O jindandu jetu, ni makamba metu, ni jiphange jetu, a tena ku tu kuatekesa.

O izuelu ia makamba metu a tu zolo ia difuangana ni balsamu, i tu bhangesa ku divua kiambote. (Jisa. 16:24; 18:24; 25:11) Maji o jikidistá ka thandanganha ngó ni kikuatekesu kia tambula. Ene a ‘kuatekesa oso ala mu tala hadi kála ene. O dikuatekesu dioso dia tambula ene kua Nzambi, diene ué dia kuatekesa na-diu akuâ.’ (2 Kol. 1:4; Luk. 6:31) António kafunga ka tufunga tua ilunga mu ixi ia México, ua bhiti ué mu ibhidi íii.

Kioso kia mu tangela dotolo kuila ua kexile ni uhaxi mu manhinga a uixana linfoma mu phutu, António ua thandanganhele kiavulu. Maji né kiki muéne ua di suínisa muene phala ka kale ni ibanzelu ia iibha. Kiebhi kia tena ku bhanga kiki? Muéne ua kexile mu lembalala o mimbu ietu, ni ku imba phala ku xinganeka mu izuelu ia mimbu íii. O kusamba ni dízui dia suína, ni ku tanga o Bibidia kia mu kuatekesa ué kiavulu.

Lelu, António ua mono kuila o kikuatekesu kia beta-kota kiejila ku jiphange mu nzumbi. Muéne uambe: “Kioso ki tua kexile mu luuala kiavulu eme ni muhatu uami, tua kexile mu bhinga ku ndandu ietu kafunga ka ilunga phala ku samba ni etu. Kiki kia kexile mu tu kuatekesa ni ku tu tululukisa.” Muéne uambe dingi: “Tua sakidila o kikuatekesu kia jindandu jetu ni jiphange jetu mu nzumbi ia tu kuatekesa, ki ku bhiti kithangana kiavulu tua xisa o ukexilu ua ku thandanganha kiavulu ni ku luuala.” Muéne ua sangulukile kiavulu mukonda ua kexile ni makamba a mu zolele, a thandanganhele ni muéne!

O kima kia mukua ki tu ki kuatekesa ué o nzumbi ikôla ia tu kanena. O poxolo Phetele uambe kuila o nzumbi ikôla “ujitu” ua tu bhana Nzambi. (Ika. 2:38) Kiki a kilondekesa kioso kia undu o Jikidistá ku Pendekoxi, ku muvu ua 33 K.K. Mu kidi, o nzumbi ikôla ujitu phala etu enioso. O ujitu iú ki uene mbambi, mukonda diahi ki u i bhingi iavulu?—Iza. 40:28-31.

O poxolo Phaulu ua bhiti mu ibhidi, saí kithangana ueji fuá. (2 Kol. 1:8-10) Maji né kiki, Phaulu ka kexile ni uôma ua kufuá. Muéne ka thandanganhele mukonda uejidile kuila Nzambi ueji mu kuatekesa. Muéne ua soneka: “A ximane Nzambi, Tata ia Ngana ietu Jezú Kristu, Tata ia jihenda, Nzambi ió athu oso kuene mù tambula o dikuatekesu! Muène mukua ku tu kuatekesa mu hadi ietu ioso.” (2 Kol. 1:3, 4) O Phaulu kehela o jiphaxi ku mu tolola. Maji, o ibhidi mua bhiti ia mu kuatekesa ku kala ni henda ia jiphange jê, kiki kia mu bhangesa ku kuatekesa ué akuâ kioso kia kexile mu bhita mu ibhidi.

António tua mu tange ku dimatekenu kioso kia disanze, ua suluka mu bhanga o sidivisu iê ia kuinga o kafunga ka ilunga. Muéne ua thandanganhele ni jiphange ithangana ioso, maji lelu muéne ni muhatu’ê a di suínisa mu kunda ni ku suínisa o jihaxi. Mu kifika, kioso kia kundu phange ua kexile mu kata, António ua mono kuila o phange iú ka mesenene kuia mu iônge. António uambe: “Muéne ka kexile mu fonga mu iônge mukonda ka zolele dingi Jihova ni jiphange, maji mukonda dia uhaxi, muéne ua kexile mu divua kia iibha, ua xinganekene kuma kala dingi ni valolo.”

Phala ku kuatekesa o phange íii, António ua mu bhingi phala ku samba ande dia ku mateka o itonokenu ni jiphange. Sumbala muéne ka divu kala muthu a tokalele ku mu sola phala ku samba, muéne ua xikina. António uambe: “Muéne ua sambe kiambote, mu ku bhita kithangana uexile kiá kala muthu uéngi. Ua mono kuila uala hanji ni valolo.”

Mu kidi, etu enioso tua dibhana kiá ni ibhidi, ki kale iofele mba iavulu. Maji kala kiambe Phaulu, kioso ki tu bhita mu ibhidi, tu kala ni nguzu ia ku kuatekesa akuetu a mu dibhana ué ni ibhidi. Mu kiki, tu kaiele o phangu ia Jihova Nzambi ietu, mu kulondekesa henda ku jiphange jetu ni ku a kuatekesa kioso kia dibhana ni ibhidi.