1-3. (a) O ku diela ihi, ni kiebhi ki tu divua? (b) Ihi i tu di longa mu phangu ia Phaulu, ia lungu ni ku sidivila Nzambi sé ku diela?

SAÍ Musoneki ua soneka: “Ku izuelu ioso io zuele ni io soneke, o ia iibha dingi ienii: Hinu nga bhange kiki!’” O musoneki iú uexile J. G. Whittier, muéne ua kexile mu zuela o ima i tu diela, se ia bhanene, tueji i bhanga kiéngi. “O ku diela,” o ku luuala kua muxima ni ndolo ia muxima, mukonda dia kima kia kambe o ku ki bhanga, kiki ki tena kulombolola “ku dila dingi.” Etu enioso tua bhange kiá ima i tua mesenene ku i bhanga kiéngi, se ia bhanene. O kuila ua mu diela?

² Saí athu a te ituxi ionene ku mienhu iâ. A mukua, ka te ituxi ionene, maji a dibhudisa, se o ima ia solo ku mienhu iâ iene ia beta-kota. Saí iá, a tena ku jimba o ima ia bhange m’ukulu, anga a suluka mu ku bhanga ima iambote. A mukua a divua hanji kia iibha, mu ku xinganeka, “tamanu” ki ngi ki bhangele. (Jisá. 51:3) Mu ihi mu ua bhiti kiá? O kuila ua mesenene ku sidivila Nzambi sé ku diela—tundé lelu katé ku hádia? O kuila kuene phangu i tena ku tu longa ndunge? Saí, o phangu ia poxolo Phaulu.

³ Ku muenhu uê, Phaulu ua te ituxi ionene, ni ku sola kiambote o ima ku muenhu uê. Muéne ua diela kiavulu mu ima ia bhiti ku muenhu uê, maji ua di longo ué kiebhi kia sidivila kiambote Nzambi ni ufiiele uoso. Tua-nda di longa kiebhi o phangu iê i tena ku tu kuatekesa ku sidivila sé ku diela.

4. Ima iahi ia bhiti ku muenhu ua poxolo Phaulu?

⁴ Phaulu ua diela o ima ia iibha ia bhangele mu unzangala. Mu kifika, muéne ua kexile ku pholo kioso kia kexile mu zukutisa o maxibulu a Kristu. O Bibidia iamba kuila, kioso kia zubha ku jibha Xitevá, ‘Saúlu [a mu ixana Phaulu] . . . u kala mu muanga o kilunga, mu ku sota mu ku ki zubha-ku. U bokona mu jinzu joso, u koka-mu mala ni ahatu, u a  tesa mu’aleia.’ (Ika. 8:3) O njimu Albert Barnes uambe kuila, o kizuelu “u kala mu muanga,” mu Ngeleku kilombolola “ku suína ni ku tema mu nguzu ia bhange [Saúlu] mu ku zukutisa o Jikidistá.” Barnes uambe dingi, “Saúlu ua kexile mu muanga o ilunga kala kiama kia mu xitu.” Mukonda dia ku kala mukua Judé, ua fikile kuila ua mu bhanga o kikalakalu kia Nzambi, kia ku zubha o Jikidistá joso. Mu kiki, muéne ua zukutisa kiavulu o Jikidistá, u ‘a zumina . . . ni ku a kusa, ni ku a jibha . . . mala mba ahatu phala ku buika o jikidistá.’—Ika. 9:1, 2; 22:4. *

5. Jimbulula kiebhi Saúlu ueha ku zukutisa o Jikidistá ja kidi, anga u kituka muboki ua njimbu iambote.

⁵ Saúlu ua mesenene kuia mu mbanza ia Damásku, ku katula o maxibulu a Jezú mu jinzo jâ, phala ku a bheka mu mbanza ia Jeluzaleme, mu Inzo ia ku fundisa. Maji muéne ua lueza, mukonda ua di sange ni Jezú, o Mutuameni ua Kilunga. (Efe. 5:23) Kioso kia kala múia ku Damásku, Jezú ua di sange nê, anga a mu vungina ku mukengeji ua madiuanu u tunda ku diulu, iu ua kituka kafôfo. Jezú anga u tuma Saúlu ku Damásku, phala ku kingila muthu ueji mu bhana itendelesu. Tuejiia ihi ia bhiti.—Ika. 9:3-22

6, 7. Ihi ilombolola kuila, Phaulu uejidile kiambote o ima ia bhiti ku muenhu uê?

