1, 2. Ita iahi ia kidi ia-nda bhita, ni ihi ki i bhingi o jiselevende ja Nzambi ku bhânga?

KU Kamusasadi mu kizuua kia 30 ku muvu ua 1938, nzungule dia athu ku ixi ia Estados Unidos akexile mu kuívua misoso mu mutelembe. O mu usuku uenhó, o musoso ua londekesele Ita. O athu akexile mu fikisa o akalakadi a mutelembe, a tange kibuka kia Masoladi a tokala ku diulu, akexile mu tomboka mu kalunga phala ku buika o Ixi. Sumbala o mutelembe ua zuelele kuila o musoso iú ki ua kidi, o athu akexile mu kuívua o musoso iú, akexile ni uôma. A mukuá a bhange ioso phala ku di langa ku jinguma jiji.

² Lelu saí ita ia kidi ia zukama. Maji o athu ka mu i suua. O ita íii ka i tange mu musoso, maji a i tange mu Bibidia o Mak’â Nzambi. O ita íii, o Alumajedone—ita ia Nzambi ia-nda bheka ku mundu iú ua iibha. (Dij. 16:14-16) Mu ita íii, o jiselevende ja Nzambi mu ixi, ka-nda bhinga ku luua ni jinguma ja mundu uéngi. Maji né kiki, ene a-nda kala ni uôma ua izulukutu ia iibha, ni madiuanu a-nda bhanga Nzambi mu kutena kuê.

3. Kikanenu kiebhi ki tua-nda di longa ni mukonda diahi tua tokala ku kijiia?

³ O kikanenu kia Bibidia mu divulu dia Zakadiia mu kibatulu kia 14, di tanga kiambote o ita ia Alumajedone. Sumbala kua bhiti kiá 2.500 a mivu tundé kia kanena o ita íii, maji kia tu tokala ué. (Lom. 15:4) Ima iavulu ia tange mu kikanenu kiki kia lungu ni izulukutu iene mu dibhana na-iu o mundu ua Nzambi, tundé kia mateka o Utuminu ua Nzambi ku diulu ku muvu ua 1914,  ni izulukutu ia-nda bhita ku hádia. O izulukutu mu kikanenu kiki, ia lungu ni ‘honga ionene,’ ni “menha ma di sanze.” (Zak. 14:4, 8) O honga íii ia-nda langa o abhezi a Jihova. Se tuijiia kiambote ihi ilombolola o menha ma di sanze phala etu, ki tua-nda ku a bhana ngó, maji tua-nda bhinga ku a nua ué. Kima kiambote kuijiia o kikanenu kiki.—2 Phe. 1:19, 20.

4. (a) O ‘kizuua kia Jihova’ kia mateka kizuua kuxi? (b) Ande dia muvu ua 1914 ihi ia kexile mu boka o abhezi a Jihova ni ihi ia bhange o jinguvulu ja mundu?

⁴ Mu kibatulu kia 14 mu divulu dia Zakadiia, di mateka ku tumbula o ‘kizuua kia Jihova.’ (Tanga Zakadiia 14:1, 2.) Ihi ilombolola o kizuua kiki? O “kizuua kia Ngana,” kia mateka kioso o “Utuminu ua jixi mu ngongo” a kitukile o “Utuminu ua Ngana ietu, ni ua Kristu iê.” (Dij. 1:10; 11:15) O kizuua kiki kia mateka ku muvu ua 1914 kioso kia mateka o Utuminu ua diulu. Ande dia muvu ua 1914, o abhezi a Jihova akexile mu bokela kuila o disukilu dia “thembu ia akua ifuxi” dieji kuíza ku muvu uenhó, ni kuila o mundu ueji bhita mu ibhidi iavulu. (Luk. 21:24) Ihi ia bhange o mundu? Mu veji dia kuívua o ngolokela íii, o jinguvulu ni atuameni a jingeleja a xonguena ni ku zukutisa o jikidistá a undu akexile mu boka. Mu ku bhanga kiki o athu enhá, akexile mu xonguena Nzambi o Muteni-a-Ioso, mukonda o Jikidistá a undu, a tokala ku “Jeluzaleme ia diulu”—o Utuminu ua Nzambi—kua-nda tumina ene.—Jihe. 12:22, 28.

