JEZÚ ua kanena kuila eji buika o tembulu ia Jeluzaleme—o kikanenu kiki kia di kumbidila ku muvu ua 70 K.K. kioso o masoladi a Titu akua Loma a buika o mbanza ia Jeluzaleme. (Mat. 24:2) Mu ku bhita Kithangana, o Sobha Juliano ua mesenene ku tunga dingi o tembulu.

O Sobha Juliano mukua Loma, uexile mukua pagão ua suku-ko. Muéne uexile muebhu a Constantino o Dikota, a mu longo ku Jikidistá ia izuua iê. Maji kioso kia kituka Sobha ku muvu ua 361 K.K. , muéne ua ditunu ku kala Kidistá, mukonda dia ima ia iibha ia kexile mu bhanga o Jikidistá, muéne ua solo ku kala mukua pagão. Mukonda dia kiki o madivulu a misoso amba kuila muéne ua kituka “mukua ku lungulula o kidi.”

Juliano ua zembele o Jikidistá. Nange muéne ua zembele o Jikidistá mukonda kioso kia kexile ni mivu 6 o athu enhá a jibhile tat’â ni ji ndandu jê ja mukuá. Kala kiambe akua musoso a jingeleja, Juliano ua suínisa akua Judé ku tunga dingi o tembulu ia Jeluzame phala o athu a mone kuila Jezú polofeta ia makutu. *

Sé phata Juliano ua mesenene ku tunga dingi o tembulu. Maji o akua misoso kejidile se Juliano ua matekene muene ku tunga o tembulu mba kana, se muéne ua matekene ku tunga o tembulu, ene uá kejiia se ihi ia mu fidisa ku zubha ku i tunga. Tuejiia ngó o kidi kiki. Kia tenesa mivu iiadi ku utuminu uê Juliano a mu jibha, mu kiki muéne ka tungu dingi u tembulu.