1, 2. O isuma ia lungu ni kilunga kia Jihova mu ngongo i tu kuatekesa ku bhanga ihi?

KIMA kiambote kuijiia kuila, tua tokala mu kilunga kia beta-o-kota ku mundu uoso. O isuma i tua mono mu divulu dia Izekiiele kibatulu 1 ni mu divulu dia Daniiele kibatulu 7, ilondekesa kiambote kiebhi kia mu kalakala Jihova phala ku kumbidila o kikanenu kiê. Jezú muéne uala ku pholo mu kuendesa o kilunga kia Jihova mu ixi. Muéne ua mu kuendesa o ikalakalu ia ku boka, ni ku bhana milongi ni ku suínisa o jiphange a mu bhanga o kikalakalu kiki, ni ku kuatekesa o athu kubheza Jihova. Kiki, ki tu kuatekesa ku dielela o kilunga kia Jihova!—Mat. 24:45.

² O kuila eie ua mu kaiela o phangu ia kilunga kia Jihova, mu ku di bhakula mu sidivisu ia Nzambi? O kuila o vondadi iê ia ku bhanga o sidivisu ia Nzambi ia mu dibandekesa, anga ua mu bhuila? Kioso ki tu xinganeka mu ibhuidisu íii nange tu mona kuila, ki tua mu bhanga dingi kála ki tua kexile mu bhanga. Kiki ki tena ku bhita ni etu. Ku hama ia dianga o poxolo Phaulu, ua suínisa o jiphange ku kaiela o phangu ia Jezú. Phaulu uambe kuila, o ku bhanga kiki kieji ku a kuatekesa ‘ku kamba ku bhuila mu nzumbi.’ (Jihe. 12:3) Mu milongi i tua di longo kiá, tua mono o kikalakalu kia mu bhanga o kilunga kia Jihova lelu. O phangu ia Kristu ia suínisine o Jikidistá ku hama ia dianga, lelu ué o kilunga kia Jihova ki tu kuatekesa ku suína mu sidivisu ia Nzambi.

3. Ihi i tua tokala ku bhanga phala ki tu bhuile ni ihi i tua-nda di longa mu milongi?

³ Phaulu uambe kuila tua tokala ku bhanga kima se ki tu mesena ku bhuila. Muéne uambe kuila tua tokala ku kalakala phala ku ‘ku bhanga o mbote.’ (Nga. 6:9) Tua-nda di longa maukexilu atanu, a tu kuatekesa ku suínisa o vondadi ietu ia ku bhanga o sidivisu ia Nzambi, ni kuenda kumoxi ni kilunga kia  Jihova. Kiki kia-nda tu kuatekesa ku mona se etu ni muiji uetu tu tena ku lungulula kima.

4. Mukonda diahi tuamba kuila o iônge ietu kima ki kiene mu kamba mu ubhezelu ua kidi?

⁴ O iônge iala ni valolo iavulu ku jiselevende ja Jihova. Ku diulu Jihova u diongeka ni ji-anju. (1 Jis. 22:19; Jobe 1:6; 2:1; Dan. 7:10) Mu ukulu o kifuxi kia Izalaiele kia kexile mu diongeka phala ‘kuívua ni ku di longa.’ (Mate. 31:10-12) Ku hama ia dianga, o Jijudé akexile mu diongeka mu tembulu phala ku tanga o Kitumu. (Luk. 4:16; Ika. 15:21) O iônge ia kexile ué ni valolo, kioso kia bhangele o ilunga ku hama ia dianga, lelu ué iala ni valolo ku ubhezelu uetu. O Jikidistá ja kidi ‘a di xinganeka mudiâ, a di suínisa mu ku di zola, ni ku bhanga o mbote.’ Tua tokala ku kolokota mu ku ‘di suínisa mudietu, kota-kota dingi kioso ki tu mona o Kizuua kia Ngana Jihova kí zukama.’—Jihe. 10:24, 25.

5. Kiebhi ki tu tena ku di suínisa mudietu mu iônge?

⁵ Saí ukexilu mu tu tena ku di suínisa mudietu, o ku tambuijila o ibhuidisu mu iônge. Mu kifika, tu tena kulondekesa o kixikinu kietu mu ku tambuijila o ibhuidisu, mba ku jimbulula o ibatulu ia Bibidia, mba ku tanga musoso ulondekesa o unjimu ua ku belesela o itumu ia Bibidia. (Jisá. 22:22; 40:9) Sé phata eie u xikina kuila né muene se tua múia kiá tunde ukulu mu iônge, o itambuijilu ia jiphange jetu mu iônge i tu suínisa—ki kala adiakimi mba ana-ndenge.

