1, 2. (a) Ídifua iahi ia-nda tu kuatekesa ku dibhana ni jitendasá? (b) Kiebhi ki ueji jimbulula se o kixikanu ihi? Bhanga kifika.

O KUBHANGA o sidivisu ia Jihova, i tu bhekela kisangusangu. Né muene tu dibhana ni jiphaxi ku mundu iú, nange tu tala ‘hadi mukonda dia kuiuka.’ (1 Phe. 3:14; 5:8, 9; 1 Kol. 10:13) Phala tu di tunde kiambote, kua bhingi kixikanu ni ku suína.

² O kixikanu ihi? O Poxolo Phaulu ua soneka: “O kuxikana-phe ku ijidisa ima i tua dielela, [kuidikisa] ima kiluua i moneka.” (Jihe. 11:1) O Bibidia ia mukua iamba: “O kixikanu o ku kingila o ima i tua mesena. Kixikanu, o ku xikina o ima ki tu tena ku i mona ni mesu.” (The Simple English Bible) Se saí kima kia bhitisa mu dijina dietu, etu tu kala ni kixikanu kia kuila o kima kiki, kia tu tokala. O ku kala ni kixikanu kuila Nzambi u suua o ibhindamu ietu, kia difu ni ku tu bhitisa kima mu dijina dietu. O kixikanu kietu ki tu kuatekesa ku mona o ki kumbidilu kia ikanenu ia Bibidia i tua mu kingila, ni ku dielela kuila kiki kia-nda di kumbidila, sumbala ki tu tena ku ki mona.

3, 4. (a) O ku suína ihi? (b) Uebhi o ukexilu ua ku kolesa o kixikanu ni ku suína kuetu?

³ O ku suína, a ku lombolola kala “ukexilu uambote mu nzumbi, ni kilunji kia uabha, phala ku tena kuzuela sé uôma, mu ku dibhana ni ibhidi ni iluezu.” (The New Interpreter’s Dictionary of the Bible) Se tu suína, tua-nda kola o muxima, ni ku kala ni nguzu.—Mar. 6:49, 50; 2 Tim. 1:7.

⁴ O kixikanu ni ku suína, ídifua iambote. Maji saí ithangana tu mona kuila tuala dingi ni kibhindamu kia ku kala ni kixikanu, maji ki tu londekesa o ku suína. Athu avulu a alombolola mu Bibidia, alondekesa phangu iambote mu ídifua íii. Phala ku kolesa o kixikanu ni ku suína kuetu, tua bhingi ku di longa o phangu jiji.

5. Phala ku tena ku di tunda kiambote mu kikalakalu kia tambula, ihi ia tokalele ku bhanga Josuué?

⁵ Tu vutuke ku dima mu 35 a hama. Kua bhitile makuinhi a uana a mivu, tundé Jihova kia bhuluile o akua Izalaiele ku ubhika bhu maku a sobha ia Ijitu. O polofeta Mozé, muéne ua kexile ku pholo. Ni 120 a mivu, Mozé ua mono ngó o ixi ia Kanana, anga ufuá ku Mulundu ua Nebo. O diiala dia mu bhingana Josuué ,“uizala ni Nzumbi ia unjimu.” (Mate. 34:1-9) Kua kambe ngó phala o akua Izalaiele ku bokona mu mbanza ia Kanana. Phala kuendesa kiambote o mundu, Josuué ua-nda bhinga o unjimu ua Nzambi. Muéne ua-nda bhinga ué ku kala ni kixikanu kia Jihova ni kulondekesa kuila muéne diiala dia suína.—Mate. 31:22, 23.

6. (a) O divulu dia Josuué 23:6 di tu suína ku bhanga’hi? (b) Ihi i tu di longa mu divulu dia Ikalakalu 4:18-20 ni mu Ikalakalu 5:29?

