Inga ua luuala mukonda dia ku mona o dixibulu diê dia Bibidia ua kexile mu kula mu nzumbi, mu kiki ua zoza?

Saí misoso ia bhiti mu ixi ia Inglaterra, ia-nda ku kuatekesa ku mona kuila ku tokala ku texi o kidielelu kiê. Ua tokala u ‘takula o kudia kuê mu menha,’ mu ku kuatekesa ió ka xikina luua o kidi kia Nzambi.—Ndo. 11:1.

O kima kia beta-kota ku mbandu iê, o ku kolokota. Ua tokala u kuatenena o kidi ni ku kala ku mbânji ia Jihova. (Mate. 10:20) Íii, iene ia bhange Georgina. Kioso muéne kia mateka ku di longa o Bibidia ni Jimbangi ja Jihova ku muvu ua 1970, o munumi’ê, Kyriacos, ua temene. Muéne ua mu fidisa ku di longa o Bibidia, ni kuehela o Jimbangi ja Jihova kuíza bhu dibhata diê, iu ua texi o madivulu oso a Jimbangi ja Jihova.

Kioso Georgina kia mateka kuia mu iônge, Kyriacos ua temene dingi. Saí kizuua muéne uai bhu Kididi kia Ubhezelu phala ku zoka. Kioso phange ia muhatu kia mono kuila, Kyriacos uejidile kuzuela o dimi dia Ngeleku, o Kingileji ndenge, muéne ua xindi ku phange ia diiala mukua Ngeleku, phala ku mu kuatekesa. Kyriacos ua divu kiambote mukonda dia ukexilu uambote ua phang’etu, iu a mu longo o Bibidia kua phang’etu. Maji mu ku bhita kithangana, Kyriacos ua palala o ku di longa o Bibidia.

Mu mivu itatu ku pholo, Georgina ua dibhana dingi ni kizukutisu. Kyriacos uambe kuila muéne ueji xisa Georgina, se a mu batizala. Mu kizuua kia mu batizala, Georgina ua sambe ni ku suína kuoso kua Jihova, phala Kyriacos ka mu xise. Kioso o Jimbangi ja Jihova kia bhixila phala ku ambata Georgina mu kiônge kionene, Kyriacos ua a mbela: “Enu diangele-nu kiá, etu tua-nda mi kaiela ni dikalu dietu.” Muéne uevu o milongi ia kamene, iu ua mono o kazola kê kioso kia mu batizala!

Mukonda dia kiki, Kyriacos ka kexile dingi mu zukutisa kiavulu Georgina, iu uai ni ku lungulula o ukexilu uê. Mu ku bhita 40 a mivu, kioso Georgina kiai mu kiônge kia dianga, muéne ua mono o munumi’ê ku mu batizala! Ihi ia kuatekesa Kyriacos? Muéne uambe: “Eme nga sangulukile kiavulu, mukonda Georgina kehela kima ki mu fidisa ku sidivila Jihova.” Georgina uambe: “Sumbala o munumi uami ua kexile mu ku ngi zukutisa, maji eme nuka ngeji kuehela kima ki ngi fidisa ku bheza Nzambi iami. Mu mivu ioso íii, eme nga kolokota ku samba kua Jihova, phala ki ngi texi o kidielelu kiami.”

Kima kia mukua ki tena ku kuatekesa o kaza diê, o ku kala ni ukexilu ua Ukidistá. O poxolo Phetele ua tendelesa o ahatu Jikidistá: “Beleselenu anume enu, phala né-mbe bhu kala ni iá a kamba kutumaka o maka ma Nzambi, ki bhekela ku a nganhala mu uendelu ua mbote ua ahatu â.” (1 Phe. 3:1) Christine ua beleselele o kitendelesu kiki, sumbala kua bhitile mivu iavulu phala o kaza diê ku xikina o kidi. Kioso muéne kia kituka Mbangi ia Jihova mu 20 a mivu ku dima, o munumi’ê Nzuá, ka xikinine kuila, kuene Nzambi. Nzuá, ka mesenene ku bhanga mbandu ia ngeleja, maji muéne ua tenene ku mona kiebhi Christine, kia kexile mu bhana valolo iavulu mu kixikanu kiê. Muéne uambe: “Nga mono kuila kiki, kia kexile ku mu bhana ku sanguluka kuavulu. Muéne ua kituka muthu ua suína, kiki kia ngi kuatekesa kiavulu mu ithangana ia bhonzo.”

