O IZUELU íii ia tat’etu iene i nga lembalala ngó, muéne uexile diiala dia lenduka, dia uabhele ku kalakala. Muéne ua zolele o ku iuka, mu kiki, ku muvu ua 1953 kioso kia mu tudila o njimbu ia Bibidia muéne ua xikina. Tundé o kizuua kieniókio muéne ua bhangele nguzu phala ku longa o tuana tuê o ima ia kexile mu di longa. Ku dimatekenu, mam’etu ka mesenene ku xisa o ngeleja iê. Maji mu ku bhita kithangana, muéne ua mateka ué ku di longa o Bibidia.

Kia bhonzele ku jitata jetu ku tu longa. Mukonda Mam’etu kejidile ku tanga kiambote, o Tat’etu ua kexile mu kalakala kiavulu ku kizuua. Saí ithangana muéne ua kexile mu bhuila kiavulu, mukonda dia kiki muéne ua kexile mu boua kioso ki tua kexile mu di longa o Bibidia. Maji muéne ua katula mbote mu kikalakalu kia kexile mu bhanga. Eme nga kexile o dikota, mu kiki nga kuatekesa ku longa o phang’ami ia muhatu ni ia diiala. Tua kexile mu zuela ia lungu ni ima ia uabhele kuzuela Tat’etu, kuila Noué ua zolele o muiji ué ni kuila muéne ua belesele Nzambi. Eme nga uabhelele kiavulu o musoso iú ua Bibidia! Mu ku bhita kithangana etu enioso tua kexile múia mu iônge mu Kilunga kiexile mu mbanza ia Roseto degli Abruzzi iala ku costa Adiátrico mu ixi ia Italia.

Ku muvu ua 1955, nga kexile ni 11 ia mivu, eme ni mam’etu, tuai mu kiônge kia dikota mu mbanza ia Loma, kiki kiexile o kiônge kietu kia dianga. Tundé o kizuua kieniókio eme nga zolele o iônge ia makota.

Kua bhitile muvu, anga a ngi batizala, mu ku bhita kithangana nga bokona mu sidivisu ia thembu ioso. Kioso ki nga tenesa 17 a mivu, nga kituka muboki ua katunda mu sanzala ia Latina, ku sulu ia Loma phala ku bhixila ku bhata, tuenda 300 ja kilometu. Iexile sanzala ia ubhe, mu kiki, sé-ku muthu ua thandanganhele ni ima ia kexile mu banza o jivizinhu. Eme ni phange ua kexile mu kalakala n’eme, tua sangulukile kiavulu mukonda tua kexile mu bhana madivulu avulu ku athu, maji mukonda ng’exile hanji ngi mona ndenge, nga kexile ni henda ia muiji uami! Maji né kiki, eme nga mesenene ku kumbidila o kitendelesu kia ngi bhana.

Mu ku bhita kithangana, a ngi tumikisa ku mbanza ia Milão phala ku kuatekesa ku iudika o ima phala o kiônge kia ilunga ia jixi joso kia bhitile ku muvu ua 1963 ia kexile ni diambu  “Jingolokela ji Xalelà-ku ja Njimbu Iambote.” Mu kiônge kiki, nga kalakala ni akuetu kala Paolo Piccioli, phange ia muzangala ua tokalele ku mbanza ia Florença. Mu kizuua kia kaiiadi kia kiônge, muéne ua bhangele diskursu dia suína dia lungu ni akudi. Eme nga banzele kuila, ‘o phange íii ka-nda kazala.’ Tua mateka ku di sonekena mikanda, mu kiki, tua mono kuila o ibanzelu ietu ia di fuile mu ima iavulu—kála o ima i tua mesenene ku bhanga mu kilunga, o henda ietu kua Jihova ni vondadi ia ku mu belesela. Eme ni Paolo tua kazala ku muvu ua 1965.

Nga kalakalele kiá kala muboki ua thembu ioso mu mbanza ia Florença, mu dikuinhi dia mivu. Kiexile kisangusangu kia dikota ku mona o kilunga ku kula mu nzumbi, bhenge-bhenge o minzangala. Eme ni Paolo tua uabhele kiavulu ku bhita kithangana ni minzangala ienii, mu kuzuela nau o Mak’â Nzambi ni ku bhanga itonokenu. Mu ithangana iavulu Paolo ua kexile mu jokala nau malunda a fiti. Mu kidi, nga uabhele ku kala ni muadi uami, maji ngejidile ué kuila o minzangala ni miji mu kilunga, a bhindamene o kikuatekesu kiê.

