwa kindala, Jihova Nzambi wa akanena kwabhana kima kyabetakota kuhádya.

5. Ixinganeku yebhi yayibha itena kuzozesa okixikanu kyetu kudifukunukinu?

⁵ Poxolo Phawulu wadimuna ojiphange phala kudilanga ku ixinganeku yayibha yexile nayu o athu mu izuwa yenyoyo, yakwila: “Se ni kidi kyene o madifundu ka fukunuka, tu bhangyenu kala ki ambe o sabhu, kwila: ‘Tu dyenu-tu, tu nwenu-tu, o mungu tu kane kufwa.’” Sayi athu lelu, ala we ni ixinganeku yiyi kala mu izuwa ya poxolo Phawulu. Mwene nange watumbula o izwelu yala mudivulu dya Izaya 22:13, izwela yalungu ni ukexilu wa akwa Izalayele. Muveji dyakuzukama kwa Nzambi, ene exile musuwa ngo ojihanji jâ. O akwa Izalayele exile ni kixinganeku kyakwila “tudya, tunwa kindala,” mukonda o ima itena kubhwa mukakithangana. Kyene we kyabanza o athu lelu. Maji o Bibidya izwela o ibhidi yadibhana nayu akwa Izalayele mukonda dya ixinganeku yiyi yayibha.—2 Mal. 36:15-20.

6. Okidyelelu kyetu kyadifukunukinu kifunyisa kyebhi o ukexilu wetu wakusola omakamba?

⁶ Kwijiya kwila Jihova wala ni kutena kwakufukununa omadifundu, kutena kutubhangesa kusola kyambote se anayi andakala makambametu. Ojiphange mumbanza ya Kolindu atokalele kudituna kubhanga ukamba ni athu kaxikinine kudifukunukinu. Didi disá dyambote phala etu lelu: Se tubhanga ukamba ni athu kamesena kwijiya ihi yandabhita kuhádya, maji alalamana ngó ni itonokenu, ene andakutufunyisa mu ukexilu wayibha. Se okidistá yakidi udilunga ni muthu wadifu kiki, mwene utena kutexika o idifwa yê yambote. O athu yâ atena kufunyisa okidistá yakidi kuta kituxi kwa Nzambi. Kyenyiki, poxolo Phawulu watudimuna: “Phaphumukenu, mu kwate kilunji ni mwenyu wayuka kala kya fwama, kana dingi kuta ituxi.”—1 Kol. 15:33, 34.

7. Kala kilondekesa 1 Kolindu 15:35-38, kibhwidisu kyebhi kyenemubhanga o athu yalungu ni difukunukinu?

⁷ Tanga 1 Kolindu 15:35-38. O athu amesena kubhangesa akwa kukala ni jiphata jalungu ni difukunukinu, nange ebhwidisa: “Omadifundu andakwafukununa kyebhi?” Kima kyambote kuxinganeka mukitambwijilu kyabhana Phawulu, mukonda lelu o athu ala ni ixinganeku yavulu, yalungu ni ihi ibhita ni muthu kyoso kyafwa. Maji ihi itulonga o Bibidya?

8. Kifika kyebhi kitena kutukwatekesa kutendela odifukunukinu dya yó andaya kudyulu?

⁸ Kyoso omuthu kyafwa anga amufunda, omukutu we ubola. Maji omubhangi wangongo utena kufukununa omuthu yu wafu ni kumubhana mukutu wengi. (Dim. 1:1; 2:7) Poxolo Phawulu wate kifika kilondekesa kwila, Nzambi kabhingi kufukununa omuthu ni mukutu wê wokulu. Xinganeka o “mbutu yokune.” Kyoso ombutu kya ikuna mumavu, yene isabhuka, kupholo ikituka kisasa mba muxi wa ubhe. Okisasa mba omuxi wa ubhe kiwadifu dingi ni lumbutu lwokune. Poxolo Phawulu wasokesa okifika kiki phala kulondekesa kwila omubhangi wetu utena kubhana ku muthu “o mukutu woso wa mu wabhela mwène.”

