Saí kizuua, kiiadi kia aboki endele mu boka mu inzo ku ixi ia Kenia, ene a diuana mu ku sanga diiala, ua zeka ku hama. Muéne ua kexile ni mukutu uofele ni maku a butu. Ene a mu tangela o kikanenu kia Nzambi kiambe kuila: “Kizuu’okio-phe, inema ia kà tuka-tuka, kala jimbambi,” o diiala uelela ni ku suína.—Iza. 35:6.

O aboki a mono kuila Onesmus, uala kiá ni 30 a mivu ndenge, ua kexile ni uhaxi ua ifuba. O ifuba iê ia zozele—se u bhanga nguzu iavulu o ifuba i toloka. Ki kuala milongo phala o uhaxi iú, mukonda dia kiki, ua kexile mu kingila ku bhita o muenhu uê oso ni jindolo, mu kialu kia inema.

Onesmus, ua xikina ku di longa o Bibidia. O manh’â ka muehele kuia mu iônge, muéne uambe kuila kieji mu bhekela jindolo. O jiphange akexile mu ngalavala o iônge phala ku mu bhekela-iu, anga Onesmus u ívua ku bhata. Mu ku di longa mu mbeji jitanu, Onesmus ua solo kuia mu iônge, sumbala ua kexile mu di ta mu kiluezu.

O kuila o kuia mu iônge kua bhangesa o jindolo ja Onesmus ku dimendala? Kana: Onesmus uambe: “O jindolo jami ji nga kexile mu kuívua ja kexile mu bhita mu ithangana ia iônge.” Mukonda o kidielelu kiê mu ixi iobhe, kia mu bhangesa ku divua kiambote. O manh’â, ua mono kuila o mon’ê ua kexile mu sanguluka kiavulu, kiki kia mu bhangesa ku xikana ku di longa ué o Bibidia. Muéne uambe: “O ku sidivila Nzambi iene o Milongo ia mona’mi.”

Mu ku bhita thembu, Onesmus ua kituka muboki kiluua a mu batizala. Kua bhiti dingi kithangana, Onesmus a mu batizala, iu ua kituka múkuatekexi ua tufunga. Sumbala muéne ka tena kuenda, iu uala ngó ni lukuaku lumoxi, Onesmus ua mesenene ku bhanga ioso ia tenene mu sidivisu ia Jihova. Muéne ua mesenene ku kala muboki ua ithangana ni ithangana, maji ua kexile ni hele. Mukonda diahi? Mukonda ueji bhindamena muthu u mu kuatekesa ku xinjika o kialu kiê kia unema. Kioso kia tangela o jiphange o vondadi iê, o jiphange ja mu kuatekesa. Ni kikuatekesu kiâ, Onesmus ua kituka muboki ua ithangana ni ithangana.

Onesmus ua mesenene ué ku kala muboki ua thembu ioso. Muéne ua sange pondo kioso kia tange o kibatulu kia kizuua, kia mu suínisa kiavulu. O divulu dia Jisálamu 34:8, dizuela: “Lolenu, mu mone kuma Jihova uene ni mbote.” Kioso kia zubha ku xinganeka mu kibatulu kiki, muéne ua mono kuila ua tokalele ku kala muboki ua thembu ioso. Lelu, muéne u boka izuua iuana ku semana, iu ua mu longa maxibulu avulu, a mu kula ué mu nzumbi. Ku muvu ua 2010, muéne ua bhiti mu Xikola ia Aboki a Thembu ioso. Onesmus ua sangulukile kiavulu, mukonda o phange ua kexile o mulongexi uê mu xikola íii, uexile o phange ua diangele o ku mu bokela o njimbu!

Sumbala o jitata ja Onesmus jafú kiá, o jiphange mu kilunga ene mu dikila o ibhindamu iê. Muéne uene mu sakidila kiavulu Jihova mukonda dia mabesá ene ku mu bhana, muéne ua kingila o kithangana, ‘ki bhua ka kala dingi muthu uamba nga kate.’—Iza. 33:24.