O kuila ua tange O Mulangidi ua muvu uoso? O kuila u tena ku tambuijila o ibhuidisu íii:

Kiebhi ni kithangana kuxi kia bokela Jezú, o ‘ji-anju jene mua vundu?’ (1 Phe. 3:19)

Nange, kioso kia mu fukununa, Jezú ua bhana ngolokela ku ji-anju ja iibha, ia lungu ni kaxtiku keji tambula.—15/6, mbandu 23.

Kiebhi o muthu ua kazala mu veji ia kaiiadi, kia tena ku zediua dingi?

Ndunge: di suínise ku bhanga ioso phala o ukaza ua dianga ki u ku fidise o ku zediua mu ukaza ua kaiiadi; di suínise ku dibhana ni makamba okulu, kejiia kiambote kaza diê dia kaiiadi; dielela kua kaza diê dia kaiiadi né muene se kaza diê dia dianga, kexile fiiele mu ukaza.—1/7, jimbandu 9-10.

Thembu kuxi kia-nda mateka Jezú ku fundisa o jimbudi ni jihombo? (Mat. 25:32)

Kiki kia-nda bhita kioso kia-nda fundisa Jezú o athu a ifuxi, mu kithangana kia hadi ia dikota, ni kioso kia-nda zubha ku buika o jingeleja ja makutu.—15/7, mbandu 6.

Kizuua kuxi o athu a bhengalala a a tange mu kifika kia jimbutu jambote ni jimbundu ja iangu, kia-nda dila ni ku di kokota ku mazu? (Mat. 13:36, 41, 42)

Ene an-nda bhanga kiki mu kizuua kia hadi ia dikota, kioso kia-nda mona kuila ka-nda tena ku bhuluka ku dizubhilu.—15/7, mbandu 13.

O izuelu ia Jezú, ia lungu ni kimbadi kia fiiele, ia di kumbidila thembu kuxi? (Mat. 24:45-47)

O izuelu íii, ki i mateka ku di kumbidila ku muvu 33 K.K., maji ia mateka ku di kumbidila ngó ku muvu ua 1914. Ku muvu ua 1919, Jezú ua solo o kimbadi phala ku tambula konda ia dibhata diê, o Jikidistá joso ene mu tambula o kúdia.—15/7, jimbandu 21-23.

Kizuua kuxi kia-nda tumina Kristu o kimbadi kia fiiele ku tambula konda ia ima ioso iala na-iu?

Kiki kia-nda bhita mu kithangana kia hadi ia dikota, kioso kia-nda tambula o kimbadi kia fiiele, o kifutu kiâ ku diulu, kia ku tumina ni Kristu.—15/7, mbandu 25.

O kuila tua tokala kuzuela kuila, o athu ka a tumbula o majina mâ mu Bibidia, exile athu a iibha mba ka kexile ni valolo?

Kana. Saí athu a bhange o vondadi ia Jihova m’ukulu, ni athu akexile ni ukexilu ua iibha, ka a tumbula o majina mâ mu Bibidia. (Lute 4:1-3; Mat. 26:18) Tuejiia ngó anju jiiadi, a a tumbula o majina mâ mu Bibidia.—1/8, mbandu 10.

Kumoxi ni nguzu i lenda ioso i tunda kua Nzambi, ihi dingi ia kuatekesa o 230 a Jimbangi ku subhuka mu kuenda o njila ia lebha ia kibende kia Sachsenhausen?

Sumbala a zozele mukonda dia nzala ni uhaxi, ene a di suínisa mudiâ phala ku kolokota.—15/8, mbandu 18.

Mukonda diahi o musoso ia akua Izalaiele ia lungu ni ku zauka o Ngiji ia Njolodá, phala ku bokona mu Ixi ia Kanana i tu suínisa?

Sumbala o ngiji, iezalele mukonda dia nvula, Jihova ua bhangesa o menha kuimana phala o mundu uê ku zauka. Kiki kia suínisa o kidielelu kiâ kua Jihova, o musoso iú u tena ué ku suínisa o kidielelu kietu.—15/9, mbandu 16.

O ukexilu ua Bibidia ua ku tumbula o jikolo, ulondekesa ihi?

O ukexilu ua Bibidia ua ku tumbula o jikolo, ulondekesa kuila Nzambi uejiia kuila o jikolo ji tula ku mixima ia athu, ni kuila o jikolo ji tu kuatekesa ku lembalala o ima.—1/10, mbandu 14-15.

Kiebhi o kikanenu mu divulu dia Mikeia 5:5 kia lungu ni abhidi, ni ilamba kia mu dikumbidila lelu?

Tua mono kuila, o ‘sambuadi dia abhidi, ni dinake dia ilamba,’ a a tange mu divulu dia Mikeia 5:5, o tufunga tua fiiele mu ilunga, a mu suínisa o mundu ua Nzambi, phala ku kala polondo, kioso kia-nda ku a takala ku hádia.—15/11, mbandu 20.

Ima iahi i tu bhangesa ku bhindamena o kikuatekesu kia Nzambi?

Tua bhingi muthu u tuendesa kiambote, tua bhingi ué kikuatekesu phala ku dibhana ni maka ku muenhu, Nzambi u tu bhana o ima iiadi íii. Nzambi ua mesena kuila o athu a kala kiambote ku muenhu ni ku zediua, muéne ua-nda kumbidila o ikanenu ia Bibidia, phala tu kale kiambote.—1/12, jimbandu 4-6.