Ngi sanguluka hanji kioso ki ngi lembalala o maxibulu avulu a Bibidia u tua kexile mu longa. O dixibulu dimoxi Adriana, ua kexile mu zuela ia lungu ni ima ia kexile mu di longa, ni miji jiiadi. O miji íii, ia iudika o kiônge phala kuzuela ni padele ia lungu ni milongi ia jingeleja kála o tilindade ni milongi ia kuila o muthu u kala ku muenhu kioso kia fuá. Kua moneka padele jitatu. Ene ka kexile mu jimbulula kiambote o milongi íii, mu kiki, ki kia bhonzele ku maxibulu metu ku mona kuila o milongi iâ, ki iene i longa o Bibidia. O kiônge kiki, kia kuatekesa o miji íii ku sola o njila ia kidi. Mu ku bhita kithangana, 15 dia athu a tokala ku miji íii, a kituka Jimbangi ja Jihova.

Mu kidi, lelu o ukexilu uetu ua ku boka ki u difu. Mu kithangana kieniókio, Paolo ua kexile ni “uhete” ua kuzuela ni ji padele—mu kiki muéne ua kexile mu diongeka nau mu ithangana iavulu. Saí kithangana muéne ua diongeka ni athu kexile Jimbangi ja Jihova. O ibhuidisu ia kexile mu bhanga o athu kua Paolo, ia londekesa kuila, o padele ua longesa o athu phala ku bhanga o ibhuidisu i mu thandanganhesa. Maji o ima ki i bhiti kala kia mesenene o ji padele. Saí muthu uebhula se kima kiambote o jingeleja ku di ta mu maka a jinguvulu, kala kia kexile mu bhanga kiá mu jihama ja mivu. O ji padele ka tenene ku tambuijila o kibhuidisu kiki. Mu kithangana kieniókio o mukengeji uai, mu kiki o kiônge kia bhu. Mu ku bhita mivu tuevu kuila o ji padele ja longesa muthu phala ku jima o mukengeji, se ene ka tenene ku tambuijila o ibhuidisu.

Mu ku bhita dikuinhi dia mivu kioso ki nga kazala ni Paolo, a tu bhana o ujitu ua ku kalakala kala  kafunga ka ilunga. Paolo ua kexile ni salu iambote, mu kiki, kia bhonzele phala ku xikina o kikalakalu kiki. Kioso ki tua sambe ni ku xinganeka mu maka enhá, etu tua xikana o kikalakalu kiki. Etu tua uabhele kiavulu ku kala ni muiji ua tu zalela. Mu usuku, etu tua kexile mu di longa o Bibidia kumoxi, kioso ki tu zubha ku di longa, Paolo u kuatekesa o an’a ku bhanga o ikalakalu iâ ia xikola. Paolo ua uabhele kiavulu ku tanga, mu kiki muéne ua uabhele kiavulu kuzuela ia lungu ni ima ia kexile mu tanga. Ji Sekunda joso tua kexile mu ia mu boka mu jimbanza ki mu kexile Jimbangi, anga tu bhinga o athu phala kuívua o diskursu mu usuku.

Mu ku bhita mivu iiadi mu sidivisu ia kafunga ka ilunga, a tu bhana o ujitu ua ku kalakala ku Betele mu mbanza ia Loma. Paolo ua kexile mu kalakala mu Departamento Legal. Eme nga kexile mu kalakala mu Inzo mua Bhaka o Madivulu. Kia bhonzele ku lungulula o ukexilu uetu ua muenhu, maji etu tua mesenene ku belesela. Kiexile kisangusangu kia dikota ku mona o kikalakalu kiavulu kia kexile mu moneka mu filiiale, ni ku mona athu avulu a kexile mu kituka Jimbangi ja Jihova mu ixi ia Itália. Mu kithangana kieniókio, o nguvulu mu ixi ia Itália, ia xikina o ubhezelu ua Jimbangi ja Jihova. Tua sangulukile ni kikalakalu kietu.

Kioso ki tuexile mu kalakala mu Betele, o kixikanu kietu kia Bibidia kia lungu ni ku xila manhinga, kia di muange mu ixi ioso ia Itália. Mukonda ku muvu ua 1980 kua moneka maka a lungu ni ku bhana manhinga, a thandanganhesele athu avulu. Saí dikaza diexile Mbangi ia Jihova, a a tatela kuila ene ehela o mon’a ua muhatu kufuá mukonda dia ku kamba ku bhana manhinga, sumbala muéne uafú mukonda dia uhaxi ua kexile nau mu manhinga. kAthu avulu mu Ixi ia Itália, ni mu jixi ja mukua ja zukama, a katele ni uhaxi iú. O jiphange mu Betele a kuatekesa o afundixi a kexile mu zokela o jitata. O kamukanda ni Despertai! a kuatekesa o athu kuijiia ni ku tendela kiambote ihi izuela o Mak’â Nzambi ia lungu ni manhinga. Ku jimbeji jienhojo, Paolo ua kexile mu kalakala 16 a ji ola ku kizuua. Nga bhangele nguzu phala ku mu kuatekesa mu kithangana kieniókio.

