O Bibidia i tu tendelesa: ‘Mbata mu muxima muene mu tunda ixinganeku iaiibha; ujibhangânga, jiphànda, maundumbu, mauii, maumbangi ma makutu, makuxinga.’ (Mat. 15:19) O muxima uetu u tena ku tu nganala, ni ku tu bhangesa ku xikina kuila o ima ia iibha ia zembe Nzambi, iambote. Nange, etu ki tu tena kuijiia kuila kima kia iibha ande dia ku ki bhanga. Ihi i tena ku tu kuatekesa ku tongolola o ixinganeku ia muxima uetu, phala ki tu bhange kima kia iibha?

Tanga o Bibidia izuua ioso ni u xinganeke mu izuelu iê.

Phaulu ua soneka: “Mukonda o dízui dia Nzambi diala ni muenhu, ni kutena, dia beta kutua, o xibhata ia mazu a iadi ndenge, di batula katé ku disesa dia muenhu, ni nzumbi.” O njimbu ia Nzambi iala mu Bibidia iala ni kutena kua ku “tungula [o] jivondadi ni mabanzelu ma mixima ia athu.” (Jihe. 4:12) O ku di tongolola mu kaxi ka mak’â Nzambi kikuatekesu kia dikota, phala kuijiia o ixinganeku ia muxima. Mu kiki, tua tokala ku tanga o Mak’â Nzambi izuua ioso ni ku xinganeka mu izuelu iê, phala tu kale ni unjimu ua ku mona o ima kála ki mona Jihova!

O kuxikina o itendelesu ia Bibidia ni ku i kumbidila, kua-nda funhisa o kitongoluelu kietu​—o ukexilu uetu moxi, u tu “bhela umbangi.” (Lom. 9:1) O kitongoluelu kietu ki tena ku tu langa mu ima ia iibha. O Bibidia iala ué ni phangu javulu ji “tu dimuna.”  (1 Kol. 10:11) Mu ku di longa o phangu jiji, tu tena ku di langa phala ki tu bhange ima ia iibha. Ihi i tua tokala o ku bhanga?

Samba kua Nzambi n’a ku kuatekese ku tongolola kiambote o ixinganeku ia muxima uê.

Jihova “uene mù lola o muxima.” (1 Mal. 29:17) Muéne “uala kota o muxima uetu ndenge, kuma Muène uejiia o ima ioso.” (1 Nzu. 3:20) Nzambi ka tena ku mu nganala. Se tu zuela kua Jihova mu musambu o ima i tu thandanganhesa, ibanzelu ietu ni ima i tua mesena, muéne u tena ku tu kuatekesa ku tongolola o ixinganeku ia muxima uetu. Etu tu tena ué ku bhinga kua Nzambi phala n’a tu ‘bhane muxima uéngi ua zele.’ (Jisá. 51:10) Mu ku tongolola o ixinganeku ia muxima, o musambu ka tokala ku u jimba.

Kala ku mesu a zele mu ithangana ia iônge ietu.

O kuívua kiambote o ima ia tanga mu iônge i tena ku tu kuatekesa ku tongolola kiambote o ukexilu uetu moxi​—o muxima. Sumbala ki tu di longo milongi ia ubhe mu veji joso ki tuia mu iônge, o ku kamba ku fonga mu iônge ku tu kuatekesa kuijiia kiambote o Mak’â Nzambi, tu tena ué kuívua itendelesu i tena ku tu kuatekesa ku tongolola o muxima uetu. O itambuijilu ia phange jetu mu iônge i tena ué ku tu kuatekesa ku tongolola o muxima uetu. (Jisa. 27:17) O ku kamba ku diongeka ni phange jetu mu iônge, kima kia iibha. I tena ku tu bhangesa ku ‘sota o jivondadi jetu.’ (Jisa. 18:1) Mu kiki, kima kiambote ku dibhula, ‘O kuila kifua kiami kuia izuua ioso mu iônge ni ku katula-mu mbote?’—Jihe. 10:24, 25.

O muxima uetu ua bhukumuka u tena ku tu nganala mu maukexilu avulu ku muenhu. Tua-nda di longa maukexilu a uana: O ku sota o jimbongo, o uhôlua, o makamba ni ima i tu bhanga mu itonokenu.

O ku sota o jimbongo.

O ku mesena ku dikila o ibhindamu ietu, kima kia tokala. Maji Jezú ua bhana kifika ki tu dimuna, kia lungu ni ku bhana valolo iavulu ku jimbongo. Jezú ua bhana kifika kia lungu ni diiala diexile mvuama ua kexile ni jinzo ja ku bhaka idima iavulu. Muéne ka kexile dingi ni kididi phala ku bhaka o idima ia mukua. O diiala dienhidi ua mesenene ku bula o inzo iê phala ku tunga iéngi ionene. Muéne ua xinganeka: “Muene kià mu ngi bhaka [o] idima iami ioso ni jimbongo joso ji ngala-na-ju. Anga ngambela o muenhu uami, ngixi: eie muenhu uami ua zediua! Mukonda uala ni jimbongo javulu, jòbhake phala nzungule ia mivu. Nhohé kiá, u die, u nue, u sanguluke!” Maji o diiala ua jimbi o kidi kiki: O muenhu uê nange ueji bhua mu usuku uenió.—Luk. 12:16-20.

