1. Ihi ia sange Nehemiia kioso kia vutuka mu Jeluzame? (Tala o foto ia dianga.)

O AKUA Jeluzaleme a thandanganha. Saí muthu a muijiia kiambote kuila nguma ia Jihova uala mu tembulu. O Jilevita ka mu bhanga dingi o kikalakalu kiá. Mu veji dia kuendesa o ima mu kilunga, o tufunga a mu ta uenji mu kizuua kia Sábhalu. Akua Izalaiele avulu a mu kazala ni akua jixi jengi ki Jijudé. Íii iene o ima ia iibha ia sangele Nehemiia, kioso kia vutuka mu Jeluzaleme.—Neh. 13:6.

2. Mukonda diahi o akua Izalaiele exile mundu ua di tunguile mu ifuxi iéngi?

² O kifuxi kia Izalaiele kia di bhakuile kua Nzambi. Ku muvu ua 1513 A.K.K., o akua Izalaiele a mesenene kiavulu ku bhanga o vondadi ia Jihova. Ene ambe: “Maka moso ma tange Jihova, ene muene u tu bhanga.” (Mak. 24:3) Mu kiki Nzambi, ua a tungula mba ua a solo phala ku kala mundu uê. Iú uexile ujitu ua dikota! Mu ku bhita makuinhi a uana a mivu, Mozé ua a lembalesa: ‘Mbata eie ki ual’okio u mundu ua ngene ua Jihova Nzambi iê; O Jihova Nzambi iê ua ku tungula mu’axaxe ka ifuxi ioso ia tungu k’ulu dia mundu, phala u kale kiá u mundu ua mu fuama muéne ngó.’—Mate. 7:6.

3. Kiebhi kia kiexile o ubhezelu ua kidi, kioso Nehemiia kia vutuka mu veji ia kaiiadi mu Jeluzaleme?

³ O ku sanguluka kua akua Izalaiele mukonda dia ku a tungula, ki kua nangenena. Sumbala kuexile Jijudé akexile mu bhanga o vondadi ia Jihova, maji avulu a mesenene ngó ku dilondekesa kuila a di tungula, maji ka mesenene ku bhanga o vondadi ia Nzambi. Kioso Nehemiia kia bhixila mu Jeluzaleme mu veji ia kaiiadi, kua bhitile kia hama ia mivu tundé kia vutukile o akua Izalaiele exile jifiiele, a tundile ku Babilonha, phala ku mateka o ubhezelu ua kidi. Muéne ua mono dingi kuila o akua Izalaiele ka kexile mu bhanga o vondadi ia Nzambi.

4. Ima iebhi i tua-nda di longa i tena ku tu kuatekesa ku kolokota phala ku kala tu mundu ua di tungula?

⁴ Kála o akua Izalaiele, lelu o Jimbangi joso ja Jihova, a a tungula kua Nzambi. Ki kale o Jikidistá a a undu kala  o “mundu uavulu,” ene oso a a tungula, a a solo phala ku bhanga o sidivisu ia Nzambi. (Dij. 7:9, 14, 15; 1 Kol. 6:11) Se-ku muthu mu dietu ua mesena ku texi o ukamba uê ni Nzambi, kála kia bhangele akua Izalaiele. Ihi i tena ku tu kuatekesa ku dilanga, phala tu kolokote ku di tungula ni ku bhanga o sidivisu ia Jihova? Mu milongi íii, tua-nda di longa ima iuana ia tange mu divulu dia Nehemiia mu kibatulu kia 13: (1) O kueha o ukamba ni athu a iibha; (2) ku kuatekesa o sidivisu ia Jihova; (3) o ku ta o ima ia nzumbi ku pholo; ni (4) ku langa o ukexilu uê ua Kidistá. Tu di longe kiambote o jipondo jiji.

5, 6. A nanhi exile Eliiasibe ni Tobiia, ni mukonda diahi tuamba kuila Eliiasibe ni Tobiia exile makamba?

