1, 2. (a) Ihi i tua tokala ku bhanga phala ku kala ni ukamba ua mbote ni Jihova? (b) Kiebhi ki tu tena ku katula mbote mu ku di longa o misoso ia athu a a tangele mu Mikanda Ikola a xikinine ku a bazela kua Nzambi?

‘EME-PHE kia ngi uabhela o ku zukama kua Nzambi, mukonda Ngana Jihova Suke-ku, muene o dilengelu diami.’ (Jisá. 73:28) Mu kibatulu kiki, o mukua jisalamu ua londekesa kuila muéne ua dielela kua Nzambi. Ihi ia mu bhangesa ku dielela kua Nzambi? Kioso kia monene kuila o athu a iibha a sangulukile, muéne ua divuile kia iibha. Muéne uambe: ‘Kifua-ze eme nga tale ngó hadi ia ku di zelesa o muxima ni ku sukula o maku’ami phala ki ngi kale ni kikuma.’ (Jisá. 73:2, 3, 13, 21) Maji kioso bokona mu “tembulu ia Nzambi,” a mu kuatekesa o ku lungulula o ibanzelu iê, ni ku kolokota mu ukamba uê ni Nzambi. (Jisá. 73:16-18) Mu kiki, o mukua Jisálamu ua di longo disá dia dikota: Se o muthu u mesena ku kala kamba dia Jihova, muéne ua tokala ku kala selevende iê, ua tokala u xikina kioso Jihova kia mu bazela ni ku kumbidila o itendelesu iê.—Jisá. 73:24.

² Etu uê tua mesena ku kala ni ukamba uambote ni Nzambi ia kidi. Phala tu kale tu makamba a Jihova, tua tokala tu diehela n’a tu umbe bhu kaxi ka itendelesu ni kioso kia tu bazela, phala tu kituke tu athu ambote bhu pholo iê! Mu ukulu, Nzambi ua bhanene ku athu oso o ufôlo ua ku sola se a xikinine kioso kia a bazela, mba kana. O misoso íii, a i soneka mu Bibidia “phala etu ku di longa,” a i soneka ué “phala ku tu dimuna etu. Mukonda tuala mu kithangana kia kuila o dizubhilu dia jithembu dia zukama kiá.” (Loma 15:4; 1 Kol. 10:11) O ku di longa o misoso íii, kia-nda tu kuatekesa kuijiia kiambote Jihova, ni ku di longa kiebhi ki tu tena ku katula mbote kioso kia tu bazela.

3. Kiebhi ki jimbulula o divulu dia Izaia 64:8 ni dia Jelemiia 18:1-6, o kutena kua Jihova ni athu? (Tala o foto ia dianga.)

³ Mu ku jimbulula o kutena kua Jihova ku athu, Izaia 64:8 uambe: ‘Jihova eie u Tat’etu; etu tu utuma, eie u ngumbi ietu; etu ene-oso tu ibhangelu ia maku mê.’ O ngumbi uala ni kutena kua ku umba o utuma kala kia mesena. O utuma ki u tena kuzuela ku ngumbi o kima kia tokala o ku bhanga. Kiene kimoxi ué ni athu, ni Nzambi. Kála o utuma ki u tena ku tumina o ngumbi ku bhanga o ímbia ia tokala, etu ué ki tu tena kuzuela kua Nzambi kiebhi kia tokala o ku tu umba.—Tanga Jelemiia 18:1-6.

4. O kuila Nzambi u jijidika o athu mu ku a umba? Jimbulula.

⁴ Akua Izalaiele a umbu kua Jihova kála o ngumbi kia umba o utuma. Maji o ngumbi ka sokela ni Jihova. O ngumbi u bhanga o utuma kala kia mesena. O kuila Jihova muéne ua bhange o athu ambote ni athu a iibha? O Bibidia iamba kuila, kana. Jihova ua bhana ujitu ua dikota ku athu—o ufôlo ua ku sola. Muéne ka jijidiké o athu phala ku mu belesela. Mu veji dia kiki, o athu a tokala ku sola se a sidivila o Mubhangi uâ Jihova, mba kana.—Tanga Jelemiia 18:7-10.