5, 6. (a) Izulukutu iahi ia bhange o ifuxi ku “mbonge” ni kua ‘ió a tokalele-mu?’ (b) A nanhi exile o ‘athu a subhukile?’

⁵ Zakadiia ua kanena ihi ieji bhanga o ifuxi kioso kia soneka: ‘O mbonge ia Jeluzaleme; a ka i tambula.” O “mbonge” ilombolola o Utuminu ua Nzambi. O Jikidistá a undu ala hanji mu ixi, ‘a tokala ku utuminu iú,’ ene ué ala ku pholo mu ikalakalu ia utuminu iú mu ixi. (Fil. 3:20) Kioso kia bhiti o Ita ia Dianga ku Mundu uoso atuameni akexile ku pholo mu kilunga kia Jihova mu ixi, a a ‘kasele’ iá a a balakale, iá a tumikisa mu kaleia ku Atlanta, mu mbanza ia Georgia, mu ixi ia Estados Unidos ia América. Akua ku zukutisa, ‘a nhana o ima ioso mu jinzo, ia ku bhangela madivulu’ a bhange ima iavulu ia iibha ku jikidistá a undu ni athu a mukuá ka kexile ni kikuma kia kima. O kizukutisu kiki kia zange o ukexilu uambote ua bhekele o jikidistá a undu, mu kuoha o madivulu mâ ni ku a fidisa ku bhanga o sidivisu iâ ia kuboka o Utuminu.

⁶ Sumbala o jimbangi ja Jihova mu thembu ióió a vudile, maji kejidile se exile kikuxi, akexile mu ku a zukutisa ku jinguma, maji o ubhezelu u ua kidi, keji tena ku u buika. Kuexile hanji ‘athu a subhukile,’ o Jikidistá a undu a ditunine ‘ku a katula mu mbonge.’

7. Phangu iahi ia bhana o Jikidistá a a undu ku abhezi a kidi lelu?

⁷ O kuila o kikanenu kiki a ki kumbidila muene kioso kia bhiti o Ita ia Dianga ku Mundu uoso? Kana. Ifuxi ia mukua ieji kuíza ué mu zukutisa o Jikidistá a undu ni jiphange jâ a dielela ku tunga mu palaízu mu ixi. (Dij. 12:17) O Ita ia Kaiadi ia bhiti ku Mundu uoso, ilondekesa o kidi kiki.  O kixikanu kia Jikidistá a a undu kua Nzambi kia bhana phangu ku jiselevende ja Nzambi lelu, ene mu dibhana ni ibhidi, kála o ku a zukutisa ku jindandu, mu sidivisu, ni bhu xikola, ene mu a xonguena mukonda dia kixikanu kiâ. (1 Phe. 1:6, 7) Kabasa kididi kua tungu o jiselevende ja Nzambi, a solele ku “kolokota ni muxima umoxi,” ka kexile ni ‘uôma ua jinguma jâ.’ (Fil. 1:27, 28) Kuebhi kua-nda sanga o mundu ua Nzambi o kilangidilu ku mundu iú, ua a zembe?—Nzu. 15:17-19.

8. (a) Mu Bibidia o milundu i tena kulombolola ihi? (b) Ihi ilombolola “o milundu ia Midiva?”

⁸ Se o Jeluzaleme—o “mbonge”—ilombolola o Jeluzaleme ia diulu, o “mulundu ua Midiva, ua lulama ni Jeluzaleme,” kifika ngó. Ihi ilombolola o mulundu? Kiebhi kia-nda u ‘uana mu’axaxi,’ anga u kala milundu iiadi? Mukonda diahi Jihova u ixana kuila “milundu iami?” (Tanga Zakadiia 14:3-5.) Mu Bibidia o milundu i tena kulombolola mautuminu mba jinguvulu. O mabesá ni kilangidilu, ki tena kulombolola ué mulundu ua Nzambi. (Jisá. 72:3; Iza. 25:6, 7) Mu kiki-phe o mulundu ua midiva kuala Nzambi, uala mu Jeluzaleme ku mbandu ia mutundila kumbi, ilombolola o ungana ua Jihova, ni utuminu uê.