⁶ O unjimu, o ku suína, ni kixikanu kia londekesa Josuué mu kithangana kieniókio kioso kia tambula o ixi ia Kanana, nange kia suínisa kiavulu o akua Izalaiele. O kia mukua, mu veji dia ku bhânga ngó, ene a bhingile ku suína phala ku bhanga ioso ia a tumina Josuué. Ku disukilu dia muenhu uê, muéne uambe: ‘Mua bhingi-phe ku suína kiavulu phala, ku bhaka ni ku bhanga ima ioso iòsoneke mu divulu didi dia ngonge ia Mozé; kana ku i phambuka, né ku kadilu, mba ku kiasu.’ (Josu. 23:6) Etu ué tua bhingi ku suína phala ku belesela Jihova, mu ithangana ioso. Kiki, ki bhita kioso o muthu u tu bhinga phala ku bhanga o ima io fidise kua Nzambi. (Tanga Ikalakalu 4:18-20; 5:29.) Se tu dielela kua Jihova mu ku samba kua muéne, ua-nda tu kuatekesa kulondekesa o ku suína.

7. Phala ku suína ni ku di tunda kiambote, ihi ia bhingile Josuué?

⁷ Phala ku suína mu ku bhanga o vondadi ia Nzambi, tua bhingi ku di longa o Maka mê ni kua kumbidila ku muenhu uetu. Kiene o kitendelesu kia bhanene Jihova kua Josuué, kioso kia bhingana Mozé: ‘Eie muene, kala ngó u kindanda, u kole o muxima, u kale ni muanu ua kualuka ngonge ioso ia ku lekelela mubhik’ami Mozé. . . . divulu didi, dia ngonge, ki di bhue mu kanu diê; kota u kala mu ku di banza jinga mu muanha ni mu usuku, ni uijiie ku bhanga ima ioso ni muanu kala kia i soneka muenhómo; mukonda se uenda ni ku ki bhanga, uendelu ué u kala ua ku bhanduluka, o kuenda kué ku kala kua unjimu.’ (Josu. 1:7, 8) Josuué ua kaiela o itendelesu, iu ua ‘di tundu kiambote mu ikalakalu iê.’ Se tu bhanga ué kiki, tua-nda kala ni ku suína kuoso ni ku di tunda kiambote mu sidivisu ietu kua Nzambi.

8. Kuebhi kua katula o izuelu ia kibatulu kietu kia muvu ua 2013, ni kiebhi o izuelu íii ia-nda ku kuatekesa?

⁸ Josuué a mu suínisa kiavulu kioso kiévu o izuelu ia Jihova: ‘Kala u kindanda, u kole o muxima; kana ku kala ni uôma, kana ku sasumuka; kuma Jihova, Nzambi ié, uala-nê kumoxi kuoso-kuoso ku uia.’ (Josu. 1:9) Jihova uala ué n’etu. Mu kiki, ki tu kale ni  ‘uôma mba ni ku sasumuka’ né muene ni ibhidi ietu. Tu xinganeke mu izuelu íii: ‘Kala u kindanda u kole o muxima. . . . Kuma Jihova, Nzambi ié, uala-nê kumoxi.’ O izuelu mu divulu dia Josuué 1:9, io sole phala o kibatulu kietu kia muvu ua 2013. Mu kidi, o izuelu íii iene ia-nda tu suínisa ku jimbeji ku pholo, kala ué o izuelu, ni ibhangelu ia athu a suínine akua kixikanu.

9. Mu ukexilu uebhi, Lahaba ua londekesa kixikanu ni ku suína?

⁹ Kioso Josuué kia tumikisa o kiiadi kia athu phala ku londa o ixi ia Kanana, Lahaba ua a sueka, iu ua nganala o jinguma ejile mua sota. Mukonda dia ibhangelu iê ia kixikanu ni ku suína, muéne ni muiji uê uoso a a bhulula kioso kia buika o mbanza ia Jedikó ku akua Izalaiele. (Jihe. 11:30, 31; Tiia. 2:25) Mu kidi, Lahaba ua xisa o ukexilu uê ua iibha, iu ua soto ku bhanga o ima kala kia mesenene Jihova. Saí athu a kituka Jikidistá, alondekesa ué kixikanu ni ku suína phala ku bhanga o ima kala kia mesenene Nzambi.

