1, 2. Kiebhi o Jimbangi ja Jihova ka difu ni jingeleja ja Kidistándade ia lungu ni kiebhi kia mona o dijina dia Nzambi?

O JINGELEJA ja Kidistándade, kene mu tumbula o dijina dia Nzambi. Mu kifika, o Bibidia Revised Standard Version, mu dimatekenu diê dizuela: “O ku tumbula o dijina dioso-dioso dia bhana kua Nzambi . . . ki kima kia tokala phala o jingeleja ja Ukidistá.”

² O Jimbangi ja Jihova a di zangeleka mu kuambata o dijina dia Nzambi ni ku di ximana. (Tanga Jisálamu 86:12; Izaia 43:10.) Mu kia mukua, etu tu mona kuila ujitu ua dikota kuijiia o dilomboluelu dia dijina dia Nzambi ni kuijiia kuila o dijina didi unéne, a tokala ku dixila. (Mat. 6:9) Mu kiki, iú ujitu ua dikota u tua tokala ku bhana valolo. Tua-nda di longa ibhuidisu itatu, ia beta-kota: Ihi ilombolola kuijiia o dijina dia Nzambi? Kiebhi Jihova kia zangeleka o dijina diê dia unéne, mu ku bandekesa o kijingu kiê? Ni kiebhi ki tu tena kuenda mu dijina dia Jihova?

3. Ihi ilombolola kuijiia o dijina dia Nzambi?

³ Kuijiia o dijina dia Nzambi, ki ki lungu ngó ni kuijiia o kizuelu “Jihova.” Ku bhinga kuijiia o ukexilu ua Jihova ni ídifua iê, vondadi ni ibhangelu iê kála ki tanga o Bibidia, ni kiebhi kia dibhana ni jiselevende jê. Mu kidi, Jihova ulondekesa se muéne nanhi kioso kiaia ni ku kumbidila o vondadi iê. (Jisa. 4:18) Jihova ua zuela o dijina diê ku di kaza dia dianga; mukonda dia kiki-phe, Eva ua tumbula o dijina didi, kioso kia vuala Kaini. (Dim. 4:1) O jiselevende ja fiiele ja Nzambi, Noué, Mbalahamu, Izake ni Jakobo, ejidile o dijina dia Nzambi. Mu ku bhita kithangana, ene a bhana dingi valolo ku dijina didi, kioso Nzambi kiai ni kua besoala, kua langa, ni kua tangela o vondadi iê. Mozé ua tambula dingi itendelesu ia lungu ni dijina dia Nzambi.

4. Mukonda diahi Mozé uebhuidisa Nzambi o dijina diê, ni mukonda diahi o ku thandanganha kuê kua tokalele?

 ⁴ Tanga Makatukilu 3:10-15. Kioso Mozé kia tenesa 80 a mivu, Nzambi ua mu bhana kikalakalu kia dikota, iu ua ambela: “U tundise mundu uami ua an’a Izalaiele mu Ijitu.” Mozé ua tambuijila ni ku xila kuoso, mu ku bhanga kibhuidisu kia betele kota. Mu kidi, Mozé uebhuidisa: ‘Diebhi o dijina diê?’ Mu kuijiia kuila o dijina dia Nzambi a d’ijidile kiá, ihi ia mesenene Mozé mu ku bhanga o kibhuidisu kiki? Mu kidi, muéne ua mesenene kuijiia dingi ia lungu ni muthu uambata o dijina didi—kima kieji bhangesa o mundu ua Nzambi ku xikina kuila Muéne ueji kua bhulula. O ku thandanganha kua Mozé, a ku tambuijila mukonda o akua Izalaiele exile abhika mu Ijitu. Ene eji kala ni phata se o Nzambi ia jitata jâ, ueji kala ni kutena kua ku a bhulula. Saí akua Izalaiele, exile mu bheza o jinzambi ja akua Ijitu!—Ize. 20:7, 8.