6. Kiebhi ki tu kuatekesa o iônge ietu ku kala ku mesu a azele?

⁶ O iônge ietu mu kilunga, ni iônge ia ilunga, mba iônge ia makota, i tu kuatekesa mu maukexilu avulu. Mu kifika, i tu kuatekesa ku kala ni nguzu ia ku boka, né muene se o athu mu diembu dietu ka-ndala ku tuívua, mba a tu zukutisa. (Ika. 4:23, 31) O madiskursu ni milongi ia mukuá ia Bibidia i tu suínisa. (Ika. 15:32; Lom. 1:11, 12) O ku diongeka ni jiphange jetu ki tu sangulukisa, ki tu suínisa ué, ‘phala mu izuua ia uíndua tu ximbakata.’ (Jisá. 94:12, 13) O Kibuka kia Utuminu Kia ku longa, ki iudika o milongi phala o jiselevende joso ja Jihova mu ixi. Tu sakidila kiavulu o milongi i tu tambula semana joso ku muvu!

7, 8. (a) Kima kiahi kia beta-kota ki tu bhangesa kuia mu iônge? (b) Kiebhi ki ku kuatekesa o iônge ku kala ku mesu a zele?

⁷ Maji etu ki tuene múia ngó mu iônge mukonda tu katula-mu mbote. O kima kia beta-o-kota ki tu bhangesa kuia mu iônge, o kubheza Jihova. (Tanga Jisálamu 95:6.) Ujitu ua dikota ku ximana o ungana ua Nzambi ietu! (Kol. 3:16) Tu bheza ué Jihova kioso ki tu tambuijila o ibhuidisu mu iônge, Jihova ua tokala ku tambula o kijingu kiki. (Dij. 4:11) Mukonda dia kiki, a tu tendelesa kiambote, “kana kufula ku di bhongolola jinga, uila amoxi ki ene kufula!”—Jihe. 10:25.

⁸ O kuila tu mona o iônge kála ujitu ua Jihova, u tu kuatekesa katé kia-nda kuíza o ki buika kia mundu iú? Se tu bhanga kiki, o iônge ietu ia-nda kala o ‘kima kia beta-o-kota’ ku muenhu uetu uezala ni ima i tu thandanganhesa. (Fil. 1:10) Etu ki tu tokala ku fonga mu iônge, tu fonga ngó se ku moneka kibhidi kia dikota.

9. Kiebhi ki tuejiia kuila o sidivisu ia kuboka kima kia beta-kota?

⁹ O ku boka ku tu kuatekesa ué kuenda  kiambote mu kilunga kia Jihova. Jezú ua mateka o kikalakalu kia ku boka kioso kia kexile mu ixi. (Mat. 28:19, 20) Tundé o kithangana kieniókio, o ku boka o njimbu ia Utuminu ua Nzambi, ni ku bhanga maxibulu, kiene o kikalakalu kia beta o kota kiene mu bhanga o kilunga kia Jihova mu ixi. Misoso iavulu mu izuua ietu ilondekesa kuila, o ji-anju ja mu tu kuatekesa mu kikalakalu kietu, ni ku sanga o athu “a fuamena o muenhu ki uabhua, anga a xikana.” (Ika. 13:48; Dij. 14:6, 7) O kilunga kia Jihova mu ixi kia mu kalakala phala ku iudika ni ku kuatekesa ku bhanga o kikalakalu kia kuboka. O kuila o sidivisu ia kuboka kiene o kima kia beta-o-kota ku muenhu ué?

10. (a) Bhana kifika ki londekesa kiebhi ki tu tena ku kolokota ku bhanga o sidivisu ietu ni ku sanguluka? (b) Kiebhi kia ku kuatekesa o ukunji ku kamba ku bhuila?