⁶ Phaulu ua xisa o ukexilu uê uokulu, kioso kia kituka Kidistá. Mu veji dia ku kala nguma ia Jikidistá, muéne ua kituka muzokeledi ua Ukidistá. Muéne, ua soneka ima katé muene ia lungu ni muéne: ‘Kuma enu muevu kiá o ukexilu uami m’ukulu, mu ubhezelu ua Jijudé. Muejiia ni kioso ki nga di kakele mu kuzukutisa o Kilunga kia Nzambi, ni ku sota ku ki muanga.’ (Nga. 1:13) Mu ku bhita kithangana, muéne ua soneka dingi ia lungu ni ima ia bhiti ku muenhu uê, kioso kia sonekena o akua Kolindo, akua Filipe ni kua Timote. (Tanga 1 Kolindu 15:9; Fil. 3:6; 1 Tim. 1:13) Phaulu ka soneka o ima ia lungu ni muéne phala ku dizangeleka mba ku dituna kuila o ima íii, ki i bhitile ku muenhu uê. Muéne uejidile kiambote kuila ua tele ituxi ionene.—Ika. 26:9-11.

⁷ O njimu Frederic W. Farrar, ua zuela o “kizukutisu kia dikota kia bhange” Saúlu. Farrar uambe dingi kuila, kioso ki tu xinganeka mu ima ia bhiti ku muenhu ua Phaulu ni ku sebhulula kua jinguma jê, “tu tena ku tendela kiambote se mukonda diahi muéne ua kexile mu diela mu ima ia bhangele.” Saí ithangana, o jiphange mu ilunga ia kexile mu kunda, ka mu ejidile luua, akexile mu mu ambela, eie Phaulu—ua kexile mu ku tu zukutisa!—Ika. 9:21.

8. Kiebhi Phaulu kia divu mukonda dia henda ia Nzambi ni ia Jezú kua muéne ni disá diahi di tu di longa?

⁸ Phaulu uejidile kuila, muéne ua tenene ngó ku bhanga o ukunji uê mukonda dia kikuatekesu kia Nzambi. Muéne ua tumbula o henda ia Nzambi 90 a ji veji, mu 14 dia mikanda ia soneka—o asoneki a mukua a Bibidia, ndenge. (Tanga 1 Kolindu 15:10.) Phaulu ua sangulukile kiavulu mukonda dia henda ia Nzambi, iu ua mesenene kulondekesa kuila muéne ua sakidile kiavulu o henda ia Nzambi kua muéne. Mu kiki, muéne ‘ua di bhakula dingi mu kikalakalu,’ o jipoxolo ja mukua ndenge. O phangu ia Phaulu ilondekesa kuila, se tu fisala o ituxi ietu, Jihova u loloka ni muxima uoso o ituxi ietu bhu kaxi ka sata ia Jezú. Disá diambote phala kala muthu mudietu ki mu bhonza ku xikina kuila, tu tena ku katula mbote mu sata ia Kristu! (Tanga 1 Timote 1:15, 16.) Né muene Phaulu uexile mu  zukutisa o akaiedi a Kristu, muéne ua soneka: “Mon’a Nzambi . . . ua tenene ku ngi zola ni ku di bhakula mukonda diami.” (Nga. 2:20; Ika. 9:5) Phaulu ua di longo o kitumu kia lungu ni ku sidivila sé ku diela. O kuila ua di longo ué o kitumu?

9, 10. (a) Mukonda diahi saí jiselevende ja Jihova ene mu diela? (b) Mukonda diahi ki kima kiambote ku thandanganha ni ima ia bhiti kiá?

⁹ O kuila ua bhange kiá ima, i ku bhangesa ku diela? O kuila ua zange kiá kithangana mba nguzu mu ku sota ima sé valolo? O kuila ua bhange kiá ima ia bhekela divuua ku akuenu? Inga uala ni ixinganeku ia iibha mukonda dia ima ioso-ioso? Ihi i u tena ku bhanga ia lungu ni maka enhá?

¹⁰ Athu avulu a thandanganha! Ku thandanganha mu ithangana iavulu, kulombolola ku kala ni njinda dia ene muene, ni ku di lalamesa mudiê. Kiki, ki luualesa. O kuila o ku lalamana, ku tena ku batula maka oso-oso? Kana! Xinganeka muthu ua mesena kuia kididi, mu ku bhita kithangana kiavulu ku munheke mu ku zanga o nguzu, maji uala bhu kididi kimoxi! Mu veji dia ku thandanganha ngó, se u bhanga ima iambote ua-nda di tunda kiambote. Eie u tena ku bhinga muloloki ku muthu u ua mu kituxi, phala o ukamba uenu, ki u bhue. U tena ku dilanga, phala o kima kia iibha ki ua bhange kua mu mukuenu ku ki bhange dingi, phala ku kale dingi ni maka. Saí ithangana, nange u tala hadi mukonda dia ituxi iê. Maji, o ku thandanganha ku tena ku bhangesa o muthu ku zoza mu ku bhanga o sidivisu iê kua Nzambi. Se-ku kisakidilu phala ió a thandanganha kiki!