10. Mu ithangana iebhi Lute ua zokela o ubhezelu ua kidi, ni mabesá’hi a tambula muéne?

¹⁰ Kioso kiafu Josuué, o Mutudi Lute mukua Mouabhe ni ku suína kuoso, ua zokela o ubhezelu ua kidi. O mutudi iú, mukonda ua kazalele ni mukua Izalaiele, nange muéne uejidile i itumu ia Jihova. O ukouê Nouemi, ua tungile mu mbanza ia Mouabhe iu ua vutuka mu ixi ia Izalaiele mu mbanza ia Beleme. Mu njila, Nouemi, ua bhingi Lute phala n’a vutuke ku mundu uê, maji Lute ua tambuijila: “Kana ku ngi bhomba ni ngi ku xie, anga ngi ku sondoloka hé ngi fula ku ku kaiela . . . o mundu ué u kala mundu uami, Nzambi ié Nzambi iami.” (Lute 1:16) Lute ua zuela ni kidi kioso o izuelu íii. Mu ku bhita kithangana, o ndandu ia Nouemi Bouaji, ua kazala ni Lute, a vuala mona ua kituka mbutu ia Davidi ni ia Jezú. Mu kidi, Jihova u besoala o ibhangelu ilondekesa kixikanu ni ku suína.—Lute 2:12; 4:17-22; Mat. 1:1-6.

11. Kiebhi Johoiada ni Jozebate kia londekesa ku suína, ihi ia bhange mukonda dia ku suína?

¹¹ O kixikanu kietu ni ku suína ku kolokota dingi, kioso ki tu mona kuma Nzambi ua mu kuatekesa ió a mu ta o mienhu iâ mu iluezu, mu ku ta ku pholo o vondadi ia Nzambi mu ku kuatekesa o jiphange jâ. Mu kifika, xinganeka o Mukunji ua Dikota Jehoiada ni muhatu uê Jozabate. Kioso o Sobha Akaziia kiafu, Ataliia manh’â, ua jibha o athu a subhuka ku muiji ua sobha, kua subhuka ngó Jouaji, muéne ua bhingana ku u sobha. Maji Jehoiada ni Jozebate a te o mienhu iâ mu iluezu, mu ku sueka Jouaji mona Akaziia ku kiledi kiê mu mivu i samanu. Ku muvu ua kasambuadi, Jehoiada ua tumbika Jouaji kala sobha, iu ua jibhisa Ataliia. (2 Jis. 11:1-16) Mu ku suka-ko, Johoiada ua kuatekesa o sobha Jouaji mu ku iudika o tembulu. Kioso kiafu Johoiada mu 130 a mivu, a mu fundu bhu mbalale bhua kexile mu funda o jisobha, “mukonda muene ua bhangele mbote, ni kua Izalaiele, ni kua Nzambi, ni ku dibhata diê.” (2 Mal. 24:15, 16) O ibhangelu ia ku suína kua londekesa Johaiada ni muhatu uê, kua bhangesa ku langa o mbutu ia Davidi ndu kua Mexiia.

12. Kiebhi kia londekesa Ebede-Meleke kuila ua suínine?

¹² Ebede-Meleke, mu inzo ia Sobha Zedekiia, ua te mu iluezu o muenhu uê phala ku bhulula Jelemiia. O sobha ua bhanene Jelemiia bhu maku a makota a Juda, a mu tatela, anga a mu takula mu kiboiongo mua kexile maloua, phala n’a fué. (Jel. 38:4-6) Né muene mu ku ta mu kiluezu o muenhu uê, Ebede-Meleke ua soto o sobha Zedekiia phala ku bhulula polofeta Jelemiia. Zedekiia ua xikana, iu ua bhana 30 a mala a  kuatekesa Ebede-Meleke, phala ku bhulula Jelemiia. Bhu kaxi ka polofeta, Nzambi ua kuatekesa Ebede-Meleke kuila, muéne keji ku fuá kioso kieji buika o mbanza ia Jeluzaleme ku akua Babilonha. (Jel. 39:15-18) O ku suína mu nzumbi, a ku besoala.