5. Kiebhi Jihova kia londekesa o dilomboluelu dia dijina diê kua Mozé?

⁵ Kiebhi Jihova kia tambuijila o kibhuidisu kia Mozé? Muéne uambe: “Ua kèla kua An’a Izalaiele kuma: KALA-DIA-KALA muene ua ngi katula, iú ua ngi tumu kó kuenu.” * Nzambi anga u ta ku dingi: “Jihova Nzambi ia jitata jenu . . . ua ngi tumu kó kuenu.” Nzambi uambe kuila muéne u tena ku bhanga ioso ia mesena ni ku kumbidila ioso ia kanena, ni kuila muéne Nzambi u kumbidila ioso ia kanena. Mu velusu 15 Jihova uambe: “Didi diene o dijina diami di xalela-ku, diene dia ku ngi lembalala na-diu kutunda muiji kuiza muiji.” Sé phata, o izuelu íii ia suínisa kiavulu Mozé ni ku kolesa o kixikanu kiê!

6, 7. Kiebhi Jihova kia zangeleka o dijina diê dionene?

⁶ Kioso kia zubha ku bhana o kikalakalu kua Mozé, Jihova ua zangeleka o dijina diê, kioso kia ‘londekesele’ kuila Mubhuludi ua akua Izalaiele. Muéne ua bheka kuinhi dia mabhebhu ku Ijitu, ni ku londekesa kuila o jinzambi ja Ijitu kexile ni kutena—katé muene ni Falaó—kuila kexile ni kutena. (Mak. 12:12) Mu ku suka-ku, Jihova ua jikula o Musanza ua Kalunga, ua bhitisa o akua Izalaiele bhu kaxi ka menha a kalunga, iu ua buika Falaó ni masoladi mê mu menha a kalunga. (Jisá. 136:13-15) Mu “kikangalakata,” Jihova ua londekesa kuila Mubhuludi ua mundu uê, kioso kiai ni ku bhana kudia ni menha, nange ku mazunda aiadi mba atatu a athu ndenge! Katé muene ua bhangesa kuila, o izuatu iâ ni idiotelu ki i kukile.  (Mate. 1:19; 29:5) Mu kidi, se-ku kima ki tena ku fidisa Jihova kulondekesa kuila o dijina diê dia unéne. Mu ku bhita kithangana, muéne uambela Izaia: “Eme, eme-muène ngi [Jihova], kana-ku Mubhuludi uengi, kale eme ngó.”—Iza. 43:11.

⁷ Josuué ua bhinganene Mozé, ua mono ué o kutena kua Jihova mu Ijitu ni mu kikangalakata. Mu kiki, ku di sukilu dia muenhu uê, Josuué ueji tena kuzuela ku akua Izalaiele kuila: “Enu-phe mua k’ijiia ni muxima uenu uoso, ni muenhu uenu uoso, kuila ima ioso ia mi dielelesele Jihova Nzambi ienu, ki [ku] sonoka kima; iene ioso ia mi bhiti muene, ki bhuala kizuelu kia sukamena.” (Josu. 23:14) Mu kidi, mu kithangana kia tokala, Jihova ua kumbidila o kizuelu kiê—ua ‘londekesa’ kuila mubhuludi.

8. Kiebhi Jihova kia mu zangeleka o dijina diê mu izuua ietu?

⁸ Kiene kimoxi ué lelu, Jihova ua mu ‘londekesa’ kuila mubhuludi. Bhu kaxi ka Mon’ê, muéne uambe kuila mu izuua isukidila-ku, o njimbu ia Utuminu, eji i tula “mu ngongo ioso.” (Mat. 24:14) Nzambi muéne ngó ueji kanena o kikalakalu kiki, ni ku bhangesa kuila kiene a ki bhanga, ku ‘athu ka di longo kiavulu.’ (Ika. 4:13) Kioso ki tu bhanga o kikalakalu kiki, tua mu kuatekesa ku kumbidila o kikanenu kia Bibidia, kia ku tula o njimbu mu ngongo ioso. Tu ximana Tat’etu ni kulondekesa kuila tua mu kumbidila o musambu uambe: “Dijina dié a dixile. Utuminu ué uize. Vondadi ié a i bhange bhoxi, kala [kia mu] i bhanga ku diulu.”—Mat. 6:9, 10.