Christine, ka kexile mu jijila o munumi’ê ku xikina o ngeleja iê, mu kiki, munumi’ê uambe: “Christine ua mono kuila kima kiambote ku kamba kuzuela n’eme ia lungu ni ngeleja iê, ni muanhu uoso muéne ua ngi ehela ku di longa o ima mu ukexilu uami.” Kioso Christine kia kexile mu mona milongi mu Mulangidi ni Despertai!, iejidile kuila Nzuá u i uabhela kiavulu, kala maka alungu ni jingijiie, mba alungu ni ibhangelu, muéne u mu londekesa na-iu mu ku tangela kuila, “Ngi mona kuma, ua-nda uabhela kiavulu ku tanga o milongi íii.”

Mu ku bhita kithangana, Nzuá ua nhoha ku salu, iu ua mateka ku bhanga o kikalakalu kia ku langa o ji fololo. Ni kithangana kia soko phala ku xinganeka dingi ia lungu ni ibhuidisu i moneka ku muenhu, muéne u dibhudisa, ‘Tuala bhobha, mukonda a tu bhange, inga tua moneka ngó?’ Saí kizuua, o phange ia kexile mu zuela ni Nzuá, ua mu ibhuidisa, “O kuila eie ua mesena ku di longa o Bibidia?” Nzuá uambe, “Kuma nga mu mona muene kuila kuene Nzambi, ngi xikina o ku di longa o Bibidia.”

Christine ua bhange kiambote, mu ku kamba ku texi o kidielelu kiê! Mu ku kolokota ku samba mu 20 ia mivu phala Nzuá n’a xikine o kidi, muéne a mu batizala. Kindala a mu sidivila Jihova ni ku suína kuoso. Nzuá uambe: “Ima iiadi ia ngi bhangesa ku xikina o kidi. O ku bhanga o mbote ni ukamba uala nau o Jimbangi ja Jihova. Kioso ki u kazala ni Mbangi ia Jihova, eie uala ni kazola mukua fiiele, u tena mu ku dielela ni kuila, ka di banze ngó mudiê.” Sé phata, Christine ua belesela o izuelu i tu sanga mu divulu dia 1 Phetele 3:1, iu ua di tundu kiambote!

Ihi i tuamba ia lungu ni maxibulu a Bibidia, mukonda dia kima kioso-kioso eha ku di longa o Bibidia? O Sobha Solomá ua soneka: ‘Kuna mbutu iê mu kimene, lukuaku luê ki lu nhohe, mukonda eie kuijiia se mbutu iebhi ia-nda ku sabhuka, se ioio, mba mbutu joso hádia ji sabhuka bhua moxi.’ (Ndo. 11:6) Saí ithangana, ku bhinga mivu iavulu phala o jimbutu ja kidi ji sabhuke. Né muene kiki, mu ku bhita kithangana, o muthu u tena ku mona kuila ua bhingi ku zukama kua Nzambi. (Tiia. 4:8) Sé phata, saí kizuua ua-nda diuana kiavulu.

Xinganeka mu phangu ia Alice uai mu tunga mu ixi ia Inglaterra. Muéne ua mateka ku di longa o Bibidia ku muvu ua 1974. Muéne ua kexile mu zuela o dimi dia Hindi, maji ua mesenene kuijiia kuzuela kiambote o dimi dia Kingileji. Alice ua di longo o Bibidia mu mivu, iu uai mu iônge mu kilunga kia Kingileji. Muéne uejidile kuila o ima ia kexile mu di longa iexile o kidi, maji ka kexile mu iambata ni kidi kioso. Né muene kiki, muéne ua uabhelele kiavulu o kitadi, iu ua zolele kuia mu jifesa. Mu kiki-phe, muéne ua palala o ku di longa o Bibidia.