13. Ku suína kuahi kua londekesa o kitatu kia minzangala akua Hebeleu, ni ihi i tu tena o ku di longa mu phangu iâ?

¹³ Ku hama ia kasambuadi A.K.K., kitatu kia minzangala jiselevende ja Jihova akua Hebeleu, a a bhana kitendelesu kia kuila, Nzambi u besoala o kixikanu ni ku suína. O Sobha ia Babilonha Nabukodonozolo, uongeka o jingunza jê joso, iu ua bhana o kitumu kia kuila, oso a tokalele ku fukamena o kiteka kia ulu kia bhangele muéne. Uoso-uoso ka ki fukamene, eji mu takula mu kijiku kia túbhia. O kitatu kia minzangala akua Hebeleu ni ku xila kuoso, ambela kua Nabukodonozolo: “Nzambi ietu, uoso tuene ku mu bhikila, muéne utena ku tu kudila; o kitual’iki muene ua-nda ku tu kudila ku kijiku kia túbhia tuê tua muzukuta, anga u tu [bhulula] ue bhu lukuaku lué, eie u sobha. Né-mbé ka ki bhange, tuma ku k’jiia, sobha, kuma etu nguetu kubheza o jinzambi jé, nguetu kufukamena o kiteka kié kia ulu ki uemika eie.” (Dan. 3:16-18) O ku bhuluka kua kitatu kia minzangala akua Hebeleu, a kulombolola kiambote mu divulu dia Daniiele 3:19-30. Nange ka tu kuatesa uôma ua ku tu takula mu kijiku kia túbhia, maji né kiki, tu dibhana ni ibhidi ia ku suína, tu tena ku dielela kuila Nzambi ua-nda tu besoala mukonda dia kixikanu ni ku suína kuetu.

14. Kala ki tanga o kibatulu kia 6 kia Daniiele, kiebhi muéne kia londekesa ku suína ni kiebhi kia di tundu?

¹⁴ Daniiele ua londekesa kixikanu ni ku suína, kioso o jinguma jê kia suínisa o Sobha Ndala, ku bhana kitumu kia kuila, “muthu uoso u bhinga kima kua Nzambi ioso-ioso mba ku muthu uengi ko kué, muenexi, kana, a mu takule mu ngenda ia jihoje.” Kioso Daniiele kiévu kuila o mukanda a u te kidimbu, muéne “ua bokona m’onzo iê, hé uia mu xilu muala jinjanela ja’nzo iê ja jikuka ja lungu ku Jeluzaleme; anga ufukama ku jiphuna jê lutatu ku kizuua, usamba, usakidila bhu pholo ia Nzambi iê, kala kiene o kifua kiê tunde ukulu.” (Dan. 6:6-10) Daniiele a mu takula mu ngenda ia jihoji—maji Jihova ua mu bhulula.—Dan. 6:16-23.

15. (a) Phangu iahi ia xisa Akuila ni Pidisila ia kixikanu ni ku suína? (b) Ihi ilombolola o izuelu ia Jezú i tu sanga mu divulu dia Nzuá 13:34, ni kiebhi Jikidistá javulu alondekesa henda?

¹⁵ Mu ithangana ka ilombolola mu Bibidia, Pidisila ni Akuila ‘a bhakuile kiá ji xingu jâ mu ku kudila o muenhu ua Phaulu.’  (Ika. 18:2; Lom. 16:3, 4) Ene ni ku suína kuoso a bhange kála kiambe Jezú: “Nga mi bhana kijila kiôbhe: Di zodienu mudienu. Kala kioso eme ki nga mi zola, enu uenu di zodienu mu dienu.” (Nzu. 13:34) O kitumu kia Mozé, kiambele kuila o muthu ua tokalele ku zola vizinhu iê, kála kia di zolo muéne. (Iji. 19:18) Maji o kitumu kia Jezú kiexile “kiôbhe” mu kulombolola kuila, o henda ia bhingile ku bhana o mienhu ietu bhu kididi kia akuetu, kála kia bhange muéne. Jikidistá javulu alondekesa henda mu ku ta ‘o ji xingu jâ mu iluezu,’ phala ka bhangese o phange jâ kua kaxtikala mba ku a jibha, bhu maku a jinguma.—Tanga 1 Nzuá 3:16.

16, 17. Jipolova jahi ja dibhana na-ju o Jikidistá ja dianga ja lungu ni kixikanu ni kiebhi kiki tu tena ku ki sokesa ni misoso ia Jikidistá mu izuua ietu?