Tua kexile kiá ni 20 a mivu a ukaza kioso ki kua moneka kima ki tu ki kingile. Nga kexile ni 41 a mivu, Paolo ua kexile ni 49 a mivu, kioso ki nga mu tangela kuila nga mu divua kala muthu uemita. Nga sange mu kadivulu kê izuelu ia soneka mu kizuua kieniókio iambele: “Musambu: Se kiki kidi, tu kuatekese ku kolokota mu sidivisu ia thembu ioso, phala ki tu zoze mu nzumbi, tu kuatekese ué ku kala jitata jambote, ji bhana phangu mu ku bhanga ima iambote. Ngi kuatekese ku bhanga kima kimoxi ku hama dia ima i ngene mu longa ku ditala mu 30 a mivu.” O ki ngi banza mu musambu iú lelu, ngi mona kuila Jihova ua tambuijila o musambu uê—ni musambu uami.

 O muenhu uetu ua lunguluka kiavulu kioso ki nga vuala Ilaria. Mu kidi, saí ithangana tua kexile mu luuala kala kia tange o divulu dia Jisabhu 24:10 kuila: “Bhu kizuua kia phaxi, se u beleketa, kuabhu, ni nguzu ié itola.” Maji etu tua di suínisa kiavulu mu ithangana ioso.

Lelu, Ilaria uamba kuila ua sanguluka kiavulu, mukonda jitata jê a di bhakuile mu sidivisu ia thembu ioso kioso kia mu vuala. Ithangana ioso muéne ua divu kala muthu a mu zolo mukonda muéne ua kudila ku muiji uambote. Eme nga kexile mu bhita né o kizuua. Kioso Paolo kia kexile mu bhixila ku bhata mu usuku, muéne ua kexile mu bhita né kithangana, ni ku bhanga né itonokenu ni ku mu kuatekesa mu ikalakalu iê ia xikola. Mukonda dia kiki, muéne ua kexile mu zeka tádidi mukonda kioso kia kexile mu zubha ku tonoka ni ku kuatekesa Ilaria, kiene ngó kia kexile mu bhanga o kikalakalu kiê. Ithangana ioso Ilaria ua kexile mu zuela: “Papa, kamba diami dia beta o kota.”

Mu kidi, phala ku kuatekesa Ilaria ku bhanga ima iambote, tua mu longo, saí ithangana kua bhingile ku mu bazela. Mu kifika, saí kizuua muéne ua kexile mu tonoka ni kamba diê, maji ka kexile mu tonoka né kiambote. Ni kikuatekesu kia Bibidia, tua mu londekesa se mukonda diahi muéne ka tokalele ku tonoka mu ukexilu uenhó. Tua mu tumina ku bhinga muloloki kua kamba diê mu kithangana kieniókio.

Ilaria uambe kuila mukonda o jitata jê ja zolele o sidivisu ia kuboka, muéne ué ua zolo o sidivisu íii. Lelu kia kazala kiá, muéne u tendela kiambote o valolo ia ku belesela Jihova, ni ku kaiela o itendelesu iê.

Ku muvu ua 2008 Paolo ua kuata uhaxi ua câncer. Ku dimatekenu kia kexile mu moneka kuila Paolo ueji disanza, muéne ua ngi suínisa kiavulu. Tua bhange nguzu phala ku sota o ji dotolo ja beta o kota phala ku saka Paolo. Eme ni Ilaria tua sambe kiavulu kua Jihova phala ku tu kuatekesa ku di bhana ni ibhidi íii ni ku suína. Kia ngi bhonzele ku mona o diiala dia suína, ku zoza bhofele-bhofele. Kioso Paolo kiafú ku muvu ua 2010, kia ngi katele kiavulu. Maji ngi sanguluka kioso ki ngi xinganeka o kikalakalu ki tua bhange mu 45 a mivu a ukaza uetu. Tua bhange ioso phala ku sidivila Jihova. Ngejiia kuila muéne ka-nda jimba o kikalakalu ki tua bhange. Nga mu kingila o kithangana kia-nda di kumbidila o izuelu iala mu divulu Nzuá 5:28, 29, phala ku mona o difukunukinu dia Paolo.

Moxi diami, muene hanji o kilumba kia zolele o musoso ua Noué. Kiene ki ngene mu banza hanji lelu. Nga mesena hanji ku belesela Jihova, kima kioso, kioso kia ngi bhinga, ngi mu belesela. Ngejiia kuila ki kala ima ia bhonzo, mba kufuá, ki i sokela ni mabesá a tu bhana Nzambi ietu mukua henda. Nga mono ku muenhu uami kuila, o ku belesela Jihova, kiene o kima kia beta-o-kota ku muenhu uami.