Ku muvu ua 1974, Stella ua kexile mu longa kua Alice. Mu ku bhita makuinhi atatu a mivu, Stella ua tambula mukanda kua Alice uambe: Ngejiia kuma ua-nda sanguluka kiavulu mu kuijiia kuila eme nga kexile ngi dixibulu diê ku muvu ua 1974, a ngi batizala kiá mu kiônge kia dikota kia bhiti kindala. Eie ua kuatekesa kiavulu ku lungulula o muenhu uami. Eie ua kunu o mbutu ia kidi ko-kuami, sumbala eme ki ngi tenene ku kala polondo phala ku di bhakula kua Nzambi, eme nga bhake o mbutu ia kidi mu kilunji ni ku muxima uami.”

Ihi ia bhitile ku muenhu ua Alice? Muéne ujimbulula kuila, ua luualele kiavulu kioso o munumi’ê kiafu ku muvu ua 1997. Muéne ua sambe kua Nzambi. Mu ku dibhita kuinhi dia ithangana, Mbangi jiiadi ja Jihova ejidile kuzuela o dimi dia Punjabi, a mu kundu ku bhata diê, anga a mu xisa kamukanda kambe, Que Esperança Existe Para os Entes Queridos Falecidos? Alice ua mono kuila, o musambu uê a u tambuijila, iu ua solo ku diongeka ni Jimbangi ja Jihova. Maji ueji ku a sangela kuebhi? Muéne ua sange o kijimbuete kuebhi kueji sanga o kilunga kia dimi dia Punjabi, kioso kia tokuesa mu divulu diê mua sonekene o kijimbuete kia mu bhanene Stella. Alice uai bhu Kididi kia Ubhezelu, iá a mu sangesa ku jiphange ja mala ni ja ahatu, akexile mu zuela o dimi dia Punjabi. Muéne uambe: “Eme nga divu kiambote kioso kia ngi sangesa, kiki kia ngi kuatekesa ku jimba bhofele o kikote kiami.”

Muéne ua mateka kuia izuua ioso mu iônge, iu ua mateka ku di longa dingi o Bibidia, ni ku di longa o kuzuela ni ku soneka kiambote o dimi dia Punjabi. Ku muvu ua 2003, muéne a mu batizala. Mu mukanda uê ua tumikisa kua Stella, uambe dingi: “Nga sakidila kiavulu, mu ku kuna o jimbutu jojo ku 29 a mivu, ni ku ngi xisa phangu iambote phala ku i kaiela.”

“Nga sakidila kiavulu, mu ku kuna o jimbutu jojo ku 29 a mivu, ni ku ngi xisa phangu iambote phala ku i kaiela.”—Alice

Ihi i u tena ku di longa mu misoso íii? U tena ku kingila dingi mivu iavulu, maji se o muthu u kala ni kibhindamu mu nzumbi, muthu ua kidi, ua lenduka, Jihova ua-nda bhangesa o mbutu ia kidi ku sabhuka ku muxima uê. Lembalala mu izuelu i tu sanga mu kifika kia bhange Jezú: “O mbutu-phe kioso ki i sabhuka, ki i kula, muéne ka k’ijiia. O mavu a di imina ene, ku dianga o kixina, kuiza o disa, hé ku kaiela o jimbundu jadisanza ku disa.” (Mar. 4:27, 28) O mbutu i kula bhofele-bhofele ‘iene i di imina.’ Mu kiki, kala muboki ua Utuminu kejiia kiebhi o mbutu ia-nda sabhuka. Mu kiki-phe, kolokota mu ku kuna. Ua-nda tena ku bhongola ibundu iavulu.

Kana ku jimba ku bhanga o misambu. Georgina ni Chistine a kolokota mu ku samba kua Jihova. Se u “kolokota mu ku samba” ni ku kamba ku texi o kidielelu kiê, “kuma hádia ki bhita o izuua” ua-nda bonga dingi o “kudia” ku ua takula mu menha.—Loma 12:12; Ndo. 11:1.