¹⁰ Kioso ki tu boka o njimbu iambote, tu beta-o-kota ku zola o kidi. Xinganeka ia zuela Mitchel, muéne kafunga, muboki ua thembu ioso. Muéne uambe: “Eme nga zolo ku zuela o kidi kia Bibidia ku athu. Ngi xinganeka milongi ia ubhe mu Mulangidi mba mu Despertai! Ngi diuana o milongi i ngi sanga-mu. Kiki ki ngi suínisa kuia mu boka ni ku mona kiebhi o athu kia-nda tambula o milongi íii, ni ku a bhangesa ku xikina ku di longa. O ukunji u ngi kuatekesa ku kolokota. Ngi suína phala ku bhanga ima ia mukuá ande dia kuia mu boka mba kioso  ki ngi zubha o ku boka.” Kiene kimoxi ué ni etu, se tu di bhakula mu sidivisu ia ku boka, ki tu kuatekesa ku kolokota mu izuua íii isukidila-ku.—Tanga 1 Kolindo 15:58.

11. Mukonda diahi tua tokala ku tanga o madivulu metu a tu bhana Jihova ni ku xinganeka o milongi i tu tanga?

¹¹ Jihova ua tu bhana kudia kuavulu mu nzumbi phala tu suíne. Nange ua tangele kia divulu mu ua sange milongi, eie uambe: ‘O milongi íii iene muene i nga bhindamene! Kia difuangana kála Jihova ua soneka o milongi íii phala eme!’ Ka isoneka ngó. Jihova u tu longa bhu kaxi ka madivulu metu. Muéne uambe: ‘Ngi ku longesa, ngi kuidikisa njila ioso i ua fuama o kuendela.’ (Jisá. 32:8) O kuila tu bhanga nguzu phala ku tanga o madivulu metu ni ku xinganeka mu milongi, kioso ki tu a tambula? O ku bhanga kiki kia-nda tu kuatekesa ku kolokota ni ku suína mu sidivisu ietu mu izuua íii isukidila-ku.—Tanga Jisálamu 1:1-3; 35:28; 119:97.

12. Ihi i tena ku tu kuatekesa ku bhana valolo ku madivulu metu?

¹² Kima kiambote ku xinganeka o kikalakalu ki bhinga phala ku bhanga o madivulu metu, phala ki tu kambe milongi. O Kibuka kia Utuminu Kia ku Longa, kiene ki bhanga o kikalakalu kiki, ki bhinga ku tokuesa, ku soneka, ku tonginina, ku bhanga ifika, ni ku a lungulula mu madimi a mukuá, ni ku a ta mu Internete. O jifiliiale ji bhanga o madivulu, a a tumikisa mu ilunga ia zukama ni iala dikanga. Mukonda diahi a bhanga o kikalakalu kioso’ki? Phala o jiselevende ja Jihova ku tambula milongi i suínisa o kixikinu kiâ. (Iza. 65:13) Tu katule mbote mu madivulu oso u tu tambula mu kilunga kia Jihova.—Jisá. 119:27.

13, 14. A nanhi a mu kuatekesa o kilunga kia Jihova ku diulu ni kiebhi ki tu tena ku kuatekesa ué mu ixi?

¹³ Mu kisuma, Nzuá ua mono Jezú kuendela ku kabalu, phala ku luua ni ió a bhukumukina Jihova. (Dij. 19:11-15) Muéne ua mono ué muthu a mu undu a mu fukununa phala kuia ku diulu, ni ji-anju ja fiiele akexile ué kuendela ku jikabalu ku dima dia Jezú! (Dij. 2:26, 27) Kiki kilondekesa kuila ene a xikina Jezú, ku kala mutuameni uâ!

¹⁴ Kiene kimoxi ué o mundu uavulu, u kuatekesa o jiphange ja Jezú ala hanji mu ixi, o Jikidistá a a undu ala ku pholo mu kuendesa o kilunga kia Jihova mu ixi. (Tanga Zakadiia 8:23.) Kiebhi ki tu tena kulondekesa kuila tua xikina o itendelesu i tu tambula mu kilunga kia Jihova? Tu tena ku kilondekesa mu ku belesela o jiphange jala ku pholo. (Jihe. 13:7, 17) Tua tokala ku mateka ku belesela mu kilunga kietu. O kuila o ima i tu zuela ia lungu ni tufunga i bhangesa akuetu ku xila o ikalakalu ia bhanga? O kuila tu suínisa o tuana tuetu ku xila o mala enhá akua kixikanu, ni ku xikina o itendelesu ia Bibidia ia bhana? O kuila ku muiji uetu tuene mu zuela se kiebhi ki tu tena ku kuatekesa o kilunga kia Jihova ni kitadi kietu? (Jisa. 3:9; 1 Kol. 16:2; 2 Kol. 8:12) O kuila tu bhana valolo ku ujitu ua ku komba o Kididi kia Ubhezelu? O nzumbi ikôla ia Jihova, i kalakala kiambote bhu kididi bhuala athu a dibhana kiambote, a kalakala kumoxi a di xila. Bhu kaxi ka nzumbi ikôla, tu tambula kikuatekesu phala ki tu bhuile mu izuua íii isukidila-ku.—Iza. 40:29-31.

