1. Ihi i tena ku tu bhangesa ku kamba o muanhu?

KIOSO kia mateka o Utuminu ua Mexiia ku diulu ku muvu ua 1914, o mundu ua Satanaji ua bokona mu izuua iê isukidila-ku. Mu ku luua ni Diabhu ni madimonho mê, Jezú ua a lundumuna mu ixi. (Tanga Dijingunuinu 12:7-9.) Satanaji uejiia kuila, “o thembu iê ia butu kia.” (Dij. 12:12) Maji saí athu mudietu a mu banza kuila, ‘o thembu ia butu,’ ia mu nangenena kiavulu. O kuila o muanhu uetu ua mu bhua kioso ki tua mu kingila kuila Jihova uíza mu buika o mundu ua Satanaji?

2. Maka ahi u tua-nda di longa mu milongi íii?

² O ku kamba o muanhu ku tena ku tu ta mu iluezu. Kiebhi ki tu londekesa o ukexilu ua ku kingila kua Nzambi? O milongi íii ia-nda tu kuatekesa kuijiia o itambuijilu ia ibhuidisu íii. (1) Ihi i tu tena ku di longa mu phangu ia Mikeia? (2) Izulukutu iahi ilondekesa o dizubhilu di tua kingila? (3) Kiebhi ki tu tena kulondekesa kisakidilu ku muanhu ua Jihova?

3. Mu izuua ia Mikeia, o maka mu izalaiele a a sokesele ni ihi?

³Tanga Mikeia 7:2-6. O polofeta ia Jihova Mikeia, ua mono akua Izalaiele ku texi o kixikanu kiá, kioso kia kexile mu tumina o Sobha ia iibha Aza. Mikeia ua sokesa akua Izalaiele a kambele o kixikanu ni iangu iala ni minha, mukonda akexile mu talatala akuâ kia iibha, ni ku a talesa hadi. O ibhidi ia vudile, katé muéne o jindandu ki ji kexile dingi ku di bhana kiambote. Mikeia uejidile kuila, muéne keji tena ku batula o maka, mu kiki, muéne ua sambe kua Jihova ni muxima uoso. Muéne-phe ua kingila Nzambi kuíza mu batula o maka. Mikeia uejidile kuila Jihova  bhu thembu Iê ueji kuíza mu batula o maka.

4. Maka ahi u tua mu bhita nau?

⁴ Kála mu izuua ia Mikeia, etu tua tungu ni athu akua luimbi, avulu ‘a kambe kisakidilu, ka moneka henda ia muthu.’ (2 Tim. 3:2, 3) Tu tena ku thandanganha kiavulu kioso o ji koleka jetu ja xikola, ku salu mba jivizinhu jetu, a londekesa o luímbi. Saí jiselevende ja Nzambi bhu kaxi ketu, ene mu di bhana ni ibhidi. Jezú uambe ku akaied’iê kuila, eji ku a zukutisa ku muiji, muéne ua tumbula o izuelu i tu sanga mu divulu dia Mikeia 7:6, mu kulondekesa kiebhi kieji divua o athu mu kuívua o njimbu iê. Jezú uambe: “Mbata eme ngeza mu ku bhangesa kuila diiala di di kuata ni tatâ, o mona muhatu u di kuata ni mam’â, mukaji-a-mona u di kuata ni ukou’ê. Kienhiki muthu, akua dibhata diê, ene a mu kala jinguma jê.” (Mat. 10:35, 36) Ki tena ku bhonza kiavulu kioso o jindandu jetu ka mu bheza Jihova, a kituka jinguma jetu! Se tua mu di bhana ni maka enhá, ki tu tokala ku bhuila. Tua tokala ku kingila kuila, Jihova uíza mu batula o maka u tua mu bhita nau. Se tu mu bhinga kikuatekesu, muéne ua-nda tu bhana o nguzu i tua bhindamena phala ku kolokota ku mu kala fiiele.

5, 6. Kiebhi Jihova kia besoala Mikeia? Ihi ia kambe kumona Mikeia?

⁵ Jihova ua bhana dibesá kua Mikeia mukonda dia muanhu uê. Mikeia ua mono o kibuikilu kia Sobha Aza ni utuminu uê ua ibhile. Muéne ua mono ué o mon’â Aza, Sobha Ezekiia, ku bhingana ku utuminu, ni ku kuatekesa akua Izalaiele ku bhanga dingi o ubhezelu ua kidi. O njimbu ia Jihova bhu kaxi ka Mikeia, ia ku fundisa o mbanza ia Samádia, ia di kumbidila kioso akua Asídia a buika o utuminu ua thunda ua Izalaiele.—Mik. 1:6.