Kioso ki tuia ni ku kula, nange tu mesena kiavulu ku kala ni jimbongo phala ki tu bhindame kioso ki tua-nda kuka, mukonda dia kiki nange tu mesena ku fonga mu iônge phala ku kalakala dingi ni ku kamba ku bhanga o ikalakalu ietu mu nzumbi. O kuila ki tu tokala ku di langa mu ima íii ia iibha? Mu unzangala uetu, tu tena ku mona kuila se-ku kima kia beta-kota ku muenhu, o ku di bhakula mu sidivisu ia thembu ioso ndenge.  O kuila tu ta ku mbandu o sidivisu ia thembu, mu ku xinganeka kuila ua tokala hanji ku sota o jimbongo ja-nda ku langidila ku hádia? O kuila ki tu tokala ku bhanga ioso lelu phala tu kale tu jimvuama ku pholo ia Nzambi? Nanhi uejiia se mungu tua-nda kala hanji ku muenhu?

O Uhôlua.

O divulu dia Jisabhu 23:20 diambe: “Ku kale mu kisangela kia jihólua ja vinhu.” Se o muthu u mesena kiavulu o uhôlua, nange muéne u sota ndunge phala kúnua mu ola joso. Nange muéne u zuela kuila nga mu nua phala ku divua kiambote, ki phala ku kodiua. Se tua mesena kúnua phala ku divua kiambote, nange kithangana phala ku tongolola o ixinganeku ia muxima uetu.

O makamba.

Mu kidi, ki tu tena ku kamba ku kala ni athu ka mu bheza Nzambi mukonda tuala nau mu ididi ioso​—kála mu xikola, mu salu ni kioso ki tuia ku boka. Maji ki kiene kimoxi ni ku bhanga nau o ukamba. O kuila tu xinganeka kuila kima kiambote ku bhanga ukamba ni ene mukonda ala ni ukexilu uambote? O Bibidia iamba: “Kana kudinganala! O ku di lunga ni athu aiibha, ku bolesa o ifua iambote.” (1 Kol. 15:33) Kála o venenu i tena ku zanga o menha oso, o ukamba ni athu ka bheza Nzambi, ku tena ku zanga o ukexilu uetu ua Kidistá ni ku tu bhangesa ku kala ni ibanzelu ia mundu, o uzuatelu, o uzuelelu ni ukexilu uê.

O ima i tu bhanga mu itonokenu.

O ungijiie u bheka bhu maku metu o mautonokenu oso katé muene o itonokenu ki i tokala ku jikidistá. Phaulu ua soneka: ‘Ufusa uoso, ka uivue né ku u tumbula ngó mu’axaxe kenu.’ (Efe. 5:3) Abha se o muxima uetu u mesena ku mona mba kuívua ima ia ufusa? Nange tu xinganeka kuila o athu oso a bhingi ku nhoha mba ku bhanga itonokenu ni kuila kala muthu ua tokala ku sola ihi ia-nda bhanga. Maji tua tokala kuijiia o kitendelesu kia Phaulu kia kuila ki tu tokala ku mona mba kuívua o ima ia ufusa.

Se a tu nganala kiá ku muxima uetu, mu ku xinganeka kuila o ima i tua mu bhanga ki ia iibha, tu tena ku lungulula o ukexilu uetu. (Efe. 4:22-24) Tua-nda di longa phangu jiiadi ja izuua ietu.

Miguel * ua lungulula o kibanzelu kiê kia lungu ni jimbongo. Muéne uambe: “Eme ni muiji uami tua tungu mu ixi mua bhana valolo iavulu ku ima ia katunda. Saí kithangana, nga di bhakula mu ku sota o jimbongo mu ku xinganeka kuila, ngi tena ku bhanga kiki, sé ku kituka muthu u uabhela kiavulu o jimbongo. Mu ku bhita kithangana, nga mono kuila o ku di bhakula mu sota o jimbongo, kia difuangana ni muthu uenda njila ki iala ni disukilu. Nga sambe kua Jihova phala ku ngi kuatekesa mu ukexilu uami ua ku mona o ima, ni ixinganeku ia muxima uami. Nga mu ambela kuila eme ni muiji uami tua mesena ku mu sidivila ni muxima uoso. Tua solo ku sosolola o ukexilu ua muenhu uetu ni kuia mu tunga mu ixi mua kambe aboki. Mu ku bhita kithangana, tua mateka o sidivisu ia thembu ioso. Tua mono kuila ki tu bhingi ku kala ni jimbongo javulu phala ku zediua ku muenhu.”

O phangu ia Lee ilondekesa kiebhi o ku tonginina o muxima uê kua mu kuatekesa kueha o makamba a iibha. Muéne uambe: “Nga kexile mu kala ni athu a jixi jengi ene mu tu sumbisa o uenji, mukonda dia salu iami. Ngejidile kuila kueji kala uhôlua uavulu mu iônge ienioió, maji kia ngi uabhele ku kala mu iônge ienioió. Sai ithangana nga kexile mu kodiua muene, maji nga kexile mu diela. Nga mono kuila nga tokalele ku tongolola kiambote o muxima uami. O milongi ia Mak’â Nzambi ni milongi ia tufunga ia ngi kuatekesa, kuijiia kuila nga kexile mu bhanga ukamba ni athu ka zolo Jihova. Lelu, o uenji ngene mu ku u bhangela kiá mu mutelembe ua kafuetele, ki ngene mu di mona dingi kiavulu ni ene.”

Tua bhingi tu kala tu athu a kidi mudietu muene ni ku tongolola o ixinganeku ia muxima uetu. Kioso ki tuia ni kubhanga kiki, tua tokala ku bhinga kikuatekesu kua Jihova mu musambu, mu ku lembalala kuila “muène uejiia o ikutu ioso ia muxima ia muthu.” (Jisá. 44:21) Nzambi ua tu bhana ué o Mak’ê a tena ku kala lumuenu phala etu. (Tiia. 1:22-25) O itendelesu i tu tambula mu kaxi ka madivulu metu ni mu iônge, i tena ué ku tu kuatekesa! Ni itendelesu íii tu tena ku langidila o muxima uetu ni ku kolokota kuenda mu njila ia iuka.