9, 10. Ihi i tu tena ku di longa mu ukexilu ua Jihova ku dibhana ni akua Izalaiele?

⁹ Mu ku bhita kithangana kioso o akua Izalaiele kia xisa o Ijitu, Jihova ua a tangela dingi ima ia lungu ni muéne. Mu ku bhanga nau o kikutu kia Kijila, muéne ua a kanena kua langa, kála ki bhanga o munumi ku kazola kê. (Jel. 3:14) O kia mukua, o akua Izalaiele a kituka kala kazola ka Jihova ni kua exana mu dijina diê. (Iza. 54:5, 6) Kioso ene kiai ni ku belesela Nzambi ni itumu iê, Nzambi ueji kua langa, kála ki bhanga o ‘Munumi.’ Muéne ueji ku a besoala, kua langidila, ni kua bhana o paze. (Dia. 6:22-27) Mu kiki-phe, o dijina dionene dia Jihova, eji di ximana ku ifuxi ioso. (Tanga Matendelelu 4:5-8; Jisálamu 86:7-10.) Sé phata, mukonda dia musoso ua akua Izalaiele, athu avulu a ifuxi iéngi, a xikina o ubhezelu ua kidi. Iene iambele Lute mukua Mouabhe, kua Nouemi: “O mundu ué u kala mundu uami, Nzambi ié Nzambi iami.”—Lute 1:16.

¹⁰ Ku 1.500 a mivu, Jihova ua zuela dingi ia lungu ni muéne, ni kiebhi kia talatala o akua Izalaiele.  Sumbala o akua Izalaiele a xibhakele Jihova mu veji javulu, ua londekesa kuila muéne “Nzambi ia jihenda” ni ku “kokoloka mu kuthathamana.” Muéne uexile Nzambi ia muanhu uavulu. (Mak. 34:5-7) O muanhu ua Jihova uexile ni disukilu, o disukilu didi, dia bhixila kioso o Jijudé kia ditunu Mon’ê ni ku mu jibha. (Mat. 23:37, 38) O akua Izalaiele ka kexile dingi mu kua exana mu dijina dia Nzambi. Ene afú mu nzumbi, kála o muxi u kukuta. (Luk. 23:31) Kiebhi ene kia divu kia lungu ni dijina dia Nzambi?

11. Mukonda diahi o akua Izalaiele ka kexile dingi mu tumbula o dijina dia Nzambi?

¹¹ Mu ku bhita kithangana, o akua Izalaiele a mateka ku kala ni kibanzelu kia iibha kia lungu ni dijina dia Nzambi, mukonda dia ku xinganeka kuila o dijina dia Nzambi ki di tokalele ku di tumbula. (Mak. 20:7) Bhofele-bhofele, a palala ku tumbula o dijina dia Nzambi. Sé phata, kiki kia bhekela lamba ku muxima ua Jihova, mukonda dia ku kamba ku xila o dijina diê. (Jisá. 78:40, 41) O dijina Jihova, dijina dionene phala muéne, mu kiki keji bhana o dijina diê ku mundu iú a mu ditunu, ka mu tokalele dingi. (Mak. 34:14) Kiki, ki tu longa kuila, kima kiambote ku talatala kiambote o dijina dia Mubhangi uetu, ni ku di xila.

