1, 2. Kikanenu kiebhi kia lungu ni izuua i sukidila-ku kia mesenene kuijiia o maxibulu a Jezú ni mukonda diahi?

PHETELE, ni Tiiaku, ni Nzuá, ni Mandele a kexile ubheka uâ ni Mesene iâ. Ene a thandanganhele kiavulu, mukonda dia ima ia zuela Jezú ia lungu ni ku buika o tembulu. (Mar. 13:1-4) Mukonda dia kiki, ene a mu ebhuidisa: “Tu tangele, ima íii mba ia kà bhita thembu kuxi? Kijimbuete kiê kiahi, kia ku tukuluka kué, ni kia dizubhilu dia mundu?” (Mat. 24:1-3) Jezú ua a ambela o ima ieji bhita ande dia ku buika Jeluzaleme, ni ima ieji bhita mu izuua i sukidila-ku ia mundu ua Satanaji. Saí kima kia zuela Jezú kia bhangesa o maxibulu mê ku mesena kuijiia dingi ia lungu ni izulukutu íii. Jezú ua kanena ima ia iibha kála o ita, ku kamba kudia, ni ima ia mukuá ia iibha, maji ua kanena ué ima iambote ieji bhita mu izuua i sukidila-ku. Muéne uambe: ‘O Njimbu íii Iambote ia Utuminu ua Nzambi, ia bhingi ku i tula mu ngongo ioso, mu ku bhana umbangi ku ifuxi ioso; kiene kia kiéza o dizubhilu.’—Mat. 24:7-14.

² O maxibulu a Jezú akexile kiá mu boka o njimbu iambote ia Utuminu kumoxi ni Kristu. (Luk. 8:1; 9:1, 2) Nange ene a lembalala kioso kiambe Jezú: “O díbhia kidi muene dia kulu, akalakadi a tolo. Diondenu-phe Ngana, mukua díbhia, a tume dingi akalakadi mu díbhia diê.” (Luk. 10:2) Maji kiebhi kieji boka “mu ngongo ioso” ni ‘ku bhana umbangi ku ifuxi ioso?’ Kuebhi kueji tunda o akalakadi? Se ene ejidile ima ieji bhita ku hádia, eji tendela kiambote ia zuela Jezú mu divulu dia Matesu 24:14.

3. Kiebhi kia mu di kumbidila o izuelu ia Luka 21:34? Ihi i tua tokala ku di ebhuidisa?

 ³ O kikanenu kia Jezú kia mu di kumbidila mu izuua ietu. Mazunda ni mazunda a athu a mu boka o njimbu iambote ia Utuminu mu ngongo ioso. (Iza. 60:22) Jezú ua londekesa ué kuila mu izuua i sukidila-ku, kieji bhonza o athu ku ta ku pholo o sidivisu ia ku boka mu ithangana ioso. Ene eji ‘thandanganha ni ima iavulu.’ (Tanga Luka 21:34.) Tua mu mona ué kuila o izuelu íii ia mu di kumbidila. Saí jiselevende ja Nzambi a mu dibhala ué mu kibhetu kiki. Ene a kilondekesa mu ima ia sola kála o salu, ni xikola, ni jimbongo mba mu ithangana ia bhita mu itonokenu. Saí iâ ka mu kalakala kiavulu mu sidivisu ia Nzambi mukonda dia ibhindamu ia muenhu. Di ebhuidise: ‘Ihi i nga mu bhanga? O kuila nga mu ta o vondadi ia Nzambi ku pholo?’

4. (a) Ihi ia bhingi Phaulu mu musambu ua bhange phala Jikidistá akua Filipe, ni mukonda diahi? (b) Ihi i tua-nda di longa mu milongi íii ni ia-nda kaiela, ni mukonda diahi?

⁴ O Jikidistá ku hama ia dianga a bhangele nguzu phala ku ta o sidivisu ia Nzambi ku pholo. Mukonda dia kiki o poxolo Phaulu ua zuela mu musambu kuila o akua Filipe a tokalele ‘ku sola o ima ia beta-o-kota.’ (Tanga Filipe 1:9-11.) Kála kia bhange poxolo Phaulu Jikidistá javulu “a suina dingi kiengi ni kutanga o Maka ma Nzambi sé uôma.” (Fil. 1:12-14) Kiene kimoxi ué kindala, saí Jikidistá mudietu a mu boka o Mak’â Nzambi ni ku suína kuoso. O kuila o kikalakalu kia mu bhanga o kilunga kia Jihova ki tena ku tu kuatekesa ku bandekesa o sidivisu ia kuboka? Ki tena! Mu milongi íii tua-nda dilonga o ima ia mu bhanga Jihova phala ku kumbidila o kikanenu mu divulu dia Matesu 24:14. Ihi ia mu bhanga o kilunga kia Jihova? O kuijiia ia mu bhanga o kilunga kia Jihova ki tu kuatekesa etu ni muiji uetu ku bhanga ihi? Mu milongi ia-nda kaiela tua-nda di longa ihi i tena ku tu kuatekesa ku kolokota mu sidivisu ia Nzambi ni ku kaiela o kilunga kia Jihova.