⁶ Maji Mikeia ka mono dingi o ikanenu ioso ia mu tumine Jihova ku soneka, mukonda muéne uafú. Mu kifika, Mikeia ua soneka: “Mu izuua-phe ia kà sukidila-ku . . . o mulundu ua inzu ia Jihova a kà u tula bhu zoko-zoko bhua suku o milundu ioso, o tumilundu tuoso ua kà tu somboka, tu xala muene bhoxi, o ifuxi ioso anga ia kà bhongolokela kuene’oko. Kua k’àia muene miji iavulu, exi: ‘Izenu, tu bandienu ku mulundu ua Jihova.’” (Mik. 4:1, 2) Mikeia uafú ande dia kikanenu kiki ku zubha ku dikumbidila. Muéne ua soneka: “Ifuxi ioso a mu kuendela, muthu mu dijina dia nzambi iê, muthu mu dijina dia nzambi iê; etu-phe tua k’èndela mu dijina dia Jihova Nzambi ietu, ku izuua ni izuua ki iene ni dizubhilu.” (Mik. 4:5) Mikeia ua tena ku kingila ni muanhu uoso mu kithangana kia ibhidi, mukonda muéne ua dielele kuila, Jihova ueji kumbidila o ikanenu Iê ioso. O polofeta ia fiiele ua dielele kua Jihova.

7, 8. (a) Ihi i tu bhagesa ku dielela kua Jihova? (b) Ihi ia-nda bhangesa kuila o thembu i bhita ni lusolo?

⁷ O kuila tua dielela kua Jihova kála Mikeia? Tua tokala ku dielela. Tua mu mona o kikanenu kia soneka Mikeia ku di kumbidila. “Mu izuua-phe ia kà sukidila-ku,” o athu a ifuxi ioso, mu madiembu moso, ni madimi moso, a mu kuíza, “ku mulundu ua inzu ia Jihova.” Sumbala ene a tundu mu ifuxi iene mu bhânga, maji ene ‘o ji xibhata jâ a ji sula kiá matemu,’ ene a di tunu ‘ku luua ita.’ (Mik. 4:3) Ujitu ua di kota ku kala bhu kaxi ka mundu ua tululuka ua Jihova!

⁸ Etu enioso tua mesena kuila Jihova u bheka kiá o dizubhilu dia mundu iú. Maji se tua mesena ku kala ni muanhu, tua tokala ku banza kála Jihova. Muéne ua solo kizuua, kia-nda fundisa o athu bhu kaxi ka “muthu uê ua mu tungula,” Jezú Kristu. (Ika. 17:31) Maji ande dia  ku bhixila o kizuu’okio, Nzambi ua mu bhana ku athu a ukexilu uoso, o ujitu ua “kuijiia o kidi,” ni ku belesela ia mu di longa, phala ku bhuluka. (Tanga 1 Timote 2:3, 4.) Se tu di bhakula mu ku kuatekesa akuetu kuijiia Nzambi, o thembu ia kambe phala Jihova ku bheka o dizubhilu, ia-nda bhita ni lusolo. Kienhiki—sé ku kingila—o kithangana kia-nda bhixila. Kisangusangu kia dikota se o dizubhilu di tu sanga tua di bhakula mu sidivisu ia kuboka o Utuminu!

9-11. O kuila o kikanenu mu divulu dia 1 Tesalonika 5:3 kia dikumbidila kiá? Jimbulula.

⁹Tanga 1 Tesalonika 5:1-3. Kua kambe ngó, o ifuxi ia-nda zuela “Kuma kua batama, kua tululuka.” Se ki tu mesena ku tu kuata ku ngolokela íii, tua tokala tu kala ‘ku mesu a zele.’ (1 Tesalonika 5:6) Phala ku tu kuatekesa ku kala ku mesu azele, tu di longe izulukutu ia-nda tu kuatekesa ku kala polondo, kioso kia-nda bhanga o ngolokela íii.