5. Ihi i bhanga Jihova kioso o athu kia dituna ku a umba?

⁵ Ihi i tuamba se o athu a dituna ku a umba ku Ngumbi ia Dikota? Kiebhi kia-nda londekesa o kutena kuê? Xinganeka ihi i bhanga o ngumbi ni utuma ki uala dingi kiambote? Muéne u sola ku bhanga kima kia mukuá ni utuma iú, mba u u texi! Kiki ki bhita mukonda o utuma ka kalakala nau kiambote. Maji Jihova kene mu lueza kioso kia umba o athu. (Mate. 32:4) O muthu u dituna o ku mu umba kua Jihova, muéne u kala ni kikuma. O ukexilu ua muthu uene u londekesa se Jihova ua-nda mu umba mba kana. O ió a xikina ku a umba kua Jihova, a kala ni valolo bhu pholo iê. Mu kifika, o Jikidistá a a undu, ‘itutu ia ku lenduka,’ ia umbu phala ku kala ‘itutu ia valolo.’ Maji, o ió a dituna ku belesela Nzambi, a kituka ‘itutu ia kambe o valolo, ia tokala ku i jima o mbutu.’—Loma 9:19-23.

6, 7. Ihi ia bhangele o Sobha Davidi ni Sobha Saúlu, kioso kia a bazela kua Jihova?

 ⁶ Jihova umba o athu bhu kaxi ka milongi ia a bhana, ni kioso kia a bazela. Tu tena ku tendelela kiebhi Jihova kia umba o athu, mu ku dilonga o ima ia bhange ni sobha jiiadi ja dianga ja Izalaiele—Saúlu ni Davidi. Kioso o Sobha Davidi kia tele phánda ni Bete-Seba, o kituxi kiê kia bheka ibhidi iavulu kua ene ni ku akuâ. Sumbala Davidi uexile sobha, Jihova ua mu bazela. Jihova ua mu tumikisa njimbu bhu kaxi ka polofeta iê Natane. (2 Sam. 12:1-12) Ihi ia bhange Davidi? Muéne ua diela o kituxi kiê ni muxima uoso. Mukonda Davidi ua diela o kituxi kiê, Jihova ua mu loloka.—Tanga 2 Samuuele 12:13.

 ⁷ O Sobha Saúlu ka bhangele kála kia bhangele Davidi. Bhu kaxi ka polofeta Samuuele Jihova ua mu tendelesa: Jibha akua Amaleke ni iama iâ ioso. Saúlu ka belesela o kitumu kiki kia Nzambi. Muéne ka jibha o sobha Akake, ka jibha ué o iama iambote. Mukonda diahi? Muéne ua mesenene fuma. (1 Sam. 15:1-3, 7-9, 12) Kioso kia mu bazele, Saúlu ua tokalele kuehela ku mu umba ku Ngumbi ia Dikota. Maji Saúlu ua ditunu ku mu umba. Muéne ua banzele kuma ua kexile mu bhanga kima kiambote. Muéne ua banzele kuila, kima kiambote ku bhaka o iama phala ku i satela Jihova, mukonda dia kiki, ka kaiela o itendelesu  ia Samuuele. Jihova ua mu katula o usobha, mu kiki, muéne ua texi o ukamba ué ni Nzambi ia kidi.—Tanga 1 Samuuele 15:13-15, 20-23.

8. Ihi i tu tena ku di longa mu ima ia bhange akua Izalaiele, kioso Jihova kia a bazela?

⁸ Mu veji dia ku bhana ngó o ufôlo ua ku mu belesela ku muthu umoxi, muéne ua bhana ué o ufôlo iú ku ifuxi ioso. Ku mu muvu ua 1513 A.K.K, Nzambi ua bhulula o ana a Izalaiele ku ubhika mu Ijitu, anga u bhanga nau kikutu. Nzambi ua solele akua Izalaiele phala ku kala mundu uê. Mu kiki, ene a kexile ni ufôlo ua ku a umba kua Nzambi, o Ngumbi ia Dikota. Maji o athu iá a kolokota mu ku bhanga ima ia iibha. Katé muene a kexile mu bheza o ji nzambi ja makutu ja jixi ja a kondolokele. Jihova ua a tumikisa o jipolofeta jê mu veji javulu, phala ku a kuatekesa ku lungulula o ukexilu uâ, maji ene ka kaiela o itendelesu iâ. (Jel. 35:12-15) Mukonda Izalaiele ka belesela Jihova, muéne ua a kaxtikala. O akua Asídia, a buika o utuminu ua thunda ua Izalaiele. Mu ku bhita kithangana, o akua Babilonha a lundula o utuminu ua Luji ua tokalele ku akua Judá. Tua di longo disá dia dikota mu phangu íii! Tua-nda katula ngó mbote mu ufôlo ua tu bhana Jihova ua ku tu umba, se tu mu ehela ku tu umba.

9, 10. Ihi ia bhangele akua Ninive, kioso kia a bazela Jihova?