5, 6. (a) Mukonda diahi Jihova uehelele o jiselevende jê ku mona mu kisuma o ima ia mu bhita ku diulu? (b) Ihi ia mono Izekiiele mu kisuma?

⁵ Sai ima Jihova ka i sonekesa mu Bibidia. Mu kifika, Jihova ka jimbulula kiebhi ki kalakala o uongo uetu ni kiebhi ki kalakala o ngongo. Mu veji dia kiki, Jihova ua tu bhana milongi i tua bhingi phala ku tendela kiambote o vondadi iê ni ku i kumbidila ku muenhu uetu. (2 Tim. 3:16, 17) Kima kiambote kuijiia kuila Jihova ua tumina ku soneka mu Bibidia o ima ia lungu ni kilunga kiê ku diulu! Kisangusangu kia dikota ku tanga o milongi mu madivulu a Izaia, ni Izekiiele, ni Daniiele ni Dijingunuinu dia Nzuá. (Iza. 6:1-4; Ize. 1:4-14, 22-24; Dan. 7:9-14; Dij. 4:1-11) Kia difuangana Jihova ua jikula o ji kulutina, anga u tu ehela ku mona o ima ioso ku diulu. Mukonda diahi Jihova u tu londekesa o ima ia mu bhita ku diulu?

⁶ Jihova ua mesena tuijiia kuila tua tokala mu kilunga kiê. O kilunga kia Jihova ku diulu kia mu kalakala kiavulu phala ku kumbidila o vondadi ia Jihova. Mu kifika, Izekiiele ua mono mu kisuma o kilunga kia Jihova kia difu ni dikalu dionene. O dikalu didi dienda lusolo, maji di bhiluka ué lusolo ku ididi ku dia mesena kuia. (Ize. 1:15-21) O dikalu  didi ki di laleka ku bhixila kua diia. Mu kisuma Izekiiele ua mono ué o Muendexi ua dikalu didi. Muéne uambe: “Eme nga mono kidifua kia kìphembe ni ukalelu kala thúbia m’oxi diê . . . kia di-fuile o ku bhenha kua unéne ua Jihova.” (Ize. 1:25-28) Nange Izekiiele ua diuanene ni kisuma kiki! Muéne ua mono kuma Jihova ua mu langa o kilunga kiê bhu kaxi ka nzumbi ikôla. O uendelu ua dikalu didi madiuanu, mukonda ulondekesa kiebhi kia mu kalakala o kilunga kia Jihova ku diulu!

7. Kiebhi ki tena o kisuma kia Daniiele ku suínisa o kixikanu kietu?

⁷ Daniiele ua mono ué kisuma ki suínisa o kixikanu kietu. Muéne ua mono Jihova o “Mukulu-ua-Ndamba” ua xikama, o kiandu kiê milengo ia túbhia. O kiandu kiexile ku thandu dia malola. (Dan. 7:9) Jihova ua mesenene kuila Daniiele u mona kuila, o kilunga kia Jihova kia mu kalakala phala ku bhanga o vondadi ia Jihova. Daniiele ua mono ué “Mon’a muthu,” o muthu iú Jezú, ua tambula o ujitu ua ku langa o kilunga kia Jihova mu ixi. Jezú ka-nda tumina mu ixi mu mivu iofele. Mu veji dia kiki, ‘o ku tumina kuê ki kuene dizubhilu, o ungana uê uene ngó, ka tena ku u bhuisa-ku.’ (Dan. 7:13, 14) O kisuma kiki ki tu bhangesa ku dielela kua Jihova ni ku xikina mu ima ia mu bhanga. Muéne ua bhana “o kutumina, ni kijingo, ni ungana,” kua Mon’ê Jezú. Jihova ua dielela o Mon’ê. Mu kiki, tu tena ku dielela kuila Jezú muéne Ngana ietu.

