O phang’etu Angela, * dikudi uala ni 30 a mivu. O tufunga a-nda kuíza ku mu kunda mukonda dia kiki muene uala ni hele iavulu. Ihi ia-nda zuela nê o tufunga? Muéne ua fongo mu iônge, ua bhuila, mukonda ua bhitile kizuua kia muvimba mu kikalakalu kiê kia ku kuatekesa o Adiakimi. Muéne ka kuatekesa ngó o adiakimi, maji ua thandanganhele ué ni manhã ua kate.

Se eie uexile kafunga uendele mu kunda Angela, ihi i ueji zuela ku ‘phange íii ia bhuila?’ (Jel. 31:25) Kiebhi ki ueji di pelepalala, phala ku kunda o phange íii ia bhuila?

Saí ithangana tu bhuila mukonda dia salu ietu, mba ikalakalu mu kilunga. Mu kifika, o polofeta Daniiele ‘ua divuile kia iibha,’ kioso kia monene o kisuma kia mu bhonzele ku ki tendela. (Dan. 8:27) Maji a mu kuatekesa kioso kia mu monekena o anju Ngabidiiele. O njimbu ia Nzambi ia bhanene kua Daniiele bhu kaxi ka anju ia jimbulula o kisuma, kiki kia mu bhana kidielelu kuila Nzambi uevuile o misambu iê, iu ua mu londekesele kuma muéne ‘muthu a mu zolele kinéne.’ (Dan. 9:21-23) Mu ku bhita kithangana, kua moneka anju ia mukuá ia suínisa ué Daniiele ni izuelu kála íii.—Dan. 10:19.

Kiene kimoxi ué kioso ki uia mu kunda phange ua bhuila mu nzumbi, katula kithangana phala ku xinganeka mu maka a mu bhita nau. Maka ahi a mu bhita nau? Kiebhi o maka enhá kia tena ku mu bhangesa  ku divua kia iibha? Ukexilu uahi ua mbote uene mu londekesa? Richard kafunga kiá mu 20 a mivu uambe: “Eme ngi xinganeka o ídifua iambote iala na-iu o jiphange jami.” Muéne uambe dingi: “Mu ku xinganeka mu maka a mu bhita nau, ande dia kuia mu ku a kunda, ngi tena ku a kuatekesa mu maka a mu bhita nau.” Se ua-nda kuia ni kafunga ni mukuenu, mukonda diahi ki mu zuela mudienu o maka a mu bhita nau o jiphange?

Kiene mu bhonza o jiphange ku tangela o tufunga o maka a mu bhita nau. Mu kifika, nange ki bhonza kua phang’ê ku ku tangela o maka a mu bhita nau. Ihi i ua tokala o ku bhanga phala ki ki bhonze kua phang’ê ku ku tangela o maka a mu bhita nau? O kima ki tena ku ku kuatekesa, o ku sanguluka mba kuzuela kima kia uabha kioso ki u bokona. Michael kafunga kiá mu 40 a mivu, kioso kiaia mu kunda phange, muéne u mateka kuzuela kiki: “Eie ua kijiia, o ujitu ua dikota uala nau o tufunga, o ku kunda o jiphange ku mabhata mâ, ni ku a ejiia kiambote. Mukonda dia kiki, nga sanguluka kiavulu mu kuíza mu ku u kunda lelu.”

Ande dia ku mateka ku zuela ni phange, ua tokala u dianga o ku samba nê. Mu misambu iê, o poxolo Phaulu ua tumbula o ídifua iambote ia jiphange, kála o kixikanu, o henda ni muanhu. (1 Tes. 1:2, 3) Kioso ki u mu tumbula o ídifua iê mu musambu, u di kuatekesa eie mudiê, u kuatekesa ué o phange ku divua kiambote phala ku u tangela ia mu bhita na-iu. Se u bhanga kiki ua-nda tena ku mu suínisa. O phange Ray, kafunga ko kulu, uambe: “Saí ithangana, o ima iambote i tua bhange tu i jimba, mu kiki, se muthu u tu lembalesa o ima íii, ki tu suínisa kiavulu.”