9. Omukanda wa 1 Kolindu 15:39-41 uzwela ihi yalungu ni mikutu?

⁹ Tanga 1 Kolindu 15:39-41. Poxolo Phawulu wamono kwila, Nzambi kabhange omikutu yoso mu ukexilu umoxi. Mukifika, omikutu ya jingombe, ya jinjila ni ya jimbiji ki idifu. Mwene wamono we kwila, kudyulu odikumbi kidyadifu ni dyeji. Poxolo Phawulu wamono we kwila “Sayi ni thethembwa itunda mukwá mu kubenya.” Kiki kidi, némwene se kitutena kumona ni mesu metu. Ojingijiye amba kwila, kwene jithethembwa javulu kijidifu, sayi jiji jamakota, jamukwa jofele, jamukwa jazele, jamukwa jakusuka, jakamukwa jadifu ni dikumbi. Poxolo Phawulu wambe we kwila “Sayi we mikutu ya dyulu, sayi mikutu ya bhoxi.” Kiki kilombolola ihi? Kilombolola kwila, o athu mu ixi ala ni mikutu muxitu,  maji kudyulu kwala mikutu ya nzumbi kala omikutu ya jiyanju.

10. Mukutu webhi wandakala nawu o athu yó andakwafukununa phala kutambula omwenyu kudyulu?

¹⁰ Poxolo Pawulu wambe: “Ni mu kufukunuka kwa madifundu we kyene. Omukutu kyoso kya u funda, mukutu wa di fila; maji o ki u fukunuka, wa kà kala mukutu ki ufu dingi.” Etu twejiya kwila, kyoso o muthu kyafwa anga amufunda, ukituka mavu. (Dim. 3:19) Kyebhi kikala omuthu amufukununa ni “mukutu ki ufu dingi”? Poxolo Phawulu kexile muzwela yalungu ni athu ejikwafukununa phala kukala ni mwenyu mu ixi, kala yó a afukununa kwala Elija, Elizewu, ni Jezú. Poxolo Phawulu wexile muzwela yalungu ni yo afukununa phala kutambula omwenyu kudyulu. Oyó andakwafukununa phala kutambula omwenyu kudyulu, andakala ni mukutu “wa nzumbi.”—1 Kol. 15:42-44.

11-12. Ihi yabhiti ni Jezú kyoso kyamufukununa, ni ihi we ibhita ni Jikidistá a a undu kyoso kya a fukununa?

¹¹ Kyoso Jezú, kyexile mu ixi mwene wexile ni mukutu waxitu. Maji kyoso kyamufukununa mwene wakituka “nzumbi i bana mwenyu” anga uvutuka kudyulu. Kyene kimoxi we, o Jikidistá a a undu a afukununa ni mukutu wa nzumbi. Poxolo Phawulu wajimbulula: “Mukwâ ni kitwadifwangana ni muthu yó amubhangele ni mavu ma bhoxi, kyene we ki twa kà di fwangana ni Muthu yó mukwa dyulu.”—1 Kol. 15:45-49.

¹² Kudisukilu dya maka yá, Poxolo Phawulu wazwela dingi yalungu ni difukunukinu. Kima kyambote kudilembalala kwila Jezú kamufukununa ni mukutu waxitu. Poxolo Phawulu wajimbulula se mukonda dyahi Jezú kamufukununa ni mukutu waxitu. Phawulu wambe: “Xitu ni manyinga ki kitena kubhingana mu Utuminu wa Nzambi” kudyulu. (1 Kol. 15:50) Ojipoxolo ni athu akamukwa kejikwafukununa ni mukutu waxitu utena kubola. Thembu kuxi ejikwafukununa? Poxolo Phawulu wambe kwila, ene ejikwafukununa kuhádya, ki kyoso kyeji fwa kana. Mukithangana kyasoneka poxolo Phawulu omukanda  wadyanga ku akwa Kolindu sayi maxibulu “afwile kyá,” kala poxolo Tiyaku. (Ika. 12:1, 2) Mukubhita kithangana, ojipoxolo jakamukwa a a undu “afu we.”—1 Kol. 15:6.