8. Kiebhi kia divu Izekiiele ni Izaia kioso kia mono o isuma ia lungu ni kilunga kia Jihova, ni kiebhi ki tu divua ué mu kuijiia o isuma íii?

 ⁸ Kiebhi ki tu divua mu kuijiia o isuma ioso ia lungu ni kilunga kia Jihova ku diulu? Etu tu diuana mu ima ia mu bhanga Jihova kála kia diuanene Izekiiele. (Ize. 1:28) O ku xinganeka mu kilunga kia Jihova, ki tu bhangesa ku bhanga kima kála kia bhangele Izaia. Kioso kia moneka o kithangana kia ku tangela akuâ o ima ia kexile mu bhanga Jihova muéne ua xikina o kikalakalu kiki. (Tanga Izaia 6:5, 8.) Izaia uejidile kuila ni kikuatekesu kia Jihova muéne ueji tena ku dibhana ni ibhidi ieji kuijila mu kikalakalu kiki. Kála kia bhangele Izaia, o kuijiia o ima ia mu bhanga o kilunga kia Jihova ku diulu, ku tu suínisa ku bandekesa o sidivisu ia Nzambi. Tu suína mu kuijiia kuila tua tokala mu kilunga kia Jihova kia mu kalakala kiavulu phala ku kumbidila o kikanenu kia Jihova!

9, 10. Mukonda diahi kua bhingile kilunga kia Jihova mu ixi?

⁹ Bhu kaxi ka Mon’ê Jezú, Jihova ua bhange o kilunga mu ixi phala ku kalakala kumoxi ni kilunga kiê kiene ku diulu. Mukonda diahi kua bhingile kilunga mu ixi, phala ku bhanga o kikalakalu kia kanena mu divulu dia Matesu 24:14? Tu di longe ima itatu.

¹⁰ Kia dianga, Jezú uambe kuila o kikalakalu kia kuboka kieji kuambata o maxibulu mê “katé ni ku maxokololo ma jixi.” (Ika. 1:8) Kia kaiiadi, o ió eji bhanga o kikalakalu kiki eji bhindamena o milongi ia Bibidia, eji bhinga ué ku a suínisa. (Nzu. 21:15-17) Kia katatu, ene eji bhinga ku diongeka phala ku bheza Jihova ni ku di longa o milongi ia lungu ni kuboka. (Jihe. 10:24, 25) Kueji bhinga kikalakalu. Phala ku bhanga o kikalakalu kioso kiki, o maxibulu a Jezú a tokalele ku kalakala kumoxi.

11. Kiebhi ki tu tena ku kuatekesa o kilunga kia Jihova?

¹¹ Kiebhi ki tu tena ku kuatekesa o kilunga kia Jihova? Tu tena ku bhanga kiki mu ku dielela ku jiphange a a solo kua Jihova ni Jezú, phala kuendesa o kikalakalu kia kuboka. Kuene ima iavulu ku mundu iú i tena ku lalamesa o jiphange jiji ja mu kuendesa o kikalakalu kia kuboka. Ihi iene mu bhanga o kilunga kia Jihova mu ixi?

12, 13. Kiebhi o tufunga kia bhanga o kikalakalu kiâ, ni mukonda diahi o kikalakalu kiâ, ki ku suínisa?

¹² O tufunga ku mundu uoso a tambula o ujitu ua kuendesa o kikalakalu kia kuboka mu jixi mua tungu. Ihi ia a bhanga phala ku kuatekesa mu kikalakalu kiki? O mala enhá a lenduka, akua kixikanu a kaiela o itendelesu ia Jihova ni Jezú phala ku bhanga o kikalakalu kia tokala ku bhanga mu ixi. Mu kiki, kioso kia batula o maka ene a kaiela o itendelesu ia Mak’â Nzambi, anga a samba kua Jihova phala ku a kuatekesa.—Jis. 119:105; Mat. 7:7, 8.

¹³ Kála o Jikidistá a kexile ku pholo ku hama ia dianga, lelu o tufunga tua mu kuendesa o kikalakalu kia kuboka a di bhakula mu ‘ukunji uetu ua ku longa o Mak’â Nzambi.’ (Ika. 6:4) Ene a sanguluka kioso kia mona kuila o njimbu iambote a mu i boka katé ku maxokololo a ixi. (Ika. 21:19, 20) Ene ka bhana o  itumu iâ. Mu veji dia kiki, ene a kaiela o itendelesu ia Bibidia ni ia Nzumbi ikôla ia Nzambi, kioso kia bhana o itendelesu phala ku kuatekesa ku sanzumuna o njimbu iambote. (Tanga Ikalakalu 15:28.) Mu ku bhanga kiki, o jiphange jiji a bhana phangu ku jiphange mu kilunga.—Efe. 4:11, 12.

