1. Kiebhi o ukexilu ua Mary ulombolola kuila ki tu tokala ku bhuila?

KIOSO kiexile muzangala, Mary Decker a muijidile ku mundu uoso kala muthu u tena ku lenga kiavulu. Athu a mu dielele kuila muéne ueji tambula o kikoué kia ku lenga o dikanga diala ni 3.000 ja jimetulu mu Jogos Olímpicos ku mu muvu ua 1984. Maji muéne nuka ua sukile ku mbambe. Muéne ua di bhukana ku kinama kia mukua iu ua dibhale. Ni jifidila ni kudila a mu katula mu kikoka kia ku lenga. Maji Mary ka bhuila mu ku lenga. Ande muene dia ku bhita muvu, Mary ua mateka dingi ku lenga iu ua tambula o kikoué ku muvu ua 1985.

2. Kiebhi o Jikidistá ja kidi kia mu lenga ni ihi i tua tokala ku bhanga?

² Mukonda tu Jikidistá, etu tua mu lenga—maji o ku lenga kua kifika. Etu tua tokala ku di bhakula mu ku lenga phala ku tambula o kikoué. O ku lenga kuetu, ki ku bhingi nguzu iavulu phala ku tambula o kikoué. Maji ki ku lenga kua ku zumbuka mu ithangana ni ithangana. Kua soko ni athu a mu lenga, ku bhinga ku suína phala ku tambula o kikoué. O poxolo Phaulu ua zuela ia lungu ni muthu u lenga kioso kia soneka o mukanda ku Jiphange mu Kolindo; o mbanza ia Kolindo a ijidile kuila o makuenze a uabhelele o ku lenga. Muéne ua soneka: “Enu’enu mua k’ijiia kuma bhu dikanga bhua di kuata o makuenze mu kulenga, ene oso a lenga muene, maji muthu umoxi ngó u tambula o kijimbuete kia kikoue. Kiene ue, enu uenu lengenu, phala mu tambule o kikoue.”—1 Kol. 9:24.

3. Kiebhi o athu oso a lenga, kia tena ku tambula o kikoué?

³ O Bibidia i tu tendelesa ku lenga o ulengelu ua kifika. (Tanga 1 Kol. 9:25-27.) O kikoué, o muenhu ua kalelaku phala o Jikidistá a a undu ku diulu mba o Jikidistá ja mukua mu ixi. O ku lenga kuetu ki ku difu ni ku lenga kuene mu bhanga o athu, mukonda ku mbandu ietu, o athu oso a lenga ni ku suína, a tambula o kikoué.  (Mat. 24:13) O athu a lenga ka tambula o kikoué, se ene ka xila o itumu mba a kamba ku lenga katé ku mbambe. O ku lenga kuku, kuene ku bheka o kikoué kia muenhu ua kalelaku.

4. Ihi i bhonzesa o ku lenga kuetu, phala ku tambula o muenhu ua kalelaku?

⁴ Ki bhonza ku lenga katé ku mbambe. Ku bhinga ku suína ni kuijiia kiambote o kima ki ua mesena. Muthu umoxi ngó ua tenene ku lenga sé ku dibhala—Jezú Kristu. Maji o dixibulu diê Tiiaku uambe kuila, o maxibulu oso a Kristu, a “tondajala mu ima iavulu.” (Tiia. 3:2) Kidi muene! Etu enioso tuene mu dibhana ni ukexilu uetu ua xitu, mba o ukexilu ua akuetu. Saí ithangana tu di bhukana mu kima, tu zendalala anga tu zoza. Nange tu dibhala muene; maji tu tena ku balumuka ni ku kolokota mu ku lenga. Saí iá a dibhale mu iluezu ia dikota, maji a a kuatekesa ku balumuka, iá a kuata dingi ku lenga ni ku suína katé kia suka ku mbambe. Kiki kilondekesa kuila etu tu tena ué ku dibhala mu veji javulu.—1 Jis. 8:46.