9. Mukonda diahi o “mulundu ua Midiva” ua uanuna?

⁹ Ihi ilondekesa o ku uana o milundu ia midiva? O mulundu ua zukama ni Jeluzaleme ku mutundila kumbi a u uanuna, ulondekesa kuila Jihova u sola utuminu ua-nda kuatekesa ua mukua. O utuminu ua kaiiadi, o Utuminu ua Diulu kua mu tumina Jezú Kristu. Mukonda dia kiki, Jihova uexana o milundu iiadi ia tundu “ku mulundu ua Midiva,” kuila “milundu iami.” (Zak. 14:4) O milundu ioso ia mu tokala.

10. Ihi ilombolola o ‘honga ionene’ iala bhu kaxi ka milundu iiadi?

¹⁰ Kioso kia uanuna o mulundu ua kifika, mbandu ku mutundila kumbi, mbandu ku sulu, o inama ia Jihova i kala ku milundu iiadi. ‘O honga ionene’ iala bhoxi dia inama ia Jihova. O honga ia kifika, ilombolola o kilangidilu kia Nzambi, muene mu suamena o jiselevende ja Jihova, mu ungana uê, ni ku Utuminu ua Mon’ê. Jihova ka-nda kuehela kuila o ubhezelu ua kidi a u buika. Thembu kuxi ia uane o mulundu ua midiva? A u uane kioso kia mateka o Utuminu ua Kristu, kioso kiabhu o Thembu ia Akua Ifuxi ku muvu ua 1914. Thembu kuxi ia mateka o Jikidistá ku bokona mu honga ia kifika?

11, 12. (a) Thembu kuxi o athu a mateka ku lengela mu honga ia kilangidilu? (b) Ihi ilondekesa kuila o lukuaku lua kutena kua Jihova luala ni mundu uê?

¹¹ Jezú ua dimuna o akaiedi’ê: “A kà mi zemba kuala akua jixi joso mukonda dia dijina diami.” (Mat. 24:9) Tundé kia mateka o izuua isukidila-ku ku muvu ua 1914, o jinguma a a zembele kiavulu. Né muene kioso kia zukutisa o Jikidistá a undu mu Ita ia Dianga ia bhiti ku Mundu, o Jikidistá jiji ka a buika. Ku muvu ua 1919 a a bhulula mu Babilonha ia Dikota—o kisangela kia jingeleja ja makutu. (Dij. 11:11, 12) *  Mu kithangana kieniókio, kiene kia mateka o Jikidistá ku lengela mu honga ku milundu ia Jihova.

¹² Tundé ku muvu ua 1919, o honga ia kilangidilu kia Nzambi iene mu langa o abhezi a kidi mu ixi ioso. Mu jixi javulu a fidisile o Jimbangi ja Jihova, ku boka ni ku a fidisa ku tambula o madivulu mâ. Saí jixi jene hanji mu fidisa. O ifuxi i tena ku bhanga ioso, maji ka-nda tena ku fidisa o ubhezelu ua kidi! O lukuaku lua kutena kua Jihova, lua-nda kala ni mundu uê.—Mate. 11:2.

13. Kiebhi ki tu tena ku kala mu honga ia kilangidilu kia Jihova, ni mukonda diahi kima kiambote ku kala mu honga íii lelu?

¹³ Se tu kolokota ku bheza Jihova, ni ku suína mu kidi, muéne ni Mon’ê Jezú Kristu a-nda bhanga o mbandu iâ, Nzambi ka-nda kuehela kuila muthu mba kima kioso-kioso ki tu ‘sumbula bhu maku Mê.’ (Nzu. 10:28, 29) Jihova uala polondo phala ku tu kuatekesa, phala tu tene ku mu belesela mu kuijiia kuila muéne o Muteni-a-Ioso, ku Utuminu uê. Kima kiambote se tu kala mu honga ia kilangidilu, mukonda o honga ia-nda beta-kota mu kala ni valolo mu kizuua kia hadi ia dikota kia zukama.

14, 15. Mu “kizuua kia Jihova,” kia-nda bhixila ku jinguma jê, ihi ia-nda bhita ni athu kalá mu honga ia kilangidilu?

