“KI TU tenene ku i jimba!” Kiki, kiene kia zuelele o athu a mono o “Drama da Criação.” O Drama íii ia bhixila mu kithangana kia tokala ni ku bhekela kisangusangu kia dikota ku athu oso a i mono. Sé phata, o Drama da Criação ia bhana umbangi ua dikota mu ku ximana Jihova, ande dia Hitler ku mateka ku zukutisa o mundu ua Jihova ku ixi ia Europa. Maji, ihi iexile o “Drama da Criação?”

O “Foto-Drama da Criação,” a i bhange ku muvu ua 1914 mu mbonge ia Jimbangi ja Jihova ku Brooklyn, mu mbanza ia Nova Iroque, Estados Unidos da América. Iene ia kexile mu londekesa jifoto, ja kexile ué ni dízui ni ku i bhitisa mu dinake dia ola. O “Foto-Drama,” a i mono ku mazunda athu ku mundu uoso. O mbandu iofele—a ixana “Drama Eureka,” ia bhebhulukile dingi, a i bhange ué ku muvu ua 1914. Maji ku muvu ua 1920, o ji makina ja kexile mu londekesa o Drama, ja sekala. O athu a mesenene hanji ku mona o “Foto-Drama.” Mu kifika, o athu a tungile mu mbanza ia Ludwigsburg mu ixi ia Alemanha, ebhuidisa se kizuua kuxi kia-nda londekesa dingi o ‘Foto-Drama.’ Ihi ia bhingile o ku bhanga, phala ku suua o kibhindamu kiki?

Phala o kibhindamu kiki, ku muvu ua 1920, o ajitu a bhangele mbandu ku miji ia Betele mu mbanza ia Magdeburg mu ixi ia Alemanha, a sumbu mbandu ia ji makina, mu mbanza ia Paris mu ixi ia França, o mbandu ja mukua mu matenda ala mu mbanza ia Leipzig ni Dresden. Mu kiki, a fungu o makina jiji, ni ja mukua j’okulu ja “Foto-Drama.”

O phange Erich Frost, muxiki a mimbu, ua bhange o muimbu phala kuendesa o vidiu. Mbandu ia dilomboluelu io katule mu divulu dietu Criação. Kiki, kiene kia bhangesa ku bhana o dijina dia—“Drama da Criação,” o mbandu ia bhebhuluka dingi akexile mu ku ixana “Foto-Drama.”

O Drama ia ubhe ia kexile mu bhanga ué o kithangana kia kexile mu bhanga o Foto-Drama—dinake dia ola—akexile mu ilondekesa mu jimbandu, mu mausuku avulu. Ia kexile mu londekesa maka alungu ni ibhangelu, misoso ia Bibidia ni misoso ia mukua, iambe ué kuila o ngeleja ia makutu ia nganala o athu. O “Drama da Criação,” akexile mu ilondekesa mu jixi ja Áustria, Alemanha, Luxemburgo, ni Suíça, ni ku athu oso a tungile mu ididi mua kexile mu zuela o dimi dia Alemão.

Erich Frost uambe: “Kioso ki nga londekesa o Drama, mu kithangana kia ku nhoha, nga suínisa o jikoleka jami,  bhenge-bhenge ió akexile mu kalakala ku ji makina, phala ku bhana o madivulu metu, ni tumikanda ku athu oso. Etu tua bhana dingi madivulu, mu ku katula mbote mu ndunge íii, mu inzo ni inzo ndenge.” Johannes Rauthe, ua ongeka o athu mu ixi ia Polônia ni mu ixi ia República Tcheca, u lembalala kuila jingivuidi javulu a xisa o ijimbuete iâ phala kua kunda ku mabhata mâ. O ijimbuete íii ia kuatekesa kiavulu, phala ku a kunda.

Ku muvu ua 1930, o “Drama da Criação” akexile mu ilondekesa mu ididi ia ubhezelu, akexile mu zuela ué kiavulu ia lungu ni Jimbangi ja Jihova. Ku muvu ua 1933, kaxaxi ka mazunda athu, a tenene ku mona o Drama íii, ni kikuatekesu kia filiiale ietu mu ixi ia Alemanha. Käthe Krauss u lembalala, “phala ku mona o Drama, mu izuua itanu, tuende 10 dia ji kilometu mu kuia ni ku vutuka, mu mixitu ni ku banda ni ku kulumuka milundu ni jihonga.” Else Billharz uambe, “O Drama da Criação, ia bandekesa o henda iami ku kidi kia Bibidia.”

Alfred Almendinger uambe kuila, kioso o manh’â kia mono o Drama, muéne “ua diuanene kiavulu iu ua sumbu Bibidia phala ku sota o kizuelu (purgatório) kilombolola kuila, kioso o muthu kiafuá, ‘uia bhu kididi kia kufundisa phala n’a mu zelese ku ituxi.’” Mukonda dia ku kamba ku sanga o kizuelu kiki mu Bibidia, muéne ua palala kuia mu ngeleja, iá a mu batizala. Erich Frost uambe kuila, “athu avulu a xikina o kidi, mukonda dia ku mona o ‘Drama da Criação.’”—3 Nzu. 1-3.

Kioso kia zubha kulondekesa o “Drama da Criação,” o ita ia akua Nazi ia mateka ku Europa. Ku dimatekenu dia muvu ua 1933, o ikalakalu ia Jimbangi ja Jihova mu ixi ia Alemanha, io fidise. Tundé ku muvu uenió, katé ku disukilu dia ita ia kaiadi ku muvu ua 1945, o jiselevende ja Jihova ku Europa, a a zukutisa kiavulu. Erich Frost, a mu balakala mu dinake dia mivu. Maji muéne ua bhuluka, iu ua sidivila mu Betele ia Wiesbaden, mu ixi a Alemanha. Sé phata, o “Drama da Criação,” ia bhixila mu kithangana kia tokalele ni ku suínisa Jikidistá javulu eji dibhana ni ji polova mu kithangana kia Ita ia Kaiadi!—musoso ua kilunga kia Jihova, mu ixi ia Alemanha.