5, 6. (a) Mukonda diahi ki kuene ‘kima ki bhangesa’ o Kidistá ku dibhala ni ihi i tena ku mu kuatekesa ku balumuka? (b) Mukonda diahi athu a mukua ka tena ku balumuka kioso kia dibhala?

⁵ Nange eie uene mu tumbula o izuelu ku “di bhukana” ni ku ‘dibhala,’ phala kulombolola ukexilu umoxi ngó mu nzumbi. O izuelu ia Bibidia ki ilombolola kima kimoxi ngó mu ithangana ioso. Mu kifika, xinganeka mu izuelu ia divulu dia Jisabhu 24:16 iambe: “Kuma o muthu ua iuka, né ua di bhale lusambuadi, ubalumuka; maji athu abhumu-phe, à ka jikinina mu kibuika.”

⁶ Jihova ka-nda kuehela kuila athu ió a dielela kua muéne, a di bhukana mba a dibhala—mu ku dibhana ni ibhidi mu ubhezelu uâ—ka tena ku balumuka.Tua dielela kuila Jihova ua-nda tu kuatekesa ku “balumuka,” phala tu tene ku mu bheza ni muxima uoso. Kiki, ki bheka kisangusangu kia dikota phala oso a zolo Jihova ni muxima uoso! O athu a iibha ka mesena ku balumuka kála kia ­mesena o athu ambote.  O athu enhá, ka sotá o kikuatekesu kia nzumbi ikola ia Nzambi né kia mundu uê, mba a dituna muene kua bhana kikuatekesu. Maji ió ‘a zolo o itumu ia Jihova’ kana-ku kima ki tena kua bhangesa ku bhuila mu ku lenga, phala ku tambula o muenhu ua kalelaku.—Tanga Jisálamu 119:165.

7, 8. Kiebhi o muthu kia tena ku ‘dibhala,’ anga u kala hanji ni valolo ku pholo ia Nzambi?

⁷ Saí iá a tondala mu ituxi iofele—mu veji javulu—mukonda dia ku zoza mu nzumbi. Maji ene a tena hanji ku kala athu a iuka ku pholo ia Jihova, se a kolokota mu ku “balumuka,” se a diela, anga a mateka dingi o ku bhanga o sidivisu ia Nzambi ni ufiiele uoso. Tu tena ku mona o henda íii ia Nzambi mu ukexilu uê ua ku dibhana ni Izalaiele iokulu. (Iza. 41:9, 10) O divulu dia Jisabhu 24:16 di tua tange kiá kudima, ki di bhana valolo ku ima ia iibha i tu bhanga—kála ki tu ‘dibhala’—maji di bhana valolo ku nguzu i tu bhanga mu ku ‘balumuka’ ni kikuatekesu kia Nzambi ietu ia henda. (Tanga Izaia 55:7.) Jihova Nzambi ni Jezú Kristu a londekesa kuila, a tu dielela mu ku tu suínisa ku ‘balumuka.’—Jisá. 86:5; Nzu. 5:19.

⁸ Né muene se o muthu ua mu lenga u di bhukana mba u dibhala, nange muéne u kala ni kithangana kia ku balumuka phala ku zubha o ku lenga, se u lenguluka. Mu ku lenga kuetu phala ku tambula o muenhu ua kalelaku, etu ki tuejiia o ‘kizuua ni kithangana’ ki tua-nda zubha o ku lenga kuku. (Mat. 24:36) Maji se ki tu dibhale mu ola joso, tua-nda kolokota mu ku lenga katé ku mbambe. Kiebhi ki tu tena ku di langa phala ki tu dibhale?

