O Sobha ia Asídia ua kexile mu sota Ilizeu o polofeta ia Nzambi, phala ku mu jibha, muéne uevu kuila ua kexile mu Mbanza ia Dotane a i kondolokele ku ilumbu, ku mulundu. Mu usuku, o Sobha ia Asídia ua tumikisa jikabalu ni makalu a ita, ni masoladi mu Dotane. Kioso ki kuákie, o masoladi a kondoloka o mbanza.—2 Jis. 6:13, 14.

Kioso o múkuatekexi ua Ilizeu kia tubhuka bhu kanga, ua mono o jinguma. Muéne ua dikola. ‘Uaué! Muadi, tata! Tua-nda ku bhanga kiebhi?’ Ilizeu uambe: “Ku kale ni uôma. Mukonda ala ni etu a beta kota, o ala ni ene ala ndenge.” O musoso u suluka: ‘Jihova anga u jikula o mesu a mubhika, muéne u tala, o mulundu uoso uezala jikabalu ni makalu a túbhia ku jimbandu joso ja Ilizeu.’ (2 Jis. 6:15-17) Ihi i tu longa o musoso iú ni misoso ia mukuá ia bhitile ku muenhu ua Ilizeu?

Ilizeu ua tululukile mu ioso ia kexile mu bhita kioso kia a kondolokele ku masoladi akua Asídia, mukonda muéne ua dielele kua Jihova, ua kexile mu mona kuila Jihova ua kexile mu ku a fikidila. Lelu ki tu kingila ku mona madiuanu, maji tuejiia kuila Jihova ua mu fikidila o jiselevende jê. Mu kidi, a tu kondoloka ué ku makalu ni jikabalu ja túbhia. Se tu kala ni kixikanu kia kuila Jihova u fikidila o mundu uê, se tu mu dielela ithangana ioso, tua-nda divua kuma a mu tu langa tua-nda tambula mabesá avulu kua Jihova. (Jisá. 4:8) Tu xinganeke kiebhi ki tu tena ku katula mbote ku izulukutu íii ni ia mukua ia bhitile ku muenhu ua Ilizeu.

Saí kizuua Ilizeu ua kexile ku mukau mu dima, Elija uíza u mu ta o divunga diê ku thandu. Ilizeu uejidile ihi ilombolola o kima kia bhangele Elija. Ilizeu uexana o makamba mê moso, iu ua di lekela ni tat’ê ni mam’ê, iu ua xi o dibhata diê dioso, phala ku sidivila Elija. (1 Jis. 19:16, 19-21) Mukonda dia Ilizeu ku mesena kiavulu ku bhanga kabasa kima kia kexile ku mu tumina Nzambi, Jihova ua mu tumina ku bhanga ima iavulu, mu kusuka-ku, ua mu bhange polofeta bhu kididi kia Elija.

 Ilizeu ua sidivila Elija mu mivu isamanu. Mu kithangana kieniókio, Ilizeu muéne “ua kexi mu ku lunduluila o menha ku maku’a Elija.” (2 Jis. 3:11) Mu izuu’io o athu akexile mudia ni maku, ka kexile mudia ni jingalafu, jiphoko, mba ima ia mukuá. Kioso kia kexile mu zubha o kudia, o selevende ua kexile mu lunduluila menha ku maku a mesene iê, phala ku sukula o maku. Kiki kilombolola kuila saí ikalakalu ia kexile mu bhanga Ilizeu, ia kexile kala ki ia valolo. Maji muéne ua zolele kiavulu o ujitu ua ku sidivila Elija.

Jikidistá javulu lelu, a bhanga uâ ikalakalu ki idifu mu sidivisu ia thembu ioso. Mukonda dia kixikanu kiâ, ene a bhana o nguzu iâ phala ku bhanga o vondadi ia Jihova. Saí ikalakalu ia bhanga, i bhinga kuila ene a xisa o jinzo jâ phala ku kalakala—mu Betele, mu tunga o ididi ia ubhezelu—saí athu ka bhana valolo mu ikalakalu íii. Se-ku Kidistá ua tokala ku divua kia iibha mu ku bhanga ikalakalu kála íii, mukonda Jihova u bhana valolo iavulu ku ikalakalu íii.—Jihe. 6:10.

Ande dia Nzambi ‘kuambata Elija ku diulu, mu kitembu,’ muéne ua tumikisa o polofeta ia Jidingale ku Betele. Kioso kia kexile mu kuenda Elija ua bhingi kua Ilizeu ku xala, maji Ilizeu ka xikina. (2 Jis. 2:1-6) Kála Lute kia naminine kua Nouemi, Ilizeu ua naminine kua Elija. (Lute 1:8, 16, 17) Mukonda diahi? Mukonda Ilizeu ua bhanene valolo ku kikalakalu kiê kia mu bhanene Nzambi, kia ku sidivila Elija.

Ilizeu ua tu xila phangu iambote. Se tu tambula ujitu ua ku bhanga kikalakalu mu kilunga kia Nzambi, tua-nda ki bhana valolo, se tu xinganeka kuila tua mu ki bhangela Jihova. O ujitu ua ku sidivila Jihova ua beta-kota mu valolo, o ujitu uoso uoso ndenge.—Jisá. 65:4; 84:10.

Kioso o maiala enhá kia kexile mu kuenda njila, Elija ua bhingi kua Ilizeu: “Ngi bhinge kioso ki ua mesena ki ngi ku bhanga.” O kia bhingile Salomá kua Jihova ku mivu ia bhiti, kia difu ué kála kia bhingi Ilizeu. Muéne ua bhingi: “O kizonguelu kia nzumbi ié-eie, momuami ki kale-mu luiadi.” (1 Jis. 3:5, 9; 2 Jis. 2:9) Mu Izalaiele, o mona ua phande kumbi muéne ua tokalele ku lundula mu luiadi. (Mate. 21:15-17) Mu kidi, Ilizeu ua kexile mu bhinga phala ku lundula o ukexilu uoso ua nzumbi ua Elija. Ilizeu ua mesenene ué ku suína kála kiexile Elija, ‘ua dielele kiavulu kua Jihova.’—1 Jis. 19:13, 14.