14, 15. (a) Ihi ia mu bhanga o jiphange phala ku tu kuatekesa mu kikalakalu kia kuboka mu ixi ioso? (b) Kiebhi ki u divua mu ku kuatekesa ku bhanga o kikalakalu kia kuboka o Utuminu?

¹⁴ Jiphange javulu a mu kalakala izuua ioso phala ku bhanga o madivulu metu, o iônge ia ilunga, ni iônge ia makota. Mazunda ni mazunda a jiphange a mu kalakala kiavulu phala ku lungulula o madivulu metu mu 600 ja madimi, phala o athu enioso a tene kuijiia “o ima ia makota ia Nzambi!” (Ika. 2:7-11) O ilumba ietu ni minzangala ietu, a kalakala kiavulu phala ku bhanga o madivulu metu. O madivulu a bhanga, a a tumikisa mu ilunga ioso mu ixi, katé muene ni ilunga iala ku maxokololo.

¹⁵ Mu ixi ietu jiphange javulu a mu kalakala ué, phala ku tu kuatekesa kuboka o njimbu iambote. Mu kifika, jiphange javulu a di bhakula mu vondadi iâ phala ku kuatekesa ku tunga o Ididi ia Ubhezelu phala o iônge mu ilunga, ni iônge ia makota. A mukuá a kuatekesa ió a bhiti mu mavuua ni ió a mu kata. Saí jiphange a bhanga ikalakalu ia lungu ni iônge ia makota, a mukua a longa mu ji xikola ja Utuminu. O kikalakalu kioso’ki phala ihi? Phala ku tu kuatekesa ku boka o njimbu iambote, ni ku kula mu nzumbi, ni ku kuatekesa athu kuijiia Jihova. O kilunga kia Jihova mu ixi kiene mu ta ku pholo o ima ia beta-kota!

16. Ihi i ua tokala ku di longa mu ubhezelu uê ku muiji mba kioso ki u di longa ubheka uê?

¹⁶ O kuila saí ithangana tu xinganeka mu kikalakalu kiene mu bhanga o kilunga kia Jihova? Saí jiphange a di longa mu ubhezelu uâ ku muiji mba kioso kia di longa ubheka uâ, o kikalakalu kiene mu bhanga o kilunga kia Jihova, anga a xinganeka mu kikalakalu kiki. Mu kifika, kima kiambote ku di longa o isuma ia Izaia, ni Izekiiele, ni Daniiele, ni Nzuá. O divulu Testemunhas de Jeová—Proclamadores do Reino de Deus ni madivulu metu a mukua, mba o Malonga mu dimi diê dia uvualukilu a tena ku ku kuatekesa kuijiia kiambote o kilunga kia Jihova.

17, 18. (a) Kiebhi kia ku kuatekesa o milongi íii? (b) Ihi i ua tokala ku di ebhuidisa?

¹⁷ Kima kiambote kuijiia o ima ia mu bhanga Jihova bhu kaxi ka kilunga kiê. Tua tokala ué ku ta ku pholo o ima ia beta-kota kumoxi ni kilunga kia Jihova. Se tu bhanga kiki, tua-nda suína, tua-nda kala ni ibanzelu ia Phaulu uambe: “Etu ki tu kala ni usudi, kuma o Nzambi, mu henda iê, muène ua tu bhana o kikalakalu’iki.” (2 Kol. 4:1) Muéne ua suínisa ué o jiphange jê: “Ki tu kalienu ni usudi mu kubhanga kiambote. Kuma hinu ki tu bhixila bhu thembu ia tokala, tua kà bhongolola, se tua kambe kubhuila.”—Nga. 6:9.

¹⁸ O kuila eie mba o muiji uê ua tokala ku lungulula ima ku muenhu, phala ku ta ku pholo o ima ia beta-o-kota izuua ioso? O kuila tu tena ku sosola o ima ku muenhu uetu phala ku bandekesa o sidivisu ia kuboka? Mu milongi i tua-nda di longa, tua-nda di longa ima itanu ia-nda tu kuatekesa kuendela kumoxi ni kilunga kia Jihova.