Veji ji kuxi ji ua zuela kiki, mba ua ki zuelela akuenu, kioso ki ua jikula o Mulangidi uê? O jifoto ni ifikula i moneka mu Mulangidi, a i bhange ni uhete phala ku xinganeka. Ji tu longa, ji tu kuatekesa ku xinganeka. Ji tu kuatekesa kioso ki tu pelepalala phala ku tambuijila o ibhuidisu ia Mulangidi ua ku di Longa.

Mu kifika, i tu bhangesa ku xinganeka se mukonda diahi a solo o foto ia dianga phala o milongi i tua-nda di longa. Ihi ilondekesa o foto? Kiebhi, iene ia di sokejeka ni milongi mba kibatulu kia Bibidia? Xinganeka kiebhi o foto ia dianga ni jifoto ja mukuá ja lungu ni diambu di tua mu di longa, ji tena ku ku kuatekesa.

O phange ua mu kuendesa o milongi ia Mulangidi, ua tokala kuehela o ji phange ku jimbulula o ifikula, ni kuzuela o phangu i tu tena ku katula ku jifoto. Saí ithangana mu milongi i tua mu di longa mu moneka izuelu ia lungu ni foto. Mu ithangana ia mukuá o phange ua mu kuendesa o milongi muene ua tokala ku sola o kaxi bhua tokala o jiphange ku jimbulula o foto. Kiki-phe o jiphange joso a tena ku katula mbote mu kikalakalu kia mu bhanga o jiphange phala ku tu kuatekesa ku xinganeka mu milongi iala mu Mak’â Nzambi.

Saí phange uambe, “Kioso ki ngi zubha ku tanga o milongi, o jifoto ji kala kála uiki ku thandu a bolo.”