¹⁰ Kioso kia bhitile o ita ia dianga ni ia kaiadi ia bhitile ku mundu uoso, o ifuxi ia dikola kuila, kua batama, kua tululuka. Kioso kia bhitile o ita ia dianga, o Liga das Nações ia tukuluka, mukonda a dielele kuila iene ieji bheka o kutululuka. Kioso kia bhitile o ita ia kaiadi ku mundu uoso, o athu a dielela kuila o kisangela kia Nações Unidas, kiene kieji bheka o ku tululuka mu ixi ioso. O jinguvulu ni atuameni a jingeleja, a dielela ku isangela iiadi íii. Mu kifika, ku muvu ua 1986, o kisangela kia Nações Unidas kia bhange ngolokela kuila, o muvu iú uene o Muvu ua Kutululuka. Ku muvu uenhó, ifuxi iavulu, ni ia jingeleja javulu ja diongekele kumoxi ni atuameni a Ngeleja ia Katolika mu mbanza ia Assisi, ku ixi ia Itália, phala ku samba phala ku kale o kutululuka.

¹¹ Né o ngolokela ia ku batama mba ku tululuka, mba ia mukuá, ia kumbidila o kikanenu mu divulu dia 1 Tesalonika 5:3. Mukonda diahi? Mukonda o kikanenu kia kuila “a kà tukumuka kibuika kiâ kia tula,” ki ki bhiti luua.

12. Ihi i tuejiia ia lungu ni ngolokela ia ku ‘Batama, mba ku tululuka?’

 ¹² Nanhi ua-nda bhanga o ngolokela, “kuma kua batama, kua tululuka?” Ihi ia-nda bhanga o atuameni a Kidistandade ni jingeleja ja mukuá? Kiebhi o jinguvulu ja jixi javulu, kia-nda di ta mu ngolokela íii? O Bibidia ki i tu tangela. Tuejiia ngó kuila, né muene se o athu a xikina mu ngolokela íii, ki kua-nda kala ku ‘batama, mba kutululuka’ kua kidi. Mukonda Satanaji muéne ua-nda tumina hanji o mundu iú. O mundu iú ua kate, ki ua-nda kuiluka dingi. Kima kia iibha se tu xikina mu ngolokela ia Satanaji, mu veji dia ku kolokota mu ufiiele uetu!

13. Mukonda diahi o ji-anju ja kuata o kitembu kia kibuika?

¹³Tanga Dijingunuinu 7:1-4. Kioso ki tua mu kingila o kikanenu kia divulu dia 1 Tesalonika 5:3 ku di kumbidila, o ji-anju ja Nzambi, ja kuata o kitembu kia kizuua kia hadi ia dikota. Mukonda diahi o ji-anju ja mu kingila? O kizulukutu kia tange poxolo Nzuá—katé kia zubha ku ta idimbu bhu mabhômo a “jiselevende ja Nzambi ietu.” * Kioso kia-nda zubha ku a ta idimbu bhu mabhômo, o ji-anju ja-nda kueha o kitembu kia kibuika. Ihi ia-nda bhita-phe?

14. Ihi ilondekesa kuila o Babilonha ia Dikota, ia zukama ku i buika?

¹⁴ O Babilonha ia Dikota, a-nda i bbuika kala kia tokala. “O miji ia athu, ni mundu, ni ifuxi, ni madimi,” ka-nda tena ku mu kuatekesa. Tua mu mona kiá ijimbuete ilondekesa kuila o dizubhilu diê dia zukama. (Dij. 16:12; 17:15-18; 18:7, 8, 21) O ku kamba kikuatekesu, tua mu ki mona kiá mu jingolokela ja bhanga mu mitelembe, ni kioso kia tatela o jingeleja ni atuameni a jingeleja. Maji né kiki, o atuameni a Babilonha ia Dikota a mu fika kuila kala mu iluezu. Maji ene a di nganala! Mu ku kaiela o ngolokela kuila, “kua batama kua tululuka,” o jinguvulu ja mundu ua Satanaji, sé ku laleka, a-nda bhilukila o jingeleja ja makutu ni ku ji buika. O Babilonha ia Dikota nuka dingi a-nda i mona! Sé phata, tua-nda sanguluka kiavulu se tu kingila ku mona o kizulukutu kiki.—Dij. 18:8, 10.

15. Mukonda diahi Jihova ua mu kingila ni muanhu uoso?

¹⁵ Sumbala athu avulu kene mu ximana o dijina diê, Jihova ua kingila ni muanhu, o kithangana kia kuíza mu fundisa o mundu iú. Jihova ka-ndala ku buika o athu aiuka. (2 Phe. 3:9, 10) O kuila kiene ué ki tua-ndala? Ande dia Jihova kuíza mu buika o mundu iú, saí ima i tua tokala ku bhanga ilondekesa kuila tua sakidila o muanhu uê.

