Eie ku xikina kuila Jezú muéne uexile o mesene ia beta-o-kota iejile mu ixi? Eie u tena ku kaiela o phangu iê, mu ukexilu ua ku longa, kála o ku bhanga ibhuidisu, ni ifika ia kexile mu bhanga. Eie ua mono kiá kuila Jezú, ua kexile mu bhanga ifika mu ithangana ioso, kioso kia kexile mu longa?

Athu avulu ene mu bhanga ifika kioso kia zuela. Nange eie ué uene mu bhanga kiá ifika se ku kijiia. Nange ua zuela kiá kima kála: “Ene ambe kuila o ibundu ioso iabhi, maji íii ia kolo hanji.” Mba u zuela: “Muéne uexile mona ua kexile ni jisonhi kioso kexile mona ndenge, maji lelu o kilumba kiki ka moneka jisonhi.”

Mu ifika kála íii, eie u dianga kuzuela kima; mu kusuka-ku u bhanga o kifika, mu ku tumbula o izuelu kála, maji, kikale, mba, eme-phe, mu kiki. Eie u tena ku bhanga o kifika mu ku bandekesa kizuelu phala ku suínisa dingi o kima ki ua mesena o ku jimbulula n’a kitendela kiambote. Kioso ki u zuela kiki, akuenu a beta-kota o ku ki tendela.

Saí jixi kala ni ukexilu ua ku bhanga ifika, maji etu tua tokala ku bhana valolo ku i fika. Uejiia se mukonda diahi? Mukonda tu sanga ifika iavulu mu Mikanda Ikôla ia Nzambi. Jezú mu ithangana ioso ua kexile mu bhanga ifika. Ua lembalala o ifika íii: “Athu ue kene kuila a uika kandeia, n’a ka fute kitutu. Kikale a ka bhaka ku thandu a meza. “Ki mu fiki kuma eme ngeza mu bhuisa-ku o Kitumu kia Mozé.” ‘Maji ngeza mu ku ki tenesa.’ “Enu muevu kuma a ki zuela, exi: Kana kuta phànda.” “Eme-phe ngi mi ambela kuma: Uoso ngó u tonginina muhatu . . . ” “a ki zuela, exi: Diesu mu diesu; dizu mu dizu.” “Eme-phe ngi mi ambela kuila: O dilebhu kana kubhânga na-diu,” uoso-phe u ku bhana huxi ku ditama dia kúdia, mu lunguluile ni diamukuá.”—Mat. 5:15, 17, 27, 28, 38, 39.

Bibidia muala madivulu a kamúkua mu tu sanga ué ifika. Iene i tena ku kuatekesa kizuelu mba kulondekesa ukexilu ua mukuá ua beta-kota ua ku bhanga kima. Se u tata, xinganeka mu kifika kiki: “Enu uenu mu jitata, kana kuthathamesa an’enu ni ku a kuatesa njinda. Maji mu a sasa ni ku a beta, ni ku a longa kioso kia tumu Ngana.” (Efe. 6:4) O poxolo Phaulu ka zuela ngó ku tata mba ku mama, kuila o tuana mu a sasa ni ku a beta ni ku a longa o kitumu kia Ngana, kiki unjimu ua kidi ué. Maji o kitendelesu kiki ua ki suínisa dingi kioso kia bhange o kifika, ‘kana kuthathamesa an’enu ni ku a kuatesa njinda, maji mu a sasa ni ku a beta, ni ku a longa kioso kia tumu Jihova.’

Mu kibatulu kiki Phaulu ua soneka ué: ‘O kuluá kuetu ki kua ku di lua ni athu mu xitu, maji tu lua ni ifuxi ia jinzumbi ja phulu ku ididi ia diulu.’ (Efe. 6:12) O kifika kiki, ki ku kuatekesa kuijiia kuila uala  ni ita ia bhonzo. Ki ku luá ni athu mu xitu; maji, ku luá ni jinzumbi ja phulu jene ku diulu.

Mu divulu didi dia Efezo, u tena ku sanga-mu ibatulu ia mukuá mua bhange Phaulu o ifika. O ku xinganeka mu ifika ia Phaulu, i tena ku tu kuatekesa ku jimbulula kiambote o kima ki tua mesena o ku bhanga.

Ua-nda uabhela kiavulu o ku di longa o kaxa mu londekesa ifika iavulu, i u sanga mu divulu dia Efezo mu kibatulu 4 ni 5. Mu ku tanga o kifika ki u sanga-mu, xinganeka ku muenhu uê. Di ebhuidise: ‘Mu kidi ukexilu uahi u ngala nau? Ihi i ngeji bhanga se nga kexile ni maka enhá? Ihi ieji zuela akuetu, mu ku mona o kifika, se mbandu iahi ia kifika ia ngi tokala eme?’ Se u mona kuila saí kifika kia ku tokala, bhanga ioso ni lusolo phala ku lungulula o ukexilu ué. Ehela o ifika i ku kuatekese.

Eie u tena ku di longa o milongi íii ku ubhezelu uê ku muiji. Kia dianga oso ku muiji uê a tokala ku tanga o ifika. Mu ku suka-ku eie u tena ku tumbula mbandu ia dianga ia kifika, a mukuá ku muiji uê a tena ua ku jimbulula o ifika iala ku mbandu ia mukuá. Kienhiki, mua-nda tena kuzuela se kiebhi ki mu tena ku kumbidila o milongi ia kifika ku mbandu ia kaiiadi. Mu kidi o ku di longa o ifika i tena ku kuatekesa o minzangala ni adiakimi, ku kala ni ukexilu uambote ua tokala o Jikidistá ku muiji ni ididi ia mukuá.

Se u bhana valolo mu ifika, ki kia-nda ku bhonza ku i sanga mu Bibidia, mukonda iene ia-nda ku kuatekesa kiambote mu ukunji uê. Mu kifika eie u tena kuzuela ku mukuá dibhata: “Athu avulu ene mu zuela kuila, o muthu kiafuá uala ni nzumbi ki ifu, maji xinganeka ngó ihi i zuela o Mak’â Nzambi bhabha. “Mba se ua mu longa dixibulu, nange u tena ku muibhula, saí athu mu sanzala ietu, a zuela kuila Nzambi ni Jezú muthu umoxi ngó; maji ihi i tuejiia i zuela o Bibidia? Kiebhi o kibanzelu kiê?”

Mu kidi, o Bibidia iezala ni ifika i tena ku tu kuatekesa kuenda mu njila ia Nzambi. Etu tu tena ku kuatekesa akuetu kuijiia o kidi kia Bibidia, bhu kaxi ka ifika.