⁵Tanga Nehemiia 13:4-9. A tu kondoloka ku ima iavulu ia iibha, mu kiki, ki bhonza ku kolokota mu ku di tungula. Xinganeka Eliiasibe ni Tobiia. Eliiasibe uexile mukunji ua dikota, Tobiia mukua Amone, ua kexile mu kalakala phala o sobha ia Pélesa. Tobiia ni makamba mê a bhangele ioso phala ku fidisa Nehemiia ku tunga o ilumbu ia Jeluzaleme. (Neh. 2:10) O akua Amone, ka tokalele ku zukama mu tembulu. (Mate. 23:3) Mu kiki, mukonda diahi o mukunji ua dikota uehela Tobiia ku kala mu xilu dia ku jandala, mu tembulu?

⁶ Tobiia uexile dikamba dia Eliiasibe. Tobiia ni mon’ê Johanane a kazele ni ahatu akua Judá, Jijudé javulu akexile mu ximana kiavulu Tobiia. (Neh. 6:17-19) O mulaula a Eliiasibe Manasa, ua kazele ni mona a Sambalate, mukua Samádia, uexile dikamba dia Tobiia. (Neh. 13:28) O ukamba uoso iú ku muiji, ua bhangesa o Mukunji ua Dikota Eliiasibe kuehela Tobiia, kexile mubhezi ua Nzambi, ku mu longa ima ka tokalele ku i bhanga. Maji Nehemiia ua londekesa o ufiiele uê kua Jihova mu ku texi o ima ioso ia Tobiia ia kexile mu xilu ia ku jandala.

7. Ihi i bhanga o tufunga ni abhezi a mukuá, phala ka kambe ku di tungula bhu pholo ia Jihova?

⁷ Mukonda tu mundu ua di bhakula kua Nzambi, o ufiiele uetu kua Jihova uene ua tokala ku dianga ku muenhu uetu. Sé ki tu kaiela o itumu ia iuka ia Nzambi, ki tua-nda kala tu athu a di tungula bhu pholo iê. Ki tu tokala kuehela o ukamba uetu ku muiji, ku tu fidisa ku kaiela o itumu ia Bibidia. O tufunga mu kilunga a kaiela o itendelesu ia Jihova, ka bhange o ima ia mesena ene. (1 Tim. 5:21) O tufunga a dilanga phala ka bhange ima iaiibha, ia a fidisa o ku kala ni ukamba ni Nzambi.—1Tim. 2:8.

8. Ihi ia tokala ku di lembalala o jiselevende joso ja Jihova, ia lungu ni makamba a sola?

⁸ Kima kiambote ku di lembalala kuila, “o ku di lunga ni athu aiibha, ku bolesa o ifua iambote.” (1 Kol. 15:33) Saí jindandu jetu a tena ku tu suínisa ku bhanga ima ia iibha. Eliiasibe ua bhanene phangu iambote ku athu, kioso kia kuatekesa Nehemiia ku tunga dingi o ilumbu ia Jeluzaleme. (Neh. 3:1) Maji mu ku bhita kithangana Tobiia ni akuâ, a bhangesa Eliiasibe ku bhanga ima ia mu fidisa ku di tungula bhu pholo ia Jihova. O makamba ambote, a tu suínisa ku bhanga ima iambote, kála o ku tanga o Bibidia, kuia mu iônge ni kuia mu sidivisu ia ku boka. Tu sakidila kiavulu kioso o muiji uetu u tu suínisa ku bhanga ima iambote.

9. Mukonda diahi o ima mu tembulu ki i kexile mu kuenda kiambote? A nanhi a a tatela kua Nehemiia mukonda dia maka enhá?

⁹Tanga Nehemiia 13:10-13. Tu mona kuma o athu ka kexile dingi mu sangela kitadi mu tembulu, kioso kia vutuka Nehemiia mu Jeluzaleme. O Jilevita akexile mu kueha o kikalakalu kiá phala kuia mu kalakala mu mábhia mâ, mukonda ka kexile dingi ku a kuatekesa. Nehemiia ua tatela o athu akexile ku pholo, mukonda dia maka enhá. Ene ka kexile mu bhanga o  kikalakalu kiâ. Nange, ene ka kexile mu tambula o kitadi ku athu, se akexile mu tambula o kitadi, ka kexile mu ki bhana mu tembulu kála kia a tumine ku bhanga. (Neh. 12:44) Mu kiki, Nehemiia ua bhangele ioso phala o athu ku sangela o kitadi. Muéne ua solo o maiala a kidi phala ku tambula konda ia tembulu, ni kitadi kieji sangela o athu.

