Eie Ua Di Lembalala?
O kuila ua tange kiambote o milongi ia Mulangidi? Tala se u tena ku tambuijila o ibhuidisu íii::
“Mundu” uebhi ua-nda bhita?
O “mundu” ua-nda bhita, ko ixi, kana, maji o athu mu ixi, kene mu bhanga o vondadi ia Nzambi. (1 Nzuá 2:17) Nzambi ua-nda ‘buika,’ o athu a bhukumuka, phala o athu ambote n’a tene ku kala mu ixi ni ku sanguluka kuoso.—1/1, jimbandu 5-7.
Abele sumbala uafú, kiebhi Abele kiala hanji mu zuela? (Jihe. 11:4)
Mukonda dia kixikanu. Se tu di longa o kixikanu kiê, ni ku kaiela o phangu iê, kia-nda londekesa kuila Abele iu zuele hanji phala etu.—1/1, mbandu 12.
Mu maukexilu ebhi mu tua tokala ku di langa phala ki tu sondoloke kua Jihova?
O maukexilu ia, o ikalakalu ni ufunu, o itonokenu, o ukamba ku muiji, o ima i bhanga o jingijiie, o sauidi, o kitadi, ni ku bhana valolo iavulu mu ukexilu uetu ua ku mona o ima.—15/1, jimbandu 12-21.
Phangu iahi i tu longa o kulenduka kua Mozé?
Mu veji dia ku diela mu kutena kuê, Mozé ua dielela kua Nzambi. Ki tu tokala kuehela kuila o kutena mba uhete, u tu bhangesa ku dizangeleka ku pholo dia akuetu. (Jisa. 3:5, 6)—1/2, mbandu 5.
Kuebhi kua-nda kala o athu a-nda ku a fukununa?
Saí athu—144.000—a-nda kala ku diulu. O athu a mukuá a-nda kala mu ixi. Mu ixi, ene a-nda zediua ni ku kala ni muenhu ua kalelaku mu palaízu.—1/3, mbandu 6.
Ihi i lombolola akua Izalaiele ‘ku saia o mixima?’ (Jel. 9:26)
O mixima iâ ia bhukumukine kinene, mu kiki, a tokalele ku katula ku mixima iâ o ima ia kexile ku a bhangesa ku bhanga o ima ia iibha—kála o ibanzelu mba o jivondadi jâ ja zembele Nzambi. (Jel. 5:23, 24)—15/3, jimbandu 9-10.
Kiebhi Jezú kiexile phangu ia ku zediua ku muenhu?
Muéne uexile ni kima phala ku bhanga ku muenhu, o ku bhanga o vondadi ia Nzambi. Muéne ua zolele kiavulu tat’ê, muéne ua zolele ué kiavulu o athu. Jezú uejidile ué kuila a mu zolele kua tat’ê. Íii o njila phala o ku zediua ku muenhu.—1/4, jimbandu 4-5.
Kiebhi kia di sokejeka o kilunga kia Jihova mu ixi?
Kiala ni Kibuka Kia Utuminu, kibuka kia filiiale, tufunga tua ilunga, kibuka kia tufunga a kilunga, ilunga ni aboki.—15/4, mbandu 29.
O kuila o kufundisa kua nzambi kilondekesa kuila muéne muthu ua iibha?
Jihova ka uabhela o kalunga ka athu akua phulu. (Ize. 33:11) O kibuikilu kia athu m’ukulu, kia londekesa ué kuila Jihova ni henda ioso, u dimuna o athu ande dia ku a buikisa. O ukexilu ua Jihova ua ku fundisa, ku tu bhana kidielelu kia kuila tu tena ku bhuluka kioso Nzambi kia-nda bheka kibuika.—1/5, jimbandu 5-6.
O kuila o ifumbe ia kexile mu jibha mu Izalaiele akexile mu ku a nhengeneka ku taka?
Kana. Ifuxi iavulu m’ukulu akexile mu ku a nhengeneka ku taka maji o akua Izalaiele kana. Maji kioso kia kexile hanji mu kumbidila o itumu mu Mikanda Ikola mu Hebalaiku, o muthu a diangele ku mu jibha mu ku mu bûba ni matadi. (Iji. 20:2, 27) Sumbala kia mu phaphela ku taka mba ku muxi phala ku dimuna akuâ.—15/5, mbandu 13.
Mukonda Diahi o Athu ka Tena ku Bheka Paze mu Ngongo?
Sumbala ni nguzu ia bhanga, o athu ka a bhange ni kutena kua kuendesa o makanda mâ. (Jel. 10:23) Mukonda Satanaji u tumina o mundu, o athu ka-nda tena ku bheka o kutululuka ku mundu. (1 Nzuá 5:19)—1/6, mbandu 16.