11. (a) Kiebhi ki tu tena ku katula mbote mu henda ia Jihova? (b) Itendelesu iebhi i tu kuatekesa ku kala ni paze ia muxima ia lungu ni ituxi ietu i tua te m’ukulu?

¹¹ Saí iá, ala ni ukexilu ua ku xinganeka mu ima ia bhiti ukulu ku mienhu iâ, ene ehela o ukexilu iú ku a thandanganhesa  kiavulu, a suka mu ku banza kuila kalá ni valolo bhu pholo ia Nzambi. Ene a banza kuila ka tokala kua zola kua Nzambi mukonda dia ituxi ia bhange. Mu kidi, o athu iá a tena ku tambula o muloloki ua Nzambi, se ene a diela ni muxima uoso o ituxi ia tele. (Ika. 3:19) Ene a tena ku katula mbote mu henda ia Jihova, kála o athu a mukua. Jihova ua-nda talatala ni henda ioso o muthu ua lenduka, mukua kidi, mukonda dia ku diela kuê. Nzambi ua bhange kiki ni Jobe, uambe kuila: “Nga diela muene, nga dimbuluka mu fufuta ni uthôkua.” (Jobe 42:6) Etu enioso, tua tokala ku kaiela o itendelesu ia Nzambi, phala tu kale ni paze ia muxima: ‘Muthu uoso u sueka o ituxi iê, ka-nda mu loloka; maji uoso-phe o ituxi iê u i fisala, anga u i xa, ió muéne a mu kuatela henda.’ (Jisa. 28:13; Tiia. 5:14-16) Mukonda dia kiki, tu tena ku fisala kua Nzambi, tu tena ku samba mu ku bhinga muloloki ni ku bhanga ioso, phala ki tu te dingi o kituxi. (2 Kol. 7:10, 11) Se tu bhanga kiki, tu tena ku katula mbote mu henda ia Nzambi, “mukua kuloloka kiavulu.”—Iza. 55:7.

12. (a) Ihi i tu longa o phangu ia Davidi ia lungu ni ku dibhana ni kitongoluelu kia neme? (b) Mu ukexilu uebhi Jihova ua diela ni kiebhi o kuijiia o kidi kiki, ki tu kuatekesa? (Tanga o kaxa)

¹² O musambu uala ni kutena; bhu kaxi kê, Nzambi u tu kuatekesa. Davidi ua jikula o muxima uê, mu kuzuela o ibanzelu iê ia zongo bhu kaxi ka misambu, i tu sanga mu divulu dia Jisálamu. (Tanga Jisálamu 32:1-5.) Davidi ua mono kuila, o ku kamba kuívua o kitongoluelu kiê, kia mu bhekela ku diela! Muéne ua katele, ua texile o ku sanguluka kuê, mukonda dia ku kamba ku fisala o kituxi kia tele. Ihi ia bhange Davidi phala ku tambula o muloloki ni ku kala ni ku sanguluka? O ku fisala o kituxi kiê kua Nzambi. Jihova ua tambuijila o misambu ia Davidi, ni ku mu suínisa phala n’a suluke ni ku bhanga kima kia beta dingi kota. Kiene kimoxi ué, se u samba ni muxima uoso, u tena ku dielela kuila Jihova ua-nda kuívua o misambu iê. Se o ima i ua bhange ku muenhu uê i ku thandanganhesa, sota ku lungulula o ima íii, ni ku kala ni kixikanu kua Jihova, kuila muéne ua ku loloka!— Jisá. 86:5.

13, 14. (a) Kibhindamu kiebhi ki tua tokala ku kala na-kiu kindala? (b) Ibhuidisu iebhi i tena ku tu kuatekesa ku mona o ukexilu uetu ua muenhu?

¹³ Tuejiia kuila o ima ia bhiti ku muenhu uetu, i tena ku tu longa phangu, maji ki tu tokala ku xinganeka kiavulu mu ima ia iibha i tua bhangele. Mu veji dia ku thandanganha ni ima i tua bhange m’ukulu, tua tokala ku xinganeka mu ima i tua mu bhanga lelu ni ia-nda bhita ku hádia. Ihi i tua mu sota ku bhanga kindala mba ki tu i bhange luua, mu ku bhita kithangana tua-nda mesena ku i bhanga mu ukexilu  uéngi mba ki tu i bhange? O kuila tua mu londekesa o ukexilu ua ufiiele ua-nda tu kuatekesa ku kamba ku diela ku hádia?