10, 11. Kiebhi muthu ni muthu u tena ku kuatekesa o ubhezelu ua kidi?

¹⁰ O kuila tu tena ku katula phangu mu musoso iú? Xe, mukonda a tu lembalala kuila, tuala ni ujitu ua ku bhana kijingu kua Jihova ni jimbongo jetu. (Jisa. 3:9) Kioso ki tu sangela kitadi phala ku kuatekesa o sidivisu iê, tua mu bhana ngó o ima ia mu tokala kiá. (1 Mal. 29:14-16) Nange ki tuala ni ima iavulu phala ku sangela, maji se tu kala ni vondadi ia ku sangela, etu enioso tu tena ku sangela.—2 Kol. 8:12.

¹¹ Ku mivu iavulu, saí muiji ua kexile mu zalela dikaza dia muadiakimi, muboki ua katunda, veji imoxi ku semana phala kudia na-u. Sumbala o muiji ua kexile ni dinake dia ana, o mama ua kexile mu zuela, “O kuila o ku ta dingi malonga aiadi ku meza o te kiá phala o dikuinhi dia athu, maka?” Nange tu mona kuila o ku bhana o kudia mu veji imoxi ku semana ki kima, maji o aboki a katunda, a sangulukile kiavulu! Maji ene exile ué dibesá phala o muiji. O izuelu ia suína ni phangu ia aboki ió, ia kuatekesa o ana ku kula mu nzumbi. Mu ku bhita kithangana, o ana oso a di bhakula mu sidivisu ia thembu ioso.

12. Phangu iahi i bhana o tufunga ni akuatekexi a tufunga mu kuendesa o kilunga kia Jihova?

¹² O phangu ia mukuá i tu katula mu musoso iú, íii: Kála kia bhangele Nehemiia, saí maiala lelu, a a solo phala kuendesa o kilunga kia Jihova. O athu a mukuá mu kilunga, a katula mbote mu phangu iâ. Mu kiki, o tufunga a kaiela ué o phangu ia poxolo Phaulu. Muéne ua kuatekesa o kilunga kia Jihova mu ku bhana itendelesu iambote. Mu kifika, muéne ua bhana itendelesu iavulu ia lungu ni ku sangela kitadi.—1 Kol. 16:1-3; 2 Kol. 9:5-7.

13. Ihi ia kexile mu bhanga o Jijudé mu kizuua kia Sábhalu?

¹³Tanga Nehemiia 13:15-21. Se tu thandanganha kiavulu ni jimbongo, bhofele-bhofele, tua-nda zoza mu nzumbi. Kála ki tanga o divulu dia Makatukilu 31:13, o Sábhalu joso ja semana jexile kithangana kia ku lembalesa akua Izalaiele kuila, exile mundu ua di tungula. O kizuua kia Sábhalu, a ki solele phala o ubhezelu ku muiji, phala kusamba ni ku xinganeka mu Kitumu kia Nzambi. Maji phala o athu a mukuá mu  izuua ia Nehemiia, o kizuua kia Sábhalu kia sokele ni izuua ia mukuá—kiexile kizuua phala ku ta uenji. Ka kexile dingi mu bhana valolo ku ubhezelu. Kioso kia mono o ima íii, Nehemiia ua kexile mu jika o mabhitu a mbanza mu kizuua kia kasamanu mu usuku, ni ku kaia o athu a tokalele ku jixi jengi akexile mu kuíza mu ta o uenji, ande dia ku mateka o Sábhalu.

14, 15. (a) Ihi i tena ku bhita n’etu se tu thandanganha kiavulu ni mauenji metu? (b) Kiebhi ki tu tena ku bokona mu dinhohenu dia Nzambi?