13. Ihi yeji bhita mukizuwa kyakutukuluka kwa Kidistu?

¹³ Kikale Jezú ni Phawulu, azwela yalungu ni kithangana kyakatunda kyeji kwiza kuhádya, kifwa okutukuluka kwa Kidistu. Mukithangana kyakutukuluka kwa Jezú, kweji kala ita, itungutu ya ixi, mavuwa ni ima yamukwa dingi yayibha yeji bhita kumundu woso. Twenemumona o ikanenu yiyi ya Bibidya kudikumbidila tunde kumuvu wa 1914. Sayi kijimbwete kyakamukwa kyakatunda. Jezú wambe kwila onjimbu yambote yakwila o Utuminu wa Nzambi wamutumina kya eji ku ibokela “mu ngongo yoso, mu kubhana umbangi ku akwa jixi joso; kyene kiwa kya kèza [o] dizubhilu.” (Mat. 24:3, 7-14) Poxolo Phawulu wazwela yalungu ni “kizuwa bhwa kejila Ngana.” Kyeji kala okithangana kyakufukununa o Jikidistá a a undu “a fwile kya.”—1 Tes. 4:14-16; 1 Kol. 15:23.

14. Ihi ibhita ni Jikidistá a a undu afwa mukithangana kyakutukuluka kwa Kidistu?

¹⁴ O Jikidistá a a undu afawa mu izuwa yalelu, a afukununa mukithangana kyafwa phala kutunga kudyulu. O izwelu ya poxolo Phawulu itusanga mu 1 Kolindu 15:51, 52 yamba kwila: “Etu ene oso ki twa kà sokela-ku mu kufwa, maji etu ene oso twa kà kituluka mu’anzanz’omo. Mukithangana kya kwila odyesu pote, kyoso hadya ki xika o koloneta ya sukidila-ku.” O izwelu yiyi ya Phawulu yamudikumbidila mu izuwa yetu! Kyoso kyafukununa, ojiphange jiji ja Kidistu asanguluka kyavulu, ene a ka “kalela-ku kyá kumoxi ni Ngana.”—1 Tes. 4:17.

15. Kikalakalu kyebhi kyandabhanga o Jikidistá a a undu?

¹⁵ O Bibidya itutangela okikalakalu kyandabhanga  kudyulu yó andakwafukununa “mukithangana kya kwila mesu pote.” Jezú wa atangela kwila: “Woso u tolola, u aluka imbamba yami katé bhu dizubilu, mwenyó kala eme kya ngi bhana ukota wa kutumina kwala Tata yami, eme we ngi mu bhana ukota wa kutumina akwa jixi. U ji tumina ni mbasa ya felu, wila jimbya ja mavu u ji bula imenga-imenga.” (Dij. 2:26, 27) Ene andakayela omutwameni wâ, Jezú, ni kutumina o ifuxi ni mbasa ya fwelu.—Dij. 19:11-15.

16. Kyebhi omazunda a athu andatolola okalunga?

¹⁶ Ni kidi kyoso o Jikidistá a a undu andatolola okalunga. (1 Kol. 15:54-57) Odifukunukinu dyawu dyandakwabhangesa kukwatekesa kubhwisa okuyibha mukithangana kya ita ya Alumajedone ya zukama. Mazunda ajiphange jamala ni ja ahatu “a tundu mu hadi ya dikota” andabhuluka ni kutunga kumundu wa ubhe. (Dij. 7:14) O athu yá andabhuluka, andamona okibwikilu kyakalunga kyoso omazunda a athu afu kyá ukulu andakwafukununa dingi. Xinganeka okusanguluka kutwanda kala naku kyoso o ima yiyi ki yanda bhita! (Ika. 24:15) Oso akolokota mu ufiyele wâ kwa Jihova, andatena we kutolola okalunga kutwalundula kwa Ada. Ene andakala ni mwenyu wakalelaku.

17. Omukanda wa 1 Kolindu 15:58 utuswinisa kubhanga ihi?

¹⁷ Jikidistá javulu lelu asanguluka ni izwelu iximbakatesa yasoneka poxolo Phawulu ku akwa Kolindu yalungu ni difukunukinu. Etwenyoso twabhingi kubelesa okitendelesu kyatubhana poxolo Phawulu kyalungu ni kubhanga o “kikalakalu kya Ngana.” (Tanga 1 Kolindu 15:58.) Se tubhanga okikalakalu kiki ni kuswisa kwoso, twandatena kukala ni mwenyu wasanguluka kuhádya. Kuhádya omwenyu wetu wandawabha dingi. Kiki kilondekesa kwila okikalakalu kyetu kyadikota mwa Ngana kikyakingoho.