15. Mukonda diahi tua tokala ku di suínisa phala ku bhanga o ima iambote?

¹⁵ Mu ku suka-ku, phala ku kolokota ni kuenda mu kilunga kia Jihova, o ukexilu ua muenhu uetu ua tokala ulondekesa o milongi i tuene mu di longa, mu ku ‘sota ku di longa jinga ioso i uabhela kiambote Nzambi.’ (Efe. 5:10, 11) Satanaji ni mundu uê ua iibha, ni ituxi ietu, i bhangesa ku tu bhonza ku bhanga o ima iambote. Saí jiphange bhu kaxi ketu, phange jetu ja kazola, mua mu dibhana ni ibhidi izuua ioso phala ku langa o ukamba uenu ni Jihova. Jihova ua mi zolo mukonda dia nguzu i mu bhanga. Ki mu bhuile! Se tu kala ni ukexilu u sangulukisa Jihova, tua-nda sanguluka kiavulu, tua-nda mona kuila ki tua mu bheza mu ki ngó.—1 Kol. 9:24-27.

16, 17. (a) Ihi i tua tokala ku bhanga se tu ta kituxi? (b) Phangu iahi i tu katula kua Ana?

¹⁶ Ihi i tua tokala ku bhanga se tua té kituxi? Bhinga kikuatekesu ni lusolo. O ku sueka o kituxi ki ku bhekela ngó ibhidi. Ua lembalala o izuelu ia Davidi kioso kiambe: “O ifuba moxi ikala ni kutuza, ngi kala mu kumba izuua ioso.” (Jisá. 32:3) Se phata o ku sueka o ituxi ietu i tu bhuidisa, maji “muthu uoso-phe ikuma iê u i fisala, anga u [ieha], ió hinu a mu kuatela henda.”—Jisa. 28:13.

¹⁷ Xinganeka mu phangu ia Ana.  * Ana kia kexile mona-ndenge uexile muboki ua thembu ioso. Maji muéne ua mateka ku bhanga ima ia iibha. Kiki kia mu bhakela kitongoluelu kia neme. Muéne uambe: “Ki [ngi] sangulukile dingi ku muenhu uami, ithangana ioso nga kexile mu luuala.” Muéne ua bhange ihi? Muéne uambe kuila, saí kizuua mu kiônge a zuela-mu maka a lungu ni divulu dia Tiiaku kibatulu 5:14, 15. Ana ua mono kuila ua bhindamene kikuatekesu iu ua bhingi kikuatekesu ku tufunga. Mu ku xinganeka mu ima ia bhiti muéne uambe: “O milongi ienii ia difu ni milongo i bhana Jihova phala o muthu ku disanza mu nzumbi. O milongo íii i bhonza ku i nua, maji i saka o muthu. Nga belesela o milongi íii eme nga disanze.” Mu ku bhita mivu, Ana ua mu kalakala dingi mu sidivisu ia Jihova ni kitongoluelu kia zele.

18. Ihi i tua tokala ku sola ku bhanga?

¹⁸ Tua tokala ku lembalala izuua ioso kuila, ujitu ua dikota ku tokala mu kilunga kia Jihova mu ixi, mu izuua isukidila-ku! Ki tu tokala ku tunda mu kilunga kia Jihova. Mu veji dia kiki, etu ni muiji uetu, tua tokala kuia mu iônge izuua ioso, phala ku bheza ni jiphange jetu, ni ku sota o athu a lenduka mu diembu dietu, ni ku katula mbote mu milongi ioso i tu bhana Jihova. Tu kuatekese ué o jiphange ala ku pholo, tu kale ué ni ukexilu u sangulukisa Jihova. Se tu bhanga kiki, tua-nda kuenda kumoxi ni kilunga kia Jihova, ki tua-nda bhuila mu ku bhanga o mbote!