¹⁴ Ihi i tu di longa mu phangu ia Nehemiia? Kia dianga, ki tu tokala ku thandanganha kiavulu ni mauenji metu. Se tu bhanga kiki, tua-nda landuka—tua-nda thandanganha dingi ni salu ietu—bhenge-bhenge se tua uabhela kiavulu o salu ietu. Lembalala o kitendelesu kia Jezú kia lungu ni ku sidivila ngana jiiadi. (Tanga Matesu 6:24.) Nehemiia ua kexile ni jimbongo, maji ihi ia bhange mu Jeluzaleme? (Neh. 5:14-18) Mu veji dia ku ta uenji ni akua Tilo mba athu a mukuá, muéne ua bhangele nguzu phala ku kuatekesa o jiphange jê, ua bhangele ué ima ia mukuá ia kuatekesa ku bhana kijingu ku dijina dia Jihova. Lelu ué kiene kimoxi, o tufunga ni akuatekexi a tufunga, a bhanga nguzu phala ku kuatekesa o kilunga, mu kiki, o jiphange mu kilunga, a a zola kiavulu, mukonda dia ukexilu uâ. Mukonda dia kiki, o mundu ua Nzambi mu kilunga a di zola mudiâ, a tululuka, a divua kiambote bhu kididi kia kondama.—Ize. 34:25, 28.

¹⁵ Sumbala ka jijidika o Jikidistá ku bhaka o ji Sábhalu joso ja semana, maji Phaulu u tu tangela kuila, “hanji kua xala dinhohenu dia ngene dia athu a Nzambi, kala o dinhohenu dia Nzambi mu kizuua kia kasambuadi.” Muéne uambe dingi: “Uoso ua bokona mu dinhohenu dia Nzambi, ua zumbuka ku ikalakalu iê, uila kia zumbukile Nzambi ku kikalakalu kiê.” (Jihe. 4:9, 10) Mukonda tu Jikidistá, tu tena ku bokona mu dinhohenu dia Nzambi, se tu mu belesela mu ku mu kuatekesa ku kumbidila o vondadi iê. O kuila eie ni muiji uê mua mu ta Jihova ku pholo ku mienhu ienu, mu ku bhanga o ubhezelu ku muiji, kuia mu iônge ni kuia mu boka? Ni ku suína kuoso tua tokala ku jimbuluila kiambote kua xefe ietu ku salu, ni athu a mukuá u tu ta na-u o uenji, ia lungu ni ubhezelu uetu, bhenge-bhenge se ene ka mono kiambote o ukexilu uetu ua ku ta ku pholo o sidivisu ietu mu kilunga. Mu kiki, tua tokala ku ‘jika o mabhitu a mbanza ni ku kaia akua Tilu,’ phala tu te ku pholo o ima mu nzumbi. Mukonda a tu tungula, tua tokala ku dibhuidisa, ‘O kuila o ukexilu uami u londekesa kuma a ngi solo phala ku bhanga o sidivisu ia Jihova?’—Mat. 6:33.

16. Kiebhi akua Izalaiele mu izuua ia Nehemiia kia zukamene ku texi o ujitu uâ ua ku kala mundu ua Nzambi ua di tungula?

¹⁶Tanga Nehemiia 13:23-27. Mu izuua ia Nehemiia, o maiala akua Izalaiele akexile mu kazala ni ahatu akua ifuxi iéngi. Kioso kia kundu Jeluzaleme mu veji ia dianga, Nehemiia ua jijidika o maiala oso exile adiakimi, phala ku soneka mukanda mua kanena kuila keji kazala ni ahatu ka bhezele Nzambi. (Neh. 9:38; 10:30) Maji, mu ku bhita mivu, kioso kia vutuka dingi, muéne ua mono kuila, o maiala a Jijudé ka kazala ngó ni ahatu exile asonhi, maji a zukamene mu ku texi o ujitu uâ, ua ku kala mundu ua Nzambi ua di tungula! O ana a vualele o ahatu ió asonhi, kejidile kuzuela mba ku tanga o dimi dia Hebalaiku. O kuila ene eji di mona kala akua Izalaiele kioso kieji kula? Anga eji di mona kala akua Asdode, akua Amone, mba akua Mouabhe? Sé kuijiia o dimi dia Ngeleku, nange ene keji tendela o Kitumu kia Nzambi. Kiebhi kieji kuijiia Jihova ni ku sola o ku mu sidivila mu veji dia ku sola o ji nzambi ja kexile mu bheza o ji  mama jâ? Kua bhingile ku batula o maka iâ ni lusolo. Mu kiki, Nehemiia ua batula o maka iá.—Neh. 13:28.