12. Kiebhi Nzambi kia solo o mundu phala o dijina diê?

¹² Bhu kaxi ka Jelemiia, Jihova ua londekesa o vondadi iê ia ku bhanga “kikutu kia ubhe” ni kifuxi kiobhe, o Izalaiele mu nzumbi. O athu oso “tundé ku mon’a ndenge mudi’â katé ku muadiakimi,” Jelemiia ua kanena kuila ene oso “ejiia Jihova.” (Jel. 31:31, 33, 34) O kikanenu kiki, kia mateka ku di kumbidila mu Pendekoxi ia 33 K.K. kioso kia bhange Nzambi o kikutu kia ubhe. O kifuxi kiobhe o ‘Izalaiele ia Nzambi,’ exile ki kale Judé ni ió ki akua Jijudé, a kituka “mundu uê uangene mu dijina diê,” mba ‘mundu a uixana mu dijina diami,’ kiene kiambe Jihova.—Nga. 6:16; Tanga Ikalakalu 15:14-17; Mat. 21:43.

13. (a) O kuila o Jikidistá ja dianga akexile mu tumbula o dijina dia Nzambi? Jimbulula (b) Kiebhi ki u mona o ujitu ua kuboka o dijina dia Jihova mu ukunji uê?

¹³ Kala ‘mundu a uexanene mu dijina dia Nzambi,’ o athu a bhangele mbandu ku kifuxi kieniókio, akexile mu tumbula o dijina dia Nzambi, kioso kia kexile mu lombolola o Mikanda ia Hebalaiku. * Mu kiki, kioso o poxolo Phetele kia zuela ku Jijudé ni iá kexile Jijudé mu Pendekoxi ia 33 K.K., muéne ua tumbula o dijina dia Nzambi mu veji javulu. (Ik 2:14, 20, 21, 25, 34) O Jikidistá ja dianga, a ximana Jihova, mukonda dia kiki, muéne ua besoala o nguzu iâ mu kikalakalu kia ku boka. Kiene kimoxi ué lelu, Jihova u besoala o ukunji uetu kioso ki tu boka o dijina diê ni kulondekesa ku athu mu ji Bibidia jâ, a mesena ku tuívua se bhu bhana. Mu kiki, tu a ejidisa o Nzambi ia kidi. Ujitu ua dikota—ki kale phala ene ni ko-kuetu! O ku bhanga kiki, ku tena ku bandekesa o ukamba ni Jihova ku u kolesa phala u nangenene.

14, 15. Sumbala mu kilunga mua bokonuene ulongelu ua makutu, ihi ia bhange Jihova phala ku langa o dijina diê?

¹⁴ Mu ku bhita kithangana, bhenge-bhenge kioso o jipoxolo joso kiafú, saí athu a suínisa o ulongelu ua makutu mu kilunga. (2 Tes. 2:3-7)  Alongexi a makutu, a kaiela katé muene o kijila kia kuila, ka tokalele ku tumbula o dijina dia Nzambi. O kuila Jihova ueji kuehela kuila, o dijina diê di jimuke? Kana! Nange ki tuejiia kiambote kiebhi kia kexile mu tumbula o dijina diê m’ukulu, maji o dijina dia Nzambi, dia bhuluka. Tundé ukulu, o dijina didi diene mu moneka mu ji Bibidia javulu, katé muene mu ji Bibidia ja ió a di longo kiavulu. Mu kifika, ku muvu ua 1757, Charles Peters ua soneka kuila, o dijina dia Nzambi, Jihova, dilombolola kiambote se muéne nanhi, dijina dioso-dioso dia ujitu ndenge. Ku muvu ua 1797 o divulu dia zuelele ia lungu ni ubhezelu ua Nzambi, Hopton Haynes mu dimatekenu dia kibatulu 7, ua soneka: “JIHOVA diexile o dijina dia Nzambi, dia kexile mu tumbula o Jijudé; dimoxi-élele diexile mu bheza; kála kia bhange Kristu ni jipoxolo jê.” Henry Grew a mu vuala ku muvu ua 1781 iu uafú ku muvu ua 1862, ka tumbula ngó o dijina dia Nzambi, maji ua xikina ué kuila o dijina didi ka di ximanene, mu kiki kua bhingi ku dixila. Kiene kimoxi ué George Storrs a mu vuala ku muvu ua 1796 iu uafú ku muvu ua 1879, ua kexile mu kalakala kumoxi ni Charles T. Russell, ua tumbula o dijina dia Nzambi, kála kia bhangele ué phange Russel.