9. Ima iebhi i tena ku tu bhalesa?

⁹ Tu di longe ima itanu i bhangesa o ku dibhala—o iluezu ietu, o jihanji ja xitu, ima ia iibha i tu bhangela o jiphange jetu, jiphaxi mba izukutisu ni ukexilu ua xitu ua akuetu. Lembalala kuila se tu tondala mu ima íii, Jihova mukua muanhu uavulu. Jihova ka tuehela mukonda dia ku kamba ufiiele.

10, 11. Ihi ia dibhana na-iu Davidi?

¹⁰ O iluezu ietu i tena kulombolola o matadi a moneka mu kikoka kioso ki tua mu lenga. Kioso ki tu xinganeka mu izulukutu ia bhiti ku muenhu ua Sobha Davidi ni ua poxolo Phetele, tu tena ku mona ima iiadi i dibhalesa—ku kamba ku di tumina jihanji ni uôma ua athu.

¹¹ O Sobha Davidi ua kambele ku tumina o jihanji jê mu ima ia bhange ni Bate-Seba. Kioso kia mu xingi kua Nabale, muéne ua kexile polondo phala ku ta kituxi. Mu kidi, muéne ua kambele ku tumina o jihanji jê, maji ka bhuila, ua bhange nguzu phala ku bhanga o ima ia uabhela Jihova.—1 Sam. 25:5-13, 32, 33; 2 Sam. 12:1-13.

12. Kiebhi Phetele kia kolokota mu ku lenga né muene ni ima ia mu dibhalesa?

¹² Phetele ua kexile ni uôma ua athu, iu ua di bhalele mu ku lueza; maji né kiki muéne ua kolokota mu ku kala fiiele kua Jezú ni kua Jihova. Mu kifika, muéne ua ditunu Mesene iê mu veji jitatu. (Luk. 22:54-62) Mu ku bhita kithangana, muéne ua lueza dingi mu ku bhana dingi valolo ku Jiphange akua Judé, o Jiphange a tokalele ku Ifuxi iéngi ndenge, mukonda ene ka a sáiele. Poxolo Phaulu uejidile kiambote o maka enhá—mu kilunga ki mu tokala ku kala kathombo. O kia bhangele Phetele kiexile kima kia iibha. Phaulu ua zuela ni Phetele phala kueha o ukexilu iú, phala ka zange o ukamba mu kilunga. (Nga. 2:11-14) O kuila Phetele ua divu kia iibha, anga ueha o ku lenga phala ku tambula o kikoué? Kana. Muéne uevu o kitendelesu kia Phaulu, ua diela, iu ua kolokota mu ku lenga.

13. Kiebhi o uhaxi u tena ku tu dibhalesa?

¹³ Saí ithangana o iluezu ietu ijila mu mauhaxi. Kiki ki tena ué ku tu dibhalesa.  Tu tena ué ku zoza mu nzumbi mba kueha ku lenga, mukonda dia uhaxi. Mu kifika, saí phange ia muhatu mu ixi ia Japão, mu ku bhita 17 dia mivu tundé kia mu batizala, ua kate kiavulu. Muéne ua thandanganhele kiavulu ni uhaxi uê, iu ua zoza mu nzumbi. Muéne ka kexile dingi múia mu kilunga. A mu kundu ku tufunga tuiadi. Ni ki suinisu kia tambula, muéne ua mateka dingi kuia mu iônge. Muéne u lembalala: “Eme nga didi mukonda o tufunga tua ngi tambulula ni henda ioso.” Phang’etu ua mateka dingi o ku lenga.

14, 15. Ihi i tua tokala ku bhanga kioso ki tu kala ni jihanji ja xitu? Bhana kifika.

¹⁴ O jihanji ja xitu ja dibhalesa athu avulu. Kioso ki tu kala ni jihanji jiji tua tokala ku bhanga nguzu phala ku langa o kilunji, o muxima ni ukexilu uetu mu nzumbi. Xinganeka mu kitendelesu kia Jezú kia ku “texi dikanga” kima kioso-kioso ki tena ku tu dibhalesa, né muene o mesu metu mba lukuaku. O kuila kiki kia lungu ué ni ibanzelu mba ixinganeku ia iibha ia bhangesa athu a mukua kueha o ku lenga?—Tanga Matesu 5:29, 30.