17. Kiebhi o jitata kia tena ku kuatekesa o ana ku kala ni ukamba ni Jihova?

¹⁷ Lelu tua tokala ku bhanga kima phala ku kuatekesa o an’etu ku di tungula. Enu mu jitata di ebhudisienu: ‘O kuila o an’ami a zuela kiambote o “dimi dia zele,” dia kidi kia Bibidia? (Sof. 3:9) O kuila ima i zuela o an’ami i londekesa kuila a mu belesela Nzambi, mba a mu belesela o mundu?’ Kana ku bhuila se u mona kuila o an’ê a bhingi ku lungulula o ukexilu uâ. Ku bhinga kithangana phala ku di longa o dimi, bhenge-bhenge se kuene ima iavulu i tu landukisa. Ima iavulu ia mu jijidika o an’ê ku bhukumukina Jihova. Mu kiki, ni muanhu uoso ua tokala ku bhanga nguzu phala ku kuatekesa o an’ê ku kala ni ukamba ni Jihova, bhenge-bhenge mu izuua ia ubhezelu ku muiji. (Mate. 6:6-9) Jimbulula o mabesá ijila mu ku kamba ku bhanga mbandu ku mundu ua Satanaji. (Nzuá 17:15-17) Bhanga ioso phala ku tula o njimbu ku mixima iâ.

18. Mukonda diahi o jitata Jikidistá ene a tokala ku kuatekesa o tuana tuâ ku di bhakula kua Jihova?

¹⁸ Mu ku suka-ko, kala mona ua-nda sola se u sidivila Nzambi mba kana. Maji né kiki, o jitata a tena ku a kuatekesa mu maukexilu avulu. Kiki kilombolola ku bhana phangu iambote, ku jimbulula kiambote o ima ia tokala ni ima ki i tokala ku bhanga o jikidistá, ni ku a kuatekesa ku tendela kiambote o mabesá mba ibhidi ijila mu ima i tu sola. Jitata, se-ku muthu uéngi u tena ku kuatekesa kiambote o anenu ku di bhakula kua Jihova. Ene a bhingi o kikuatekesu kienu phala ku di bhakula kua Nzambi, ni ku kolokota ku di tungula. Mu kidi etu enioso tua tokala ku di langa, phala ki tu texi o ‘izuatu ietu ia zele,’ ia kifika—o ídifua iambote ni itumu ilondekesa kuila tu akaiedi a Kristu.—Dij. 3:4, 5; 16:15.

19, 20. Ihi i tua tokala ku bhanga phala Jihova ka tu jimbe mu ‘ima iambote i tua bhange?’

¹⁹ O Polofeta Malakiia uexile ku muenhu mu Izuua ia Nehemiia uambe kuila, ‘anga u ki soneka mu divulu kuma dilembalelu . . . kua iá akua uôma uê; iá ene mu xila o Dijina diê.’ (Mal. 3:16, 17) Nzambi ka-nda jimba ió ala ni uôma uê, ni ió a zolo o dijina diê.—Jihe. 6:10.

²⁰ Nehemiia ua sambe: ‘Eie-phe, Nzambi iami, ngi te jinge o muxima, mbé phala o mbote iami.’ (Neh. 13:31) Kála Nehemiia, o majina metu a-nda kala mu divulu dia Nzambi dia dilembalelu se tu kolokota mu kueha o ukamba ni athu a iibha, ku kuatekesa o sidivisu ia Jihova, o kuta o ima ia nzumbi ku pholo, ni ku langa o ukexilu uetu ua Kidistá. Tu di ‘ditonginine kiambote phala tu mone se tuala mu kuxikana.’ (2 Kol. 13:5) Se tu kolokota mu ukamba uetu ni Jihova, muéne ka-nda jimba ‘o ima iambote i tua bhange.’