¹⁵ O muvu ua 1931, uexile muvu ua betele kota phala o mundu ua Nzambi, mukonda ku muvu uenió o Adilongi a Bibidia, kala kia kexile mu kua exana m’ukulu, a mateka ku a exana mu dijina dia Jimbangi ja Jihova. (Iza. 43:10-12) Mu kiki, ene a bokela o athu kuila a sangulukile kiavulu, mu ku kala jiselevende ja Nzambi ni ku kala “mundu uê uangene mu dijina diê,” mu ku ximana o dijina diê. (Ika. 15:14) O izulukutu íii i tu lembalesa o izuelu ia Jihova i tu sanga mu divulu dia Malakiia 1:11, iambe: “Kuma tundé bhu tundila [o] dikumbi katé bhu di fuila, o Dijina diami dia kà kala kima kionene ku miji ioso.”

16 Mukonda diahi tua tokala ku mona kuila, kijingu kia dikota kuendela mu dijina dia Jihova?

¹⁶ O polofeta Mikeia ua soneka: “Ifuxi ioso a mu kuendela, muthu mu dijina dia nzambi iê, muthu mu dijina dia nzambi iê; etu-phe tua k’èndela mu dijina dia Jihova Nzambi ietu, ku izuua ni izuua ki iene dizubhilu.” (Mik. 4:5) Mukonda dia Jihova kuehela o Adilongi a Bibidia kua exana mu dijina diê, kiki kiexile kijingu kia dikota. Kiki kia a dielelesele ué kuila ene a a xikinine kua Nzambi. (Tanga Malakiia 3:16-18.) O kuila kiene ué ki u divua? O kuila ua mu bhanga ioso phala “kuendela mu dijina dia Jihova?” O kuila u bhana valolo ku ioso ia lungu ni dijina didi?

17. Ihi ilombolola kuenda mu dijina dia Nzambi?

¹⁷ Kuendela mu dijina dia Nzambi, ku bhinga ima itatu. Kia dianga, tua tokala kuijidisa o dijina didi ku akuetu, mu kuijiia kuila o athu a-nda bhuluka ngó, ió ‘a kola o dijina dia Jihova.’ (Loma 10:13) Kaiadi, tua tokala ku kala ni ídifua iala na-iu Jihova, bhenge-bhenge o henda. Katatu tu-enda mu dijina dia Nzambi ni kisangusangu, kioso ki tu belesela o itumu iê, mu ku bhanga kiki, tu ximana o dijina dia Tata ietu. (1 Nzu. 4:8; 5:3) Ua mesena ‘kuenda mu dijina dia Jihova Nzambi ietu, mu izuua ni izuua sé dizubhilu?’

18. Mukonda diahi athu oso a ximana o dijina dia Jihova, a tala ku pholo ni kidielelu?

¹⁸ Kua kambe ngó, oso a xibhakela Jihova, a-nda kuijiia se muéne nanhi. (Ize. 38:23) Kiki, kia-nda bhita ni athu kála kiambele Falaó: “Jihova nanhi muene, phala eme ngi mu ivue dízui?” Muéne ua tena kuijiia Jihova ni lusolo! (Mak. 5:1, 2; 9:16; 12:29) Ku mbandu ietu, tua soto kuijiia Jihova, n’a kale kamba dietu. Tu di zangeleka mu ku kala tu mundu uê u mu belesela ni ku tu ixana mu dijina diê. Tu tala ku pholo, mu ku dielela mu kikanenu ki tu sanga mu divulu dia Jisálamu 9:10: “Oso a ku ijiia o dijina, eie muene u Jihova a ku dielela; kuma, eie Jihova, u muthu ua kukakula oso a ku kana.”