Kála kia bhangele Phaulu eie u tena ku bhana “mabesá ma nzumbi,” mu ku tanga nê o Bibidia, né ngó se kibatulu kimoxi. (Loma 1:11) Mu kifika, o phange ua luuala  kiavulu, nange u divua kála kala ni valolo, kála kia divuile o mukua jisalamu ua di sokesele ni ‘mbinda ia nhiengena bhu dixi.’ (Jisá. 119:83, 176) Kioso ki u zubha ku tanga o kibatulu kiki, u tena ku zuelela o phange kuila eie ‘ku jimbi’ o itumu ia Nzambi.

O kuila o kifika kia iphaka ia phalata, kieji tula ku muxima ua phange ua xisa o kilunga, mba ua zoza mu nzumbi? (Luka 15:8-10) Nange o kiphaka kia phalata kia tundile ku musanga a u bhangele ni iphaka iavulu ia phalata. Kioso ki u jimbulula o kifika kiki ku phange, u tena ku mu kuatekesa ku mona kuila muéne uala ni valolo mu kilunga. Kioso ki u zubha o ku mu jimbuluila, eie u tena ku mu kuatekesa ku mona kuila, Jihova u mu langa kála kambudi.

O jiphange jetu ja uabhela kuzuela o milongi ia tange mu Bibidia. Mu kiki, k’eie ngó ua tokala kuzuela! Kioso ki u zubha ku tanga o velusu ilondekesa o maka ala nau, u tena ku sola kizuelu anga u a bhinga ku zuela ihi ia banza. Mu kifika, kioso kia zubha ku tanga o divulu dia 2 Kolindo 4:16, o kafunga nange uibhula: “O kuila ua mono kiá kiebhi Jihova kia ku suínisa?” O kuibhula kiki, ku tena ku bhangesa kuila, ‘mu di suínisa mudienu.’—Loma 1:12.

U tena ué ku suínisa phang’iê ua luuala, mu ku mu tangela musoso ua muthu a mu tange mu Bibidia, ua bhitile ué ni maka kála muéne. O muthu ua luuala, nange u divua kála kia kexile mu divuua Hana mba Epafrodito. Saí kithangana o kiiadi kiki kia luualele kiavulu, maji né kiki, akexile hanji ni valolo kua Nzambi. (1 Sam. 1:9-11, 20; Fil. 2:25-30) Mukonda diahi ku tange o phangu ia athu a mukuá a a tange mu Bibidia, se ki bhinga?

Kioso ki u zubha o ku kunda phange ia diiala mba ia muhatu, kana ku jimba ku a suua. (Ika. 15:36) Mu ku bhita kithangana kia ku kunda phange, o kima kiambote o ku bakana nê, phala mu kalakale kumoxi mu sidivisu ia kuboka. Bernard, kafunga ka uhete, kioso kia takajana ni phange a mu kundile, muéne u mu ibhuidisa ia lungu ni milongi ia mu bhanene, muéne u mu ambela kiki: “Ngi tangele, o kuila o milongi ia ku kuatekesa?” O ku thandanganha ni phange, kua-nda londekesa se muéne ua bhindamena dingi kikuatekesu mba kana.

O jiphange jetu a tokala kuijiia kuila a a zolo, ni kuila ene mu ku a suua. (1 Tes. 5:11) Mukonda dia kiki, ande dia kuia mu kunda phange, katula kithangana phala ku xinganeka mu maka a mu bhita nau o jiphange jê. Kioso ki ua-ndaia mu kunda, dianga o kusamba. Sola kiambote o ibatulu ia Bibidia. Mu kusuka-ku sota izuelu iambote i tululukisa o muxima ua phange ka mu ‘divuua kiambote’!