Kiebhi kia tambuijila Elija? O polofeta uambe: “Eie ua bhingi kima kia bhonzo. O ki kala eie u ngi mona kioso kia ngi katula koku’e eie, o kiki-phe a ku bhanga-kiu, maji se ua lémbua ku ngi mona, ka ká ki bhanga.” (2 Jis. 2:10) O kitambuijilu kia Elija kia lomboluele ima iiadi. Kia dianga, Nzambi muéne ngó ua tokalele kuzuela se Ilizeu ua tokalele muene ku tambula o kima kia bhingile. Kaiiadi, se Ilizeu ua mesenene ku tambula o kima kia bhingile, muene ua tokalele ku kala ni Elija ithangana ioso, né muéne se kua monekene ibhidi.

Kiebhi kia mono Jihova o kima kia bhingi Ilizeu kia lungu ni ku tambula izonguelu iiadi ia nzumbi ia Elija? O musoso u zuela: ‘Anga ki bhita-phe kuila, kioso ene kia muia ni kuenda ni kuzuela, a tukumuka dikalu dia túbhia ni jikabalu ja túbhia, dia a muangununa muthu ni muthu kua mukuá, o Elija anga u banda ku diulu, a mu zungumuina mu kitembu. O Ilizeu kioso kia ki mono, ua dikola.’ * O kizulukutu kiki kia londekesa o kitambuijilu kia bhana Jihova kua Ilizeu. Ilizeu ua mono kioso kia kexile mu kuambata Elija, muéne ua tambula o kizongelu kia kaiiadi kia nzumbi kia Elija, iu ua lundula o kutena kua kexile na-ku Elija.—2 Jis. 2:11-14.

Ilizeu ua bongele o kizuatu kia Elija kia balukile, iu ua ki zuata. O kizuatu kieniókio kia kexile mu londekesa kuila Ilizeu uexile polofeta ia Nzambi. Mu ku bhita kithangana, muéne ua londekesa ué kuila uexile polofeta ia Nzambi, kioso kia bhangele o madiuanu a ku uanuna o menha a Kalunga ka Njolodá.

Ilizeu nange nuka ua jimbile o kizuua kia mbatele Elija ku kitembu. O muthu ka mono dikalu dia ita, mba kabalu ka túbhia izuua ioso! O ima íii ia kexile mu londekesa kuila, Jihova ua kexile mu tambuijila o kima kia bhingile Ilija. Kioso Nzambi kia tambuijila o misambu ietu, etu ki tu mono kisuma kia dikalu dia túbhia dia ita mba jikabalu ja túbhia. Maji tu tena ku  mona kuila Nzambi mu kutena kuê, o vondadi iê a i bhanga. Kioso ki tu mona kuila Jihova ua mu besoala o kilunga kiê mu ixi, mu kidi, kia difu kála tua mu “mona” o dikalu diê dia mu kalakala.—Ize. 10:9-13.

Ilizeu ua monene ima iavulu ia mu kuatekesa ku dielela mu Kutena kua Jihova. Mu kidi, o nzumbi ikôla ia Nzambi, ia kuatekesa o polofeta o ku bhanga 16 a madiuanu—ua beta o kota mu ku bhanga madiuanu, Elija ndenge. * Mu veji ia kaiiadi, kioso Ilizeu kia mono o makalu a túbhia, kiexile kioso kia bhiti o ita mu Dotane, kála ki tua tange ku dimatekenu dia milongi íii.

Né muene Ilizeu ua kexile ni jinguma javulu mu mbanza ia Dotane, maji muéne ua tululukile. Mukonda diahi? Mukonda muéne ua dielele kiavulu kua Jihova. Etu ué tua tokala ku mu dielela kiavulu. Mu kiki, tua tokala ku samba mu ku bhinga o nzumbi ikôla ia Nzambi, phala tu kale ni kixikanu, ni ídifua ia mukua ia nzumbi ikôla.—Luka 11:13; Nga. 5:22, 23.

O kizulukutu kia bhitile mu Mbanza ia Dotane, kia bhangesa Ilizeu ku dielela kua Jihova ni ku masoladi mê. O polofeta ua monene kuila Nzambi ua tumikisine o ji-anju mu mbanza phala ku mu langa ku jinguma jê. Mu ku jima o mesu a jinguma ja Ilizeu, Nzambi ua bhulula Ilizeu ni selevende iê. (2 Jis. 6:17-23) Mu kithangana kieniókio kia bhonzele, kála mu ithangana ia mukuá, Ilizeu ua kexile ni kixikanu, iu ua dielele kua Jihova.

Kála kia bhangele Ilizeu, etu ué tu dielele kua Jihova Nzambi. (Jisa. 3:5, 6) Se tu bhanga kiki, ‘Nzambi ua-nda tu bhulula ni ku tu bhana dibesá.’ (Jisá. 67:1) Tuejiia kuila ka tu kondoloka ku makalu a túbhia mba jikabalu ja túbhia. Maji kioso kia-nda mateka o “kizuua kia hadi ia dikota,” Jihova ua-nda tu fikidila mukonda tu mundu uê. (Mat. 24:21; Dij. 7:9, 14) Kioso ki tua mu kingila o kizu’kio, tua tokala ku lembalala kuila, “Nzambi muene dilengelu dietu.”—Jisá. 62:8.