⁹ Jihova ua bhana ué ku mbanza ia Asídia ia ixi ia Ninive, o ufôlo ua ku belesela kioso kia a bazela. Muéne ua zuelela Jona: “Balumuka, u-ie mu  mbanza ia dikota ia Ninive, u kole njimbu ia kibuika kiê, mukonda ituxi iê ia bande kunu, ia ngi bhixila.” Jihova ua kanene ku buika o ixi ia Ninive.—Jona 1:1, 2; 3:1-4.

¹⁰ Kioso Jona kia zuelela o athu o kima kia zuela Jihova, “akua Ninive anga a xikana Nzambi; anga a kola ngonge ia kujila, hé a zuata jisaku ja kidinhanji, tunde ku dikota katé ku ndenge.” O sobha iâ “u balumuka ku kiandu kiê kia ungana, u zula izuatu iê ku mukutu, u zuata saku, anga u xikama mu utôkua.” O akua Ninive a xikina ku a umba kua Jihova, mukonda a diela o ituxi iâ. Mukonda dia kiki, Jihova ka a buika dingi.—Jona 3:5-10.

11. Ihi i tu di longa mu ukexilu ua talatala Jihova o akua Izalaiele ni akua Ninive?

¹¹ Sumbala akua Izalaiele exile mundu ua Nzambi, maji né kiki Jihova ua a bazela. O akua Ninive ká kexile mundu ua Jihova, maji né kiki ene ehela Nzambi ku a umba. Mukonda dia kiki, Jihova ua a lendukila, ka a buika. O phangu jiiadi jiji, ji londekesa kuila Jihova “ka moneka kathômbo k’athu!”—Mate. 10:17.

12, 13. (a) Mukonda diahi Nzambi u loloka ió a diela o ituxi iâ, a xikina ku a umba mba ku a bazela? (b) Mukonda dia ukexilu uê ua ku ‘diela’ ihi ia bhange Jihova, kioso kia te Saúlu o kituxi, ni ihi ia bhange kioso kia diela Ninive?

¹² O ukexilu ua Nzambi ua ku tu umba, ulondekesa kuila muene muthu ua lenduka, ni kuila muéne uejiia o kithangana kia tokala phala ku bhanga kima. Tu tena ku mona o kidi kiki, kioso Jihova kia zuela ku athu kuma ua-nda ku a buika mukonda dia ituxi iâ, maji mu suka-ku, ka a buika mukonda o athu a diela o ituxi iâ. O Mikanda Ikola iamba kuila Jihova ‘ua diela ku tumbika Saúlu ku ungana.’ (1 Sam. 15:11) Kioso akua Ninive a diela o ituxi iâ, anga eha o ku bhanga o ima ia iibha, o Bibidia izuela: ‘Kienhókio Ngana Nzambi anga u mona ikalakalu iâ, ni kioso kia diela ku jinjila jâ, ja bhengalala. Ngana Nzambi anga u lenguluka, u bhomba muxima uê, o kia iibha kia tangele ku a bhanga, ka a bhange-kiu dingi.’—Jona 3:10.

¹³ O kizuelu “ua diela” mu dimi dia Hebalaiku, ki lombolola kuila, o muthu u lungulula o kibanzelu kiê, mba o kima kia mesenene o ku bhanga. Jihova ua tumbika Saúlu ku ungana, maji kioso Saúlu kia mu bhukumukina, muéne ua mu tambula o ungana. Muéne ka tambula o ungana kua Saúlu mukonda ua di nganala kioso kia mu solele, maji ua bhange kiki, mukonda Saúlu ka mu dielele dingi, mu kiki ua mu bhukumukina. Maji kioso o akua Ninive kia diela o ituxi iâ, Nzambi ua a loloka, ka a buika dingi. Kisangusangu kia dikota kuijiia kuila Jihova, o Ngumbi ietu, ua lenduka, uejiia o kithangana kia tokala phala ku bhanga kima, mukua henda, ni kuila muéne u loloka o athu kioso kia diela o ituxi iâ!

14. (a) Kiebhi Jihova kia tu umba? (b) Ihi i tua tokala o ku bhanga kioso Nzambi kia tu umba?

¹⁴ Lelu, Jihova u tu umba bhu kaxi ka Mak’â mê o Bibidia, ni bhu kaxi ka kilunga kiê. (2 Tim. 3:16, 17) Ki tu tokala muene ku xikina kioso kia tu bazela bhu kaxi ka Bibidia, mba ka kilunga kiê? Né muene se a tu batizala kiá ukulu, mba tuala ni maujitu avulu mu kilunga, tua tokala ku kolokota mu ku belesela o itendelesu ia Jihova, phala tu kituke tu itutu ia valolo.

15, 16. (a) Kiebhi ki divua o muthu kioso kia mu tambula o ujitu mba maujitu mu kilunga? Jimbulula. (b) Ihi i tu kuatekesa ku di bhana ni jisonhi kioso kia tu bazela?