¹⁶ Kála Jezú, o Jikidistá ja dianga a suínine mu ku bheza ngó Jihova. (Mat. 4:8-10) Ene a ditunu ku bhana sata ia mazumba phala ku bhana kijingu ku sobha ia Loma. (Tala o foto) Daniiele P. Mannix mu divulu diê Those About to Die ua soneka: “Ki Jikidistá javulu a xikina ku bhanga kiki, sumbala ni kalatódio ni túbhia tua uama, tuo bhakele phala ku bhanga ia mesenene. O muthu a mu kase, ua tokalele ku bhangesa o túbhia ku uama dingi n’a tambule Mukanda ua Sata anga a mu eha. A mu tangele ué kuila muéne ka mu bheza o sobha ia loma; maji ua mu xikina ngó ukexilu ua sobha kala mutuameni ua kexile ku pholo ia akua Loma. Né muene kiki, se-ku Kidistá ua soto ku bhanga kiki phala ku di bhulula.”

¹⁷ O Jikidistá a a balakele ku akua Nazista katé muene ni kufuá, a a bhanene mu veji javulu kithangana kia ku bhulula o mienhu iâ, se ene a xikinine ku dituna Jihova. Maji ofele ngó a xikina ku bhanga kiki. Mu ku dibhana katé muene ni kufuá mu ixi ia Ruanda, Jimbangi ja Jihova a zuela o dimi dia Tutsi ni Hutu a di langidila mudiâ. O jipolova jiji, ja bhingile ku suína ni kixikanu.

18, 19. Phangu jebhi ja Bibidia ji tena ku tu kuatekesa ku bhanga o kikalakalu kietu, kia kuboka ni kixikanu ni ku suína kuoso?

¹⁸ Kindala, tuala ni ujitu ua ku bhanga mbandu ku kikalakalu kia bhana ku jiselevende ja Nzambi—kia ku tula o njimbu iambote ni ku bhanga maxibulu. (Mat. 24:14; 28:19, 20) Tu sanguluka kiavulu mu phangu íii ia Jezú! Muéne u kala mu “nhunga ku jimbanza ni mu jisanzala, mu ku boka ni kutula o Njimbu Iambote ia Utuminu ua Nzambi.” (Luk. 8:1) Kála muéne, etu tua bhingi kixikanu ni ku suína, phala ku boka o njimbu ia Utuminu. Ni kikuatekesu kia Nzambi, etu tu tena ku kala kála Noué mukua ku suína, “mujimbuidi ua maka maiuka” phala o “mundu ua athu ió abhumu,” a a buika ku dilúvio dionene.—2 Phe. 2:4, 5.

¹⁹ O musambu u tu kuatekesa kuambata ku pholo o kikalakalu kia ku boka. Kioso o akaiedi a Kristu akexile mu kua zukutisa, a sambele phala ‘ku boka o maka a Nzambi ni ku suína kuoso,’ Nzambi ua a tambuijila. (Tanga Ikalakalu 4:29-31.) Se u mukua uôma ua kuboka inzo ni inzo, Jihova ua-nda tambuijila o misambu iê, phala u kale ni kixikanu ni ku suína kua kolo.—Tanga Jisálamu 66:19, 20. *

20. Kikuatekesu kiahi ki tuala na-kiu etu tu jimbangi ja Jihova?

²⁰ Ki kima kiofele ku kaiela o njila ia muenhu, sumbala ni ibhidi ia tu kondeleka ku mundu iú ua iibha. Mu kienhiki, ki tuala ubheka uetu. Nzambi uala n’etu. Mon’ê o Mutuameni ua kilunga, uala ué n’etu. Tuala dingi 7.000.000 a Jimbangi ja Jihova ku mundu uoso. Ni kikuatekesu kiâ, tua-nda kolokota mu kulondekesa kixikanu ni kuboka o njimbu iambote ni kioso ki tuia ni ku xinganeka mu kibatulu kia muvu ua 2013: ‘Kala u Kindanda, u kole o muxima. . . . Jihova Nzambi iê uala-nê kumoxi.’—Josu. 1:9.