¹⁴ Kioso o hadi ia dikota iia ni ku zukama, ki tu bhingi ku thandanganha mukonda dia ibanzelu íii: ‘O kuila nga tokalele ku bhanga dingi mu sidivisu ia Nzambi? Mukonda diahi ki ngi bokona mu sidivisu ia thembu ioso, kioso ki nga kexile ni kithangana? Ihi ia ngi fidisa ku bhanga dingi phala n’a ngi sole ngi múkuatekexi ua tufunga? O kuila nga bhange ioso phala ku lungulula o ukexilu uami? O kuila Jihova u ngi mono kuma eme ngi muthu nga tokalele ku kala ku mundu uobhe?’ Mu veji dia ku thandanganha ngó ni ibhuidisu íii, tua tokala ku xinganeka kiambote mu kaxi ka ibhuidisu íii, phala ku mona se tua mu bhanga ioso mu sidivisu ia Jihova. Se tu kamba ku bhanga kiki, kia-nda tu bhangesa ku diela dingi.—2 Tim. 2:15.

15, 16. (a) Nguzu iahi ia bhange athu avulu ku mienhu iâ, phala ku dianga ku ta ku pholo o sidivisu ia Nzambi? (b) Mukonda diahi ki tu tokala ku diela mu nguzu i tua bhange, phala ku ta o Utuminu ua Nzambi ku pholo?

¹⁵ Ihi i tuamba ia lungu ni enu mua bhange ioso phala ku bokona mu sidivisu ia thembu ioso? Nange eie ua xisa salu iambote mba uenji uambote, mu ku sosolola o ima ku muenhu uê, phala ku kala dingi ni kithangana kia ku bhanga o ikalakalu ia Ngana Nzambi. Nange, ua mono kuila kima kiambote ku kala hanji u dikudi mba ua kazala kiá maji ku mesena ku vuala, phala ni u di bhakule mu sidivisu ia thembu ioso—kála o ku sidivila ku Betele, kuia mu tunga o ididi ia kubheza mu jixi jengi, ku kunda o ilunga mba ku kala mukunji mu ixi iéngi. O kuila ua tokala ku diela mukonda dia eie ku di bhakula mu sidivisu ia Jihova? O kuila u xinganeka kuma o nguzu i ua bhange, ia ki ngó? Kana!

¹⁶ Eie ua solo ku bhanga kiki, mukonda dia henda iê kua Jihova ni vondadi ia ku kuatekesa akuenu, a mesena ku mu sidivila. Ku bhingi ku banza kuila, ueji kala dingi kiambote ku muenhu, se uambatele ukexilu uéngi ua muenhu uê. U tena ku sanguluka mu kuijiia kuila, o i ua bhange iene i ua tokalele o ku bhanga. U tena ku sanguluka mu ku bhana o nguzu iê, phala ku sidivila Jihova. Muéne ka-nda jimba o nguzu i ua bhange mu sidivisu iê. Ku muenhu ua kalelaku, muéne ua-nda ku bhana mabesá avulu, o lelu ndenge!—Jisá. 145:16; 1 Tim. 6:19.

17, 18. (a) Kitumu kiebhi kia kuatekesa Phaulu ku sidivila sé ku diela? (b) Ihi i ua xinganeka o ku bhanga ia lungu ni ima ia bhiti kiá, lelu ni ku hádia mu sidivisu ia Jihova?

¹⁷ Kitumu kiebhi kia di longo Phaulu kia mu kuatekesa ku sidivila Nzambi sé ku diela? Mu Bibidia ia J. B. Phillips, Phaulu ua soneka: “Ngi xisa o ima ku dima, anga ngi tala ku pholo mu ku suua o kima ki nga mesena.” (Tanga Filipe 3:13, 14.) Phaulu ka kexile mu banza mu ima ia iibha ia kexile mu bhanga, kioso kia kexile mu bhanga o ubhezelu ua Jijudé. Mu veji dia kiki, ua soto ku di bhakula ni nguzu iê ioso n’a tambule o kikoué.

¹⁸ Etu enioso tu tena ku belesela o kitumu kia Phaulu. Mu veji dia ku kala mu banza mu ima ia bhiti kiá, tua tokala ku di bhakula ni muxima uetu uoso, ku ima iala ku pholo. Ki tu tena ku jimba o ituxi ietu i tua te m’ukulu, maji ki tu tokala ku di tatela mu ithangana ioso mukonda dia ima ienii. Tu tena ku bhanga nguzu phala ku jimba o ima ia bhiti kiá, mu ku bhanga ioso ni ioso phala ku bandekesa o sidivisu ietu kua Nzambi ni ku tala o mabesá ala ku hádia!