 ¹⁵ Saí ithangana a tu bazela mu ku tu longa o ima ia mesena Nzambi ko kuetu. Maji saí ithangana a tu bazela mukonda tua te kituxi. Mukonda dia kiki, nange a tu tambula o ujitu mba maujitu u tuala nau mu kilunga. Xinganeka mu phangu ia Dennis * uexile kafunga. A mu bazela mukonda muéne ka solo kiambote o uenji uê, mukonda dia kiki, ua te kituxi. Kiebhi kia divu Dennis kioso kia bhana ngolokela mu kilunga kuila, a mu katula o ujitu ua ku kala kafunga? Muéne uambe: “Nga divu kála muthu kala dingi ni valolo. Ku 30 a mivu a bhiti, nga kexile ni maujitu avulu mu kilunga. Nga kexile muboki ua thembu ioso, nga sidivile ku Betele, nga kexile múkuatekexi ua tufunga, mu ku suka-ku, a ngi bhele o ujitu ua ku kala kafunga. Ki ku bhitile luua thembu iavulu, tundé ki nga bhange o diskursu diami dia dianga mu kiônge kia dikota. Maji o maujitu oso iâ a texika mu kizuua kimoxi. Nga kexile ni jisonhi, nga banze kuma ki ngi kexile dingi ni kididi mu kilunga.”

¹⁶ Dennis ua tokalele kueha o ima ia iibha ia kexile mu bhanga, ia bhangesa o ku mu bazela. Maji ihi ia mu kuatekesa ku di bhana ni jisonhi ni ima ia mukuá? Muéne ua jimbulula: “Nga solo o ku kolokota ku di longa o Bibidia, ni kuia mu boka, ni kuia mu iônge. O jiphange mu kilunga a ngi kuatekesa kiavulu, o madivulu metu a ngi suínisa ué. O milongi ni diambu: ‘Já Teve Privilégios de Serviço no Passado? Poderá Recuperá-los?’ mu Sentinela 15 de Agosto de 2009, kiexile kala kitambuijilu kia misambu iami. O kitendelesu kia beta o kota ki nga uabhela, kiambele, ‘Mu kithangan’okio ki ua kambe kikalakalu mu kilunga, kolokota mu kula mu nzumbi.’” Mbote iahi ia katula Dennis kioso kia mu bazela? Mu ku bhita mivu muene uambe: “Jihova ua ngi bhana dingi o ujitu ua ku sidivila kala múkuatekexi ua tufunga.”

17. Mbote iahi i katula o muthu ua te o kituxi kioso kia mu kaia mu kilunga? Jimbulula.

¹⁷ O ukexilu ua mukua ua Jihova ua ku bazela o muthu ua te o kituxi, o ku mu kaia mu kilunga. Kioso kia kaia o muthu iú mu kilunga, o kilunga a ki langa mu ima ia iibha ia bhange o muthu iú, ni ku kuatekesa ué o ku diela o kituxi kiê ni ku ki eha. (1 Kol. 5:6, 7, 11) Robert a mu kaiele mu kilunga, anga u bhita 16 a mivu se ku vutuka mu kilunga. Ku mivu ioso íii o jitata jê ni jiphange jê a kolokota mu ufiiele uâ kua Nzambi, ka kexile mu diongeka ni Robert, katé muéne ka kexile ku mu menekena. Tundé Robert kia vutuka mu kilunga, kua bhitile kiá mivu, lelu, muéne ua mu ditunda kiambote mu kilunga. Kioso kia mu ebhula se mukonda diahi muéne ua vutuka mu kilunga, muéne uambe kuila, mukonda o muiji ué ki u kexile mu zuela nê. Muéne uambe ué: “Se o muiji uami ua kexile mu dibhana kiambote n’eme, mba ku ngi menekena, eme ngeji divua kiambote, mu kiki ki ngeji vutuka mu kilunga kia Jihova.”

18. Tua-nda kala utuma uahi se tuehela o Ngumbi ia Dikota ku tu umba?

¹⁸ Nange ki tua-nda bhinga ku tu bazela mu ukexilu iú. Maji ihi i tua-nda bhanga kioso o Ngumbi ietu ia Dikota kia-nda mesena ku tu umba? O kuila tua-nda xikina ku tu umba? Tua-nda kaiela o phangu ia Davidi, mba ia Saúlu? O Ngumbi ia Dikota Tat’etu. Kana ku jimba kuila, ‘Ngana, u bazela uoso ua mu zolo; kala o tata kia longa mona uoso a mua-ndala o mbote.’—Jisa. 3:11, 12.