¹⁴ Mu ku zukama ku dizubhilu dia mundu iú, Satanaji ua-nda suína dingi mu ku zukutisa o jiselevende ja Jihova. Mu kusuka-ku, o ‘kizuua kia Jihova’ kia-nda bhixila ku jinguma jê. Jihova ka-nda kuehela kuila Satanaji u kolokota ku zukutisa o mundu uê. Mu kizuua kieniókio, o Muteni-a-Ioso ua-nda di tungula ‘mu ita ioso ia bhange kiá’.—Zak. 14:3

¹⁵ Mu kizuua kia ita ia Jihova, ihi ia-nda bhita ni athu kalá mu ‘honga ionene’ ia kilangidilu kia Jihova? Ene kanda “kala ni mukengeji” ulondekesa kuila a a xikina kuala Nzambi. Mu kizuua kia ita íii ia zukama, ‘o jikabalu, ni jimula, ni jikamelu ni ji bulu ni iama ioso’—o jifalamenda ja ita, jilondekesa o kutena kuâ—ja-nda jimuka-ku. O jifalamenda ja-nda kala kála ‘menha a kituka gelo,’ ki ja-nda tena ku bhanga kima, kála jala ni mbambi. Jihova ua-nda bheka ué mabhebhu a-nda “jikinisa.” Né muene se kifika ngó, o mabhebhu a-nda zubha o ima ioso i tu kuatesa uôma. Mu kizuua kieniókio, o “mesu’â . . . o dimi diâ, mu kanu dia kà lukuta,” a-nda bhânga kála ifofo, ka-nda tena kuzuela. (Zak. 14:6, 7, 12, 15) Se-ku muthu mu ixi ua-nda tena ku lenga. Satanaji ua-nda kala ni masoladi avulu. (Dij. 19:19-21) “Oso a kà bhakula ku kalunga kuala Jihova kizuu’okio, a kà dizala muene tundé ku’andekela ixi katé ku ia suku.”—Jel. 25:32, 33.

16. Mu ku zukama o kizuua kia Jihova, ibhuidisu iahi i tua tokala ku xinganeka, ni ihi i tua-nda bhanga?

¹⁶ O ita i bhekela ngó hadi ku athu, katé muene ku athu a nganhala o ita. Nange ku kamba kudia. A bula o jinzu. Nange ku kala uadiama. O athu a kamba o ufolo. Se o hadi íii i tula ko-kuetu, ihi i tua-nda bhanga? O kuila tua-nda thandanganha? Se a tu jijidika kueha o kixikanu kietu, tua-nda xikina? Tua-nda jimba o kidielelu kietu, anga tu luuala? Kima kiambote ku kala ni kixikanu mu ku dielela mu kutena kua Jihova kioso kia-nda mateka o kizuua kia hadi ia dikota, ni ku kala mu honga ia kilangidilu kia Jihova!—Tanga Habakuke 3:17, 18.

17, 18. (a) O ‘menha a di sanze’ alombolola ihi? (b) Ihi ilombolola o “musanza ua kalunga ku mutundila kumbi,” ni “musanza ua kalunga ku mutudila-kumbi?” (c) Kioso ki u xinganeka mu ima ia-nda bhita ku hádia, ihi i ua solo o kubhanga?

¹⁷ Kioso kia-nda bhita o Alumajedone, o ‘menha a di sanze’ a-nda kunguluka tundé ku kiandu kia Utuminu ua Kristu. O ‘menha a di sanze,’ o ima ia muenhu ia-nda bhana Jihova. O “musanza ua kalunga ku mutundila kumbi,” ulombolola o Mar Morto, o “musanza ua kalunga ku mutudila-kumbi,” ulombolola o Mar Mediterrânio. O misanza iiadi ilombolola, athu. O Mar Morto, ilombolola o athu ala mu jimbila. O Mar Mediterrânio, iala ni muenhu ilombolola o “mundu uavulu” ua-nda bhuluka ku Alumajedone. (Tanga Zakadiia 14:8, 9; Dij. 7:9-15) Mu kiki o ibuka iiadi ia athu, a-nda ku a bhulula ku kalunga ku tua lundula kua Adá, kioso kiaia ni kúnua o menha a di sanze mba o ‘ngiji ia menha a muenhu.’—Dij. 22:1, 2.

¹⁸ Ni kilangidilu kia Jihova, tua-nda bhuluka ku dizubhilu dia mundu iú, ni ku bokona ku mundu uobhe ua Nzambi. Sumbala a tu zembe ku athu a ifuxi ioso, tua solo ku kala fiiele ku Utuminu ua Nzambi, ni ku kala mu honga ia kilangidilu kia Jihova.