Muéne ua Tokalele ku Muiji ua Kaiafa
Saí ithangana o ima ia iene mu sanga koxi dia mavu kioso o jingijiie kiaia ni ku kanda, nange a sanga ima ia lungu ni muthu a mu zuela mu Bibidia. O kiki, ki bhangesa o athu ku xikana mu izuelu ia Bibidia. Mu kifika, ku muvu ua 2011, o ngijiie mukua Izalaiele, ua soneka itendelesu ia lungu ni muthu a mu tanga mu Bibidia. I tanga ia lungu ni mbila mua sange o ifuba ia muthu uafú, mu 2.000 ku dima—o ifuba ia muthu akexile mu i bhaka kioso o mukutu uê uoso ua buikile kiá.
O mbila íii, ia kexile ni isoneku: “Midiiana mona a Yeshua, mona Kaiafa, uexile mukunji ua dikota ua Mahaziia ia Bete-Inidi.” O Mukunji ua dikota ua fundisile Jezú, ua tokalele ku muiji ua Kaiafa. (Nzu. 11:48-50) O mukua musoso a mu ixana Flávio Jeseph, a mu ixana “Joseph, a mu ijidile ué mu dijina dia Kaiafa.” Sé phata, o mbila íii ia tokalele ku muiji uê. Mu kuijiia kuila o isoneku ia kexile mu mbila, ia kexile mu zuela ia lungu ni mukunji ua dikota, “Yehosef bar Caiapha,” mba Joseph mona Kaiafa, * nange Midiiana ua tokalele ku muiji ua Kaiafa.
Kala kia zuela o Israel Antiquities Authority (IAA), o ima ia kexile mu mbila ia Midiiana io sange ni mii akexile mu nhana ima mu jimbila. O ku tokuesa kua bhange, kulondekesa kiambote kuila, o ima íii ia tokalele muene mu mbila ia Midiiana.
O mbila íii, i tanga ué dingi kima kia ubhe. Izuela ia lungu ni Mahaziia ua kexile o muthu ua subhukile ku kibuka kia 24 akunji, akexile mu sidivila mu tembulu mu mbanza ia Jeluzaleme. (1 Mal. 24:18) O Israel Antiquities Authority uambe kuila, o isoneku mu mbila íii, ilondekesa kiambote kuila “o muiji ua Kaiafa ua tokalele ku kibuka kia Mahaziia.”
O isoneku i tumbula ué Bete-Inidi. Kuene ibanzelu iiadi ia lungu ni isoneku íii. O Israel Antiquities Authority uambe kuila, “O kibanzelu kia dianga nange Bete-inri, o dijina dia muiji ua mukunji ua dikota—o tuana tua Imele, (Eji. 2:36, 37; Neh. 7:39-42) o mbutu íii muene mua tokalele o muiji ua Mahaziia. O kibanzelu kia kaiadi kiambe kuila, nange [Bete-inri] o kididi kua vualela Midiiana mba kua vualele o muiji uê uoso.” Mu kiki, o mbila ia Midiiana i bhana kixikanu kia kuila, o athu a a tange mu Bibidia athu a kidi.
^ kax. 3 O ia lungu ni mbila ia Kaiafa, tanga o milongi iambe, “O sumo sacerdote que condenou Jesus,” mu A Sentinela de 15 de Janeiro de 2006, mu jimbandu 10-13.