16, 17. (a) Mukonda diahi tua tokala ku kuatekesa ió a zoza mu nzumbi? (b) Mukonda diahi o athu a zoza mu nzumbi, a tokala ku vutuka kua Jihova ni lusolo?

¹⁶Kuatekesa ió a bhuila mu nzumbi. Jezú uambe kuila, ku diulu a sanguluka kiavulu, kioso ki moneka o mbudi ia texikile. (Mat. 18:14; Luka 15:3-7) Jihova u thandanganha ni jiselevende jê a zolo o dijina diê, né muene ió a zoza mu nzumbi mu izuua íii. Kioso ki tu kuatekesa muthu ku vutuka mu kilunga, Jihova ni ji-anju a sanguluka kiavulu.

¹⁷ O kuila eie uala bhu kaxi ka ió a mu suína mu sidivisu ia Nzambi? Nange eie ua bhuila mu nzumbi mukonda muthu mu kilunga ua ku zuela kiaiibha, eie ua xisa o kilunga kia Jihova. Se kua bhiti kiá kithangana, ua tokala ku di ibhuidisa: ‘O kuila lelu o muenhu uami ua beta-kota mu valolo, nga beta-kota ku sanguluka? O kuila Jihova muéne ua ngi zuela kia  iibha, anga o muthu mukuá ituxi? O kuila saí kizuua Jihova Nzambi ua ngi bhangele kiá kima kia iibha?’ Jihova nuka ua tu bhangele kima kia iibha. Né muéne se ki tua mu kumbidila o kikanenu ki tua mu bhangele kia ku mu sidivila, muéne ka tu katula o ima iambote ia tu bhana. (Tiia. 1:16, 17) Maji o kizuua kia Jihova kia-nda kuíza. Kiki kiene o kithangana kia ku vutuka kua Tata ietu ia henda Jihova, ni mu kilunga kiê—kiene ngó o kididi mu tua tokala o ku kala mu izuua íii i sukidila-ku.—Mate. 33:27; Jihe. 10:24, 25.

18. Mukonda diahi tua tokala ku kuatekesa o jiphange jala ku pholo mu kilunga?

¹⁸O athu a kidi a kuatekesa oso ala ku pholo mu kilunga. Kála o kafunga ka henda, Jihova u tu langa, u tu dikila. Muéne ua solo Mon’ê, o Kafunga ka beta-o-kota ka jimbudi ja kilunga. (1 Phe. 5:4) O tufunga mu 100.000 ia ilunga ia Jihova, a sota ithangana phala ku tambula konda ia mbudi ni mbudi ia Nzambi. (Ika. 20:28) Etu tu kuatekesa o jiphange ala ku pholo mu kilunga, mu kulondekesa kisakidilu kua Jihova ni kua Jezú, mu ioso iene mu tu bhangela.

19. Mukonda diahi tua tokala ku kala kumoxi ni jiphange?

¹⁹Di bhanenu kiambote ni akuenu. Kiki kilombolola ihi? Se o kifuxi kia masoladi kia mu bhânga ni nguma, ene ka xisa njila, kiki kilombolola kuila ene a di zukama dingi. Kienhiki, o nguma ki i tena ku bokona phala ku a kuata. Satanaji ua mu bhanga ioso phala ku buika o mundu ua Nzambi. Kiki ki kithangana kia ku bhânga ni jiphange jetu. Maji kithangana kia ku di zukama ku jiphange jetu mu nzumbi, ni ku loloka o ituxi iâ, ni ku dielela kua Jihova.

20. Ihi i tua tokala o ku bhanga lelu?

²⁰ Etu enioso tu tena ku di langa mu nzumbi ni kulondekesa o ukexilu ua ku kingila. Tu kingile ni muanhu uoso o ngolokela ia kuila, “kua batama, kua tululuka!” ni kithangana kia-nda ta o kidimbu kia suku kua ió a a solo. Mu ku suka-ku o ji-anju jiuana a-nda kueha o kitembu kia kibuikilu, o Babilonha ia Dikota-phe, a-nda i buika. Kioso ki tua mu kingila o izulukutu íii, tua tokala ku xikina o itendelesu ia jiphange ala ku pholo mu kilunga kia Jihova. Zukama ku jiphange, mu ku bhânga ni Diabhu ni madimonho mê! Lelu kiene o kithangana kia ku belesela o kitendelesu kia musoneki ua Jisálamu uambe: “Kolenu maku, mixima ienu i kale ni nguzu iobhe, enu oso mua dielela kua Jihova.”—Jisá. 31:24.