¹⁵ Saí phange ia diiala ua soneka kuila, ua dibhana ni maka a undumbu alungu ni mala a zeka ni mala ni akuâ. Sumbala a mu sase ku jitata Jikidistá, muéne uambe: “Eme nga divu kia iibha mu ola joso mukonda ki ngi di fuile ni akuetu.” Kioso kia tenesa 20 a mivu muéne ua kituka muboki ua thembu ioso ni múkuatekexi ua tufunga. Mu ku bhita kithangana muéne ua dibhale mu kiluezu kia dikota, a mu bazela mu nzumbi, iá a mu kuatekesa ku tufunga. Mukonda dia misambu, ni ku di longa o Mak’â Nzambi ni ku kuatekesa akuâ, muéne ua tena ku balumuka ni ku mateka dingi ku lenga mu nzumbi. Mu ku bhita mivu, muéne uambe: “Saí ithangana ngi kala hanji ni jihanji jiji, maji ki ng’ehela o jihanji jiji ku ngi tolola. Ngejiia kuila Jihova k’ehela o ibhidi ku bhita ni muthu se muéne uejiia kuila ka-nda tena ku dibhana na-iu. Mu kidi, ngi dielela kuila Nzambi uejiia kuila ngi tena ku dibhana ni ibhidi íii.” O phange íii iambe dingi: “Nga-nda tambula mabesá ku mundu uobhe mukonda dia ibhidi i nga dibhana na-iu. Nga mesena o mabesá enhá! Kioso ki ngiia ni ku kingila o kizuua kieniókio, nga-nda kolokota mu ku bhânga.” Muéne ua mesena ku kolokota mu ku lenga.

16, 17. (a) Ihi ia kuatekesa o phange ia kexile mu xinganeka kuila a mu bhange kima kia iibha ku jiphange? (b) Phala ki tu dibhale, tua tokala ku dielela kua nanhi?

¹⁶ O ima ia iibha i bhanga o jiphange i tena ku tu dibhalesa. Saí phange uexile kafunga mu ixi ia França ua banzele kuila o jiphange a mu bhange kima kia iibha anga u kala ni njinda iavulu. Mukonda dia kiki muéne ka kexile dingi múia mu kilunga. Tufunga tuiadi ai ku mu kunda, a mu ivu kiambote, a mu ehela kuzuela ioso ia kexile mu bhita na-iu. Ene a mu suínisa ku xisa o ima ioso bhu maku a Jihova ni ku mu tangela kuila o kima kia beta-kota o ku sangulukisa Nzambi. Muéne ua xikana o itendelesu, mu ku bhita kithangana ua mateka dingi ku lenga mu ku bhanga o sidivisu ia kilunga.

¹⁷ O Jikidistá joso a tokala ku dielela kua Jezú Kristu o Mutuameni ua kilunga, mu veji dia ku thandanganha ni athu akua ituxi. O mesu a Jezú a “lekujuka kala mulengu ua túbhia,” u tala kiambote o ima ioso ia mu bhita, etu ndenge. (Dij. 1:13-16) Mu kifika, muéne uejiia kuila o kima ki tu mona kuila kia iibha, nange ki kiene ki mona muéne. Mu kithangana kia tokala Jezú ua-nda batula o maka oso mu ukexilu ua iuka. Mu kiki, ki tu tokala kuehela kuila o ima ia iibha i bhanga o jiphange, i tu zozesa mu ufiiele uetu.

18. Kiebhi ki tu tena ku dibhana ni jitendasá mba ibhidi?

¹⁸ O ima iiadi ja mukua i bhangesa o ku dibhala, o jiphaxi mba kizukutisu ni ukexilu ua xitu ua akuetu mu kilunga.Mu kifika kiê kia mukuni, Jezú uambe: O ‘jiphaxi, mba kizukutisu’ ki tena ku dibhalesa o athu.  Ki kale se o izukutisu ijila ku mbandu ia—muiji, jivizinhu mba jinguvulu—i bhalesa ió ‘moxi diê-phe a kambe ndanji’ ka kulu luua mu nzumbi. (Mat. 13:21) Mu kiki, se tu kolokota mu ku langidila o ukexilu ua muxima uetu, o mbutu ia Utuminu ia-nda tu kuatekesa ku kolesa o kixikanu kietu mu nzumbi. Kioso ki tu dibhana ni ibhidi, tua tokala ku bhanga nguzu mu ku samba ni ku xinganeka mu ima ia valolo. (Tanga Filipe 4:6-9.) Ni kikuatekesu kia Jihova, tua-nda dibhana ni jitendasá, ki tua-nda kuehela kuila jene ji tu dibhalesa.

19. Ihi i tua tokala ku bhanga phala o ima ia iibha i bhanga o athu ki i tu dibhalese?

¹⁹ Tundé ukulu athu avulu ehela kuila o ukexilu ua xitu ua akuâ, u a bhangesa ku bhuila mu ku lenga. Kala muthu uala ni ukexilu ua ku mona o maka alungu ni kilunji, mukonda dia kiki saí iá a dibhala. (1 Kol. 8:12, 13) Se muthu u tu xinga o kuila tua-nda luuala kiavulu? O Bibidia i tendelesa o Jikidistá phala ka fundise akuâ, maji a loloka akuâ ni ku kamba ku di banza mudiâ. (Luk. 6:37) Kioso ki u mona ima i dibhalesa, dibhudise: ‘O kuila nga mu fundisa akuetu mu kaxi ka ibanzelu iami? Mu kuijiia kuila o jiphange jami akua ituxi, o kuila nga-nda bhuila mu ku lenga mukonda dia kima kioso-kioso kia ngi bhanga?’ O henda ietu kua Jihova i tena ku tu kuatekesa ku bhanga nguzu, phala ki tuehele kima kioso-kioso ki bhangesa muthu ku tu fidisa ku bhixila bhu mbambe.

20, 21. Ihi i ua solo ku bhanga mu ku lenga phala ku tambula o muenhu ua kalelaku?

²⁰ O kuila ua mesena ku zubha o ‘dikanga dia ku xindi?’ (2 Tim. 4:7, 8) Ua tokala ku di longa ubheka uê. Tanga o Bibidia ni madivulu metu a mukua phala ku ku kuatekesa kuijiia kiambote o ima i tena ku dibhalesa. Bhinga o nzumbi ikola phala i ku bhane o nguzu i ua bhingi. Lembalala kuila se-ku muthu u lenga u lembua ku tambula o muenhu ua kalelaku mukonda dia ku dibhala. Muéne u tena ku balumuka ni ku kolokota mu ku lenga. Muéne u tena ku katula mbote mu ibhidi ia bhiti na-iu kiá mu ku di longa madisá phala ku kolesa o kixikanu kiê.

²¹ O Bibidia iamba kuila o ku lenga phala ku tambula o muenhu ua kalelaku, ku bhinga nguzu. Ki ki soko ni maximbombo ambata ngó o athu a-nda lenga. Etu muene tua tokala ku lenga phala ku tambula o muenhu ua kalelaku. Kioso ki tuia ni ku lenga tua-nda kala ni “kutululúka kuavulu” ku tunda kua Jihova kala kitembu ki tula ku kunda dietu. (Jisá. 119:165) Tu tena ué ku dielela kuila muéne ua-nda tu bhana mabesá ki kale lelu katé ku hádia ni hádia, kioso ki tua-nda ku zubha o ku lenga.—Tiia. 1:12.